'ਜਥੇਦਾਰ' ਨੇ ਸਿਰਫ਼ ਇਕ ਪਾਰਟੀ ਦੇ ਸਿਆਸੀ ਏਜੰਡੇ ਨੂੰ ਚੁਕ ਕੇ ਆਪ ਹੀ ਅਹਿਸਾਸ ਕਰਵਾ ਦਿਤਾ ਕਿ ਅਸਲ ਵਿਚ ਸ਼੍ਰੋਮਣੀ ਕਮੇਟੀ ਇਕ ਸਿਆਸੀ ਪਾਰਟੀ ਦੀ ਕਠਪੁਤਲੀ ਬਣ ਚੁੱਕੀ ਹੈ।
ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੀ 100ਵੀਂ ਵਰ੍ਹੇਗੰਢ ਤੇ ਅਕਾਲ ਤਖ਼ਤ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਵਲੋਂ ਇਹ ਗੱਲ ਕਹੀ ਗਈ ਕਿ ਸ਼੍ਰੋਮਣੀ ਅਕਾਲੀ ਦਲ, ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦਾ ਪੁੱਤਰ ਹੈ। ਉਨ੍ਹਾਂ ਆਖਿਆ ਕਿ ਹੁਣ ਅਕਾਲੀ ਦਲ ਪੰਜਾਬ ਤੋਂ ਪੰਥ ਵਲ ਜਾਂਦਾ ਰਸਤਾ ਤੈਅ ਕਰਨ ਤੇ ਲੱਗ ਜਾਏ।
Giani Harpreet Singh
ਉਨ੍ਹਾਂ ਨੇ ਕਈ ਵਿਰੋਧੀ ਤਾਕਤਾਂ ਨੂੰ ਸਿੱਖ ਧਰਮ ਦਾ ਦੁਸ਼ਮਣ ਆਖਿਆ ਪਰ ਅਫ਼ਸੋਸ ਉਹ ਆਪ ਹੀ ਨਹੀਂ ਸਮਝ ਸਕੇ ਕਿ ਇਨ੍ਹਾਂ ਸ਼ਬਦਾਂ ਤੋਂ ਹੀ ਪਤਾ ਲੱਗ ਗਿਆ ਕਿ ਉਹ ਆਪ ਵੀ ਸਿੱਖ ਫ਼ਲਸਫ਼ੇ ਦੇ ਉਲਟ ਚਲ ਰਹੇ ਹਨ। ਬਾਬੇ ਨਾਨਕ ਦਾ ਜਿਹੜਾ ਫ਼ਲਸਫ਼ਾ ਅੱਜ ਸਿੱਖਾਂ ਦੀ ਸੋਚ ਉਤੇ ਛਾਇਆ ਹੋਣਾ ਚਾਹੀਦਾ ਸੀ, ਉਹ ਤਾਂ 'ਜਥੇਦਾਰ' ਦੀ ਸੋਚ ਵਿਚ ਹੈ ਹੀ ਨਹੀਂ ਸੀ।
Akal Takht Sahib
ਅੱਜ ਜੇ ਕੋਈ ਗੁਰੂ ਦੀ ਬਾਣੀ ਨਾਲ ਜੁੜਿਆ ਹੁੰਦਾ ਤਾਂ ਉਸ ਮੰਚ ਤੋਂ ਖੜੇ ਹੋ ਕੇ ਪਿਉ ਪੁੱਤਰ ਦੀ ਗੱਲ ਆਖ ਕੇ ਔਰਤ ਨੂੰ ਪੂਰੀ ਤਰ੍ਹਾਂ ਇਕ ਪਾਸੇ ਨਾ ਕਰ ਦੇਂਦਾ। ਉਹ ਸਿੱਖੀ ਦੀ ਜ਼ਿਆਦਾ ਸੇਵਾ ਕਰ ਰਹੇ ਹੁੰਦੇ ਜੇ ਕਹਿ ਦੇਂਦੇ ਕਿ ਸ਼੍ਰੋਮਣੀ ਕਮੇਟੀ ਮਾਂ ਹੈ ਤੇ ਅਕਾਲੀ ਦਲ ਉਸ ਦਾ ਪੁੱਤਰ। ਜੇ ਬਾਬੇ ਨਾਨਕ ਵਲੋਂ ਦਿਤੀ ਸੋਚ ਨੂੰ ਸਮਝਦੇ ਹੁੰਦੇ ਤਾਂ 'ਔਲਾਦ' ਸ਼ਬਦ ਨਾਲ ਉਸੇ ਬਰਾਬਰੀ ਵਾਲੀ ਸੋਚ ਦੀ ਨਾਨਕੀ ਭਾਸ਼ਾ ਵਿਚ ਗੱਲ ਕਰਦੇ ਤੇ ਔਰਤ ਨੂੰ ਮਾਂ ਦੇ ਰੂਪ ਵਿਚ ਨਾਲ ਜ਼ਰੂਰ ਜੋੜ ਲੈਂਦੇ।
SGPC
ਪਰ 'ਜਥੇਦਾਰ' ਨੇ ਸਿਰਫ਼ ਇਕ ਪਾਰਟੀ ਦੇ ਸਿਆਸੀ ਏਜੰਡੇ ਨੂੰ ਚੁਕ ਕੇ ਆਪ ਹੀ ਅਹਿਸਾਸ ਕਰਵਾ ਦਿਤਾ ਕਿ ਅਸਲ ਵਿਚ ਸ਼੍ਰੋਮਣੀ ਕਮੇਟੀ ਇਕ ਸਿਆਸੀ ਪਾਰਟੀ ਦੀ ਕਠਪੁਤਲੀ ਬਣ ਚੁੱਕੀ ਹੈ। ਉਸ ਸਿਆਸੀ ਪਾਰਟੀ ਦੇ ਨੇਤਾ ਭਾਵੇਂ ਸੌਦਾ ਸਾਧ ਨੂੰ ਜਾ ਮੱਥੇ ਟੇਕਣ ਜਾਂ ਬੀਜੇਪੀ ਨੂੰ 'ਪਤੀ' ਬਣਾ ਲੈਣ, ਸ਼੍ਰੋਮਣੀ ਕਮੇਟੀ ਲਈ ਉਹ 'ਮਹਾਨ' ਹੀ ਹਨ ਤੇ ਸਾਰੇ ਸਿੱਖਾਂ ਨੂੰ ਉਨ੍ਹਾਂ ਦੇ ਮਗਰ ਲੱਗ ਜਾਣਾ ਚਾਹੀਦਾ ਹੈ। ਇਹ ਹੁਕਮ ਹੈ 'ਜਥੇਦਾਰ' ਦਾ।
Sauda Sadh
ਕੇਂਦਰ ਦੀ ਸਰਕਾਰ ਨੂੰ 'ਈ.ਵੀ.ਐਮ ਦੀ ਸਰਕਾਰ' ਆਖ ਕੇ 'ਜਥੇਦਾਰ' ਨੇ ਅਕਾਲੀ ਦਲ ਦੀ ਭਾਈਵਾਲ ਰਹੀ ਪਾਰਟੀ ਉਤੇ ਸ਼ਬਦੀ ਹਮਲਾ ਤਾਂ ਕੀਤਾ ਪਰ ਕੀ ਉਹ ਇਹ ਵੀ ਆਖ ਰਹੇ ਹਨ ਕਿ ਅਕਾਲੀ ਦਲ ਵੀ ਈ.ਵੀ.ਐਮ ਦੇ ਕਾਰਨ ਦੋ ਸੀਟਾਂ ਜਿਤਿਆ ਸੀ? ਜੇ ਕਿਸਾਨ ਮਜਬੂਰ ਨਾ ਕਰਦੇ ਤਾਂ ਅਕਾਲੀ ਅੱਜ ਵੀ 'ਈ ਵੀ ਐਮ' ਸਰਕਾਰ ਦਾ ਹਿੱਸਾ ਬਣੇ ਹੋਏ ਹੋਣੇ ਸਨ। ਕੀ ਇਸ ਪਾਪ ਲਈ ਉਹ ਅਕਾਲੀਆਂ ਕੋਲੋਂ ਮਾਫ਼ੀ ਮੰਗਵਾਉਣਗੇ?
SGPC
ਇਕ ਗੱਲ ਤਾਂ ਉਨ੍ਹਾਂ ਮੰਨ ਲਈ ਕਿ ਅਕਾਲੀ ਦਲ ਅਪਣੀ ਪੰਥਕ ਸੋਚ ਤੋਂ ਪਿਛੇ ਹਟ ਗਿਆ ਸੀ। ਸੋ ਇਕ ਸੱਚ ਸ਼ਾਇਦ ਗ਼ਲਤੀ ਨਾਲ ਹੀ ਸਹੀ ਪਰ ਮੂੰਹ ਤੋਂ ਨਿਕਲ ਤਾਂ ਆਇਆ। ਪਰ ਜਦ ਆਪ ਸ਼੍ਰੋਮਣੀ ਕਮੇਟੀ ਦੇ ਪੁੱਤਰ ਨੂੰ 'ਘਰ ਵਾਪਸੀ' ਵਾਸਤੇ ਪ੍ਰੇਰਿਤ ਕਰ ਰਹੇ ਹਨ ਤਾਂ ਇਹ ਵੀ ਵੇਖਣ ਕਿ ਜੇ 'ਮਾਂ' ਆਪ ਹੀ ਪੰਥਕ ਸੋਚ ਤੋਂ ਦੂਰ ਹੋ ਚੁੱਕੀ ਹੈ ਤਾਂ ਫਿਰ ਸਿੱਖ ਪੰਥ ਵਾਸਤੇ ਅੱਗੇ ਕੀ ਰਸਤਾ ਹੈ?
Shiromani Akali Dal
ਅਸਲ ਵਿਚ ਸਾਨੂੰ ਆਦਤ ਪੈ ਗਈ ਹੈ ਕਿ ਅਸੀ ਕਿਸੇ ਨਾ ਕਿਸੇ ਹੋਰ ਨੂੰ ਅਪਣੀ ਕਮਜ਼ੋਰੀ ਵਾਸਤੇ ਜ਼ਿੰਮੇਵਾਰ ਠਹਿਰਾਉਂਦੇ ਰਹੀਏ। ਬਾਹਰਲੀਆਂ ਤਾਕਤਾਂ ਸਿੱਖ ਪੰਥ ਨੂੰ ਖ਼ਤਮ ਕਰਨ ਦੀ ਕੋਸ਼ਿਸ਼ ਵਿਚ ਹਨ, ਇਹ ਸੱਭ ਤੋਂ ਪਸੰਦੀਦਾ ਤੇ ਪ੍ਰਚਲਤ ਫ਼ਿਕਰਾ ਹੈ। ਪਰ ਕੀ ਸ਼੍ਰੋਮਣੀ ਅਕਾਲੀ ਦਲ ਦਾ ਹਰ ਆਗੂ ਜੋ 10 ਸਾਲਾਂ ਤਕ ਨਸ਼ਾ, ਰੇਤਾ, ਸ਼ਰਾਬ ਮਾਫ਼ੀਆ ਨੂੰ ਵਧਾਉਂਦਾ ਰਿਹਾ, ਜੋ ਸੌਦਾ ਸਾਧ ਦੇ ਡੇਰੇ ਜਾ ਕੇ ਸਿਰ ਝੁਕਾਉਂਦਾ ਰਿਹਾ, ਜੋ ਸਰਕਾਰੀ ਪੈਸੇ ਦਾ ਗ਼ਲਤ ਇਸਤੇਮਾਲ ਕਰਦਾ ਰਿਹਾ, ਜਿਸ ਨੇ ਪੰਜਾਬ ਪੁਲਿਸ ਨੂੰ ਜਨਰਲ ਡਾਇਰ ਦੀ ਗ਼ੁਲਾਮ ਫ਼ੌਜ ਬਣਾ ਦਿਤਾ ਤੇ ਅਣਗਣਿਤ ਹੋਰ ਗ਼ਲਤੀਆਂ ਕਰਨ ਵਾਲੇ ਵੀ ਬਾਹਰ ਤੋਂ ਆਏ ਸਨ?
Sikh
ਬੜਾ ਆਸਾਨ ਹੈ ਇਹ ਕਹਿਣਾ ਕਿ ਬਾਹਰਲੀਆਂ ਤਾਕਤਾਂ ਸਾਨੂੰ ਖ਼ਤਮ ਕਰਨਾ ਚਾਹੁੰਦੀਆਂ ਹਨ ਪਰ ਇਕ ਅਜਿਹਾ ਤਾਕਤਵਰ ਸਿੱਖ ਵੀ ਤਾਂ ਚਾਹੀਦਾ ਹੈ ਜੋ ਆਖ ਸਕੇ ਕਿ ਇਹ ਮੇਰੀ ਗ਼ਲਤੀ ਹੈ ਕਿ ਮੈਂ ਆਪ ਸਿੱਖ ਸੋਚ ਤੋਂ ਦੂਰ ਹੋ ਗਿਆ ਸੀ ਤੇ ਫਿਰ ਮੇਰੀ ਅਗਵਾਈ ਵਿਚ ਪੰਥ ਤਾਂ ਦੂਰ ਹੋਣਾ ਹੀ ਸੀ। ਪਰ ਚਲੋ ਇਸ ਮਾਂ (ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ) ਨੇ ਅਪਣੇ ਪੁੱਤਰ (ਸ਼੍ਰੋਮਣੀ ਅਕਾਲੀ ਦਲ) ਦੇ ਮੋਹ ਵਿਚ ਅਪਣੀਆਂ ਬਾਕੀ ਔਲਾਦਾਂ ਨੂੰ ਗੁਮਰਾਹ ਕਰਨ ਦਾ ਫ਼ੈਸਲਾ ਕਰ ਲਿਆ ਹੈ ਤਾਂ ਬਾਕੀ ਸਾਰੀਆਂ ਔਲਾਦਾਂ ਨੂੰ ਕੀ ਹੋ ਗਿਆ ਹੈ?
Giani Harpreet Singh
100 ਸਾਲ ਦੇ ਸ਼੍ਰੋਮਣੀ ਕਮੇਟੀ ਦੇ ਰਾਜ ਵਿਚ ਸੈਂਕੜੇ ਗ਼ਲਤੀਆਂ ਦੁਹਰਾਈਆਂ ਗਈਆਂ ਹਨ। ਅੱਜ ਮਹੰਤਾਂ ਦੀ ਛਵੀ ਸਿੱਖ ਆਗੂਆਂ ਵਿਚ ਨਜ਼ਰ ਆ ਰਹੀ ਹੈ। ਸ਼ਾਇਦ ਉਸ ਤੋਂ ਵੀ ਵੱਧ ਖ਼ਤਰਨਾਕ ਕਿਉਂਕਿ ਇਹ ਸਿਰਫ਼ ਪੈਸੇ ਤੇ ਫ਼ਲਸਫ਼ੇ ਤਕ ਸੀਮਤ ਨਹੀਂ ਸਗੋਂ ਵਾਰ-ਵਾਰ ਸਿੱਖ ਨੌਜਵਾਨ ਨੂੰ ਉਕਸਾ ਕੇ, ਗ਼ਲਤ ਰਾਹ ਤੇ ਵੀ ਪਾ ਦੇਂਦੇ ਹਨ।
Akal Takht Sahib
ਕੁੱਝ ਚਿਰ ਪਹਿਲਾਂ ਅਕਾਲ ਤਖ਼ਤ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਵਲੋਂ ਖ਼ਾਲਿਸਤਾਨ ਦਾ ਸਮਰਥਨ ਕੀਤਾ ਗਿਆ ਸੀ ਤੇ ਕਲ ਵੀ ਬੜੇ ਗਰਮ ਸ਼ਬਦਾਂ ਵਿਚ ਹਰ ਸਿੱਖ ਨੂੰ ਸ਼ੇਰ ਬਣ ਕੇ ਜਵਾਬ ਦੇਣ ਵਾਸਤੇ ਵੰਗਾਰਿਆ ਗਿਆ। ਪਰ ਸੁਣਨ ਵਾਲੇ ਨੌਜਵਾਨ ਪਹਿਲਾਂ ਵੱਖ-ਵੱਖ ਪੰਥਕ ਮੰਚਾਂ ਤੋਂ ਦਹਾੜਨ ਵਾਲੇ ਆਗੂਆਂ ਨੂੰ ਆਪ ਸੱਚ ਬੋਲਣ ਦਾ ਸਾਹਸ ਵਿਖਾ ਕੇ ਅਪਣੇ ਗਲੇ ਵਿਚੋਂ ਸਿਆਸਤਦਾਨਾਂ ਦੀ ਗੁਲਾਮੀ ਦੇ ਪਟੇ ਉਤਾਰਨ ਵਾਸਤੇ ਕਿਉਂ ਨਹੀਂ ਕਹਿੰਦੇ?
Harpreet Singh
ਪਹਿਲਾਂ ਜਦ ਇਹ ਸਾਰੇ ਆਗੂ ਆਪ ਗੁਰਬਾਣੀ ਪੜ੍ਹ ਅਤੇ ਸਮਝ ਲੈਣਗੇ ਤੇ ਗੁਰੂਆਂ ਦੀ ਸੋਚ ਨੂੰ ਅਪਣੇ ਕਿਰਦਾਰ ਵਿਚ ਉਤਾਰ ਲੈਣਗੇ ਤਾਂ ਇਨ੍ਹਾਂ ਦਾ ਅਸਲ ਸਤਿਕਾਰ ਉਦੋਂ ਸ਼ੁਰੂ ਹੋਵੇਗਾ। ਇਸ ਮਰਦ-ਔਰਤ ਦੀ ਬਰਾਬਰੀ ਵਾਲੀ ਸੋਚ ਹੇਠ ਪਲੀ ਇਸ ਬੇਟੀ ਵਲੋਂ, 'ਪੁੱਤਰ' ਮੋਹ ਵਿਚ ਗੁਆਚੇ ਬਾਪੂਆਂ ਨੂੰ ਪਹਿਲਾਂ ਆਪ ਗੁਰੂ ਦੀ ਸ਼ਰਨ ਵਿਚ ਮੁੜਨ ਦੀ ਬੇਨਤੀ ਹੈ।
- ਨਿਮਰਤ ਕੌਰ
