ਮਾਨਸਾ : ਸਿੱਖ ਧਰਮ ਵਿਚ ਪ੍ਰਚਲਤ ਸ਼ਬਦ ਗੁਰੂ ਸਿਧਾਂਤ ਨੂੰ ਖੋਰਾ ਲਾਉਣ ਲਈ ਹੁਣ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਵਲੋਂ ਗੁਪਤ ਰੂਪ ਵਿਚ ਆਰੰਭੀਆਂ ਹੋਈਆਂ ਕਾਰਵਾਈਆਂ ਦਾ ਪਰਦਾਫ਼ਾਸ਼ ਹੋਣ ਲੱਗਾ ਹੈ। ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਆਗੂ ਸੁਖਚੈਨ ਸਿੰਘ ਅਤਲਾ ਨੇ ਸਪੋਕਸਮੈਨ ਨਾਲ ਵਿਸ਼ੇਸ਼ ਗੱਲਬਾਤ ਕਰਦਿਆਂ ਦਸਿਆ ਹੈ ਕਿ ਦਿੱਲੀ ਕਮੇਟੀ ਨੇ ਜੋ ਨਿਤਨੇਮ ਲਈ ਗੁਰਬਾਣੀ ਦੇ ਗੁਟਕਾ ਸਾਹਿਬ ਛਾਪੇ ਹਨ ਉਨ੍ਹਾਂ 'ਤੇ ਜਿਥੇ ਵਪਾਰੀਆਂ ਦੇ ਨਿਜੀ ਵਪਾਰ ਨੂੰ ਉਤਸ਼ਾਹਤ ਕਰਨ ਲਈ ਇਸ਼ਤਿਹਾਰ ਛਾਪੇ ਜਾਂਦੇ ਹਨ ਉਥੇ ਹੀ ਲਿਪੀਆਂਤਰ ਵੀ ਗ਼ਲਤ ਦਰਜ ਕੀਤਾ ਹੈ।  ਦਿੱਲੀ ਕਮੇਟੀ ਸਿੱਖ ਸੰਗਤਾਂ ਦੇ ਪੈਸੇ ਨਾਲ ਹੀ ਸਿੱਖੀ ਪ੍ਰਚਾਰ ਨਹੀਂ ਕਰ ਰਹੀ ਬਲਕਿ ਨੁਕਸਾਨ ਕਰਨ ਵਿਚ ਰੁਝੀ ਹੋਈ ਹੋਈ ਹੈ।

Delhi Sikh Gurdwara Management Committee sacrilege Gurbani

ਸੁਖਚੈਨ ਸਿੰਘ ਅਤਲਾ ਨੇ ਸਪੋਕਸਮੈਨ ਨੂੰ ਇਸ਼ਤਿਹਾਰਾਂ ਵਾਲੇ ਗੁਰਬਾਣੀ ਦੇ ਇਨ੍ਹਾਂ ਗੁਟਕਿਆਂ ਦੀਆਂ ਫ਼ੋਟੋਆਂ ਦਿੰਦੇ ਹੋਏ ਕਿਹਾ ਕਿ ਸਿੱਖ ਧਰਮ ਦੇ ਸ਼ਬਦ ਗੁਰੂ ਸਿਧਾਂਤ ਨੂੰ ਖੋਰਾ ਲਾਉਣ ਵਾਲੀਆਂ ਤਾਕਤਾਂ ਦੇ ਲੀਡਰ ਸਰਕਾਰਾਂ, ਐਸਜੀਪੀਸੀ ਅਤੇ ਅਦਾਲਤਾਂ 'ਤੇ ਭਾਰੂ ਹਨ। ਇਨ੍ਹਾਂ ਹੀ ਤਾਕਤਾਂ ਵਲੋਂ ਪ੍ਰਾਈਵੇਟ ਪਬਲਿਸ਼ਰਜ਼ ਰਾਹੀਂ ਲਗਾਤਾਰ ਗੁਰਬਾਣੀ ਨਾਲ ਸਬੰਧਤ ਪੋਥੀਆਂ, ਗੁਟਕੇ ਅਤੇ ਸਿੱਖ ਇਤਿਹਾਸ ਦੀ ਰੂਹ ਨੂੰ ਮਾਰਨ ਵਾਲਾ ਮਟੀਰੀਅਲ ਬਿਨਾਂ ਕਿਸੇ ਡਰ ਅਤੇ ਭੈਅ ਦੇ ਛਾਪ ਕੇ ਬਾਜ਼ਾਰ ਵਿਚ ਵੇਚਿਆ ਜਾ ਰਿਹਾ ਹੈ।

Delhi Sikh Gurdwara Management Committee sacrilege Gurbani

ਐਸਜੀਪੀਸੀ ਨੇ ਲੰਘੇ ਤਿੰਨ ਦਹਾਕਿਆਂ ਵਿਚ ਗੁਰਬਾਣੀ ਅਤੇ ਗੁਰ ਇਤਿਹਾਸ ਦੇ ਅਪਮਾਨ ਸਮੇਤ ਪੰਜਾਬ ਤੇ ਸਿੱਖ ਸਭਿਆਚਾਰ ਦਾ ਸੱਭ ਤੋਂ ਵੱਧ ਨੁਕਸਾਨ ਕਰ ਕੇ ਕਾਲੇ ਇਤਿਹਾਸ ਦੇ ਦਰਜਨਾਂ ਨਵੇਂ ਹੋਰ ਚੈਪਟਰ ਲਿਖ ਦਿਤੇ ਹਨ। ਭਾਈ ਅਤਲਾ ਨੇ ਕਿਹਾ ਅੰਮ੍ਰਿਤਸਰ ਕਮੇਟੀ ਅਤੇ ਦਿੱਲੀ ਕਮੇਟੀ ਅੰਦਰ ਸਿੱਖ ਵਿਰੋਧੀ ਲਾਬੀ ਦੀ ਦਹਾਕਿਆਂ ਤੋਂ ਮਜ਼ਬੂਤ ਪਕੜ ਬਣੀ ਹੋਈ ਹੈ। ਇਹੀ ਲਾਬੀ ਸਿੱਖ ਗੁਰੂ ਸਾਹਿਬ ਜੀ ਦੇ ਜੀਵਨ ਆਧਾਰਤ ਫ਼ਿਲਮਾਂ ਬਣਾਉਣ ਅਤੇ ਮਨਜ਼ੂਰੀਆਂ ਦਿਵਾਉਣ ਲਈ ਵਾਰ ਵਾਰ ਸਰਗਰਮ ਹੁੰਦੀ ਹੈ ਤਾਂ ਜੋ ਸਿੱਖ ਫ਼ਲਸਫ਼ੇ ਦਾ ਨੁਕਸਾਨ ਕੀਤਾ ਜਾਵੇ ਅਤੇ ਚੌਖਾ ਪੈਸਾ ਵੀ ਕਮਾਇਆ ਜਾ ਸਕੇ।

Delhi Sikh Gurdwara Management Committee sacrilege Gurbani

ਉਨ੍ਹਾਂ ਕਿਹਾ ਐਸਜੀਪੀਸੀ ਦੇ ਅਧਿਕਾਰੀ ਅਪਣਾ ਫ਼ਰਜ਼ ਭੁਲ ਕੇ ਵੱਧ ਤੋਂ ਵੱਧ ਧਨ ਕਮਾਉਣ ਦੀ ਦੌੜ ਵਿਚ ਮਸ਼ਰੂਫ਼ ਹਨ। ਲੰਘੇ ਤਿੰਨ ਦਹਾਕਿਆਂ ਵਿਚ ਐਸਜੀਪੀਸੀ ਦੇ ਅਧਿਕਾਰੀਆਂ ਨੇ ਸਿੱਖ ਵਿਰੋਧੀ ਤਾਕਤਾਂ ਵਿਰੁਧ ਅਤੇ ਸਿੱਖ ਕੌਮ ਦੇ ਹੱਕ ਅਜਿਹਾ ਕੋਈ ਇਕ ਵੀ ਮਿਸਾਲੀ ਕੰਮ, ਜਾਂਚ ਪੜਤਾਲ ਜਾਂ ਫ਼ੈਸਲਾ ਨਹੀਂ ਲਿਆ ਜੋ ਇਤਿਹਾਸ ਵਿਚ ਦਰਜ ਹੋ ਸਕੇ।