ਝਾਂਸੀ ਦੇ ਮਹਾਰਾਣੀ ਲਕਸ਼ਮੀ ਬਾਈ ਮੈਡੀਕਲ ਕਾਲਜ 'ਚ ਸ਼ਰਮਸਾਰ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇਲਜ਼ਾਮ ਹੈ ਕਿ ਡਾਕਟਰਾਂ ਨੇ ਹਾਦਸੇ 'ਚ ਜ਼ਖ਼ਮੀ ਹੋਣ ਤੋਂ ਬਾਅਦ ਹਸਪਤਾਲ 'ਚ ਦਾਖ਼ਲ ਹੋਏ ਕਲੀਨਰ ਦੇ ਕੱਟੇ ਪੈਰ ਨੂੰ ਹੀ ਉਸ ਦੇ ਸਿਰ ਦੇ ਹੇਠਾਂ ਰਖ ਕੇ ਸਿਰਹਾਣਾ ਬਣਾ ਦਿਤਾ।
ਇਸ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਸੀਐਮਐਸ ਡਾ. ਹਰੀਸ਼ ਚੰਦਰ ਨੇ ਇਕ ਸੀਨੀਅਰ ਰੈਜ਼ੀਡੈਂਟ ਡਾਕਟਰ ਸਮੇਤ 4 ਲੋਕਾਂ ਨੂੰ ਬਰਖ਼ਾਸਤ ਕਰ ਦਿਤਾ। ਜਾਂਚ ਲਈ ਇਕ ਸਪੈਸ਼ਲ ਕਮੇਟੀ ਬਣਾਈ ਗਈ ਹੈ। ਕਾਲਜ ਦੀ ਪ੍ਰਿੰਸੀਪਲ ਨੇ ਦੋਸ਼ੀਆਂ ਵਿਰੁਧ ਸਖ਼ਤ ਕਾਰਵਾਈ ਦੀ ਗੱਲ ਕਹੀ ਹੈ।
ਜਾਣਕਾਰੀ ਮੁਤਾਬਕ, ਘਨਸ਼ਿਆਮ ਝਾਂਸੀ ਦੇ ਇਕ ਸਕੂਲ ਦੀ ਬੱਸ 'ਚ ਕਲੀਨਰ ਹੈ। ਸ਼ਨਿਚਰਵਾਰ ਨੂੰ ਬੱਸ ਬੱਚਿਆਂ ਨੂੰ ਲੈ ਕੇ ਜਾ ਰਹੀ ਸੀ। ਉਸ ਸਮੇਂ ਇਕ ਟਰੈਕਟਰ ਨੂੰ ਬਚਾਉਂਦੇ ਹੋਏ ਬੱਸ ਪਲਟ ਗਈ। ਹਾਦਸੇ 'ਚ 6 ਬੱਚੇ ਜ਼ਖ਼ਮੀ ਹੋ ਗਏ। ਉਥੇ ਹੀ, ਘਨਸ਼ਿਆਮ ਦਾ ਪੈਰ ਕੱਟ ਗਿਆ, ਉਸ ਨੂੰ ਇਲਾਜ ਲਈ ਝਾਂਸੀ ਮੈਡੀਕਲ ਕਾਲਜ ਦੇ ਐਮਰਜੈਂਸੀ ਵਾਰਡ 'ਚ ਲਿਆਇਆ ਗਿਆ। ਜਿਥੇ ਡਾਕਟਰਾਂ ਨੇ ਇਲਾਜ ਤਾਂ ਕੀਤਾ ਪਰ ਇਸ 'ਚ ਲਾਪਰਵਾਹੀ ਦੀਆਂ ਅਜਿਹੀਆਂ ਤਸਵੀਰਾਂ ਸਾਹਮਣੇ ਆਈਆਂ ਜੋ ਸਿਸਟਮ ਦੀ ਬੇਸ਼ਰਮੀ ਦਸ ਰਹੀਆਂ ਸਨ।
ਮੈਡੀਕਲ ਕਾਲਜ ਦੀ ਪ੍ਰਿੰਸੀਪਲ ਸਾਧਨਾ ਕੌਸ਼ਿਕ ਨੇ ਦਸਿਆ ਕਿ ਅਸੀਂ ਘਟਨਾ ਤੋਂ ਬਾਅਦ ਵਿਭਾਗ ਦੇ ਲੋਕਾਂ ਨਾਲ ਗੱਲ ਕੀਤੀ। ਇਸ ਦੇ ਬਾਅਦ ਸੀਨੀਅਰ ਰੈਜ਼ੀਡੈਂਟ ਆਰਥੋਪੈਡਿਕ ਡਾਕਟਰ, ਈਐਮਓ, ਸੀਨੀਅਰ ਨਰਸ ਅਤੇ ਇਕ ਹੋਰ ਸਟਾਫ਼ ਨੂੰ ਬਰਖ਼ਾਸਤ ਕਰ ਦਿਤਾ ਹੈ।
ਐਮਰਜੈਂਸੀ ਵਾਰਡ 'ਚ ਡਾਕਟਰਾਂ ਨੇ ਜ਼ਖ਼ਮੀ ਕਲੀਨਰ ਦਾ ਝਟਪਟ ਇਲਾਜ ਸ਼ੁਰੂ ਕਰ ਦਿਤਾ ਸੀ। ਡਾਕਟਰਾਂ ਨੂੰ ਉਸ ਦੇ ਸਿਰ ਹੇਠਾਂ ਰਖਣ ਲਈ ਕੁੱਝ ਚਾਹੀਦਾ ਸੀ। ਉਸ ਸਮੇਂ ਮਰੀਜ਼ ਦੇ ਕਿਸੇ ਸਾਥੀ ਨੇ ਕੱਟੇ ਪੈਰ ਨੂੰ ਹੀ ਉਸ ਦੇ ਸਿਰ ਹੇਠਾਂ ਰੱਖ ਦਿਤਾ। ਕਮੇਟੀ ਵਲੋਂ ਜਾਂਚ ਜਾਰੀ ਹੈ, ਜੇਕਰ ਡਾਕਟਰ ਜਾਂ ਸਟਾਫ਼ ਦੀ ਗ਼ਲਤੀ ਸਾਹਮਣੇ ਆਈ ਤਾਂ ਸਖ਼ਤ ਕਾਰਵਾਈ ਕਰਨਗੇ।
