ਸਾਰੀਆਂ ਪਾਰਟੀਆਂ ਦੀ ਕਾਰਗੁਜ਼ਾਰੀ ਤੇ ਰਵਈਆ ਵੇਖ ਕੇ ਆਉਣ ਵਾਲੀਆਂ ਚੋਣਾਂ ਵਿਚ ਉਲਝਣ ਵਾਲੀ ਗੰਦੀ ਰਾਜਨੀਤੀ ਦਾ ਉਭਾਰ ਫਿਰ ਤੋਂ ਹਕੀਕਤ ਬਣਦਾ ਨਜ਼ਰ ਆ ਰਿਹਾ ਹੈ ਕਿਉਂਕਿ ..
ਸਾਰੀਆਂ ਪਾਰਟੀਆਂ ਦੀ ਕਾਰਗੁਜ਼ਾਰੀ ਤੇ ਰਵਈਆ ਵੇਖ ਕੇ ਆਉਣ ਵਾਲੀਆਂ ਚੋਣਾਂ ਵਿਚ ਉਲਝਣ ਵਾਲੀ ਗੰਦੀ ਰਾਜਨੀਤੀ ਦਾ ਉਭਾਰ ਫਿਰ ਤੋਂ ਹਕੀਕਤ ਬਣਦਾ ਨਜ਼ਰ ਆ ਰਿਹਾ ਹੈ ਕਿਉਂਕਿ ਗੰਦੀ ਸੋਚ ਕਦੇ ਸਫਾਈ ਨਹੀਂ ਲਿਆ ਸਕਦੀ। ਪੰਜਾਬ ਵਿਧਾਨ ਸਭਾ ਦਾ ਖ਼ਾਸ ਸੈਸ਼ਨ ਕਿਤੇ ਨਾ ਕਿਤੇ ਉਸ ਸੈਸ਼ਨ ਦੀ ਯਾਦ ਕਰਵਾ ਰਿਹਾ ਸੀ ਜਿਹੜਾ ਅੱਜ ਤੋਂ ਤਕਰੀਬਨ ਸਵਾ ਤਿੰਨ ਸਾਲ ਪਹਿਲਾਂ ਬਰਗਾੜੀ ਮੁੱਦੇ ਤੇ ਬੁਲਾਇਆ ਗਿਆ ਸੀ।
CM Charanjit Singh Channi
ਉਸ ਦਿਨ ਲੱਗਾ ਸੀ ਕਿ ਕਾਂਗਰਸੀਆਂ ਦੇ ਦਿਲਾਂ ਵਿਚੋਂ ਪੰਥਕ ਅਵਾਜ਼ਾਂ ਨਿਕਲ ਰਹੀਆਂ ਸਨ ਤੇ ਹੁਣ ਪੰਜਾਬ ਵਿਚ ਹਾਲਾਤ ਸੁਧਰਨ ਵਾਲੇ ਸਨ ਪਰ ਸਵਾ ਤਿੰਨ ਸਾਲ ਮਗਰੋਂ ਇਕ ਵਾਰ ਫਿਰ ਉਸੇ ਤਰ੍ਹਾਂ ਜਾਂ ਉਸ ਤੋਂ ਵੱਧ ਜੋਸ਼ ਦਿਸਿਆ ਪਰ ਕੀ ਇਸ ਵਾਰ ਕੋਈ ਉਮੀਦ ਵੀ ਜਾਗੀ? ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਕਿਹਾ ਤਾਂ ਸੀ ਕਿ ਰਾਤਾਂ ਨੂੰ ਬਰਗਾੜੀ ਦੇ ਮੁੱਦੇ ’ਤੇ ਨੀਂਦ ਨਹੀਂ ਆਉਂਦੀ ਪਰ ਫਿਰ ਸਾਢੇ ਚਾਰ ਸਾਲ ਭਾਵੇਂ ਕੈਪਟਨ ਅਮਰਿੰਦਰ ਦੀ ਅਗਵਾਈ ਵਿਚ ਸਰਕਾਰ ਚੱਲ ਰਹੀ ਸੀ ਪਰ ਕਿਸੇ ਦੀ ਨੀਂਦ ਉਡਦੀ ਨਹੀਂ ਵੇਖੀ ਤੇ ਸੱਭ ਸੁੱਖ ਚੈਨ ਨਾਲ ਸੁੱਤੇ ਰਹੇ-ਉਦੋਂ ਤਕ ਜਦ ਤਕ ਚੋਣਾਂ ਦਾ ਘੁੱਗੂ ਸੁਣਾਈ ਨਾ ਦਿਤਾ।
BSF
ਅਪਣੇ ਵਲੋਂ ਤਾਂ ਮੁੱਖ ਮੰਤਰੀ ਨੇ ਆਖ ਦਿਤਾ ਕਿ ਉਨ੍ਹਾਂ ਦੀ ਸਾਢੇ ਚਾਰ ਸਾਲ ਦੀ ਸਰਕਾਰ ਅਕਾਲੀਆਂ ਨਾਲ ਮਿਲੀ ਹੋਈ ਸੀ ਜਿਸ ਨੇ ਸਾਰੇ ਸਰਕਾਰੀ ਕੇਸਾਂ ਨੂੰ ਕਮਜ਼ੋਰ ਕਰ ਦਿਤਾ ਪਰ ਕੀ ਕਿਸੇ ’ਤੇ ਵੀ ਵਿਸ਼ਵਾਸ ਕੀਤਾ ਜਾ ਸਕਦਾ ਹੈ? ਜਿਸ ਤਰ੍ਹਾਂ ਦੀ ਸ਼ਬਦਾਵਲੀ ਦੀ ਵਰਤੋਂ ਕੀਤੀ ਗਈ ਉਸ ਤੋਂ ਜੋਸ਼ ਨਹੀਂ ਬਲਕਿ ਚੋਣਾਂ ਦੀ ਘਬਰਾਹਟ ਜ਼ਰੂਰ ਨਜ਼ਰ ਆ ਰਹੀ ਸੀ। ਵਿਧਾਨ ਸਭਾ ਵਿਚ ਉਹੀ ਇਲਜ਼ਾਮਬਾਜ਼ੀ, ਗਾਲੀ ਗਲੋਚ, ਇਕ ਦੂਜੇ ਨੂੰ ਅੱਖਾਂ ਦਿਖਾਉਣ ਦੀ ਲੋਕ-ਨਾਟਸ਼ਾਲਾ ਪ੍ਰੋਸੀ ਗਈ ਪਰ ਅੰਤ ਵਿਚ ਸਿੱਟਾ ਕੀ ਨਿਕਲਿਆ? ਬੀ.ਐਸ.ਐਫ਼ ਦੇ ਦਾਇਰੇ ਵਿਰੁਧ ਤੇ ਖੇਤੀ ਕਾਨੂੰਨਾਂ ਨੂੰ ਰੱਦ ਕਰਨ ਦਾ ਮਤਾ ਹੁਣ ਫਿਰ ਗਵਰਨਰ ਦੇ ਬੂਹੇ ਅੱਗੇ ਜਾ ਰਖਿਆ ਜਾਵੇਗਾ।
Manish Tiwari
ਰਾਜਾਂ ਦੇ ਵਿਸ਼ੇਸ਼ ਅਧਿਕਾਰਾਂ ਨੂੰ ਰੌਂਦਣ ਦਾ ਦਸ ਕੇ ਸੂਬਾ ਸਰਕਾਰ ਸੁਪਰੀਮ ਕੋਰਟ ਵਿਚ ਜਾ ਕੇ ਰਸਤਾ ਕੱਢ ਸਕਦੀ ਹੈ ਪਰ ਸਹੀ ਰਸਤਾ ਕਢਣ ਦੀ ਗੱਲ ਤਾਂ ਕੀਤੀ ਹੀ ਨਹੀਂ ਗਈ। ਕਾਂਗਰਸੀ ਐਮ.ਪੀ. ਮਨੀਸ਼ ਤਿਵਾੜੀ ਨੇ ਸਾਫ਼ ਤੌਰ ’ਤੇ ਅਪਣੀ ਪਾਰਟੀ ਨੂੰ ਦਸਿਆ ਸੀ ਕਿ ਉਹ ਕਿਹੜੀ ਧਾਰਾ ਹੇਠ ਸੁਪਰੀਮ ਕੋਰਟ ਦਾ ਦਰਵਾਜ਼ਾ ਖਟਖਟਾ ਕੇ ਬੀ.ਐਸ.ਐਫ਼ ਦੇ ਫ਼ੈਸਲੇ ਨੂੰ ਚੁਨੌਤੀ ਦੇ ਸਕਦੇ ਹਨ। ਜਿਸ ਪਾਰਟੀ ਵਿਚ ਕਪਿਲ ਸਿਬਲ, ਮਨੀਸ਼ ਤਿਵਾੜੀ ਵਰਗੇ ਵੱਡੇ ਵਕੀਲ ਹੋਣ ਉਸ ਨੂੰ ਤਾਂ ਮਾਹਰਾਂ ਦੀ ਘਾਟ ਹੀ ਨਹੀਂ ਹੋਣੀ ਚਾਹੀਦੀ, ਪਰ ਜੋ ਨੇਤਾ ਅਪਣਿਆਂ ਦੀ ਨਹੀਂ ਸੁਣ ਸਕੇ ਉਹ ਪਰਾਇਆਂ ਦੀ ਕੀ ਸੁਣਨਗੇ?
Bikram singh majithia
ਵਿਧਾਨ ਸਭਾ ਦਾ ਸੈਸ਼ਨ ਸਰਕਾਰੀ ਸੈਸ਼ਨ ਦੀ ਬਜਾਏ ਇਕ ਨਿਜੀ ਸੈਸ਼ਨ ਜਾਪਦਾ ਸੀ ਜਿਥੇ ਸਰਕਾਰ ਵਲੋਂ ਸਾਰੀਆਂ ਖ਼ਰਾਬੀਆਂ ਦਾ ਜ਼ਿੰਮੇਵਾਰ ਬਿਕਰਮ ਮਜੀਠੀਆ ਨੂੰ ਬਣਾਇਆ ਜਾ ਰਿਹਾ ਸੀ। ਬਿਕਰਮ ਮਜੀਠੀਆ ਉਤੇ ਸ਼ਬਦੀ ਗੋਲੀਬਾਰੀ ਕਰੀ ਜਾਣ ਨਾਲੋਂ ਤੋਂ ਬਿਹਤਰ ਹੁੰਦਾ ਜੇ ਉਸ ਵਿਰੁਧ ਕੁੱਝ ਠੋਸ ਸਬੂਤ ਪੇਸ਼ ਕਰਦੇ (ਚਾਚੇ ਕੈਪਟਨ ਅਮਰਿੰਦਰ ਸਿੰਘ ਨੇ ਤਾਂ ਇਹ ਕਰਨਾ ਹੀ ਨਹੀਂ ਸੀ) ਜੋ ਇਨ੍ਹਾਂ ਇਲਜ਼ਾਮਾਂ ਨੂੰ ਸਹੀ ਸਿੱਧ ਕਰ ਸਕਦੇ। ਇਲਜ਼ਾਮ ਲਗਾਉਂਦੇ-ਲਗਾਉਂਦੇ 6 ਸਾਲ ਹੋ ਗਏ ਹਨ ਤੇ ਹੁਣ ਸਿਰਫ਼ ਸਬੂਤਾਂ ਨਾਲ ਹੀ ਗੱਲ ਕਰਨੀ ਚਾਹੀਦੀ ਹੈ।
Raja Warring
ਜਦ ਰਾਜਾ ਵੜਿੰਗ ਦੀ ਸਿਫ਼ਤ ਕੀਤੀ ਜਾ ਰਹੀ ਸੀ ਤਾਂ ਇਹ ਵੀ ਦਸਣਾ ਚਾਹੀਦਾ ਸੀ ਕਿ ਅੱਜ ਵੀ ਕੈਬਨਿਟ ਵਿਚ ਅਜਿਹੇ ਮੰਤਰੀ ਬੈਠੇ ਹਨ ਜਿਨ੍ਹਾਂ ਦੇ ਹੇਠ ਵੀ ਬੱਸ ਸਟੈਂਡਾਂ ਤੇ ਗ਼ੈਰ ਕਾਨੂੰਨੀ ਕਬਜ਼ੇ ਚਲਦੇ ਆ ਰਹੇ ਸਨ।ਵਿਧਾਨ ਸਭਾ ਦੀ ਕਾਰਗੁਜ਼ਾਰੀ ਨੂੰ ਵੇਖ ਕੇ ਅੰਦਾਜ਼ਾ ਹੋ ਗਿਆ ਹੈ ਕਿ ਆਉਣ ਵਾਲੀਆਂ ਚੋਣਾਂ ਵਿਚ ਫਿਰ ਪੰਜਾਬ ਦੀ ਜਨਤਾ ਦੇ ਅਰਮਾਨਾਂ ਨਾਲ ਖੇਡਿਆ ਜਾਵੇਗਾ। ਫਿਰ ਇਕ ਪੰਜਾਬ ਮਾਡਲ ਵਿਖਾਇਆ ਜਾਵੇਗਾ ਪਰ ਜਾਪਦਾ ਨਹੀਂ ਕਿ ‘‘ਲਾਲੀਪਾਪ’’ ਦੇਣ ਦੇ ਇਲਾਵਾ ਕੋਈ ਠੋਸ ਕੰਮ ਵੀ ਹੋਵੇਗਾ।
Shiromani Akali Dal Protest
ਅਕਾਲੀ ਦਲ ’ਤੇ ਇਲਜ਼ਾਮ ਤਾਂ ਬਹੁਤ ਲੱਗੇ ਹੋਏ ਹਨ ਪਰ ਸਭ ਤੋਂ ਭਾਰਾ ਇਹ ਹੈ ਕਿ ਉਨ੍ਹਾਂ ਅਪਣੀ ਪੰਥਕ ਸੋਚ ਦੇ ਖ਼ਿਲਾਫ਼ ਜਾ ਕੇ ਪੰਜਾਬ ਦੀਆਂ ਨੀਹਾਂ ਨੂੰ ਕਮਜ਼ੋਰ ਕੀਤਾ ਹੈ। ਜਿਥੇ ਬਰਾਬਰੀ ਤੇ ਸਾਰੇ ਧਰਮਾਂ ਨੂੰ ਨਾਲ ਲੈ ਕੇ ਸਿਆਸਤ ਵਿਚ ਅਕਾਲੀ ਦਲ ਨੇ ਸਿੱਖੀ ਦਾ ਝੰਡਾ ਦੇਸ਼ ਵਿਚ ਉੱਚਾ ਕੀਤਾ ਸੀ, 25 ਸਾਲ ਦੇ ਰਾਜ ਦੀ ਲਾਲਸਾ ਵਿਚ ਫੱਸ ਕੇ ਉਨ੍ਹਾਂ ਨੇ ਅਪਣੇ ਸਿਰ ’ਤੇ ਜਾਤ ਪਾਤ, ਭ੍ਰਿਸ਼ਟਾਚਾਰ ਤੇ ਮਾਫ਼ੀਆ ਦੇ ਪੱਕੇ ਦਾਗ਼ ਲਗਵਾ ਲਏ। ਪੰਜਾਬ ਦੀ ਦੂਜੀ ਵੱਡੀ ਪਾਰਟੀ, ਵਿਰੋਧੀ ਧਿਰ ਦੀ ‘ਆਪ’ ਵਿਚ ਘਬਰਾਹਟ ਵੀ ਜਗ ਜ਼ਾਹਰ ਹੈ।
Sucha Singh Chhotepur
ਲੋਕ ਵਿਸ਼ਵਾਸ ਕਰਨ ਵਾਸਤੇ ਤਿਆਰ ਹਨ ਪਰ ਜੇ ਆਗੂ ਅੱਗੋਂ ਇਹ ਆਖਣ ਲੱਗੇ ਕਿ ਉਹ ਪੰਜਾਬੀਆਂ ਵਿਰੁਧ ਹਨ ਤਾਂ ਫਿਰ ਪਿਛਲੀ ਵਾਰੀ ਵਾਲਾ ਹਾਲ ਹੀ ਹੋਣ ਵਾਲਾ ਹੈ। ਆਪ ਨੂੰ ਇਕ ਸਰਵੇਖਣ ਅੱਜ ਦੇ ਦਿਨ 60 ਸੀਟਾਂ ਦੇ ਰਿਹਾ ਹੈ ਪਰ ਜੇ ਪੰਜਾਬੀਆਂ ਦੇ ਹੱਥ ਵਿਚ ਸੱਤਾ ਦੀ ਡੋਰ ਨਾ ਫੜਾਈ ਤਾਂ ਯਾਦ ਰਖਿਉ ਕਿ ਨਾ ਸੁੱਚਾ ਸਿੰਘ ਛੋਟੇਪੁਰ ਤੇ ਇਲਜ਼ਾਮ ਬਰਦਾਸ਼ਤ ਹੋਏ ਸਨ ਤੇ ਨਾ ਹੀ ਭਗਵੰਤ ਮਾਨ ਦਾ ਪਿੰਡ ਥਕੇਵਾਲਾ ਬਰਦਾਸ਼ਤ ਕਰੇਗਾ।ਸਾਰੀਆਂ ਪਾਰਟੀਆਂ ਦੀ ਕਾਰਗੁਜ਼ਾਰੀ ਤੇ ਰਵਈਆ ਵੇਖ ਕੇ ਆਉਣ ਵਾਲੀਆਂ ਚੋਣਾਂ ਵਿਚ ਉਲਝਣ ਵਾਲੀ ਗੰਦੀ ਰਾਜਨੀਤੀ ਦਾ ਉਭਾਰ ਫਿਰ ਤੋਂ ਹਕੀਕਤ ਬਣਦਾ ਨਜ਼ਰ ਆ ਰਿਹਾ ਹੈ ਕਿਉਂਕਿ ਗੰਦੀ ਸੋਚ ਕਦੇ ਸਫਾਈ ਨਹੀਂ ਲਿਆ ਸਕਦੀ।
-ਨਿਮਰਤ ਕੌਰ
