10 ਫ਼ਰਵਰੀ ਦੇ ਰੋਜ਼ਾਨਾ ਸਪੋਕਸਮੈਨ ਵਿਚ ਪੰਨਾ ਨੰ. 4 ਤੇ ਛਪੀ ਖ਼ਬਰ ਹੈਰਾਨ ਕਰਨ ਵਾਲੀ ਹੈ ਕਿ ਸ਼੍ਰੀ ਮਾਛੀਵਾੜਾ ਸਾਹਿਬ ਬਲਾਕ ਵਿਚ 37 ਸਕੂਲਾਂ ਵਿਚ.....
10 ਫ਼ਰਵਰੀ ਦੇ ਰੋਜ਼ਾਨਾ ਸਪੋਕਸਮੈਨ ਵਿਚ ਪੰਨਾ ਨੰ. 4 ਤੇ ਛਪੀ ਖ਼ਬਰ ਹੈਰਾਨ ਕਰਨ ਵਾਲੀ ਹੈ ਕਿ ਸ਼੍ਰੀ ਮਾਛੀਵਾੜਾ ਸਾਹਿਬ ਬਲਾਕ ਵਿਚ 37 ਸਕੂਲਾਂ ਵਿਚ ਸਿਰਫ਼ ਇਕ-ਇਕ ਅਧਿਆਪਕ ਹੀ ਪੜ੍ਹਾ ਰਿਹਾ ਹੈ। ਸ਼੍ਰੀ ਮਾਛੀਵਾੜਾ ਸਾਹਿਬ ਬਲਾਕ, ਸਿਖਿਆ ਪੱਖੋਂ ਹੀ ਨਹੀਂ, ਸਿਹਤ ਪੱਖੋਂ ਵੀ ਕਾਫ਼ੀ ਬਿਮਾਰ ਹੈ। ਇਸ ਬਲਾਕ ਦੇ ਸਿਹਤ ਮਹਿਕਮੇ ਵਿਚ ਵੀ ਕੁੱਲ 20 ਸਬ-ਸੈਂਟਰ ਹਨ, ਜਿਨ੍ਹਾਂ ਵਿਚੋਂ 8 ਸਬ ਸੈਂਟਰ ਖ਼ਾਲੀ ਹਨ ਤੇ ਸਿਰਫ਼ 12 ਸਬ ਸੈਂਟਰਾਂ ਤੇ ਹੀ ਏ.ਐਨ.ਐਮਜ਼ ਤਾਇਨਾਤ ਹਨ ਜਿਨ੍ਹਾਂ ਨੂੰ ਦੋ-ਦੋ, ਸੈਂਟਰਾਂ ਦਾ ਕੰਮ ਕਰਨਾ ਪੈ ਰਿਹਾ ਹੈ।
ਸਿਹਤ ਮਹਿਕਮੇ ਵਿਚ ਇਕ ਤਾਂ ਰਜਿਸਟਰ ਵਰਕ ਦਾ ਏਨਾ ਬੋਝ ਹੈ, ਉਪਰੋਂ ਜਨਮ ਮੌਤ ਦੇ ਸਰਟੀਫ਼ਿਕੇਟਾਂ ਨੂੰ ਵੀ ਕੰਪਿਊਟਰ ਤੇ ਆਨ ਲਾਈਨ ਕਰਨਾ ਪੈ ਰਿਹਾ ਹੈ। ਮਹਿਕਮਾ ਨਵੀਆਂ ਨਿਯੁਕਤੀਆਂ ਨਹੀਂ ਕਰ ਰਿਹਾ। ਇਸ ਬਲਾਕ ਵਿਚ 5 ਪੋਸਟਾਂ ਐਲ.ਐਚ.ਵੀਜ਼ ਦੀਆਂ ਹਨ ਜਿਨ੍ਹਾਂ ਵਿਚੋਂ ਪੋਸਟਾਂ ਲਗਭਗ ਨਾਂ ਦੀਆਂ ਹੀ ਭਰੀਆਂ ਹਨ ਕਿਉਂਕਿ ਦੋ ਪੋਸਟਾਂ ਤੇ ਕੰਮ ਕਰਦੀਆਂ ਐਲ. ਐਚ. ਵੀਜ਼ ਡੈਪੂਟੇਸ਼ਨ ਕਰਵਾ ਕੇ ਅਪਣੇ ਪਿੱਤਰੀ ਜ਼ਿਲ੍ਹਿਆਂ ਵਿਚ ਚਲੀਆਂ ਗਈਆਂ ਹਨ ਤੇ ਇਕ ਐਲ.ਐਚ. ਵੀ ਨੇ 28 ਫ਼ਰਵਰੀ ਨੂੰ ਰਿਟਾਇਰ ਹੋ ਜਾਣਾ ਹੈ।
ਪਿੱਛੇ ਸਿਰਫ ਇਕ ਐਲ. ਐਚ. ਵੀ. ਰਹਿ ਜਾਣੀ ਹੈ। ਸਿਤਮ ਵੇਖੋ ਪੋਸਟਾਂ ਖ਼ਾਲੀ ਹਨ ਤੇ ਸਰਕਾਰ ਏ.ਐਨ.ਐਮਜ਼ ਦੀਆਂ ਪਦਉਨਤੀਆਂ ਕਰ ਕੇ ਐਲ.ਐਚ.ਵੀਜ਼ ਦੀਆਂ ਪੋਸਟਾਂ ਨਹੀਂ ਭਰ ਰਹੀ। ਸਿਹਤ ਮਹਿਕਮੇ ਦਾ ਢੰਗ ਹੀ ਨਿਰਾਲਾ ਹੈ। ਇਹ ਐਲ-ਐਚ-ਵੀਜ਼ ਦੀ ਪਦ ਉੱਨਤੀ ਸਮੇਂ ਉਨ੍ਹਾਂ ਨੂੰ ਦੂਰ ਦੁਰਾਡੇ ਸਟੇਸ਼ਨਾਂ ਉਤੇ ਭੇਜ ਦਿੰਦਾ ਹੈ ਤੇ ਫਿਰ ਡੈਪੂਟੇਸ਼ਨ ਦੀ ਆੜ ਹੇਠ ਅਫ਼ਸਰਸ਼ਾਹੀ ਭ੍ਰਿਸ਼ਟਾਚਾਰ ਕਰ ਕੇ ਅਪਣੇ ਹੱਥ ਰੰਗਦੀ ਹੈ।
ਸਿਹਤ ਮਹਿਕਮੇ ਨੂੰ ਚਾਹੀਦਾ ਹੈ ਕਿ ਉਹ ਪਦਉੱਨਤੀ ਸਮੇਂ ਨਿਯੁਕਤ ਏ.ਐਨ.ਐਮ ਨੂੰ ਉਸ ਦੇ ਮੌਜੂਦਾ ਪਿਤਰੀ ਜ਼ਿਲ੍ਹੇ ਜਾਂ ਬਲਾਕ ਵਿਚ ਹੀ ਤਾਇਨਾਤ ਕਰੇ ਤੇ ਭ੍ਰਿਸ਼ਟਾਚਾਰ ਨੂੰ ਜਾਂਦਾ ਰਾਹ ਬੰਦ ਕਰੇ।
-ਸੁਖਮਿੰਦਰ ਬਾਗ਼ੀ, ਆਦਰਸ਼ ਨਗਰ ਸਮਰਾਲਾ, ਸੰਪਰਕ : 94173-94805
