ਨਵੀਂ ਦਿੱਲੀ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਪ੍ਰਧਾਨ ਪਰਮਜੀਤ ਸਿੰਘ ਤੇ ਸਕੱਤਰ ਜਨਰਲ ਹਰਵਿੰਦਰ ਸਿੰਘ ਸਰਨਾ ਨੇ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਵਲੋਂ ...
ਨਵੀਂ ਦਿੱਲੀ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਪ੍ਰਧਾਨ ਪਰਮਜੀਤ ਸਿੰਘ ਤੇ ਸਕੱਤਰ ਜਨਰਲ ਹਰਵਿੰਦਰ ਸਿੰਘ ਸਰਨਾ ਨੇ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਵਲੋਂ 12 ਮਈ ਨੂੰ ਕੀਤੇ ਗਏ ਜਨਰਲ ਇਜਲਾਸ ਨੂੰ ਫ਼ਰਜ਼ੀ ਤੇ ਸਿੱਖਾਂ ਦੀਆਂ ਅੱਖਾਂ ਵਿਚ ਘੱਟਾ ਪਾਉਣਾ ਦਸਿਆ ਹੈ।ਉਨ੍ਹਾਂ ਮੰਗ ਕੀਤੀ ਕਿ ਕਮੇਟੀ ਪ੍ਰਬੰਧਕ ਐਨੇ ਹੀ ਸੱਚੇ ਸੁੱਚੇ ਹਨ ਤਾਂ ਕਿਉਂ ਨਹੀਂ 2013 ਤੋਂ ਕਮੇਟੀ ਦਾ ਪ੍ਰਬੰਧ ਸੰਭਾਲਣ ਤੋਂ ਲੈ ਕੇ, ਹੁਣ ਤਕ ਦਾ 'ਵਾਈਟ ਪੇਪਰ' ਜਾਰੀ ਕਰ ਕੇ ਕਮੇਟੀ ਦੇ ਅਦਾਰਿਆਂ ਤੇ ਪ੍ਰਾਜੈਕਟਾਂ ਆਦਿ ਦਾ ਸਾਰਾ ਹਿਸਾਬ ਸਿੱਖਾਂ ਦੀ ਕਚਹਿਰੀ ਵਿਚ ਰਖਦੇ ਕਿ ਆਖ਼ਰ ਕਿਉਂ ਮੁਨਾਫ਼ੇ ਵਿਚ ਜਾ ਰਹੀ
ਕਮੇਟੀ ਅੱਜ ਕਰੋੜਾਂ ਰੁਪਏ ਦੇ ਘਾਟੇ ਦਾ ਸ਼ਿਕਾਰ ਹੋ ਚੁਕੀ ਹੈ।ਅੱਜ ਇਥੇ ਪਾਰਟੀ ਦਫ਼ਤਰ, ਗੁਰਦਵਾਰਾ ਰਕਾਬ ਗੰਜ ਸਾਹਿਬ ਕੰਪਲੈਕਸ ਵਿਖੇ ਸੱਦੀ ਪੱਤਰਕਾਰ ਮਿਲਣੀ ਵਿਚ ਪਰਮਜੀਤ ਸਿੰਘ ਸਰਨਾ ਨੇ ਕਿਹਾ ਕਿ ਜਨਰਲ ਹਾਊਸ ਵਿਚ ਕਮੇਟੀ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ. ਤੇ ਜਨਰਲ ਸਕੱਤਰ ਮਨਜਿੰਦਰ ਸਿੰਘ ਸਿਰਸਾ ਵਲੋਂ ਗੁਰੂ ਹਰਿਕ੍ਰਿਸ਼ਨ ਹਸਪਤਾਲ ਬਾਲਾ ਸਾਹਿਬ ਨੂੰ ਮੁੜ ਸ਼ੁਰੂ ਕਰਨ, ਗੁਰੂ ਹਰਿਕ੍ਰਿਸ਼ਨ ਸਕੂਲਾਂ ਨੂੰ ਮਾਲੀ ਘਾਟੇ 'ਚੋਂ ਬਾਹਰ ਕੱਢਣ, ਉਚ ਵਿਦਿਅਕ
ਅਦਾਰਿਆਂ ਨੂੰ ਮੁਨਾਫ਼ੇ ਵਿਚ ਲਿਜਾਉਣ ਦਾ ਕੋਈ 'ਰੋਡ ਮੈਪ' ਪੇਸ਼ ਨਹੀਂ ਕੀਤਾ ਗਿਆ, ਨਾ ਹੀ ਸਾਡੇ 'ਤੇ ਬਾਲਾ ਸਾਹਿਬ ਹਸਪਤਾਲ ਨੂੰ ਵੇਚ ਦੇਣ ਦੇ ਦੋਸ਼ ਸਾਬਤ ਕਰ ਸਕੇ ਜਿਸ ਤੋਂ ਪ੍ਰਬੰਧਕਾਂ ਦੀ ਨਾਲਾਇਕੀ ਸਾਫ਼ ਝੱਲਕਦੀ ਹੈ।ਉਨ੍ਹਾਂ ਕਿਹਾ ਕਿ ਜਦ ਅਸੀਂ ਗੁਰਦਵਾਰਾ ਪ੍ਰਬੰਧ ਤੋਂ ਬਾਹਰ ਹੋਏ ਸੀ, ਉਦੋਂ ਬਾਦਲ ਦਲ ਦੀ ਨਵੀਂ ਕਮੇਟੀ ਨੂੰ 123 ਕਰੋੜ ਰੁਪਏ ਦੀਆਂ ਐਫ਼ਡੀਆਂ ਆਦਿ ਦੇ ਗਏ ਸੀ
ਜੋ ਕਮੇਟੀ ਨੇ ਵੀ ਆਰ.ਟੀ.ਆਈ. ਵਿਚ ਮੰਨਿਆ ਹੈ ਪਰ ਖ਼ਜ਼ਾਨੇ ਨੂੰ ਭਰਨ ਦੀ ਬਜਾਏ ਇਹ 123 ਕਰੋੜ ਹੀ ਖ਼ੁਰਦ-ਬੁਰਦ ਕਰ ਗਏ ਜਿਸ ਦਾ ਹਿਸਾਬ ਹੀ ਨਹੀਂ। ਗੁਰਦਵਾਰੇ ਦੇ ਮੁਲਾਜ਼ਮਾਂ ਨੂੰ ਤਿੰਨ ਮਹੀਨੇ ਤੋਂ ਤਨਖ਼ਾਹਾਂ ਨਹੀਂ ਦਿਤੀਆਂ ਜਾ ਰਹੀਆਂ। ਪ੍ਰਬੰਧ ਆਖ ਰਹੇ ਹਨ ਕਿ ਅਸੀਂ ਘਾਟੇ ਵਿਚ ਹਾਂ, ਫਿਰ ਕਾਹਦਾ ਪ੍ਰਬੰਧ ਚਲਾ ਰਹੇ ਹਨ ਜਦ ਕੋਈ ਆਮਦਨ ਕਿਥੋਂ ਆਏਗੀ, ਦਾ ਕੋਈ ਰੋਡ ਮੈਪ ਹੀ ਨਹੀਂ?”