Advertisement
  ਵਿਚਾਰ   ਸੰਪਾਦਕੀ  28 Sep 2020  ਕਿਸਾਨਾਂ ਨੂੰ ਵਪਾਰੀਆਂ ਦੇ ਗ਼ੁਲਾਮ ਬਣਾ ਦੇਵੇਗਾ ਖੇਤੀ ਸੁਧਾਰ ਐਕਟ 2020

ਕਿਸਾਨਾਂ ਨੂੰ ਵਪਾਰੀਆਂ ਦੇ ਗ਼ੁਲਾਮ ਬਣਾ ਦੇਵੇਗਾ ਖੇਤੀ ਸੁਧਾਰ ਐਕਟ 2020

ਸਪੋਕਸਮੈਨ ਸਮਾਚਾਰ ਸੇਵਾ
Published Sep 28, 2020, 7:55 am IST
Updated Sep 28, 2020, 7:55 am IST
ਮੰਡੀ 'ਚ ਵਪਾਰੀ ਵਲੋਂ ਮਨ ਭਾਉਂਦਾ ਰੇਟ ਦਿੱਤਾ ਜਾਵੇਗਾ, ਜੋ ਕਿਸਾਨ ਨੂੰ ਆਰਥਕ ਤੌਰ 'ਤੇ ਤਬਾਹ ਕਰ ਦੇਵੇਗਾ।
Farmers Protest
 Farmers Protest

ਅੱਜ ਤੋਂ ਤਕਰੀਬਨ ਵੀਹ ਸਾਲ ਪਹਿਲਾਂ ਫ਼ਸਲਾਂ ਦੇ ਰੇਟ ਕਾਫ਼ੀ ਘੱਟ ਸਨ ਪਰ ਇਸ ਤੋਂ ਬਾਅਦ ਫ਼ਸਲਾਂ ਦਾ ਘੱਟੋ ਘੱਟ ਸਮਰਥਨ ਮੁਲ ਵਧਦਾ ਗਿਆ ਜਿਸ ਨਾਲ ਕਿਸਾਨਾਂ ਨੂੰ ਕਾਫ਼ੀ ਫ਼ਾਇਦਾ ਹੋਇਆ ਪਰ ਹਾਲ ਵਿਚ ਹੀ ਕੇਂਦਰ ਦੀ ਮੋਦੀ ਸਰਕਾਰ ਵਲੋਂ ਕਿਸਾਨਾਂ ਦੀਆਂ ਫ਼ਸਲਾਂ ਸਬੰਧੀ ਪਾਸ ਕੀਤੇ ਆਰਡੀਨੈਂਸ ਨੇ ਕਿਸਾਨਾਂ ਦੇ ਸਾਹ ਸੂਤ ਦਿਤੇ ਹਨ। ਇਸ ਨਾਲ ਮੰਡੀ 'ਚ ਘੱਟੋ ਘੱਟ ਭਾਅ ਉਤੇ ਵਿਕਦੀਆਂ ਫ਼ਸਲਾਂ ਨੂੰ ਵੇਚਣ ਵਿਚ ਸੰਕਟ ਪੈਦਾ ਹੋ ਗਿਆ ਹੈ ਕਿਉਂਕਿ ਬਾਸਮਤੀ ਵਾਂਗ ਜੇਕਰ ਇਹ ਦੋਵੇਂ ਫ਼ਸਲਾਂ, ਝੋਨਾ ਅਤੇ ਕਣਕ, ਵੀ ਵਿਕਣ ਲੱਗ ਗਈਆਂ ਤਾਂ ਕਿਸਾਨਾਂ ਦੇ ਹੱਥ ਕੁੱਝ ਨਹੀਂ ਰਹਿਣਾ। ਮੰਡੀ 'ਚ ਵਪਾਰੀ ਵਲੋਂ ਮਨ ਭਾਉਂਦਾ ਰੇਟ ਦਿੱਤਾ ਜਾਵੇਗਾ, ਜੋ ਕਿਸਾਨ ਨੂੰ ਆਰਥਕ ਤੌਰ 'ਤੇ ਤਬਾਹ ਕਰ ਦੇਵੇਗਾ।

Farmers ProtestFarmers Protest

ਅਸਲ 'ਚ ਇਹ ਉਸੇ ਤਰ੍ਹਾਂ ਦੀ ਹੀ ਕਹਾਣੀ ਘੜੀ ਜਾ ਰਹੀ ਹੈ ਜਿਵੇਂ ਇਕ ਮੋਬਾਈਲ ਕੰਪਨੀ ਨੇ ਘੜੀ ਸੀ। ਇਸ ਮੋਬਾਈਲ ਕੰਪਨੀ ਨੇ ਕੁੱਝ ਪੈਸਿਆਂ ਨਾਲ ਪਹਿਲਾਂ ਕਈ ਮਹੀਨੇ ਮੁਫ਼ਤ ਗੱਲ ਕਰਨ ਤੇ ਇੰਟਰਨੈੱਟ ਵਰਤਣ ਦੀ ਗਾਹਕਾਂ ਨੂੰ ਖੁਲ੍ਹ ਕੇ ਸਹੂਲਤ ਦਿਤੀ। ਇਸ ਨਾਲ ਕੰਪਨੀ ਦੇ ਖ਼ੂਬ ਕੁਨੈਕਸ਼ਨ ਵਿਕੇ ਤੇ ਨਵੇਂ ਗਾਹਕ ਜੁੜਦੇ ਗਏ, ਇਥੋਂ ਤਕ ਕਿ ਗਾਹਕਾਂ ਦੀ ਗਿਣਤੀ ਕਰੋੜਾਂ ਵਿਚ ਪਹੁੰਚ ਗਈ। ਜਦੋਂ ਕੰਪਨੀ ਨੇ ਵੇਖਿਆ ਕਿ ਗਾਹਕ ਇਸ ਸਹੂਲਤ ਦੇ ਆਦੀ ਹੋ ਚੁੱਕੇ ਹਨ ਤੇ ਇਸ ਨੂੰ ਛੱਡ ਨਹੀਂ ਸਕਦੇ ਤਾਂ ਹੌਲੀ-ਹੌਲੀ ਮੁਫ਼ਤ ਗੱਲ ਕਰਨ ਤੇ ਇੰਟਰਨੈੱਟ ਵਰਤਣ ਦਾ ਸਮਾਂ ਘਟਾ ਕੇ ਉਲਟਾ ਖ਼ਰਚਾ ਵਧਾਉਣਾ ਸ਼ੁਰੂ ਕਰ ਦਿਤਾ। ਇਸ ਨੂੰ ਵਪਾਰ ਦੀ ਇਕ ਘਾਗ ਨੀਤੀ ਕਿਹਾ ਜਾਂਦਾ ਹੈ।

Farmers ProtestFarmers Protest

ਇਹੀ ਕੁੱਝ ਕਿਸਾਨਾਂ ਨਾਲ ਹੋਣਾ ਹੈ ਜੇਕਰ ਇਨ੍ਹਾਂ ਦੋਵਾਂ ਫ਼ਸਲਾਂ ਦਾ ਸਰਕਾਰ ਨੇ ਘੱਟੋ ਘੱਟ ਖ਼ਰੀਦ ਮੁੱਲ ਜਾਰੀ ਰਖਿਆ ਵੀ ਤਾਂ ਖ਼ਰੀਦ ਐਨੀ ਘੱਟ ਕਰ ਦਿਤੀ ਜਾਵੇਗੀ ਕਿ ਕਿਸਾਨ ਮਜਬੂਰੀ ਵੱਸ ਨਿਜੀ ਕੰਪਨੀਆਂ ਕੋਲ ਫ਼ਸਲ ਵੇਚਣ ਲਈ ਮਜਬੂਰ ਹੋਵੇਗਾ ਜਿਸ ਦਾ ਹੋ ਸਕਦੈ ਸ਼ੁਰੂ ਵਿਚ ਜ਼ਿਆਦਾ ਭਾਅ ਦੇ ਦਿਤਾ ਜਾਵੇ ਪਰ ਸਮੇਂ ਦੇ ਬੀਤਣ ਨਾਲ ਇਹ ਖ਼ਰੀਦ ਅਤੇ ਮੁੱਲ ਤੈਅ ਕਰਨ ਦੀ ਕਮਾਨ ਵਪਾਰੀ ਹੱਥ ਆ ਜਾਵੇਗੀ ਤੇ ਕਿਸਾਨ ਵਪਾਰੀਆਂ ਦਾ ਗ਼ੁਲਾਮ ਬਣ ਜਾਵੇਗਾ।

Farmers protestFarmers protest

 ਅੰਬਾਨੀਆਂ ਅਡਾਨੀਆਂ ਨੂੰ ਵਪਾਰਕ ਪੱਖੋਂ ਹਰ ਸਹੂਲਤ ਦੇਣ ਵਾਲੀਆਂ ਸਰਕਾਰਾਂ ਦੀ ਮੈਲੀ ਅੱਖ ਅਸਲ ਵਿਚ ਕਿਸਾਨਾਂ ਦੀਆਂ ਜ਼ਰਖ਼ੇਜ਼ ਜ਼ਮੀਨਾਂ ਉਤੇ ਹੈ ਤੇ ਇਸ ਖੇਡ ਵਿਚ ਸੱਭ ਤੋਂ ਗ਼ਰਕੀ ਹੋਈ ਭੂਮਿਕਾ ਕਿਸਾਨਾਂ ਦੇ ਵੱਡੇ ਮਸੀਹਾ ਅਖਵਾਉਣ ਵਾਲੇ ਬਾਦਲ ਪ੍ਰਵਾਰ ਨੇ ਨਿਭਾਈ ਹੈ ਜਿਸ ਨੇ ਖੇਤੀ ਆਰਡੀਨੈਂਸ ਵਿਰੁਧ ਕੋਈ ਜ਼ੁੰਮੇਵਾਰੀ ਵਾਲੀ ਭੂਮਿਕਾ ਨਹੀਂ ਨਿਭਾਈ।

Farmers Protest at Mohali Farmers Protest

ਕਾਂਗਰਸ ਸਰਕਾਰ ਨੇ ਵੀ ਰਾਜਨੀਤਕ ਪੱਖੋਂ ਇਸ ਬਿੱਲ ਦੀ ਵਿਰੋਧਤਾ ਕਰ ਕੇ ਸਿਰਫ਼ ਕਿਸਾਨਾਂ ਨੂੰ ਖ਼ੁਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਇਸ ਸੱਭ ਦੇ ਦਰਮਿਆਨ ਸਿਆਸਤਦਾਨਾਂ ਨੇ ਚਲਾਕੀ ਨਾਲ ਕਿਸਾਨਾਂ ਦੇ ਹੱਕਾਂ ਉਤੇ ਆਪ ਡਾਕਾ ਮਰਵਾਇਆ ਹੈ। ਕਿਸਾਨ ਧਰਨੇ ਦੇ ਰਹੇ ਹਨ, ਸੜਕਾਂ ਜਾਮ ਕਰ ਰਹੇ ਹਨ। ਇਹ ਠੀਕ ਹੈ ਕਿ ਹੱਕਾਂ ਖ਼ਾਤਰ ਲੜਾਈ ਲੜਨੀ ਪੈਂਦੀ ਹੈ ਪਰ ਵੋਟਾਂ ਪਾਉਣ ਵੇਲੇ ਅਪਣੇ ਨਾਲ ਧ੍ਰੋਹ ਕਮਾਉਣ ਵਾਲੇ ਸਵਾਰਥੀ ਸਿਆਸਤਦਾਨਾਂ ਦੀ ਪਹਿਚਾਣ ਕਰਨੀ ਵੀ ਜ਼ਰੂਰੀ ਹੈ।                      
                                                                 -ਪ੍ਰੋ. ਧਰਮਜੀਤ ਸਿੰਘ ਜਲਵੇੜਾ, ਸੰਪਰਕ : 94784-60084

Location: India, Punjab
Advertisement
Advertisement

 

Advertisement
Advertisement