ਬਾਬੇ ਨਾਨਕ ਦਾ ਦਰ ਤਾਂ ਸਭ ਤੋਂ ਉੱਚਾ ਹੈ ਤੇ ਇਸ ਗੱਲ ਨੂੰ ਦੁਨੀਆਂ ਦਾ ਸਾਰਾ ਬੌਧਿਕ ਜਗਤ ਕਬੂਲ ਕਰ ਰਿਹਾ ਹੈ। ਬਾਬੇ ਨਾਨਕ ਦੀ ਬਾਣੀ ਉਤੇ ਅਮਲ ਕਰਨਾ ਸਿੱਖਾਂ ਨੇ ਛੱਡ ਦਿਤਾ ਹੈ, ਇਸ ਲਈ ਇਸ ਦਾ ਪ੍ਰਚਾਰ ਕਰਨ ਲਈ ਕਿਸੇ ਨੂੰ ਫ਼ੁਰਸਤ ਕਿਵੇਂ ਮਿਲੇਗੀ? ਪ੍ਰਚਾਰ ਦੇ ਨਾਂ ਤੇ ਪੈਸੇ ਇਕੱਠੇ ਕਰ ਕੇ ਸ਼ੀਸ਼ ਮਹਿਲ ਉਸਾਰਨ ਵਾਲੇ ਕਈ ਅਦਾਰੇ ਡੇਰਾਵਾਦ ਦਾ ਨਵਾਂ ਐਡੀਸ਼ਨ ਪੇਸ਼ ਕਰ ਰਹੇ ਹਨ। ਬੌਧਿਕਤਾ ਨਾਲ ਇਸ ਪਾਸੇ ਸਪੋਕਸਮੈਨ ਦੀ 'ਏਕਲਾ ਚਲੋ' ਦੀ ਨੀਤੀ ਨੇ 'ਉੱਚਾ ਦਰ ਬਾਬੇ ਨਾਨਕ ਦਾ' ਨਾਮ ਦਾ ਮਹੱਤਵਾਕਾਂਖੀ ਅਦਾਰਾ ਪੂਰਨਤਾ ਦੇ ਨੇੜੇ ਪਹੁੰਚਾ ਦਿਤਾ ਹੈ।
ਭਾਈ ਲਾਲੋਆਂ ਦੇ ਸਹਿਯੋਗ ਵਿਚ ਕਿਰਤੀ ਤਾਂ ਨਹੀਂ ਪਰ ਕਿਸਾਨ ਸੱਚੇ ਸਹਿਯੋਗੀ ਬਣੇ ਹਨ। ਸਹਿਯੋਗੀ ਤੇ ਵਿਰੋਧੀ ਤੇ ਸਮੀਖਿਅਕ ਸਾਰੇ ਹੀ ਬੜੀ ਨੀਝ ਨਾਲ ਉਡੀਕ ਰਹੇ ਹਨ ਕਿ ਇਹ ਅਦਾਰਾ ਕਿਹੜੇ ਨਵੇਂ ਸੁਪਨਿਆਂ ਦੀ ਸੇਧ ਉਜਾਗਰ ਕਰੇਗਾ। ਸਿੱਖ ਪੰਥ ਵਿਚ ਇਕ ਹਠੀਲਾ ਸਿਰਦਾਰ ਕਪੂਰ ਸਿੰਘ ਆਈ.ਸੀ.ਐਸ. ਨਿਵੇਕਲਾ ਵਿਅਕਤਿਤਵ ਸੀ। ਪਿਛਲੇ ਦਸ ਸਾਲ ਦੇ ਸੰਘਰਸ਼ ਵਿਚ ਦੂਜਾ ਸਿਰਦਾਰ ਜੋਗਿੰਦਰ ਸਿੰਘ 'ਸਿਰਦਾਰ' ਦੀ ਪਰਿਭਾਸ਼ਾ ਉਤੇ ਖਰਾ ਉਤਰਦਾ ਨਜ਼ਰ ਆ ਰਿਹਾ ਹੈ। ਗੁਰੂ ਮਿਹਰ ਕਰੇ ਤੇ ਉਸ ਦੇ ਬੌਧਿਕ ਅਦਾਰੇ ਨੂੰ ਜੋ ਅਪਣੀ ਕਿਸਮ ਦਾ ਪਹਿਲਾ ਸਿੱਖੀ ਉਦਮ ਹੈ, ਨੂੰ ਚਾਨਣ ਮੁਨਾਰਾ ਬਣਾ ਦੇਵੇ।
