ਇੰਟਰਨੈਸ਼ਨਲ ਮਾਨੀਟਰੀ ਫ਼ੰਡ ਵਲੋਂ ਭਾਰਤ ਦੀ ਵਿਕਾਸ ਦਰ 'ਚ ਵਾਧੇ ਦੇ ਅੰਦਾਜ਼ਿਆਂ ਨੂੰ ਅਗਲੇ ਤਿੰਨ ਸਾਲਾਂ ਵਾਸਤੇ ਘਟਾ ਦਿਤੇ ਜਾਣ ਨਾਲ ਕਿਸੇ ਨੂੰ ਹੈਰਾਨੀ ਨਹੀਂ ਹੋਵੇਗੀ।
ਇੰਟਰਨੈਸ਼ਨਲ ਮਾਨੀਟਰੀ ਫ਼ੰਡ ਵਲੋਂ ਭਾਰਤ ਦੀ ਜੀ.ਡੀ.ਪੀ. ਯਾਨੀਕਿ ਵਿਕਾਸ ਦਰ 'ਚ ਵਾਧੇ ਦੇ ਅੰਦਾਜ਼ਿਆਂ ਨੂੰ ਅਗਲੇ ਤਿੰਨ ਸਾਲਾਂ ਵਾਸਤੇ ਘਟਾ ਦਿਤੇ ਜਾਣ ਨਾਲ ਕਿਸੇ ਨੂੰ ਹੈਰਾਨੀ ਨਹੀਂ ਹੋਵੇਗੀ। ਆਖ਼ਰਕਾਰ ਕਿਸੇ ਆਮ ਆਦਮੀ ਨੂੰ ਕਿਸੇ ਮਾਹਰ ਦੇ ਦੱਸਣ ਦੀ ਲੋੜ ਨਹੀਂ ਰਹੀ ਕਿ ਤੰਗੀ ਚਲ ਰਹੀ ਹੈ। ਇਹ ਤੰਗੀ ਕਿਸੇ ਵੀ ਸਮੇਂ ਮੰਦੀ ਵਲ ਜਾ ਸਕਦੀ ਹੈ।
Photo
ਗੱਡੀਆਂ ਨਹੀਂ ਵਿਕ ਰਹੀਆਂ, ਸਾਰਾ ਉਦਯੋਗ ਘਾਟੇ ਵਿਚ ਜਾ ਰਿਹਾ ਹੈ, ਕੋਲੇ ਤੇ ਬਿਜਲੀ ਦਾ ਉਤਪਾਦਨ ਘੱਟ ਰਿਹਾ ਹੈ, ਕਿਸਾਨੀ ਖ਼ਤਰੇ ਵਿਚ ਧਸਦੀ ਜਾ ਰਹੀ ਹੈ, ਬੇਰੁਜ਼ਗਾਰੀ ਵਧਦੀ ਜਾ ਰਹੀ ਹੈ, ਅਤੇ ਸਰਕਾਰ ਨੂੰ ਤਾਂ ਆਈ.ਐਮ.ਐਫ਼. ਵਲੋਂ ਦੱਸਣ ਦੀ ਲੋੜ ਨਹੀਂ ਹੋਣੀ ਚਾਹੀਦੀ ਕਿ ਆਰਥਕ ਹਾਲਾਤ ਵਿਗੜਦੇ ਹੀ ਜਾ ਰਹੇ ਹਨ।
GDP
ਪਰ ਹਮੇਸ਼ਾ ਵਾਂਗ ਇਸ ਸਰਕਾਰ ਨੂੰ ਆਰਥਕ ਮਾਹਰਾਂ ਦੇ ਸੁਝਾਅ ਚੁਭਦੇ ਹਨ ਅਤੇ ਹੁਣ ਵੀ ਇਹ ਮਾਹਰਾਂ ਦੀ ਨਹੀਂ ਸੁਣਨ ਵਾਲੇ। ਮਾੜੀ ਹਾਲਤ 'ਚੋਂ ਬਾਹਰ ਨਿਕਲਣ ਦਾ ਜਿਹੜਾ ਰਸਤਾ ਮਾਹਰ ਦਸਦੇ ਹਨ, ਉਹ ਇਹ ਹੈ ਕਿ ਸਰਕਾਰ ਅਪਣਾ ਗੁਆਚਿਆ ਵਿਸ਼ਵਾਸ ਬਹਾਲ ਕਰਨ ਲਈ ਬੁਨਿਆਦੀ ਢਾਂਚੇ 'ਤੇ ਖ਼ਰਚਾ ਕਰੇ ਜਿਸ ਨਾਲ ਲੋਕਾਂ ਦੀ ਜੇਬ ਵਿਚ ਪੈਸਾ ਆਵੇ।
Modi Govt
ਅੱਜ ਆਮ ਆਦਮੀ ਕੋਲ ਖ਼ਰਚਣ ਵਾਸਤੇ ਪੈਸਾ ਹੀ ਨਹੀਂ ਰਿਹਾ। ਸਰਕਾਰ ਨੂੰ ਕਿਸਾਨੀ ਦੇ ਖੇਤਰ ਵਿਚ ਮਜ਼ਬੂਤੀ ਲਿਆਉਣ ਦੀ ਸਲਾਹ ਵੀ ਮਾਹਰਾਂ ਨੇ ਬੜੇ ਜ਼ੋਰ ਨਾਲ ਦਿਤੀ ਹੈ। ਜਦੋਂ ਮੋਦੀ ਸਰਕਾਰ ਆਈ ਸੀ ਤਾਂ 'ਮੇਕ ਇਨ ਇੰਡੀਆ' ਦੀ ਮੁਹਿੰਮ ਸ਼ੁਰੂ ਕੀਤੀ ਗਈ ਸੀ। ਉਸ ਸਮੇਂ ਪੱਕਾ ਸੀ ਕਿ ਪ੍ਰਧਾਨ ਮੰਤਰੀ ਅੰਬੈਸਡਰ ਗੱਡੀ ਨੂੰ ਸਰਕਾਰੀ ਗੱਡੀ ਬਣਾ ਕੇ ਅਪਣੀ ਇਸ ਮੁਹਿੰਮ ਨੂੰ ਤੇਜ਼ ਕਰਨਗੇ।
Farmer
ਪਰ ਜਦੋਂ ਪ੍ਰਧਾਨ ਮੰਤਰੀ ਹੀ ਬੀ.ਐਮ.ਡਬਲਿਊ./ਮਰਸੀਡੀਜ਼ ਵਰਗੀਆਂ ਵਿਦੇਸ਼ੀ ਗੱਡੀਆਂ ਨਹੀਂ ਛੱਡ ਸਕਦੇ ਤਾਂ ਫਿਰ ਭਾਰਤ ਵਿਚ ਤਾਂ ਪਕੌੜੇ ਹੀ ਵਿਕਣਗੇ ਤੇ ਉਹੀ 'ਮੇਡ ਇਨ ਇੰਡੀਆ' ਅਖਵਾਉਣਗੇ। ਇਨ੍ਹਾਂ ਸਾਰੇ ਮਾਹਰਾਂ ਦੇ ਸੁਝਾਵਾਂ ਨੂੰ ਪਰ੍ਹਾਂ ਰੱਖ ਕੇ ਵਿੱਤ ਮੰਤਰੀ ਨੇ ਹੁਣ ਬਜਟ ਤੋਂ ਪਹਿਲਾਂ ਦੀ ਤਿਆਰੀ ਬਾਰੇ ਦਸਦਿਆਂ ਇਹ ਐਲਾਨ ਕੀਤਾ ਹੈ ਕਿ ਟੈਕਸ ਚੋਰੀ ਕਰਨ ਵਾਲਿਆਂ ਅਤੇ ਕਾਲੇ ਧਨ ਵਾਲਾ ਧੰਦਾ ਕਰਨ ਵਾਲਿਆਂ ਉਪਰੋਂ ਅਪਰਾਧਕ ਕੇਸ ਹਟਾਉਣ ਦਾ ਕੰਮ ਕਰਨਗੇ।
Photo
ਚਲੋ ਨੀਰਵ ਮੋਦੀ ਅਤੇ ਵਿਜੈ ਮਾਲਿਆ ਵਰਗਿਆਂ ਦੇ ਅੱਛੇ ਦਿਨ ਤਾਂ ਵਾਪਸ ਆ ਗਏ। ਅੱਛੇ ਦਿਨ ਕੁੱਝ ਹੋਰ ਲੋਕਾਂ ਦੇ ਵੀ ਆਏ ਹਨ। ਭਾਰਤ ਵਿਚ 63 ਲੋਕਾਂ ਦੇ ਅੱਛੇ ਦਿਨ ਆਏ ਹਨ। ਇਹ 63 ਉਹ ਖਰਬਾਂ ਪਤੀ ਵੱਡੇ ਲੋਕ ਹਨ ਜਿਨ੍ਹਾਂ ਕੋਲ ਭਾਰਤ ਦੇ 70% ਲੋਕਾਂ ਨਾਲੋਂ ਚਾਰ ਗੁਣਾਂ ਵੱਧ ਦੌਲਤ ਹੈ। ਇਹੀ ਅੰਕੜਾ ਪਿਛਲੇ ਸਾਲ ਯਾਨੀ ਕਿ 2018-19 ਵਿਚ ਇਹ ਦਸਦਾ ਸੀ ਕਿ ਭਾਰਤ ਦੇ 1% ਲੋਕਾਂ ਕੋਲ ਦੇਸ਼ ਦੀ 77% ਦੌਲਤ ਹੈ।
Photo
ਦੇਸ਼ ਵਿਚ 119 ਅਰਬਾਂਪਤੀ ਸਨ ਜਿਨ੍ਹਾਂ ਕੋਲ ਦੇਸ਼ ਦੀ 73% ਦੌਲਤ ਸੀ। ਪਰ ਇਸ ਸਾਲ ਇਨ੍ਹਾਂ ਅਬਰਾਂਪਤੀਆਂ ਦੀ ਗਿਣਤੀ 119 ਤੋਂ ਘੱਟ ਕੇ 63 ਰਹਿ ਗਈ ਹੈ (ਗਿਣਤੀ ਆਕਸਫ਼ੇਮ ਅਨੁਸਾਰ) ਭਾਰਤ ਦੀ ਸਰਕਾਰ ਗਿਣੇ ਚੁਣੇ ਅਮੀਰਾਂ ਵਾਸਤੇ ਸੋਚ ਰਹੀ ਹੈ ਜਿਸ ਦਾ ਸਬੂਤ ਹਨ ਇਹ ਅੰਕੜੇ। ਅੰਕੜੇ ਤਸਵੀਰ ਸਾਫ਼ ਕਰਦੇ ਹਨ।
Jeff Bezos
ਹਾਲ ਵਿਚ ਹੀ ਦੁਨੀਆਂ ਦਾ ਸਭ ਤੋਂ ਅਮੀਰ ਇਨਸਾਨ ਐਮੇਜ਼ਨ ਦਾ ਮਾਲਕ ਜੇਫ਼ ਬਿਜੋਸ ਭਾਰਤ ਆਇਆ ਸੀ ਅਤੇ ਉਸ ਨੇ ਐਲਾਨ ਕੀਤਾ ਸੀ ਕਿ ਉਹ ਇਕ ਬਿਲੀਅਨ ਡਾਲਰ ਭਾਰਤ ਵਿਚ ਨਿਵੇਸ਼ ਕਰੇਗਾ। ਉਸ ਦੇ ਐਲਾਨ ਦਾ ਪ੍ਰਧਾਨ ਮੰਤਰੀ ਵਲੋਂ ਸਵਾਗਤ ਕਰਨਾ ਤਾਂ ਕਿਤੇ ਰਿਹਾ, ਉਸ ਦੀ ਨਿੰਦਾ ਕਰਦਿਆਂ ਕੇਂਦਰੀ ਉਦਯੋਗ ਮੰਤਰੀ ਪੀਯੂਸ਼ ਗੋਇਲ ਨੇ ਆਖਿਆ 'ਕੋਈ ਅਹਿਸਾਨ ਥੋੜਾ ਕਰ ਰਿਹਾ ਹੈ?'
Nirmala Sitharaman
ਠੀਕ ਹੈ ਅਹਿਸਾਨ ਤਾਂ ਨਹੀਂ ਕਰ ਰਿਹਾ ਪਰ ਜੇ ਕੇਂਦਰੀ ਉਦਯੋਗ ਮੰਤਰੀ ਇਸ ਅੰਦਾਜ਼ ਵਿਚ ਹੀ ਗੱਲ ਕਰਦੇ ਰਹੇ ਤਾਂ ਕੌਣ ਆਵੇਗਾ ਭਾਰਤ ਵਿਚ ਅਪਣਾ ਪੈਸਾ ਲੈ ਕੇ? ਕਾਰਨ ਇਹ ਦਸਿਆ ਜਾ ਰਿਹਾ ਹੈ ਕਿ ਬੇਜੋਸ ਦੀ ਅਖ਼ਬਾਰ, ਪੋਸਟ, ਸਾਡੇ ਪ੍ਰਧਾਨ ਮੰਤਰੀ ਦੇ ਕੰਮਾਂ ਦੀ ਸ਼ਲਾਘਾ ਨਹੀਂ ਕਰਦੀ ਪਰ ਜੇਫ਼ ਬੇਜੋਸ ਸਾਡੇ ਛੋਟੇ ਅਤੇ ਦਰਮਿਆਨੇ ਉਦਯੋਗਾਂ ਦੀ ਮਦਦ ਕਰ ਰਿਹਾ ਹੈ।
Piyush Goyal
ਪੀਯੂਸ਼ ਗੋਇਲ ਨੂੰ ਇਸ ਹਕੀਕਤ ਦਾ ਅਹਿਸਾਸ ਹੋਣਾ ਚਾਹੀਦਾ ਹੈ। ਜਾਂ ਸ਼ਾਇਦ ਉਹ ਚਾਹੁੰਦੇ ਹੀ ਨਹੀਂ ਕਿ ਛੋਟੇ ਉਦਯੋਗਪਤੀਆਂ ਦੀ ਮਦਦ ਹੋਵੇ ਕਿਉਂਕਿ ਛੋਟੇ ਭਾਰਤੀਆਂ ਦੀ ਮੌਜੂਦਾ ਮਾੜੀ ਹਾਲਤ ਹੀ ਇਨ੍ਹਾਂ 60 ਖਰਬਪਤੀਆਂ ਦੀ ਚੜ੍ਹਤ ਦਾ ਮੁੱਖ ਕਾਰਨ ਹੈ।
Modi
ਅਸੀ ਸਮਝਦੇ ਸੀ ਕਿ ਅੱਛੇ ਦਿਨਾਂ ਦਾ ਮਤਲਬ ਹੈ ਭਾਰਤ ਦੇ ਆਮ ਲੋਕਾਂ ਦੇ ਅੱਛੇ ਦਿਨ ਆਉਣਗੇ ਪਰ ਹੁਣ ਤਾਂ ਇਕ ਵਾਰੀ ਫਿਰ ਤੋਂ ਸਾਫ਼ ਹੋ ਗਿਆ ਹੈ ਕਿ ਅੱਛੇ ਦਿਨ ਜਿਨ੍ਹਾਂ ਦੇ ਆਉਣੇ ਸਨ, ਉਹ ਆ ਚੁੱਕੇ ਹਨ। ਜੇ ਹੁਣ ਵਿੱਤ ਮੰਤਰੀ ਕਾਲਾ ਧਨ ਨੂੰ ਅਪਰਾਧ ਹੀ ਨਹੀਂ ਰਹਿਣ ਦੇਣਗੇ ਤਾਂ ਸੋਚੋ ਹੋਰ ਕਿਸ ਤਰ੍ਹਾਂ ਦੀ ਤਰੱਕੀ ਆਉਣ ਵਾਲੀ ਹੈ? -ਨਿਮਰਤ ਕੌਰ
