ਕੰਗਨਾ ਰਣੌਤ, ਸੁਸ਼ਾਂਤ ਰਾਜਪੂਤ ਤੇ ਰੀਆ ਚੱਕਰਵਰਤੀ ਵਾਂਗ ਇਕ ਆਮ ਸਾਧਾਰਣ ਪ੍ਰਵਾਰ ਤੋਂ ਉਠ ਕੇ ਆਈ ਲੜਕੀ ਸੀ ਜਿਸ ਦਾ ਫ਼ਿਲਮ ਜਗਤ ਵਿਚ ਕੋਈ ਵਲੀ-ਵਾਰਸ ਨਹੀਂ ਸੀ। ਪੰਜਾਬ 'ਵਰਸਿਟੀ ਤੋਂ ਅਪਣਾ ਕੰਮ ਸ਼ੁਰੂ ਕਰਨ ਵਾਲੀ ਕੰਗਨਾ ਦਾ ਅੱਜ ਤਕ ਦਾ ਸਫ਼ਰ ਔਕੜਾਂ ਤੋਂ ਖ਼ਾਲੀ ਨਹੀਂ ਰਿਹਾ।
Sushant Singh Rajput
ਅੰਦਰ ਦੀ ਕਸ਼ਮਕਸ਼ ਦੀ ਗਹਿਰਾਈ ਤਾਂ ਉਹ ਆਪ ਹੀ ਜਾਣ ਸਕਦੀ ਹੈ ਪਰ ਜਾਪਦਾ ਤਾਂ ਇਹੀ ਹੈ ਕਿ ਕੰਗਨਾ ਰਣੌਤ ਨੇ ਫ਼ਿਲਮੀ ਸਿਤਾਰਾ ਬਣਨ ਵਾਸਤੇ ਉਹੀ ਰਸਤੇ ਅਪਣਾਏ ਜੋ ਹਰ ਚਾਹਵਾਨ ਅਪਣਾਉਂਦਾ ਹੈ। ਕੰਗਨਾ ਬਾਰੇ ਗਲੀਆਂ ਬਾਜ਼ਾਰਾਂ ਵਿਚ ਜੋ ਕੁੱਝ ਕਿਹਾ ਗਿਆ, ਉਸ ਬਾਰੇ ਕੋਈ ਟਿਪਣੀ ਨਾ ਕਰਦੇ ਹੋਏ, ਇਹ ਜ਼ਰੂਰ ਆਖਿਆ ਜਾ ਸਕਦਾ ਹੈ ਕਿ ਕੰਗਨਾ ਵੀ ਫ਼ਿਲਮੀ ਦੁਨੀਆਂ ਦੇ ਰੰਗ ਵਿਚ ਰੰਗੀ ਗਈ।
Kangana Ranaut
ਰਿਤਿਕ ਰੌਸ਼ਨ ਜੋ ਕਿ ਵਿਆਹੇ ਹੋਏ ਸਨ, ਨਾਲ ਰਿਸ਼ਤਾ ਜੋੜਿਆ ਪਰ ਬਾਅਦ ਵਿਚ ਦੋਹਾਂ ਨੇ ਇਕ ਦੂਜੇ ਉਪਰ ਕਈ ਗੰਭੀਰ ਦੋਸ਼ ਮੜ੍ਹ ਦਿਤੇ। ਪ੍ਰੰਤੂ ਕੰਗਨਾ ਵਿਚ ਇਕ ਗੱਲ ਸੀ ਜਿਸ ਕਰ ਕੇ ਉਹ ਬਾਕੀ ਸਾਰੇ ਸਿਤਾਰਿਆਂ ਤੋਂ ਅਲੱਗ ਸੀ। ਉਹ ਸਿਰਫ਼ ਇਕ ਸੁੰਦਰ ਚਿਹਰਾ ਨਹੀਂ ਸੀ, ਕੰਗਨਾ ਰਣੌਤ ਇਕ ਬਹੁਤ ਹੀ ਸੁਲਝੀ ਹੋਈ ਕਲਾਕਾਰ ਹੈ ਜਿਸ ਨੇ ਫ਼ਿਲਮਾਂ ਵਿਚ ਹੀਰੋ ਦੀ ਲੋੜ ਨੂੰ ਹੀ ਖ਼ਤਮ ਕਰ ਦਿਤਾ।
Hrithik Roshan
ਕੰਗਨਾ ਰਣੌਤ ਇਕ ਬਹੁਤ ਹੀ ਪ੍ਰਭਾਵਸ਼ਾਲੀ ਲੜਕੀ ਹੈ ਜਿਸ ਨੇ ਅਪਣੇ ਕਲਾਕਾਰਾਂ ਨੂੰ ਚਮਕਾਉਣ ਵਾਸਤੇ ਇਕ ਯੋਜਨਾ ਬਣਾਈ ਤੇ ਉਸ ਨੂੰ ਸਫ਼ਲਤਾ ਨਾਲ ਇਸਤੇਮਾਲ ਕੀਤਾ ਤੇ ਕੰਗਨਾ ਰਣੌਤ ਨੇ ਅਪਣੇ ਵਾਸਤੇ ਅਗਲਾ ਟੀਚਾ ਮਿਥ ਲਿਆ ਹੈ ਜਿਸ ਵਿਚ ਉਹ ਅਪਣੇ ਆਪ ਨੂੰ ਜਾਂ ਤਾਂ ਭਾਜਪਾ ਦਾ ਪ੍ਰਚਾਰਕ ਬਣਾਉਣ ਦੀ ਤਿਆਰੀ ਕਰ ਰਹੀ ਹੈ ਜਾਂ ਉਸ ਨੇ ਅਪਣੇ ਵਾਸਤੇ ਰਾਜ ਸਭਾ ਦੀ ਕੁਰਸੀ ਪੱਕੀ ਕਰ ਲਈ ਹੈ। ਅੱਜ ਕੰਗਨਾ ਨੇ ਸ਼ਿਵ ਸੈਨਾ ਨੂੰ ਚੁਨੌਤੀ ਦੇ ਕੇ ਅਪਣੀ ਅਗਲੀ ਚਾਲ ਚਲ ਦਿਤੀ ਹੈ।
Kangana Ranaut
ਉਸ ਦੀ ਕਿਸਮਤ ਚੰਗੀ ਹੈ ਕਿ ਸ਼ਿਵ ਸੈਨਾ ਨੇ ਅਪਣੀ ਸਿਆਸੀ ਤਾਕਤ ਦੇ ਸਿਰ ਤੇ ਕੰਗਨਾ ਦੇ ਦਫ਼ਤਰ ਵਿਚ ਗ਼ੈਰ ਕਾਨੂੰਨੀ ਉਸਾਰੀ ਤੋੜਨ ਵਿਚ ਕਾਹਲ ਕਰ ਦਿਤੀ। ਇਸ ਨਾਲ ਕੰਗਨਾ ਦੀ ਨਫ਼ਰਤ ਇਕ ਆਮ ਆਦਮੀ ਦਾ ਗੁੱਸਾ ਬਣ ਗਿਆ। ਪਰ ਹਾਰਿਆ ਕੌਣ? ਹਾਰੀ ਇਕ ਹੋਰ ਆਮ ਪ੍ਰਵਾਰ ਦੀ ਲੜਕੀ ਰੀਆ ਚੱਕਰਵਰਤੀ ਜੋ ਕੰਗਨਾ ਵਾਂਗ ਚਲਾਕ ਨਹੀਂ ਸੀ।
Kangana Ranaut
ਇਕ ਸਫ਼ਲ ਕਲਾਕਾਰ ਸੁਸ਼ਾਂਤ ਰਾਜਪੂਤ ਨਾਲ ਪਿਆਰ ਕਰਦੀ ਸੀ ਜਾਂ ਉਸ ਦਾ ਇਸਤੇਮਾਲ ਕਰਦੀ ਸੀ, ਪਰ ਉਹ ਵੀ ਉਹੀ ਕੁੱਝ ਕਰ ਰਹੀ ਸੀ ਜੋ ਕੰਗਨਾ ਨੇ ਕਦੇ ਕੀਤਾ ਸੀ। ਇਕ ਹੋਰ ਫ਼ਰਕ ਵੀ ਹੈ ਇਨ੍ਹਾਂ ਦੋਵਾਂ ਵਿਚ। ਕੰਗਨਾ ਅੰਦਰ ਨਫ਼ਰਤ ਇਸ ਕਦਰ ਭਰ ਚੁੱਕੀ ਹੈ ਕਿ ਉਹ ਹੁਣ ਅਪਣੇ ਵਰਗੀ ਹੀ ਇਕ ਹੋਰ ਲੜਕੀ ਨੂੰ ਤਬਾਹ ਕਰਨ ਵਿਚ ਕੋਈ ਕਸਰ ਨਹੀਂ ਛੱਡ ਰਹੀ।
Sushant Singh Rajput
ਰੀਆ ਵਿਰੁਧ ਕੋਈ ਦੋਸ਼ ਸਾਬਤ ਨਹੀਂ ਹੋ ਸਕਿਆ, ਸਿਵਾਏ ਇਸ ਦੇ ਕਿ ਸ਼ਾਇਦ ਉਸ ਨੇ ਆਪ ਵੀ ਨਸ਼ੇ ਦਾ ਸੇਵਨ ਕੀਤਾ ਤੇ ਸੁਸ਼ਾਂਤ ਨੂੰ ਵੀ ਨਸ਼ੇ ਦਿਤੇ। ਜੇਕਰ ਉਸ ਨੇ ਨਸ਼ਾ ਕੀਤਾ ਹੁੰਦਾ ਤਾਂ ਉਸ ਨੂੰ ਇਲਾਜ ਦੀ ਵੀ ਲੋੜ ਹੋਵੇਗੀ, ਕਿਉਂਕਿ ਅੱਜ ਤਕ ਅਸੀ ਨਸ਼ਾ ਕਰਨ ਵਾਲੇ ਨੂੰ ਨਹੀਂ ਬਲਕਿ ਨਸ਼ਾ ਦੇ ਕਾਰੋਬਾਰ ਕਰਨ ਵਾਲੇ ਨੂੰ ਜ਼ਿੰਮੇਵਾਰ ਮੰਨਦੇ ਆਏ ਹਾਂ।
Riya Chakravarth
ਪਰ ਨਫ਼ਰਤ ਉਗਲਦੀ ਕੰਗਨਾ ਰਣੌਤ ਨੇ ਦੇਸ਼ ਨੂੰ ਇਸ ਕਦਰ ਭਾਵੁਕ ਕਰ ਦਿਤਾ ਹੈ ਕਿ ਅੱਜ ਦੇਸ਼ ਗੁਨਾਹ ਸਾਬਤ ਹੋਣ ਤੋਂ ਪਹਿਲਾਂ ਹੀ ਰੀਆ ਨੂੰ ਸਜ਼ਾ-ਏ-ਮੌਤ ਸੁਣਾ ਰਿਹਾ ਹੈ। ਅਫ਼ਸੋਸ ਕਿ ਜਿਹੜੀ ਅਦਾਕਾਰਾ ਇਕ ਸਮੇਂ ਇਕ ਨਵੀਂ ਲਹਿਰ ਦੀ ਸ਼ੁਰੂਆਤ ਕਰ ਰਹੀ ਸੀ, ਅੱਜ ਅਪਣੀ ਨਫ਼ਰਤ ਸਦਕੇ ਉਸੇ ਦਾਗ਼ੀ ਫ਼ਿਲਮੀ ਜਗਤ ਦਾ ਇਕ ਸਿਆਸੀ 'ਡਾਨ' ਬਣ ਚੁੱਕੀ ਹੈ ਤੇ ਅਪਣੇ ਵਰਗਿਆਂ ਨੂੰ ਹੀ ਮਾਰ ਕੇ ਉਨ੍ਹਾਂ ਦੀਆਂ ਕਬਰਾਂ ਨੂੰ ਅਪਣੀ ਪੌੜੀ ਵਜੋਂ ਵਰਤਣਾ ਚਾਹੁੰਦੀ ਹੈ।
- ਨਿਮਰਤ ਕੌਰ
