ਮਲੋਟ ਵਿਚ ਹੋਣ ਜਾ ਅਕਾਲੀ ਦਲ-ਭਾਜਪਾ ਗਠਜੋੜ ਦੀ ਸਾਂਝੀ ਰੈਲੀ ਬਾਰੇ ਜੋ ਜਾਣਕਾਰੀ ਮਿਲੀ ਹੈ, ਉਸ ਨੇ ਅਕਾਲੀ ਦਲ ਵਲੋਂ ਗੁਰੂ ਦੀ ਗੋਲਕ ਨੂੰ ਸੰਨ੍ਹ ਲਗਾਉਣ...........
ਤਰਨਤਾਰਨ : ਮਲੋਟ ਵਿਚ ਹੋਣ ਜਾ ਅਕਾਲੀ ਦਲ-ਭਾਜਪਾ ਗਠਜੋੜ ਦੀ ਸਾਂਝੀ ਰੈਲੀ ਬਾਰੇ ਜੋ ਜਾਣਕਾਰੀ ਮਿਲੀ ਹੈ, ਉਸ ਨੇ ਅਕਾਲੀ ਦਲ ਵਲੋਂ ਗੁਰੂ ਦੀ ਗੋਲਕ ਨੂੰ ਸੰਨ੍ਹ ਲਗਾਉਣ ਦਾ ਇਕ ਹੋਰ ਪੁਖਤਾ ਸਬੂਤ ਪੇਸ਼ ਕੀਤਾ ਹੈ। ਇਸ ਰੈਲੀ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਸ਼ਾਮਲ ਹੋ ਰਹੇ ਹਨ। ਸ਼੍ਰੋਮਣੀ ਕਮੇਟੀ ਦੇ ਗਲਿਆਰਿਆਂ ਵਿਚੋਂ ਮਿਲੀ ਜਾਣਕਾਰੀ ਮੁਤਾਬਕ ਅਕਾਲੀ ਦਲ ਅਤੇ ਭਾਜਪਾ ਦੀ ਸਾਂਝੀ ਰੈਲੀ ਮਲੋਟ ਵਿਚ ਹੋਣ ਜਾ ਰਹੀ ਹੈ। ਇਸ ਰੈਲੀ ਲਈ ਇਕੱਠ ਨੂੰ ਪ੍ਰਸ਼ਾਦਾ ਛਕਾਉਣ ਦੀ ਜ਼ਿੰਮੇਵਾਰੀ ਸ਼੍ਰੋਮਣੀ ਕਮੇਟੀ ਨੂੰ ਸੌਂਪੀ ਗਈ ਹੈ।
Gobind Singh Longowal - SGPC President (File Photo)
ਕਮੇਟੀ ਅਧਿਕਾਰੀਆਂ ਨੇ ਕਰੀਬ 50 ਹਜ਼ਾਰ ਲੋਕਾਂ ਦੀ ਰੋਟੀ ਲਈ ਕਰੀਬ 10 ਲੱਖ ਰੁਪਏ ਖ਼ਰਚ ਕਰ ਕੇ ਅਕਾਲੀ ਦਲ ਦੇ ਆਗੂਆਂ ਦੀਆਂ ਖ਼ੁਸ਼ੀਆਂ ਹਾਸਲ ਕਰ ਲਈਆਂ ਹਨ। ਇਸ ਰੈਲੀ ਲਈ ਲੰਗਰ ਪਕਾਉਣ ਦੀ ਪੂਰੀ ਸੇਵਾ ਇਕ ਕਾਰ ਸੇਵਾ ਵਾਲੇ ਬਾਬੇ ਦੇ ਨਾਲ ਨਾਲ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਅਤੇ ਗੁਰਦਵਾਰਾ ਮੁਕਤਸਰ ਸਾਹਿਬ ਨੂੰ ਸੌਂਪ ਦਿਤੀ ਗਈ ਹੈ ਜੋ ਇਸ ਰੈਲੀ ਲਈ ਦਾਲ ਸਬਜ਼ੀਆਂ ਰੋਟੀਆਂ ਤੇ ਪੀਣ ਵਾਲੇ ਬੋਤਲ ਬੰਦ ਪਾਣੀ ਦੀ ਰੈਲੀ ਦੌਰਾਨ ਸਪਲਾਈ ਕਰਨਗੇ। ਕਿਹਾ ਜਾਂਦਾ ਹੈ ਕਿ ਇਹ ਬਾਬਾ ਮਲੋਟ ਤੋਂ ਕਰੀਬ 8 ਕਿਲੋਮੀਟਰ ਦੂਰ ਇਕ ਡੇਰਾ ਬਣਾ ਕੇ ਬੈਠਾ ਹੈ ਤੇ ਇਹ ਬਾਬਾ ਅਕਾਲੀ ਦਲ ਦੇ ਨੇੜੇ ਦੇ ਬਾਬਿਆ ਵਿਚੋਂ ਇਕ ਹੈ।
Langar (File Photo)
ਇਸ ਸਬੰਧੀ ਬਾਬੇ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਬਾਬੇ ਨੇ ਫ਼ੋਨ ਨਹੀਂ ਚੁਕਿਆ ਪਰ ਬਾਬੇ ਦੇ ਸੇਵਾਦਾਰ ਨੇ ਦਸਿਆ ਕਿ ਸਾਡੇ ਵਲੋਂ ਪੂਰੀ ਤਿਆਰੀ ਹੈ, ਲੰਗਰ ਸਪਲਾਈ ਲਈ ਜ਼ਿੰਮੇਵਾਰ ਬਾਬੇ ਦੇ ਮੁਕਤਸਰ ਸਥਿਤ ਡੇਰੇ ਵਿਚ ਲੰਗਰ ਤਿਆਰ ਕੀਤਾ ਜਾ ਰਿਹਾ ਹੈ। ਦੂਜੇ ਪਾਸੇ ਗੁਰਦਵਾਰਾ ਮੁਕਤਸਰ ਸਾਹਿਬ ਦੇ ਇਕ ਅਧਿਕਾਰੀ ਨੇ ਤਸਦੀਕ ਕੀਤਾ ਕਿ ਲੰਗਰ ਸਵੇਰੇ 7 ਵਜੇ ਰੈਲੀ ਵਾਲੀ ਥਾਂ 'ਤੇ ਪੁੱਜ ਜਾਵੇਗਾ ਤੇ ਸੰਗਤ ਵਿਚ ਵਰਤਾਇਆ ਜਾਵੇਗਾ।
