ਚੰਡੀਗੜ੍ਹ : ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਦੀ ਹਤਿਆ ਦਾ ਕੇਸ ਹੁਣ ਲਗਭਗ ਅਪਣੇ ਅੰਜ਼ਾਮ ‘ਤੇ ਪਹੁੰਚ ਚੁਕਾ ਹੈ ਜਿਸ ਦੇ ਲਈ 16 ਮਾਰਚ ਨੂੰ ਇਸ ਕੇਸ ਦੇ ਆਖ਼ਰੀ ਮੁੱਖ ਮੁਲਜ਼ਮਾਂ ‘ਚ ਸ਼ਾਮਲ ਜਗਤਾਰ ਸਿੰਘ ਤਾਰਾ ਡੇਕਵਾਲਾ ਵਿਰੁਧ ਕੇਸ ਦੀ ਆਖ਼ਰੀ ਬਹਿਸ ਹੋਵੇਗੀ ਅਤੇ ਮਾਡਲ ਜੇਲ ਬੁੜੈਲ ‘ਚ ਲਗਦੀ ਰਹੀ ਵਿਸ਼ੇਸ਼ ਅਦਾਲਤ ਨੇ ਇਹ ਕੇਸ 17 ਮਾਰਚ ਲਈ ਅਪਣੇ ਫ਼ੈਸਲੇ ਲਈ ਨੀਅਤ ਕਰ ਦਿਤਾ ਹੈ।
ਤਾਰਾ ਦੇ ਨਿਜੀ ਸਲਾਹਕਾਰ ਵਕੀਲ ਸਿਮਰਨਜੀਤ ਸਿੰਘ ਦੇ ਹਵਾਲੇ ਨਾਲ ਜੇਲ ਅੰਦਰ ਲਗਦੀ ਇਸ ਅਦਾਲਤ ਦੀ ਕਾਰਵਾਈ ਬਾਰੇ ਇਹ ਜਾਣਕਾਰੀ ਹਾਸਲ ਹੋਈ ਹੈ। ਤਾਰਾ ਵਲੋਂ ਬੀਤੀ 25 ਜਨਵਰੀ ਨੂੰ ਹੀ ਅਦਾਲਤ ਨੂੰ ਅਪਣਾ ਲਿਖਤੀ ਇਕਬਾਲਨਾਮਾ ਸੌਂਪਦੇ ਹੋਏ ਕੇਸ ‘ਚ ਅਪਣੀ ਸ਼ਮੂਲੀਅਤ ਸਵੀਕਾਰ ਕੀਤੀ ਜਾ ਚੁਕੀ ਹੈ।
ਇਸ ਕੇਸ ਅਤੇ ਹੁਣ ਤਕ ਦੇ ਅਜਿਹੇ ਹੋਰਨਾਂ ਅਦਾਲਤੀ ਕੇਸਾਂ ਦਾ ਹਵਾਲਾ ਲਿਆ ਜਾਵੇ ਤਾਂ ਰਾਜੋਆਣਾ ਦੀ ਤਰ੍ਹਾਂ ਤਾਰਾ ਨੂੰ ਵੀ ਇਸ ਅਦਾਲਤ ਵਿਚ ਫਾਂਸੀ ਦੀ ਸਜ਼ਾ ਸੁਣਾਈ ਜਾਣੀ ਹੀ ਤੈਅ ਮੰਨੀ ਜਾ ਰਹੀ ਹੈ। ਉਧਰ ਦੂਜੇ ਪਾਸੇ ਸੀਬੀਆਈ ਦੇ ਵਕੀਲ ਨੇ ਬਹਿਸ ਮੌਕੇ ਸੁਪਰੀਮ ਕੋਰਟ ਅਤੇ ਕੁੱਝ ਹੋਰਨਾਂ ਅਜਿਹੇ ਕੇਸਾਂ ਦੇ ਹਵਾਲੇ ਵੀ ਅਦਾਲਤ ਦੇ ਸਾਹਮਣੇ ਪੇਸ਼ ਕੀਤੇ ਹਨ, ਜਿਨ੍ਹਾਂ ਵਿਚ ਵੀ ਮੁਲਜ਼ਮ ਵਲੋਂ ਅਪਣੇ ਬਚਾਅ ‘ਚ ਕੁੱਝ ਬੋਲਣ ਤੋਂ ਇਨਕਾਰ ਕੀਤਾ ਗਿਆ ਸੀ ਤੇ ਉਸ ਵਿਰੁਧ ਪੇਸ਼ ਸਬੂਤ,ਗਵਾਹੀਆਂ ਅਤੇ ਇਕਬਾਲਨਾਮਿਆਂ ਦੇ ਆਧਾਰ ਉਤੇ ਫ਼ੈਸਲੇ ਸੁਣਾਏ ਜਾ ਚੁਕੇ ਹਨ।
ਸੀਬੀਆਈ ਵਕੀਲ ਨੇ ਅਦਾਲਤ ਨੂੰ ਦਸਿਆ ਕਿ ਜਗਤਾਰ ਸਿੰਘ ਤਾਰਾ ਨੇ ਉਪਰੋਕਤ ਹਤਿਆ ਵਿਚ ਵਰਤੀ ਗਈ ਅੰਬੈਸਡਰ ਕਾਰ ਨੂੰ ਬਸੰਤ ਸਿੰਘ ਬਣ ਕੇ ਖ਼ਰੀਦਿਆ ਅਤੇ ਉਸ ਨੂੰ ਚੰਡੀਗੜ੍ਹ ਵਿਖੇ ਸਫ਼ੈਦ ਰੰਗ ਦਾ ਪੇਂਟ ਕਰਵਾਇਆ ਅਤੇ ਘਟਨਾ ਵਾਲੇ ਦਿਨ ਬਤੌਰ ਡਰਾਈਵਰ ਕਾਰ ਨੂੰ ਚਲਾ ਰਿਹਾ ਸੀ। ਤਾਰਾ ਦੇ ਵਕੀਲ ਐਡਵੋਕੇਟ ਸਿਮਰਨਜੀਤ ਸਿੰਘ ਨੇ ਅਦਾਲਤ ਕੋਲ ਭਾਈ ਤਾਰਾ ਦੇ ਕਬੂਲਨਾਮੇ ਦੀ ਕਾਪੀ ਨੂੰ ਜਾਰੀ ਕਰਨ ਦੀ ਮੰਗ ਕੀਤੀ ਹੈ ਅਤੇ ਅਦਾਲਤ ਨੂੰ ਅਗਲੀ ਸੁਣਵਾਈ ਤੋਂ ਪਹਿਲਾਂ ਅਪਣੀ ਲਿਖਤੀ ਬਹਿਸ ਨੂੰ ਅਦਾਲਤ ਵਿਚ ਪੇਸ਼ ਕਰਨ ਲਈ ਸਮਾਂ ਮੰਗਿਆ ਹੈ। ਅਦਾਲਤ ਵਲੋਂ ਕੇਸ ਦੀ ਸੁਣਵਾਈ, ਰਹਿੰਦੀ ਬਹਿਸ 16 ਮਾਰਚ 2018 ਲਈ ਮੁਲਤਵੀ ਕਰ ਦਿਤੀ ਗਈ ਹੈ ਅਤੇ ਫ਼ੈਸਲੇ ਦੀ ਮਿਤੀ 17 ਮਾਰਚ ਨਿਰਧਾਰਤ ਕਰ ਦਿਤੀ ਹੈ।