ਪ੍ਰੈੱਸ ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਛਪਾਈ ਕੀਤੀ ਜਾਵੇਗੀ: ਸਿਰਸਾ
ਨਵੀਂ ਦਿੱਲੀ : ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਦਿੱਲੀ ਸਥਿਤ 'ਗੁਰਦੁਆਰਾ ਰਕਾਬ ਗੰਜ ਸਾਹਿਬ' ਕੰਪਲੈਕਸ ਵਿਚ ਆਧੁਨਿਕ ਪ੍ਰਿੰਟਿੰਗ ਪ੍ਰੈੱਸ ਦੀ ਸਥਾਪਨਾ ਕੀਤੀ ਹੈ। ਇਸ ਪ੍ਰਿੰਟਿਗ ਪ੍ਰੈੱਸ ਦੀ ਲਾਗਤ 8 ਕਰੋੜ ਰੁਪਏ ਆਈ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪ੍ਰਮਾਣਕ ਛਪਾਈ ਲਈ ਦੁਨੀਆਂ ਵਿਚ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਅੰਮ੍ਰਿਤਸਰ ਅਤੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਹੀ ਕਾਨੂੰਨੀ ਤੌਰ 'ਤੇ ਅਧਿਕਾਰਤ ਹੈ। ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜਿੰਦਰ ਸਿੰਘ ਸਿਰਸਾ ਨੇ ਦਸਿਆ ਕਿ ਇਸ ਪ੍ਰੈੱਸ ਵਿਚ ਸਿੱਖ ਧਰਮ ਦੀ ਰਿਵਾਇਤਾਂ ਦਾ ਪਾਲਣ ਕਰਦੇ ਹੋਏ ਪਾਵਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਛਪਾਈ ਕੀਤੀ ਜਾਵੇਗੀ।
Manjinder Sirsa
ਉਨ੍ਹਾਂ ਕਿਹਾ ਕਿ ਇਥੇ ਪ੍ਰਕਾਸ਼ਤ ਪ੍ਰਮਾਣਕ ਸਮੱਗਰੀ ਦੁਨੀਆਂ ਦੇ ਲਗਭਗ 40 ਦੇਸ਼ਾਂ ਵਿਚ ਗੁਰਦਵਾਰਿਆਂ ਅਤੇ ਸਿੱਖਾਂ ਨੂੰ ਸਸਤੀ ਦਰ 'ਤੇ ਉਪਲਬੱਧ ਕਰਵਾਈ ਜਾਵੇਗੀ। ਸਿਰਸਾ ਨੇ ਇਹ ਵੀ ਦਸਿਆ ਕਿ ਨਵੀਂ ਪ੍ਰਿੰਟਿੰਗ ਪ੍ਰੈੱਸ ਪ੍ਰਤੀ ਘੰਟਾ ਲਗਭਗ 15,000 ਰੰਗੀਨ ਪੰਨੇ ਪ੍ਰਕਾਸ਼ਤ ਕਰਨ ਦੀ ਸਮਰੱਥਾ ਰੱਖਦੀ ਹੈ ਅਤੇ ਇਸ ਦੇ ਸਥਾਪਤ ਹੋਣ ਨਾਲ ਅਪ੍ਰਵਾਸੀ ਭਾਰਤੀਆਂ ਵਿਚ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਵਧਦੀ ਮੰਗ ਨੂੰ ਪੂਰਾ ਕੀਤਾ ਜਾ ਸਕੇਗਾ। ਮਨਜਿੰਦਰ ਸਿੰਘ ਸਿਰਸਾ ਨੇ ਦਸਿਆ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ 1430 ਪੰਨਿਆਂ ਦੀ ਮਹਿਜ਼ ਇਕ ਧਾਰਮਕ ਕਿਤਾਬ ਨਹੀਂ ਹੈ, ਸਗੋਂ ਇਸ ਨੂੰ ਸਿੱਖ ਧਰਮ ਵਿਚ ਗੁਰੂ ਦਾ ਦਰਜਾ ਹਾਸਲ ਹੈ। ਇਸ ਪਾਵਨ ਗ੍ਰੰਥ ਦੀ ਛਪਾਈ ਦੌਰਾਨ ਵੀ ਇਸ ਦੇ ਉੱਚੇ ਰੁਤਬੇ ਦਾ ਪੂਰਾ ਮਾਣ ਰੱਖਿਆ ਜਾਂਦਾ ਹੈ।
Gurdwara rakab ganj sahib
ਸਿਰਸਾ ਨੇ ਅੱਗੇ ਦਸਿਆ ਕਿ ਕਾਰ ਸੇਵਾ ਬਾਬਾ ਕਸ਼ਮੀਰ ਸਿੰਘ ਭੂਰੀਵਾਲੇ ਵਲੋਂ ਸਥਾਪਤ ਨਵੀਂ ਪ੍ਰਿਟਿੰਗ ਪ੍ਰੈੱਸ ਲਈ 'ਗ੍ਰੰਥ ਸਾਹਿਬ ਭਵਨ' ਦੇ ਨਾਮ ਤੋਂ ਇਕ ਨਵਾਂ ਕੰਪਲੈਕਸ ਸਥਾਪਤ ਕੀਤਾ ਗਿਆ ਹੈ, ਜਿਥੇ 1430 ਪੰਨਿਆਂ ਦੇ ਪਾਵਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਿੱਖ ਪ੍ਰੰਪਰਾ ਅਤੇ ਮਰਿਆਦਾ ਮੁਤਾਬਕ ਪੂਰੀ ਤਰ੍ਹਾਂ ਸਿਖਿਅਤ ਹੁਨਰਮੰਦ ਸਿੱਖ ਮਾਹਰਾਂ ਵਲੋਂ ਪ੍ਰਕਾਸ਼ਤ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਇਥੇ ਸਿੱਖ ਸਾਹਿਤ, ਪ੍ਰਚਾਰ ਸਮੱਗਰੀ, ਡਾਇਰੀਆਂ ਅਤੇ ਕੈਲੰਡਰ ਵੀ ਪ੍ਰਕਾਸ਼ਤ ਕੀਤੇ ਜਾਣਗੇ।
