ਆਲ ਇੰਡੀਆ ਤ੍ਰਿਣਮੂਲ ਕਾਂਗਰਸ ਨੇ ਸ਼ੁਰੂ ਕੀਤੀ ਭੁੱਖ ਹੜਤਾਲ
ਅੰਮ੍ਰਿਤਸਰ, 5 ਮਾਰਚ (ਸੁਖਵਿੰਦਰਜੀਤ ਸਿੰਘ ਬਹੋੜੂ) : ਆਲ ਇੰਡੀਆ ਤ੍ਰਿਣਾਮੂਲ ਕਾਂਗਰਸ ਪੰਜਾਬ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਕੇਂਦਰੀ ਵਿੱਤ ਮੰਤਰੀ ਅਰੁਣ ਜੇਤਲੀ ਨੂੰ ਦਰਬਾਰ ਸਾਹਿਬ ਦੇ ਲੰਗਰ ਘਰ 'ਤੇ ਜੀਐਸਟੀ ਹਟਾਉਣ ਲਈ ਅੱਜ ਭੁੱਖ ਹੜਤਾਲ ਦੀ ਸ਼ੁਰੂਆਤ ਕੀਤੀ। ਤ੍ਰਿਣਾਮੂਲ ਕਾਂਗਰਸ ਪੰਜਾਬ ਦੇ ਕਨਵੀਨਰ ਮਨਜੀਤ ਸਿੰਘ ਕੁਰਾਲੀ ਦੀ ਅਗਵਾਈ ਹੇਠ ਅੱਜ ਚੌਕ ਸਾਰਾਗੜ੍ਹੀ ਵਿਖੇ ਮਨਜੀਤ ਸਿੰਘ, ਤਰਨਦੀਪ ਸਿੰਘ ਸੋਨੀ, ਬਲਜੀਤ ਸਿੰਘ, ਭਾਈ ਪਾਲ ਸਿੰਘ, ਅਮਰਿਤ ਗਿੱਲ, ਗੁਰਪ੍ਰੀਤ ਚੌਹਾਨ, ਮੋਹਿੰਦਰਪਾਲ ਸਿੰਘ, ਗੁਰਮੇਲ ਸਿੰਘ, ਸੁਰਿੰਦਰਪਾਲ, ਮਾ ਸੰਪੂਰਨ ਸਿੰਘ ਪਹਿਲੇ ਦਿਨ ਭੁੱਖ ਹੜਤਾਲ 'ਤੇ ਬੈਠੇ।
ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮਨਜੀਤ ਸਿੰਘ ਕੁਰਾਲੀ ਨੇ ਜੀਐਸਟੀ ਨੂੰ ਔਰੰਗਜ਼ੇਬ ਜਜੀਆ ਟੈਕਸ ਕਰਾਰ ਦਿਤਾ ਹੈ। ਆਲ ਇੰਡੀਆ ਤ੍ਰਿਣਾਮੂਲ ਕਾਂਗਰਸ ਕਮੇਟੀ ਪੰਜਾਬ ਅਤੇ ਹਮਾਇਤੀ ਹੋਰ ਜਥੇਬੰਦੀਆਂ ਨੇ ਭਾਰਤ ਸਰਕਾਰ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਇਸ ਨੇ ਜੀਐਸਟੀ 'ਚ ਅਮਲ 'ਚ ਲਿਆਉਂਦਿਆਂ ਆਮ ਨਾਗਰਿਕਾਂ ਤੇ ਧਾਰਮਕ ਅਸਥਾਨਾਂ ਨੂੰ ਵੀ ਨਹੀਂ ਬਖ਼ਸ਼ਿਆ ਹੈ। ਉਨ੍ਹਾਂ ਕਿਹਾ ਕਿ ਟੈਕਸ ਵਸੂਲਣਾ ਸਰਕਾਰ ਦਾ ਹੱਕ ਪਰ ਕੋਈ ਵੀ ਟੈਕਸ ਕਿਸੇ ਆਮ ਆਦਮੀ ਨੂੰ ਪ੍ਰੇਸ਼ਾਨ ਕਰਨ ਲੱਗ ਜਾਵੇ ਤਾਂ ਉਸ ਨੂੰ ਹਟਾ ਦੇਣਾ ਚਾਹੀਦਾ ਹੈ। ਮਨਜੀਤ ਸਿੰਘ ਮੁਤਾਬਕ 1469 ਤੋਂ ਗੁਰੂ ਨਾਨਕ ਕਾਲ ਤੋਂ ਲੰਗਰ ਪ੍ਰਥਾ ਚਲਦੀ ਆ ਰਹੀ ਹੈ। ਭਾਰਤ 'ਤੇ ਵਿਦੇਸ਼ੀਆਂ ਨੇ ਵੀ ਰਾਜ ਕੀਤਾ ਜਿਸ ਵਿਚ ਮੁਗਲ ਅਤੇ ਅੰਗਰੇਜ਼ ਸ਼ਾਮਲ ਸਨ ਪਰ ਕਿਸੇ ਨੇ ਵੀ ਲੰਗਰ ਤੇ ਕਿਸੇ ਕਿਸਮ ਦਾ ਟੈਕਸ ਨਹੀਂ ਲਾਇਆ ਪਰ ਆਜ਼ਾਦ ਭਾਰਤ ਵਿਚ ਭਾਰਤੀ ਜਨਤਾ ਪਾਰਟੀ ਦੀ ਮੋਦੀ ਸਰਕਾਰ ਨੇ ਜੀਐਸਟੀ ਲਾਉੁਣ ਸਮੇਂ ਦਰਬਾਰ ਸਾਹਿਬ ਨੂੰ ਵੀ ਨਹੀਂ ਬਖ਼ਸ਼ਿਆ ਜਿਥੇ ਰੋਜ਼ਾਨਾ ਸਵਾ ਲੱਖ ਸ਼ਰਧਾਲੂ ਮੱਥਾ ਟੇਕਦੇ ਹਨ ਅਤੇ ਕਿਰਤ ਕਮਾਈ ਵਿਚੋਂ ਦਾਨ ਕਰਦੇ ਹਨ।
