ਵਧਦੀ ਆਮਦਨ ਦਾ ਅਸਰ ਤਾਂ ਕੱਚੇ ਮੁਲਾਜ਼ਮਾਂ ਉਤੇ ਹੋਣਾ ਲਾਜ਼ਮੀ ਸੀ।
ਜਦ ਨੌਜਵਾਨ ਆਗੂ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਟਰਾਂਸਪੋਰਟ ਦਾ ਮਹਿਕਮਾ ਸੰਭਾਲਿਆ ਤਾਂ ਟਰਾਂਸਪੋਰਟ ਮਹਿਕਮੇ ਵਿਚ ਅਜਿਹੀ ਹਲਚਲ ਮਚੀ ਕਿ ਆਮ ਪੰਜਾਬੀ ਦੇ ਮਨ ਵਿਚ ਇਕ ਤਰ੍ਹਾਂ ਦੀ ਠੰਢ ਪੈ ਗਈ। ਪਿਛਲੇ 14 ਸਾਲ ਤੋਂ ਆਮ ਇਨਸਾਨ ਦੀ ਜੇਬ ਉਤੇ ਜਿਹੜਾ ਡਾਕਾ ਪੈ ਰਿਹਾ ਸੀ, ਉਸ ਦਾ ਹਿਸਾਬ ਲੈਣ ਦੀ ਕਿਸੇ ਨੇ ਤਾਂ ਹਿੰਮਤ ਵਿਖਾਈ। ਰਾਜਾ ਵੜਿੰਗ ਦੇ ਕੰਮ ਵਿਚ ਜੋਸ਼ ਸੀ, ਉਹੀ ਜੋਸ਼ ਜੋ ਲੋਕਾਂ ਦੇ ਦਿਲਾਂ ਵਿਚ ਉਸ ਸਮੇਂ ਜਾਗਿਆ ਸੀ ਜਦੋਂ ਉਨ੍ਹਾਂ ਨੇ ਪਿਛਲੀ ਕੈਪਟਨ ਸਰਕਾਰ ਚੁਣੀ ਸੀ। ਬੱਸ ਸਟੈਂਡਾਂ ਤੋਂ ਨਿਜੀ ਬੱਸ ਅਪ੍ਰੇਟਰਾਂ ਦੇ ਕਬਜ਼ੇ ਹਟਾਏ ਗਏ, ਟਰਾਂਸਪੋਰਟ ਵਿਭਾਗ ਦਾ ਕੰਮ ਸੁਚਾਰੂ ਰੂਪ ਵਿਚ ਚਲਣਾ ਸ਼ੁਰੂ ਹੋਇਆ ਤੇ ਫਿਰ ਖ਼ਜ਼ਾਨੇ ਵਿਚ ਆਮਦਨ ਵੀ ਵਧੀ।
Raja Warring
ਵਧਦੀ ਆਮਦਨ ਦਾ ਅਸਰ ਤਾਂ ਕੱਚੇ ਮੁਲਾਜ਼ਮਾਂ ਉਤੇ ਹੋਣਾ ਲਾਜ਼ਮੀ ਸੀ। ਫਿਰ ਇਹ ਉਮੀਦ ਜਾਗੀ ਕਿ ਸਿਆਸਤਦਾਨਾਂ ਦੀਆਂ ਨਿਜੀ ਕੰਪਨੀਆਂ ਦੇ ਲਾਇਸੰਸ ਰੱਦ ਕਰ ਦਿਤੇ ਜਾਣ ਤਾਂ ਇਹ ਰੋਜ਼ਗਾਰ ਸ਼ਾਇਦ ਪੰਜਾਬ ਦੇ ਬੇਰੋਜ਼ਗਾਰ ਨੌਜਵਾਨਾਂ ਨੂੰ ਮਿਲ ਸਕੇਗਾ। ਇਸੇ ਤਰ੍ਹਾਂ ਰੇਤ ਮਾਫ਼ੀਆ ਤੇ ਕਾਬੂ ਪਾਉਣ ਤੋਂ ਪਹਿਲਾਂ ਰੇਤਾ ਮੁਫ਼ਤ ਕੀਤਾ ਗਿਆ ਪਰ ਕਿਉਂਕਿ ਅਜਿਹਾ ਸਿਸਟਮ ਬਣ ਚੁੱਕਾ ਸੀ ਜਿਥੇ ਰੇਤਾ ਚੁਕਣ ਅਤੇ ਤੁਹਾਡੇ ਕੋਲ ਪਹੁੰਚਣ ਤਕ ਵੱਖ ਵੱਖ ਥਾਵਾਂ ਤੇ ਪੈਸੇ ਦਾ ਲੈਣ ਦੇਣ ਚਲਦਾ ਸੀ, ਇਸ ਲਈ ਸਹੀ ਕੀਮਤ ਸ਼ੁਰੂ ਹੀ ਨਹੀਂ ਹੋ ਸਕੀ।
Amrinder Singh Raja Warring
ਮੁੱਖ ਮੰਤਰੀ ਨੇ ਤਾਂ ਕੀਮਤ ਵੀ ਤੈਅ ਕਰ ਦਿਤੀ ਪਰ ਉਨ੍ਹਾਂ ਦੇ ਅਪਣੇ ਪ੍ਰਧਾਨ ਨੇ ਹੀ ਦਸ ਦਿਤਾ ਕਿ ਕੀਮਤਾਂ ਅੱਜ ਵੀ ਉਹੀ ਪਹਿਲਾਂ ਵਾਲੀਆਂ ਹੀ ਚਲ ਰਹੀਆਂ ਹਨ। ਨਸ਼ੇ ਰੋਕਣ ਲਈ ਜਿੰਨਾ ਵੀ ਸਰਕਾਰ ਕੰਮ ਕਰ ਰਹੀ ਹੈ, ਉਸ ਨਾਲ ਨਸ਼ਾ ਘੱਟ ਹੋਣ ਦਾ ਨਾਮ ਹੀ ਨਹੀਂ ਲੈ ਰਿਹਾ। ਕਾਰਨ ਨਸ਼ਾ ਸਿਸਟਮ ਵਿਚ ਨਸ਼ੇ ਦੇ ਵਪਾਰੀ ਦੀ ਬਣ ਚੁਕੀ ਤਾਕਤ ਹੈ। ਜਦ ਲੋਕ ਕਿਸੇ ਨੂੰ ਫੜਾਉਂਦੇ ਹਨ ਤਾਂ ਤਾਕਤਵਰ ਸਿਆਸਤਦਾਨ ਉਨ੍ਹਾਂ ਨੂੰ ਛੁਡਾ ਲੈਂਦੇ ਹਨ। ਪੁਲਿਸ ਦੇ ਅਪਣੇ ਲੋਕ ਇਸ ਵਪਾਰ ਨੂੰ ਫੈਲਾਉਣ ਵਿਚ ਭਾਈਵਾਲ ਬਣੇ ਹੋਏ ਹਨ ਤੇ ਅਜੇ ਵੀ ਉਹ ਜਾਲ ਵਿਛਿਆ ਹੋਇਆ ਹੈ। ਜਦ ਪੁਲਿਸ ਤੇ ਸਿਆਸਤਦਾਨ ਨਸ਼ਾ ਤਸਕਰੀ ਵਿਚ ਸ਼ਾਮਲ ਹੋਣ ਤਾਂ ਫਿਰ ਹੱਲ ਕਿਸ ਤਰ੍ਹਾਂ ਕਢਿਆ ਜਾ ਸਕਦਾ ਹੈ?
CM Channi
ਨਵੀਂ ਸਰਕਾਰ ਨੇ ਕੇਬਲ ਮਾਫ਼ੀਆ ਵਿਰੁਧ ਜੰਗ ਛੇੜ ਦਿਤੀ ਹੈ ਤੇ ਟਰਾਂਸਪੋਰਟ ਮਾਫ਼ੀਆ ਵਾਂਗ ਕੇਬਲ ਮਾਫ਼ੀਆ ਨੇ ਵੀ ਹੁਣ ਅਪਣਾ ਕਾਨੂੰਨੀ ਹੱਕ ਪੇਸ਼ ਕਰ ਦਿਤਾ ਹੈ ਜਿਸ ਤਹਿਤ ਉਹ ਖਪਤਕਾਰ ਤੋਂ ਅਪਣੀ ਮਨਚਾਹੀ ਕੀਮਤ ਵਸੂਲ ਕਰ ਸਕਦੇ ਹਨ ਅਤੇ ਉਹ ਸਹੀ ਵੀ ਹਨ। ਗ਼ਲਤੀ ਉਨ੍ਹਾਂ ਦੀ ਨਹੀਂ, ਉਸ ਸਿਸਟਮ ਦੀ ਹੈ ਜਿਸ ਨੇ ਇਕ ਵਪਾਰ ਨੂੰ ਮਾਫ਼ੀਆ ਬਣਾ ਦਿਤਾ। ਇਹ ਹੈ ਪੰਜਾਬ ਦੀ ਸੱਚਾਈ ਕਿ ਸਿਆਸਤਦਾਨ ਦੀ ਸੋਚ ਤੇ ਨੀਯਤ ਨੇ ਸੂਬੇ ਵਿਚ ਕਾਨੂੰਨੀ ਵਪਾਰ ਨੂੰ ਮਾਫ਼ੀਏ ਦਾ ਰੂਪ ਦੇ ਦਿਤਾ। ਸਿਆਸਤਦਾਨ ਨੇ ਆਪ ਵਪਾਰ ਨੂੰ ਪੰਜਾਬ ਵਿਚ ਮਾਫ਼ੀਆ ਬਣਾਇਆ ਤਾਕਿ ਉਹ ਉਸ ਦਾ ਫ਼ਾਇਦਾ ਉਠਾ ਸਕਣ।
Transport Minister Raja Warring
ਨਸ਼ੇ ਦੇ ਵਪਾਰ ਤੋਂ ਇਲਾਵਾ ਪੰਜਾਬ ਵਿਚ ਕੇਬਲ, ਰੇਤਾ, ਟਰਾਂਸਪੋਰਟ ਮਾਫ਼ੀਆ ਕਾਨੂੰਨੀ ਤਾਕਤਾਂ ਨਾਲ ਲੈਸ ਹੈ। ਸ਼ਰਾਬ ਤਾਂ ਸਰਕਾਰ ਆਪ ਵੇਚਦੀ ਹੈ ਪਰ ਇਸ ਵਿਚ ਵੀ ਮਾਫ਼ੀਆ ਬਿਠਾ ਦਿਤਾ ਗਿਆ ਹੈ ਜੋ ਸ਼ਰਾਬ ਵਪਾਰੀ ਤੋਂ ਟਰੱਕ ਪਾਸ ਹੋਣ ਦੇ ਪੈਸੇ ਲੈਂਦਾ ਹੈ। ਜਦ ਸਿਆਸਤਦਾਨ ਤੇ ਅਫ਼ਸਰਸ਼ਾਹੀ ਆਪਸ ਵਿਚ ਹੱਥ ਮਿਲਾ ਗਏ ਤਾਂ ਫਿਰ ਸ਼ਰਾਬ ਦੇ ਵਪਾਰੀਆਂ ਨੇ ਮੁਨਾਫ਼ਾ ਵਧਾਉਣ ਵਾਸਤੇ ਸ਼ਰਾਬ 10-12 ਸਾਲ ਦੇ ਬੱਚਿਆਂ ਨੂੰ ਵੀ ਵੇਚਣੀ ਸ਼ੁਰੂ ਕਰ ਦਿਤੀ ਪਰ ਸਰਕਾਰ ਫਿਰ ਵੀ ਚੁੱਪ ਰਹੀ। ਸੋ ਸ਼ਰਾਬ ਮਾਫ਼ੀਆ ਹੋਂਦ ਵਿਚ ਆ ਗਿਆ।
Amarinder Singh
ਅੱਜ ਦੀ ਸੱਚਾਈ ਸਾਬਕਾ ਮੁੱਖ ਮੰਤਰੀ ਦੇ ਮੂੰਹੋਂ ਨਿਕਲ ਗਈ ਜਦ ਉਨ੍ਹਾਂ ਆਖਿਆ ਕਿ ਕਾਂਗਰਸੀ ਆਗੂ ਆਪ ਰੇਤਾ ਮਾਫ਼ੀਆ ਦਾ ਹਿੱਸਾ ਸਨ। ਉਨ੍ਹਾਂ ਇਸ ਸਿਸਟਮ ਵਿਚ ਅਪਣੀ ਸ਼ਮੂਲੀਅਤ ਦਾ ਸਬੂਤ ਦਿਤਾ ਕਿਉਂਕਿ ਜਾਣਦੇ ਹੋਏ ਵੀ ਕਿ ਉਨ੍ਹਾਂ ਦੇ ਰਾਜ ਵਿਚ ਮਾਫ਼ੀਆ ਚਲ ਰਿਹਾ ਹੈ, ਉਹ ਫਿਰ ਵੀ ਚੁੱਪ ਰਹੇ। ਹੁਣ ਚੁੱਪੀ ਦਾ ਕਾਰਨ ਕੀ ਸੀ? ਉਹ ਕਿਉਂ ਚੁੱਪ ਰਹੇ ਅਤੇ ਚਰਨਜੀਤ ਸਿੰਘ ਚੰਨੀ ਨੂੰ ਮੰਤਰੀ ਬਣਾਇਆ ਜਦ ਕਿ ਉਹ ਮੰਨਦੇ ਸਨ ਕਿ ਉਨ੍ਹਾਂ ਦਾ ਬਾਦਲਾਂ ਨਾਲ ਸਮਝੌਤਾ ਸੀ ਜਾਂ ਉਹ ਅੱਜ ਸਿਰਫ਼ ਚੰਨੀ ਦੀ ਚੜ੍ਹਤ ਤੋਂ ਘਬਰਾ ਕੇ ਇਹ ਦੋਸ਼ ਲਗਾ ਰਹੇ ਹਨ?
CM Charanjit Singh Channi
ਅੱਜ ਤੇ ਪਿਛਲੇ 14 ਸਾਲ ਦੀ ਸਿਆਸਤ ਵਿਚ ਅੰਤਰ ਨੀਯਤ ਦਾ ਹੈ ਜਿਥੇ ਹਰ ਪਾਸੇ ਤੋਂ ਪੰਜਾਬ ਵਿਚ ਮਾਫ਼ੀਆ ਉਤੇ ਵਾਰ ਕਰਨ ਦਾ ਯਤਨ ਕੀਤਾ ਜਾ ਰਿਹਾ ਹੈ ਪਰ ਇਹ ਯਤਨ ਸਫ਼ਲ ਨਹੀਂ ਹੋ ਰਹੇ ਕਿਉਂਕਿ ਮਾਫ਼ੀਆ ਚਲਾਉਣ ਵਾਲੇ ਗੁੰਡੇ ਮਵਾਲੀ ਨਹੀਂ ਹਨ ਬਲਕਿ ਸਿਆਸਤਦਾਨ ਤੇ ਅਫ਼ਸਰ ਹਨ ਜਿਨ੍ਹਾਂ ਕਾਨੂੰਨ ਦੇ ਦਾਇਰੇ ਵਿਚ ਰਹਿ ਕੇ ਮਾਫ਼ੀਆ ਬਣਾਇਆ ਹੈ। ਮਾਫ਼ੀਆ ਨੂੰ ਕੱਢਣ ਵਾਸਤੇ ਸਿਰਫ਼ ਨੀਯਤ ਹੀ ਨਹੀਂ, ਵਕਤ ਅਤੇ ਕਾਨੂੰਨੀ ਦਾਅ ਪੇਚ ਵੀ ਚਾਹੀਦੇ ਹੁੰਦੇ ਹਨ। ਅੱਜ ਸਮੇਂ ਦੀ ਘਾਟ ਹੈ ਤੇ ਸ਼ਾਇਦ ਮਾਫ਼ੀਆ ਮਿਟ ਨਾ ਸਕੇ ਪਰ ਆਸ ਕਰਦੇ ਹਾਂ ਕਿ ਪੰਜਾਬ ਦੀ ਅਗਲੀ ਸਰਕਾਰ ਹੀ ਸ਼ਾਇਦ ਮਾਫ਼ੀਆ ਦਾ ਖ਼ਾਤਮਾ ਕਰਨ ਦੀ ਨੀਯਤ ਧਾਰ ਕੇ ਆਵੇ। -ਨਿਮਰਤ ਕੌਰ
