ਕਰਤਾਰਪੁਰ ਲਾਂਘਾ ਖੁਲ੍ਹਵਾਉਣ ਸਬੰਧੀ ਜਥੇਬੰਦੀ ਨੇ ਨਰਿੰਦਰ ਮੋਦੀ ਨੂੰ ਚਿੱਠੀ ਲਿਖੀ
ਅੰਮਿ੍ਰਤਸਰ (ਸੁਖਵਿੰਦਰਜੀਤ ਸਿੰਘ ਬਹੋੜੂ) : ਕਰਤਾਰਪੁਰ ਲਾਂਘਾ ਅੰਦੋਲਨ ’ਚ ਯੋਗਦਾਨ ਪਾਉਣ ਵਾਲੇ ਭਬੀਸ਼ਨ ਸਿੰਘ ਗੁਰਾਇਆ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਆਨਲਾਈਨ ਪੱਤਰ ਲਿਖ ਕੇ ਬੇਨਤੀ ਕੀਤੀ ਹੈ ਕਿ ਕਰਤਾਰਪੁਰ ਸਾਹਿਬ ਦਾ ਲਾਂਘਾ ਖੋਲ੍ਹਿਆ ਜਾਵੇ ਜੋ ਕਿ 16 ਮਾਰਚ 2020 ਤੋਂ ਲਾਕਡਾਊਨ ਕਰ ਕੇ ਬੰਦ ਕਰ ਦਿਤਾ ਗਿਆ ਸੀ। ਹੁਣ ਕਿਉਂਕਿ ਦੇਸ਼ ਭਰ ਦੇ ਸਾਰੇ ਇਮੀਗ੍ਰੇਸ਼ਨ ਦਫ਼ਤਰ ਖੋਲ੍ਹ ਦਿਤੇ ਗਏ ਹਨ, ਕਰਤਾਰਪੁਰ ਸਾਹਿਬ ਵਾਲੇ ਲਾਂਘੇ ਨੂੰ ਬੰਦ ਰੱਖਣ ਦੀ ਕੋਈ ਤੁਕ ਹੀ ਨਹੀਂ ਬਣਦੀ। ਕਰਤਾਰਪੁਰ ਦੀ ਯਾਤਰਾ ਕੌਮਾਂਤਰੀ ਹੈ, ਜਿਥੇ ਕੋਰੋਨਾ ਪ੍ਰੋਟੋਕੋਲ ਆਸਾਨੀ ਨਾਲ ਲਾਗੂ ਹੈ।
ਇਥੇ ਭੀੜ ਹੋਣ ਦਾ ਸਵਾਲ ਹੀ ਪੈਦਾ ਨਹੀਂ ਹੁੰਦਾ ਕਿਉਂਕਿ ਸਰਹੱਦੀ ਇਮੀਗ੍ਰੇਸ਼ਨ ਦਫ਼ਤਰ ਤਕ ਉਹੀ ਜਾ ਸਕਦਾ ਹੈ ਜਿਸ ਨੇ ਪਹਿਲਾਂ ਤੋਂ ਆਨਲਾਈਨ ਆਗਿਆ ਲਈ ਹੋਵੇ। ਫਿਰ ਯਾਤਰੀ ਸੁਰੱਖਿਆ ਪੁਲਿਸ ਦੇ ਹੁਕਮ ਬਗੈਰ ਕਦਮ ਵੀ ਨਹੀਂ ਪੁੱਟ ਸਕਦਾ। ਸਗੋਂ ਕੌਮਾਂਤਰੀ ਹਵਾਈ ਅੱਡਿਆਂ ’ਤੇ ਭੀੜ ਹੋ ਸਕਦੀ ਹੈ ਪਰ ਕਰਤਾਰਪੁਰ ਲਾਂਘੇ ’ਤੇ ਨਹੀਂ। ਫਿਰ ਜਿਥੇ ਜਾਣਾ ਹੈ ਉਹ ਵੀ ਕੋਈ ਭੀੜ ਭਾੜ ਵਾਲੀ ਥਾਂ ਨਹੀਂ ਹੈ ਕਿਉਂਕਿ ਕਰਤਾਰਪੁਰ ਸਾਹਿਬ ਇਕੱਲਾ ਪਿਆ ਸਥਾਨ ਹੈ ਜਿਥੇ ਨੇੜੇ-ਤੇੜੇ ਕੋਈ ਬਾਜ਼ਾਰ, ਮੰਡੀ, ਪਿੰਡ, ਬਸਤੀ ਜਾਂ ਸ਼ਹਿਰ ਨਹੀਂ ਹੈ। ਸੋ ਕਰਤਾਰਪੁਰ ਦੀ ਯਾਤਰਾ ਕੋਈ ਆਮ ਧਾਰਮਕ ਯਾਤਰਾ ਨਹੀਂ।
Kartarpur Sahib
ਬਾਕੀ ਥਾਈਂ ਅਕਸਰ ਭੀੜਾਂ ਇਕੱਠੀਆਂ ਹੋ ਜਾਂਦੀਆਂ ਹਨ। ਪਾਕਿਸਤਾਨ ਵਿਚ ਉਂਜ ਵੀ ਕੋਰੋਨਾ ਦਾ ਅਸਰ ਸਾਡੇ ਨਾਲੋਂ ਘੱਟ ਰਿਹਾ ਹੈ ਅਤੇ ਉਥੋਂ ਦੀ ਸਰਕਾਰ ਇਹ ਯਾਤਰਾ ਦੁਬਾਰਾ ਚਾਲੂ ਕਰਨ ਲਈ ਹਾਮੀ ਵੀ ਭਰ ਚੁੱਕੀ ਹੈ। ਸਰਕਾਰ ਯਾਤਰੀ ਦੇ ਟੀਕਾ ਲੱਗਾ ਹੋਣ ਦੀ ਸ਼ਰਤ ਵੀ ਨਾਲ ਜੋੜ ਲਵੇ। ਚਿੱਠੀ ਦੀ ਨਕਲ ਉਨ੍ਹਾਂ ਨੇ ਵਿਦੇਸ਼ ਮੰਤਰੀ, ਕੇਂਦਰੀ ਖੇਤੀਬਾੜੀ ਮੰਤਰੀ, ਮੁੱਖ ਮੰਤਰੀ ਪੰਜਾਬ, ਗ੍ਰਹਿ ਸਕੱਤਰ ਭਾਰਤ ਸਰਕਾਰ ਅਤੇ ਡੀ.ਸੀ. ਗੁਰਦਾਸਪੁਰ ਨੂੰ ਵੀ ਭੇਜੀ ਹੈ ਕਿ ਬਣਦੀ ਕਰਵਾਈ ਸ਼ੁਰੂ ਕੀਤੀ ਜਾਵੇ।
kartarpur sahib
ਗੁਰਾਇਆ ਦੀ ਜਥੇਬੰਦੀ ‘ਸੰਗਤ ਲਾਂਘਾ ਕਰਤਾਰਪੁਰ’ ਜਿਸ ਨੇ ਪਿੱਛੇ ਲਾਂਘਾ ਖੁਲ੍ਹਵਾਉਣ ਲਈ 18 ਸਾਲ ਜੱਦੋਜਹਿਦ ਕੀਤੀ, ਲਾਂਘਾ ਖੁਲ੍ਹਣ ’ਤੇ ਨਵੰਬਰ 2019 ਵਿਚ ਭੰਗ ਕਰ ਦਿਤੀ ਗਈ ਸੀ। ਕਲ ਫਿਰ ਸੰਗਰਾਂਦ ਦੇ ਦਿਹਾੜੇ ਤੇ ਗੁਰਾਇਆ ਨੇ ਭਜਨ ਸਿੰਘ ਰੋਡਵੇਜ, ਰਾਜ ਸਿੰਘ ਅਤੇ ਲਖਵਿੰਦਰ ਸਿੰਘ ਨੇ ਸਰਹੱਦ ’ਤੇ ਅਰਦਾਸ ਕੀਤੀ ਜਿਸ ਵਿਚ ਅਨੇਕਾਂ ਸੰਗਤਾਂ ਵੀ ਸ਼ਾਮਲ ਹੋਈਆਂ।
