ਨਵੀਂ ਦਿੱਲੀ, 27 ਦਸੰਬਰ : ਵਿਸ਼ਵ ਦੀ ਨਾਮੀ ਅਮਰੀਕੀ ਫ਼ੁਟਵੇਅਰ ਕੰਪਨੀ ਨੇ ਹਾਈ ਕੋਰਟ 'ਚ ਆਨਲਾਈਨ ਰਿਟੇਲ ਕੰਪਨੀ ਫ਼ਲਿੱਪਕਾਰਟ ਵਿਰੁਧ ਕੇਸ ਦਰਜ ਕਰਵਾਇਆ ਹੈ। ਅਮਰੀਕੀ ਕੰਪਨੀ ਨੇ ਇਹ ਕਾਰਵਾਈ ਪੁਲਿਸ ਵਲੋਂ ਫ਼ਲਿੱਪਕਾਰਟ ਦੇ ਗੋਦਾਮ 'ਚ ਮਾਰੇ ਗਏ ਛਾਪੇ ਦੌਰਾਨ ਨਕਲੀ ਜੁੱਤੇ ਮਿਲਣ ਉਪਰੰਤ ਕੀਤੀ ਹੈ।ਅਮਰੀਕੀ ਕੰਪਨੀ ਸਕੈਚਰਸ ਨੂੰ ਜਾਣਕਾਰੀ ਮਿਲੀ ਹੈ ਸੀ ਕਿ ਫ਼ਲਿੱਪਕਾਰਟ ਅਤੇ ਉਸ ਨਾਲ ਜੁੜੇ ਚਾਰੇ ਹੋਰ ਸੇਲਰਸ ਨਕਲੀ ਜੁੱਤਿਆਂ ਦੀ ਵਿਕਰੀ ਕਰਦੇ ਸਨ। ਇਸ ਤਰ੍ਹਾਂ ਦੀ ਵਿਕਰੀ ਨਾਲ ਕੰਪਨੀ ਦਾ ਨਾਮ ਖ਼ਰਾਬ ਹੁੰਦਾ ਹੈ।
ਸਕੈਚਰਸ ਨੇ ਮਾਮਲੇ ਦੀ ਸ਼ਿਕਾਇਤ ਦਿੱਲੀ ਹਾਈ ਕੋਰਟ 'ਚ ਕੀਤੀ, ਜਿਸ ਤੋਂ ਬਾਅਦ ਕੋਰਟ ਨੇ ਸਥਾਨਕ ਕਮਿਸ਼ਨਰਾਂ ਨੂੰ ਨਿਯੁਕਤ ਕਰ ਕੇ ਮਾਮਲੇ ਦੀ ਛਾਣਬੀਣ ਕਰਨ ਲਈ ਕਿਹਾ। ਜਾਣਕਾਰੀ ਮੁਤਾਬਕ ਪੁਲਿਸ ਅਧਿਕਾਰੀਆਂ ਦੀ ਅਗਵਾਈ 'ਚ ਕੰਪਨੀ ਨੇ ਦਿੱਲੀ ਅਤੇ ਅਹਿਮਾਦਾਬਾਦ 'ਚ ਸੱਤ ਗੁਦਾਮਾਂ 'ਚ ਛਾਪੇ ਮਾਰ ਕੇ 15 ਹਜ਼ਾਰ ਜੋੜੀਆਂ ਨਕਲੀ ਜੁੱਤੇ ਬਰਾਮਦ ਕੀਤੇ। ਇਹ ਗੋਦਾਮ ਫ਼ਲਿੱਪਕਾਰਟ ਨਾਲ ਜੁੜੇ ਸੇਲਰਸ ਰਿਟੇਲ ਨੈੱਟ, ਟੈਕ ਕੁਨੈਕਟ, ਯੂਨਿਕੇਮ ਲਾਜਿਸਟਿਕ ਅਤੇ ਮਾਰਕੋ ਵੈਗਨ ਦੇ ਸਨ। ਸਕੈਚਰਸ ਦੇ ਬੁਲਾਰੇ ਨੇ ਕਿਹਾ ਕਿ ਕੰਪਨੀ ਅਪਣੇ ਬ੍ਰਾਂਡ ਨਾਂ ਦੀ ਸੁਰੱਖਿਆ ਅਤੇ ਕਾਪੀਰਾਈਟ ਤੋਂ ਬਚਣ ਲਈ ਢੁਕਵੀਂ ਕਾਰਵਾਈ ਕਰੇਗੀ। ਫ਼ਲਿੱਪਕਾਰਟ ਆਨਲਾਈਨ ਮਾਰਕਿਟਪਲੇਸ ਹੈ, ਜੋ ਦੇਸ਼ ਭਰ ਦੇ ਗਾਹਕਾਂ ਨੂੰ ਸੇਲਰਸ ਨਾਲ ਜੋੜਦੀ ਹੈ। ਅਮਰੀਕੀ ਕੰਪਨੀ ਦੇ ਬੁਲਾਰੇ ਨੇ ਕਿਹਾ ਕਿ ਅਸੀਂ ਅਪਣਾ ਬਿਜ਼ਨਸ ਇਮਾਨਦਾਰੀ ਅਤੇ ਕਾਨੂੰਨ ਮੁਤਾਬਕ ਕਰਦੇ ਹਾਂ। ਅਸੀਂ ਇਸ ਮਾਮਲੇ 'ਤੇ ਕੋਈ ਟਿੱਪਣੀ ਨਹੀਂ ਕਰ
ਸਕਦੇ ਕਿਉਂਕਿ ਮਾਮਲਾ ਅਦਾਲਤ 'ਚ ਹੈ।