ਬਰਨਾਲਾ, 3 ਜਨਵਰੀ (ਜਗਸੀਰ ਸਿੰਘ ਸੰਧੂ): ਫ਼ਤਿਹਗੜ੍ਹ ਸਾਹਿਬ ਦੇ ਸ਼ਹੀਦੀ ਜੋੜਮੇਲੇ 'ਤੇ ਸਿਆਸੀ ਕਾਨਫ਼ਰੰਸਾਂ 'ਤੇ ਅਕਾਲ ਤਖ਼ਤ ਵਲੋਂ ਰੋਕ ਲਗਾਉਣ ਪਿੱਛੇ ਅਸਲ ਮੰਤਵ ਸਪੱਸਟ ਹੋਣ ਲੱਗ ਪਿਆ ਹੈ। ਇਹ ਰੋਕ ਸ਼ਹੀਦਾਂ ਦੇ ਸਤਿਕਾਰ ਲਈ ਨਹੀਂ, ਸਗੋਂ ਆਰ.ਐਸ.ਐਸ ਦੇ ਮਨਸੂਬਿਆਂ ਦੀ ਪੂਰਤੀ ਲਈ ਲਗਾਈ ਗਈ ਹੈ ਕਿਉਂਕਿ ਇਹ ਰੋਕ ਰੋਕ ਸਿਰਫ਼ ਤੇ ਸਿਰਫ਼ 25 ਦਸੰਬਰ ਦਾ ਦਿਨ ਵੇਖ ਕੇ ਹੀ ਲਗਾਈ ਗਈ ਸੀ ਕਿਉਂਕਿ ਆਰ. ਐਸ.ਐਸ. ਦੇ ਹੁਕਮ 'ਤੇ ਬ੍ਰਿਕਰਮੀ ਕੈਲੰਡਰ ਦੀ ਪੋਹ ਸੁਦੀ ਸਤਵੀਂ ਅਨੁਸਾਰ ਪਟਨਾ ਸਾਹਿਬ ਵਿਖੇ ਗੁਰੂ ਗੋਬਿੰਦ ਸਿੰਘ ਜੀ ਦੇ 350ਵੇਂ ਅਵਤਾਰ ਪੁਰਬ ਦੇ ਸਤਾਬਦੀ ਸਮਾਗਮਾਂ ਨੂੰ ਸਫ਼ਲ ਕਰਨ ਲਈ ਪੰਜਾਬ ਵਿਚੋਂ ਭਾਰੀ ਗਿਣਤੀ ਵਿਚ ਸੰਗਤ ਨੂੰ ਪਟਨਾ ਸਾਹਿਬ ਲੈ ਕੇ ਜਾਣਾ ਹੀ ਰੋਕ ਦਾ ਅਸਲੀ ਮੰਤਵ ਸੀ। ਇਸ ਮੰਤਵ ਲਈ ਫ਼ਤਿਹਗੜ੍ਹ ਸਾਹਿਬ ਦੇ ਸ਼ਹੀਦੀ ਜੋੜ ਮੇਲੇ 'ਤੇ ਸਿਆਸੀ ਕਾਨਫ਼ਰੰਸਾਂ 'ਤੇ ਰੋਕ ਲੱਗਣ ਉਪਰੰਤ ਜਿਥੇ ਪੰਜਾਬ ਦੀ ਕੈਪਟਨ ਸਰਕਾਰ ਸਰਧਾਲੂਆਂ ਦੀਆਂ 4 ਰੇਲ ਗੱਡੀਆਂ ਭਰ ਕੇ ਪਟਨਾ ਸਾਹਿਬ ਪੁੱਜੀ, ਉਥੇ ਸ਼੍ਰੋਮਣੀ ਅਕਾਲੀ ਦਲ ਦੀ ਸਾਰੀ ਲੀਡਰਸ਼ਿਪ ਨੇ ਵੀ ਵੱਡੇ-ਵੱਡੇ ਕਾਫ਼ਲਿਆਂ ਨਾਲ ਉਥੇ ਸਮੂਲੀਅਤ ਕੀਤੀ, ਦੂਜੇ ਪਾਸੇ ਸ਼੍ਰੋਮਣੀ ਕਮੇਟੀ ਨੇ ਵੀ ਅਪਣਾ ਸਾਰਾ ਜ਼ੋਰ ਇਨ੍ਹਾਂ ਸਮਾਗਮਾਂ ਨੂੰ ਸਫ਼ਲ ਕਰਨ ਲਈ ਲਗਾ ਦਿਤਾ। 

ਹੁਣ ਮੂਲ ਨਾਨਕਸ਼ਾਹੀ ਕੈਲੰਡਰ ਮੁਤਾਬਕ ਸਿੱਖਾਂ ਵਲੋਂ 5 ਜਨਵਰੀ ਨੂੰ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦਾ ਪ੍ਰਕਾਸ ਪੁਰਬ ਵੱਡੇ ਪੱਧਰ 'ਤੇ ਮਨਾਏ ਜਾਣ ਦੀ ਕਨਸੋਆਂ ਮਿਲਣ ਤੋਂ ਬਾਅਦ ਸ੍ਰੋਮਣੀ ਕਮੇਟੀ ਵਲੋਂ ਰਾਗੀ ਜਥਿਆਂ ਨੂੰ ਇਹ ਸਮਾਗਮ ਵਿਚ ਸ਼ਾਮਲ ਹੋਣ ਤੋਂ ਰੋਕਣ ਲਈ ਦਿਤੇ ਹੁਕਮਾਂ ਨੇ ਇਸ ਮਾਮਲੇ ਵਿਚ ਪ੍ਰਮਾਣ ਦੇ ਦਿਤਾ ਹੈ।
ਜ਼ਿਆਦਾਤਰ ਪਿੰਡਾਂ ਅਤੇ ਸਹਿਰਾਂ ਦੇ ਗੁਰੂਘਰਾਂ ਵਿਚ 5 ਜਨਵਰੀ ਨੂੰ ਵੀ ਗੁਰਪੁਰਬ ਮਨਾਉਣ ਦੀਆਂ ਵੱਡੀ ਪੱਧਰ ਤਿਆਰੀਆਂ ਚਲ ਰਹੀਆਂ ਹਨ। ਇਸ ਗੱਲ ਦੀ ਭਿਣਕ ਪੈਣ ਤੋਂ ਬਾਅਦ ਆਰ.ਐਸ.ਐਸ ਨੇ ਸਾਰੇ ਹਾਲਾਤ ਨੂੰ ਅਪਣੇ ਪੱਖ ਵਿਚ ਕਰਨ ਲਈ ਅਕਾਲ ਤਖ਼ਤ ਤੋਂ ਟੇਢੇ ਢੰਗ ਨਾਲ ਹੁਕਮਨਾਮਾ ਜਾਰੀ ਕਰਵਾ ਦਿਤਾ। ਇਸ ਵਿਚਾਰ ਦੀ ਹੋਰ ਪ੍ਰਮਾਣਤਾ ਇਸ ਗੱਲ ਤੋਂ ਮਿਲ ਜਾਵੇਗੀ ਕਿ ਕੀ ਅਕਾਲ ਤਖ਼ਤ ਦਾ ਇਹ ਹੁਕਮਨਾਮਾ ਸਦਾ ਲਈ ਫ਼ਤਿਹਗੜ੍ਹ ਸਾਹਿਬ ਦੇ ਸ਼ਹੀਦੀ ਜੋੜ ਮੇਲੇ 'ਤੇ ਸਿਆਸੀ ਕਾਨਫ਼ਰੰਸਾਂ 'ਤੇ ਪਾਬੰਦੀ ਲਗਾਉਣ ਲਈ ਹੋਇਆ ਹੈ ਜਾਂ ਫਿਰ ਸਿਰਫ਼ ਇਸ ਵਾਰ ਹੀ ਆਰ.ਐਸ.ਐਸ ਦੀ ਮੂਲ ਨਾਨਕਸ਼ਾਹੀ ਕੈਲੰਡਰ ਦਾ ਭੋਗ ਪਾਉਣ ਦੀ ਇੱਛਾ ਪੂਰਤੀ ਲਈ ਕੀਤਾ ਗਿਆ ਹੈ।