ਆਸਿਫਾ ਦੇ ਖਿਲਾਫ਼ ਨਾਮਜ਼ਦਗੀ ਪੱਤਰ ਦਾਖਲ ਕਰਨ ਵਾਲੇ ਤਿੰਨ ਉਮੀਦਵਾਰ ਅਬਦੁਲ ਰਸੂਲ ਬਰੋਹੀ, ਅਮਾਨੁੱਲਾ ਅਤੇ ਮੇਰਾਜ ਅਹਿਮਦ ਸਨ।
Asif Ali Zardari: ਲਾਹੌਰ - ਰਾਸ਼ਟਰਪਤੀ ਆਸਿਫ ਅਲੀ ਜ਼ਰਦਾਰੀ ਅਤੇ ਮਰਹੂਮ ਸਾਬਕਾ ਪ੍ਰਧਾਨ ਮੰਤਰੀ ਬੇਨਜ਼ੀਰ ਭੁੱਟੋ ਦੀ ਸਭ ਤੋਂ ਛੋਟੀ ਧੀ ਦੇ ਨੈਸ਼ਨਲ ਅਸੈਂਬਲੀ ਲਈ ਚੁਣੇ ਜਾਣ ਤੋਂ ਬਾਅਦ ਜ਼ਰਦਾਰੀ ਨੇ ਪਾਕਿਸਤਾਨੀ ਰਾਜਨੀਤੀ 'ਚ ਇਕ ਪਰਿਵਾਰ ਤੋਂ ਸਭ ਤੋਂ ਵੱਧ ਵਿਧਾਇਕਾਂ/ਸੰਸਦ ਮੈਂਬਰਾਂ ਦੀ ਗਿਣਤੀ ਬਣਨ ਦਾ ਰਿਕਾਰਡ ਬਣਾ ਕੇ 'ਸ਼ਰੀਫ ਪਰਿਵਾਰ' ਨੂੰ ਪਿੱਛੇ ਛੱਡ ਦਿੱਤਾ ਹੈ।
ਆਸਿਫ਼ਾ ਨੇ ਅਗਲੇ ਮਹੀਨੇ ਹੋਣ ਵਾਲੀਆਂ ਜ਼ਿਮਨੀ ਚੋਣਾਂ ਲਈ ਸਿੰਧ ਸੂਬੇ ਦੇ ਸ਼ਹੀਦ ਬੇਨਜ਼ੀਰਾਬਾਦ (ਪਹਿਲਾਂ ਨਵਾਬਸ਼ਾਹ) ਹਲਕੇ ਤੋਂ ਸੰਸਦੀ ਚੋਣਾਂ ਲਈ ਨਾਮਜ਼ਦਗੀ ਪੱਤਰ ਦਾਖਲ ਕੀਤਾ ਸੀ। ਹਲਕੇ ਦੇ ਰਿਟਰਨਿੰਗ ਅਫ਼ਸਰ ਦੇ ਦਫ਼ਤਰ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਆਸਿਫਾ ਦੇ ਖਿਲਾਫ਼ ਤਿੰਨ ਉਮੀਦਵਾਰਾਂ ਨੇ ਨਾਮਜ਼ਦਗੀ ਪੱਤਰ ਦਾਖ਼ਲ ਕੀਤੇ ਸਨ ਪਰ ਬਾਅਦ 'ਚ ਤਿੰਨਾਂ ਨੇ ਆਪਣੀ ਉਮੀਦਵਾਰੀ ਵਾਪਸ ਲੈ ਲਈ, ਜਿਸ ਤੋਂ ਬਾਅਦ ਆਸਿਫ਼ਾ ਨੂੰ ਬਿਨਾਂ ਮੁਕਾਬਲਾ ਚੁਣ ਲਿਆ ਗਿਆ। ਆਸਿਫਾ ਦੇ ਖਿਲਾਫ਼ ਨਾਮਜ਼ਦਗੀ ਪੱਤਰ ਦਾਖਲ ਕਰਨ ਵਾਲੇ ਤਿੰਨ ਉਮੀਦਵਾਰ ਅਬਦੁਲ ਰਸੂਲ ਬਰੋਹੀ, ਅਮਾਨੁੱਲਾ ਅਤੇ ਮੇਰਾਜ ਅਹਿਮਦ ਸਨ।
ਇਹ ਸੀਟ ਉਨ੍ਹਾਂ ਦੇ ਪਿਤਾ ਆਸਿਫ ਅਲੀ ਜ਼ਰਦਾਰੀ ਦੇ ਰਾਸ਼ਟਰਪਤੀ ਚੁਣੇ ਜਾਣ ਤੋਂ ਬਾਅਦ ਖਾਲੀ ਹੋਈ ਸੀ। ਆਸਿਫ਼ਾ ਦੀ ਜਿੱਤ ਨਾਲ ਜ਼ਰਦਾਰੀ ਪਰਿਵਾਰ ਦੇ ਹੁਣ ਰਾਸ਼ਟਰੀ ਅਤੇ ਸੂਬਾਈ ਪੱਧਰ 'ਤੇ ਛੇ ਸੰਸਦ ਮੈਂਬਰ ਹੋ ਗਏ ਹਨ, ਜਿਸ ਨੇ ਸ਼ਰੀਫ ਪਰਿਵਾਰ ਦੇ ਸਭ ਤੋਂ ਵੱਧ ਵਿਧਾਇਕਾਂ/ਸੰਸਦ ਮੈਂਬਰਾਂ ਦਾ ਰਿਕਾਰਡ ਤੋੜ ਦਿੱਤਾ ਹੈ ਕਿਉਂਕਿ ਦੇਸ਼ ਦੇ ਸੰਸਦੀ ਇਤਿਹਾਸ ਵਿਚ ਹੁਣ ਇਸ ਪਰਿਵਾਰ ਦੇ ਮੈਂਬਰਾਂ ਦੀ ਗਿਣਤੀ ਸਭ ਤੋਂ ਵੱਧ ਹੈ।
ਉਨ੍ਹਾਂ ਦੀ ਬੇਟੀ ਆਸਿਫਾ, ਬੇਟਾ ਬਿਲਾਵਲ ਭੁੱਟੋ ਜ਼ਰਦਾਰੀ ਅਤੇ ਜੀਜਾ ਮੁਨੱਵਰ ਅਲੀ ਤਾਲਪੁਰ ਨੈਸ਼ਨਲ ਅਸੈਂਬਲੀ ਦੇ ਮੈਂਬਰ ਹਨ ਜਦਕਿ ਭੈਣਾਂ ਫਰਿਆਲ ਤਾਲਪੁਰ ਅਤੇ ਅਜ਼ਰਾ ਪੇਚੁਹੋ ਸਿੰਧ ਵਿਚ ਸੂਬਾਈ ਅਸੈਂਬਲੀ ਦੇ ਮੈਂਬਰ ਹਨ। ਦੂਜੇ ਪਾਸੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ ਦੇ ਵੱਡੇ ਭਰਾ ਨਵਾਜ਼ ਸ਼ਰੀਫ ਅਤੇ ਉਨ੍ਹਾਂ ਦੇ ਬੇਟੇ ਹਮਜ਼ਾ ਸ਼ਾਹਬਾਜ਼ ਸ਼ਰੀਫ ਨੈਸ਼ਨਲ ਅਸੈਂਬਲੀ ਲਈ ਚੁਣੇ ਗਏ ਹਨ
ਜਦਕਿ ਉਨ੍ਹਾਂ ਦੀ ਭਤੀਜੀ ਮਰੀਅਮ ਨਵਾਜ਼ ਸ਼ਰੀਫ ਪੰਜਾਬ ਦੀ ਮੁੱਖ ਮੰਤਰੀ ਹਨ। 31 ਸਾਲਾ ਅਸੀਫਾ ਕੋਲ ਰਾਜਨੀਤੀ ਅਤੇ ਸਮਾਜ ਸ਼ਾਸਤਰ ਵਿੱਚ ਬੈਚਲਰ ਦੀ ਡਿਗਰੀ ਅਤੇ ਗਲੋਬਲ ਹੈਲਥ ਐਂਡ ਡਿਵੈਲਪਮੈਂਟ ਵਿੱਚ ਮਾਸਟਰ ਦੀ ਡਿਗਰੀ ਹੈ। ਉਸਨੇ ਸ਼ੁਰੂ ਵਿੱਚ 2012 ਵਿਚ ਪੋਲੀਓ ਦੇ ਖਾਤਮੇ ਦੀ ਮੁਹਿੰਮ ਲਈ ਸਦਭਾਵਨਾ ਰਾਜਦੂਤ ਵਜੋਂ ਕੰਮ ਕੀਤਾ, ਜਿਸ ਨਾਲ ਉਸਦਾ ਚਿਹਰਾ ਜਨਤਾ ਨੂੰ ਜਾਣੂ ਹੋ ਗਿਆ।
