ਪਿਛਲੇ ਦੋ ਦਿਨਾਂ ਤੋਂ ਸੋਸ਼ਲ ਮੀਡੀਆ ਉਤੇ ਪੰਜਾਬ ਪੁਲਿਸ ਵਲੋਂ ਨੌਜੁਆਨਾਂ ਉਤੇ ਡੰਡੇ ਚਲਾਉਂਦਿਆਂ ਦੀਆਂ ਤਸਵੀਰਾਂ ਅਤੇ ਵੀਡੀਉ ਚਲ ਰਹੇ ਹਨ ਅਤੇ ਲੋਕ ਜਿਥੇ ਸਹਿਮਤੀ ਅਤੇ ਸ਼ਾਬਾਸ਼ੀ ਦੇ ਰਹੇ ਹਨ, ਉਥੇ ਹੀ ਕੁੱਝ ਲੋਕ ਇਤਰਾਜ਼ ਵੀ ਕਰ ਰਹੇ ਹਨ। ਪੰਜਾਬ ਪੁਲਿਸ ਉਨ੍ਹਾਂ ਨੌਜੁਆਨਾਂ ਉਪਰ ਡੰਡਾ ਚੁਕ ਰਹੀ ਹੈ ਜਿਹੜੇ ਕਰਫ਼ੀਊ ਦੀ ਉਲੰਘਣਾ ਕਰ ਕੇ, ਬਗ਼ੈਰ ਕਿਸੇ ਕਾਰਨ ਤੋਂ, ਸੜਕਾਂ ਉਤੇ ਉਤਰ ਆਉਂਦੇ ਹਨ ਤੇ ਅਪਣੇ ਆਪ ਸਮੇਤ, ਦੂਜਿਆਂ ਦੀਆਂ ਜ਼ਿੰਦਗੀਆਂ ਵੀ ਖ਼ਤਰੇ ਵਿਚ ਪਾ ਦੇਂਦੇ ਹਨ। ਨੌਜੁਆਨ ਕਦੇ ਬਾਹਰ ਸੁੰਨਸਾਨ ਪਸਰੀ ਵੇਖਣ ਲਈ ਅਤੇ ਕਦੇ ਗੇੜੀ ਕੱਢਣ ਦੇ ਬਹਾਨੇ ਨਿਕਲ ਆਉਂਦੇ ਹਨ।
File photo
ਡੰਡਾ ਚਲਾਉਣਾ ਆਮ ਹਾਲਾਤ ਵਿਚ ਤਾਂ ਠੀਕ ਨਹੀਂ ਆਖ ਸਕਦੇ ਪਰ ਇਹ ਹੁਣ ਆਮ ਵਰਗੇ ਹਾਲਾਤ ਨਹੀਂ ਹਨ। ਅੱਜ ਦੁਨੀਆਂ ਉਤੇ ਜਿਹੜੀ ਆਫ਼ਤ ਆਈ ਹੋਈ ਹੈ, ਇਸ ਨੂੰ ਇਕ ਆਧੁਨਿਕ ਜੰਗ ਹੀ ਆਖਿਆ ਜਾ ਸਕਦਾ ਹੈ। ਜਿਸ ਤਰ੍ਹਾਂ ਪਹਿਲਾਂ ਸਰਹੱਦਾਂ ਦੀ ਰਾਖੀ ਵਾਸਤੇ ਜੰਗਾਂ ਹੁੰਦੀਆਂ ਸਨ, ਇਹ ਅੱਜ ਦੇ ਜ਼ਮਾਨੇ ਦੀ ਜੰਗ ਹੈ। ਜੰਗ ਸਮੇਂ ਆਮ ਵਰਗੇ ਤੌਰ-ਤਰੀਕੇ ਨਹੀਂ ਅਪਣਾਏ ਜਾ ਸਕਦੇ।ਪੰਜਾਬ ਸਰਕਾਰ ਵਲੋਂ ਪੰਜਾਬੀਆਂ ਨੂੰ ਆਪੋ-ਅਪਣੇ ਘਰਾਂ ਅੰਦਰ ਰਹਿਣ ਦਾ ਮੌਕਾ ਦਿਤਾ ਗਿਆ ਸੀ ਪਰ ਲੋਕਾਂ ਨੇ ਉਸ ਜਨਤਾ-ਕਰਫ਼ੀਊ ਦਾ ਜਲੂਸ ਕੱਢ ਦਿਤਾ।
File Photo
ਹੁਣ ਬਕਾਇਦਾ ਕਰਫ਼ੀਊ ਲੱਗਣ ਦੇ ਬਾਵਜੂਦ, ਲੋਕਾਂ ਦਾ ਘਰਾਂ 'ਚੋਂ ਬਾਹਰ ਨਿਕਲਣਾ ਇਹੀ ਸਿਧ ਕਰਦਾ ਹੈ ਕਿ ਅਜੇ ਵੀ ਲੋਕ ਸਥਿਤੀ ਦੀ ਗੰਭੀਰਤਾ ਨੂੰ ਨਹੀਂ ਸਮਝ ਪਾ ਰਹੇ ਤੇ ਸਖ਼ਤੀ ਕੀਤੇ ਬਿਨਾਂ, ਸਾਡਾ ਇਕ ਭਾਗ ਤਾਂ ਕਦੇ ਵੀ ਨਹੀਂ ਸਮਝੇਗਾ। ਨੌਜੁਆਨਾਂ ਦੇ ਨਾਲ-ਨਾਲ ਇਕ ਹੋਰ ਤਬਕਾ ਹੈ ਜੋ ਗੱਲ ਦੀ ਗੰਭੀਰਤਾ ਨੂੰ ਸਮਝਣ ਤੋਂ ਇਨਕਾਰ ਕਰਨਾ ਅਪਣਾ ਹੱਕ ਸਮਝਦਾ ਹੈ ਅਤੇ ਉਹ ਹੈ ਵਿਹਲੀਆਂ ਗੱਪਾਂ ਨੂੰ ਸੱਥਾਂ ਵਿਚ ਬੈਠ ਕੇ ਮਾਣਨ ਵਾਲੇ ਬਜ਼ੁਰਗਾਂ ਦਾ। ਬਜ਼ੁਰਗਾਂ ਦੀ ਸੱਭ ਤੋਂ ਵੱਡੀ ਉਦਾਹਰਣ ਹੈ
Image
ਇਕ ਪਿੰਡ ਜਿਥੇ ਸਾਰਾ ਬਜ਼ੁਰਗ ਤਬਕਾ ਇਕੱਠਾ ਹੋ ਕੇ ਬੈਠਾ ਸੀ ਅਤੇ ਜਦੋਂ ਪੁਲਿਸ ਵਾਲੇ ਘਰਾਂ ਵਿਚ ਚਲੇ ਜਾਣ ਵਾਸਤੇ ਸਮਝਾਉਣ ਲਈ ਆਏ ਤਾਂ ਉਹ ਪੁਲਸ ਵਾਲਿਆਂ ਨਾਲ ਹੀ ਖਹਿਬੜ ਪਏ। ਪੁਲਸੀਆਂ ਉਤੇ ਕਈ ਇਲਜ਼ਾਮ ਜੜ ਦਿਤੇ ਗਏ। ਬਜ਼ੁਰਗਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਗ਼ੁਲਾਮ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਤੇ ਪਿੰਡ ਦੀ ਸੱਥ ਵਿਚ ਰਹਿ ਕੇ ਗੱਲਬਾਤ ਕਰਨ ਦਾ ਹੱਕ ਵੀ ਖੋਹ ਲੈਣਾ ਚਾਹੁੰਦੇ ਹਨ। ਕੁੱਝ ਅਜਿਹੇ ਵੀ ਬਜ਼ੁਰਗ ਹਨ ਜੋ 'ਰੱਬ ਆਸਰੇ' ਬਾਹਰ ਘੁੰਮਣ ਜਾਣਾ ਚਾਹੁੰਦੇ ਹਨ।
Image
ਕਰਫ਼ੀਊ ਵਿਚ ਉਨ੍ਹਾਂ ਦਾ ਸਾਹ ਘੁਟਣ ਲਗਦਾ ਹੈ ਅਤੇ ਸ਼ਾਇਦ ਅੱਜ ਦਾ ਕਰਫ਼ੀਊ ਉਨ੍ਹਾਂ ਨੂੰ ਪੰਜਾਬ ਦੇ ਕਾਲੇ ਦਿਨਾਂ ਦੇ ਕਰਫ਼ੀਊ ਦੀ ਯਾਦ ਕਰਵਾਉਂਦਾ ਹੋਵੇਗਾ ਜਦੋਂ ਇਹ ਸੰਨਾਟਾ ਗੋਲੀਆਂ ਨਾਲ ਟੁਟਦਾ ਸੀ। ਪੰਜਾਬ ਪੁਲਿਸ ਦੀ ਸਖ਼ਤੀ ਵੀ ਪੁਰਾਣੇ ਦਿਨਾਂ ਦੀ ਯਾਦ ਕਰਵਾਉਂਦੀ ਹੋਵੇਗੀ ਪਰ ਅੱਜ ਤਸਵੀਰ ਬਹੁਤ ਵਖਰੀ ਹੈ। ਇਹ ਨਹੀਂ ਆਖਿਆ ਜਾ ਸਕਦਾ ਕਿ ਇਹ ਜੋ ਜੰਗ ਹੈ, ਇਹ ਕੁਦਰਤ ਦਾ ਕਹਿਰ ਹੀ ਹੈ ਜਾਂ ਉਨ੍ਹਾਂ ਵਿਗਿਆਨਕ ਤਜਰਬਿਆਂ ਦਾ ਨਤੀਜਾ ਜਿਸ ਦੇ ਜ਼ੋਰ ਤੇ ਚੀਨ ਨੇ ਦੁਨੀਆਂ ਨੂੰ ਮੁੱਠੀ ਵਿਚ ਕਰਨ ਦੀ ਯੋਜਨਾ ਬਣਾਈ ਹੈ।
Image
ਹਕੀਕਤ ਹੁਣ ਇਹੀ ਹੈ ਕਿ ਇਸ ਕੋਰੋਨਾ ਨੇ ਸਾਡੇ ਪੰਜਾਬ ਤੇ ਸਾਡੇ ਦੇਸ਼ 'ਚ ਅਪਣੇ ਪੈਰ ਜਮਾ ਲਏ ਹਨ ਅਤੇ ਹੁਣ ਹਰ ਕਿਸੇ ਨੂੰ ਸਿਪਾਹੀ ਬਣ ਕੇ ਜਾਂ ਤਾਂ ਸਰਕਾਰ ਦੀਆਂ ਹਦਾਇਤਾਂ ਨੂੰ ਮੰਨਣਾ ਪਵੇਗਾ ਨਹੀਂ ਤਾਂ ਡੰਡਾ ਚਲਾਉਣ ਤੋਂ ਸਿਵਾ ਸਰਕਾਰ ਕੋਲ ਚਾਰਾ ਹੀ ਕੋਈ ਨਹੀਂ ਰਹਿਣਾ। ਜੇਲ ਦੀ ਸਜ਼ਾ ਵੀ ਹੋ ਸਕਦੀ ਹੈ। ਪਰ ਜੇਲਾਂ ਵਿਚੋਂ ਤਾਂ ਅਜੇ ਪਹਿਲੇ ਕੈਦੀਆਂ ਵੀ ਨੂੰ ਛਡਿਆ ਜਾ ਰਿਹਾ ਹੈ। ਤਾਂ ਕੀ ਉਹ ਘਰਾਂ ਵਿਚ ਸੁਰੱਖਿਅਤ ਰਹਿ ਸਕਣਗੇ? ਅਜੇ ਪੰਜਾਬ ਪੁਲਿਸ ਨੇ ਜਾਂ ਤਾਂ ਡੰਡਾ ਚਲਾਇਆ ਹੈ ਜਾਂ ਉਠਕ-ਬੈਠਕ ਕਰਵਾਈ ਹੈ।
Image
ਤੇਲੰਗਾਨਾ ਦੇ ਮੁੱਖ ਮੰਤਰੀ ਨੇ ਤਾਂ ਆਖ ਦਿਤਾ ਹੈ ਕਿ ਜੇ ਲੋਕਾਂ ਨੇ ਕਰਫ਼ੀਊ ਦੀ ਬੰਦਸ਼ ਨਾ ਮੰਨੀ ਤਾਂ ਉਹ ਵੇਖਦਿਆਂ ਗੋਲੀ ਮਾਰਨ ਦੇ ਹੁਕਮ ਦੇਣ ਤੋਂ ਵੀ ਪਿੱਛੇ ਨਹੀਂ ਹਟਣਗੇ। ਰੂਸ ਦੇ ਪ੍ਰਧਾਨ ਮੰਤਰੀ ਨੇ ਹੁਕਮ ਦਿਤੇ ਹਨ ਕਿ ਜੇ ਕਿਸੇ ਨੇ ਘਰਾਂ 'ਚੋਂ ਬਾਹਰ ਨਿਕਲਣ ਦੀ ਹਿੰਮਤ ਕੀਤੀ ਜਾਂ ਸਰਕਾਰ ਦੀਆਂ ਹਦਾਇਤਾਂ ਦੀ ਪਾਲਣਾ ਨਾ ਕੀਤੀ ਤਾਂ ਉਸ ਨੂੰ 5 ਸਾਲ ਦੀ ਸਖ਼ਤ ਕੈਦ ਦੀ ਸਜ਼ਾ ਦਿਤੀ ਜਾ ਸਕੇਗੀ।
File photo
ਸਾਰੇ ਲੋਕਾਂ ਨੂੰ ਸਮਝਣ ਦੀ ਲੋੜ ਹੈ ਕਿ ਇਸ ਜੰਗ ਵਿਚ ਸਰਕਾਰ ਦੀ ਫ਼ੌਜ ਉਸ ਦੀ ਜਨਤਾ ਹੈ। ਇਸ ਵਾਸਤੇ ਹਰ ਨਾਗਰਿਕ ਨੂੰ ਸਿਰਫ਼ ਘਰ ਅੰਦਰ ਬੈਠਣ ਦੀ ਲੋੜ ਹੈ। ਜਿਸ ਨੂੰ ਅਜੇ ਵੀ ਸ਼ੱਕ ਹੈ, ਉਹ ਨਵਾਂਸ਼ਹਿਰ ਦੇ ਮ੍ਰਿਤਕ ਬਜ਼ੁਰਗ ਬਲਦੇਵ ਸਿੰਘ ਦੇ ਪ੍ਰਵਾਰ ਵਲ ਵੇਖ ਲੈਣ। ਬਲਦੇਵ ਸਿੰਘ ਨੇ 14 ਦਿਨ ਘਰ ਅੰਦਰ ਬੈਠਣਾ ਕਬੂਲ ਨਾ ਕੀਤਾ ਅਤੇ ਹੋਲਾ-ਮਹੱਲਾ ਦੇ ਸਮਾਗਮ ਵਿਚ ਆਨੰਦਪੁਰ ਸਾਹਿਬ ਵੀ ਚਲਾ ਗਿਆ।
File photo
ਉਸ ਦੀ ਅਪਣੀ ਮੌਤ ਵੀ ਹੋਈ ਅਤੇ ਆਨੰਦਪੁਰ ਸਾਹਿਬ ਵਿਖੇ ਕੰਮ ਕਰਦੇ ਪੰਜਾਬ ਪੁਲਿਸ ਦੇ ਇਕ ਸਿਪਾਹੀ ਨੂੰ ਵੀ ਇਹ ਬਿਮਾਰੀ ਹੋ ਗਈ। ਉਸ ਨੇ ਅਪਣੇ ਪ੍ਰਵਾਰ ਦੇ 5 ਜੀਆਂ ਨੂੰ ਵੀ ਇਹ ਬਿਮਾਰੀ ਲਾ ਦਿਤੀ ਜਿਨ੍ਹਾਂ ਵਿਚ ਉਸ ਦਾ 6 ਸਾਲ ਦਾ ਪੋਤਾ ਵੀ ਹੈ। ਅਪਣਿਆਂ ਅਤੇ ਬੇਗਾਨਿਆਂ ਦੀ ਜਾਨ ਨੂੰ ਖ਼ਤਰੇ 'ਚ ਪਾ ਦਿਤਾ ਪਰ ਸਰਕਾਰ ਦੀ 14 ਦਿਨ ਘਰ ਅੰਦਰ ਬੈਠਣ ਦੀ ਹਦਾਇਤ ਨੂੰ ਪ੍ਰਵਾਨ ਨਾ ਕੀਤਾ।
File Photo
ਸੋ ਜੇਕਰ ਅੱਜ ਕੁੱਝ ਲੋਕਾਂ ਨੂੰ ਸਮਝਾਉਣ ਵਾਸਤੇ ਡੰਡੇ ਪੈ ਰਹੇ ਹਨ ਤਾਂ ਇਸ ਨੂੰ ਪੂਰੀ ਤਰ੍ਹਾਂ ਗ਼ਲਤ ਵੀ ਨਹੀਂ ਠਹਿਰਾਇਆ ਜਾ ਸਕਦਾ। ਪੁਲਿਸ ਵਾਲੇ ਇਸ ਵੇਲੇ ਲੋਕਾਂ ਨੂੰ ਇਸ ਬਿਮਾਰੀ ਤੋਂ ਬਚਾਉਣ ਲਈ ਡੰਡਾ ਚੁਕ ਰਹੇ ਹਨ। ਜੇ ਡੰਡੇ ਨਹੀਂ ਖਾਣੇ ਤਾਂ ਕਿਸੇ ਜ਼ਰੂਰੀ ਲੋੜ ਤੋਂ ਬਿਨਾ, ਬਾਹਰ ਨਾ ਨਿਕਲੋ। ਬਸ ਏਨੀ ਕੁ ਗੱਲ ਹੀ ਤਾਂ ਹੈ। -ਨਿਮਰਤ ਕੌਰ
