ਚੰਡੀਗੜ੍ਹ, 7 ਫ਼ਰਵਰੀ (ਨੀਲ ਭਲਿੰਦਰ ਸਿੰਘ): ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਹਤਿਆ ਕੇਸ ਤਹਿਤ ਭਾਈ ਜਗਤਾਰ ਸਿੰਘ ਤਾਰਾ ਵਲੋਂ ਪਿਛਲੀ ਤਰੀਕ ਉਤੇ ਅਦਾਲਤ ਨੂੰ ਛੇ ਪੰਨਿਆਂ ਦੇ ਰੂਪ 'ਚ ਦਿਤਾ ਇਕਬਾਲਨਾਮਾ ਅੱਜ ਐਡੀਸ਼ਨਲ ਸੈਸ਼ਨ ਜੱਜ ਜੇ.ਐਸ. ਸਿੱਧੂ ਦੀ ਬੁੜੈਲ ਜੇਲ 'ਚ ਲਗਦੀ ਵਿਸ਼ੇਸ਼ ਅਦਾਲਤ ਨੇ ਸੀਬੀਆਈ ਦੇ ਵਕੀਲ ਨੂੰ ਸੌਂਪ ਦਿਤਾ ਹੈ। ਸੀ.ਬੀ.ਆਈ ਦੇ ਵਕੀਲ  ਐਸ.ਕੇ.ਸਕਸੈਨਾ ਵਲੋਂ ਉਕਤ ਪੱਤਰ ਸੀ.ਬੀ.ਆਈ ਦੇ ਹੈੱਡ ਕੁਆਰਟਰ ਭੇਜਣ ਲਈ ਅਤੇ ਉਕਤ ਪੱਤਰ 'ਤੇ ਜਾਂਚ ਏਜੰਸੀ ਦੀ ਪ੍ਰਤੀਕਿਰਿਆ ਲਈ ਅਗਲੀ ਤਰੀਕ ਤਕ ਸਮੇਂ ਦੀ ਮੰਗ ਕੀਤੀ ਹੈ ਜਿਸ ਕਰ ਕੇ ਕੇਸ ਦੀ ਸੁਣਵਾਈ ਆਉਂਦੀ  19 ਫ਼ਰਵਰੀ ਲਈ ਮੁਲਤਵੀ ਕਰ ਦਿਤੀ ਗਈ ਹੈ।

 ਉਧਰ ਅੱਜ ਵਿਸ਼ੇਸ਼ ਅਦਾਲਤ ਦੀ ਬੁੜੈਲ ਜੇਲ ਚੰਡੀਗੜ੍ਹ ਵਿਚ ਹੋਈ ਅੱਜ ਦੀ ਸੁਣਵਾਈ ਮੌਕੇ ਸੀ.ਬੀ.ਆਈ ਦੇ ਵਕੀਲ ਨੇ  ਤਾਰਾ ਕੋਲੋਂ 29 ਸਵਾਲ ਪੁੱਛੇ। ਦਸਣਯੋਗ ਹੈ ਕਿ  ਹੁਣ ਤਕ ਸੀ.ਬੀ.ਆਈ ਦੇ ਵਕੀਲ ਵਲੋਂ ਤਾਰਾ ਕੋਲੋਂ ਤਕਰੀਬਨ 149 ਸਵਾਲ ਪੁਛੇ ਜਾ ਚੁਕੇ ਹਨ। ਇਸੇ ਦੌਰਾਨ ਅੱਜ ਤਾਰਾ ਨੇ ਅਦਾਲਤ ਵਿਚ ਇਕ ਅਰਜ਼ੀ ਦਾਖ਼ਲ ਕਰ ਕੇ ਮੰਗ ਕੀਤੀ ਹੈ ਕਿ ਉਸ ਦੀ ਸਜਰੀ ਤਸਵੀਰ ਉਸ ਦੇ ਪਰਵਾਰ ਨੂੰ ਦਿਤੇ ਜਾਣ ਦੀ ਹਦਾਇਤ ਜੇਲ ਅਧਿਕਾਰੀਆਂ ਨੂੰ ਕੀਤੀ ਜਾਵੇ। ਅਦਾਲਤ ਨੇ ਉਕਤ ਅਰਜ਼ੀ ਦੀ ਸੁਣਵਾਈ ਵੀ 19 ਫ਼ਰਵਰੀ ਨੂੰ ਰੱਖ ਦਿਤੀ ਹੈ।