ਲਲਿਤ ਮੋਦੀ ਨੇ ਸੋਸ਼ਲ ਮੀਡੀਆ 'ਤੇ ਕੁਝ ਪੋਸਟਾਂ ਸਾਂਝੀਆਂ ਕੀਤੀਆਂ ਹਨ, ਜਿਸ ਤੋਂ ਪਹਿਲਾਂ ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਸੀ ਕਿ ਦੋਵਾਂ ਦਾ ਵਿਆਹ ਹੋ ਗਿਆ ਹੈ
ਮੁੰਬਈ: ਸਾਬਕਾ ਮਿਸ ਯੂਨੀਵਰਸ ਸੁਸ਼ਮਿਤਾ ਸੇਨ ਅਤੇ ਲਲਿਤ ਮੋਦੀ ਜਲਦ ਹੀ ਵਿਆਹ ਕਰਨ ਜਾ ਰਹੇ ਹਨ। ਲਲਿਤ ਮੋਦੀ ਨੇ ਖੁਦ ਸੋਸ਼ਲ ਮੀਡੀਆ 'ਤੇ ਇਕ ਪੋਸਟ ਰਾਹੀਂ ਇਹ ਜਾਣਕਾਰੀ ਦਿੱਤੀ ਹੈ। ਲਲਿਤ ਮੋਦੀ ਨੇ ਸੋਸ਼ਲ ਮੀਡੀਆ 'ਤੇ ਕੁਝ ਪੋਸਟਾਂ ਸਾਂਝੀਆਂ ਕੀਤੀਆਂ ਹਨ, ਜਿਸ ਤੋਂ ਪਹਿਲਾਂ ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਸੀ ਕਿ ਦੋਵਾਂ ਦਾ ਵਿਆਹ ਹੋ ਗਿਆ ਹੈ ਪਰ ਕੁਝ ਸਮੇਂ ਬਾਅਦ ਉਹਨਾਂ ਨੇ ਸਪੱਸ਼ਟ ਕੀਤਾ ਕਿ ਉਹ ਰਿਲੇਸ਼ਨਸ਼ਿਪ 'ਚ ਹਨ। ਇਸ ਤੋਂ ਬਾਅਦ ਉਹਨਾਂ ਕਿਹਾ ਸੀ ਕਿ ਉਹ ਜਲਦ ਹੀ ਵਿਆਹ ਕਰਨਗੇ।
ਮੀਡੀਆ ਰਿਪੋਰਟਾਂ ਅਨੁਸਾਰ 18 ਸਾਲ ਦੀ ਉਮਰ 'ਚ ਮਿਸ ਇੰਡੀਆ ਅਤੇ 19 ਸਾਲ ਦੀ ਉਮਰ 'ਚ ਮਿਸ ਯੂਨੀਵਰਸ ਬਣੀ ਸੁਸ਼ਮਿਤਾ ਆਪਣੀ ਪਹਿਲੀ ਫਿਲਮ ਤੋਂ ਹੀ ਆਪਣੇ ਅਫੇਅਰਜ਼ ਨੂੰ ਲੈ ਕੇ ਚਰਚਾ 'ਚ ਹੈ। ਨਿਰਦੇਸ਼ਕ ਵਿਕਰਮ ਭੱਟ ਸੁਸ਼ਮਿਤਾ ਦੀ ਪਹਿਲੀ ਫਿਲਮ 'ਦਸਤਕ' ਦੇ ਲੇਖਕ ਸਨ। ਦੋਹਾਂ ਦਾ ਨਾਂ ਕਾਫੀ ਜੁੜਿਆ ਸੀ ਅਤੇ ਸਾਲਾਂ ਤੱਕ ਸੁਰਖੀਆਂ 'ਚ ਰਿਹਾ। 1996 'ਚ ਸ਼ੁਰੂ ਹੋਇਆ ਰਿਸ਼ਤਿਆਂ ਦਾ ਇਹ ਸਿਲਸਿਲਾ 2021 'ਚ ਰੋਹਮਨ ਸ਼ਾਲ ਨਾਲ ਬ੍ਰੇਕਅੱਪ ਤੱਕ ਜਾਰੀ ਰਿਹਾ। ਸੁਸ਼ਮਿਤਾ ਆਪਣੀਆਂ ਫਿਲਮਾਂ ਤੋਂ ਜ਼ਿਆਦਾ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਸੁਰਖੀਆਂ 'ਚ ਰਹੀ। ਉਹ ਵਿਆਹ ਦੇ ਸਵਾਲ ਨੂੰ ਹਮੇਸ਼ਾ ਟਾਲਦੀ ਰਹੀ ਪਰ ਦੋ ਬੇਟੀਆਂ ਨੂੰ ਗੋਦ ਲੈ ਕੇ ਉਹਨਾਂ ਦੀ ਜ਼ਿੰਮੇਵਾਰੀ ਸੰਭਾਲਣ 'ਤੇ ਵੀ ਉਸ ਦੀ ਕਾਫੀ ਤਾਰੀਫ ਹੋਈ।
ਸੁਸ਼ਮਿਤਾ ਦਾ ਜਨਮ 19 ਨਵੰਬਰ 1975 ਨੂੰ ਇਕ ਬੰਗਾਲੀ ਪਰਿਵਾਰ ਵਿਚ ਹੋਇਆ ਸੀ। ਹੈਦਰਾਬਾਦ ਵਿਚ ਪੈਦਾ ਹੋਈ ਸੁਸ਼ਮਿਤਾ ਦੇ ਪਿਤਾ ਸੁਬੀਰ ਸੇਨ ਭਾਰਤੀ ਹਵਾਈ ਸੈਨਾ ਵਿਚ ਇਕ ਵਿੰਗ ਕਮਾਂਡਰ ਸਨ ਅਤੇ ਮਾਂ ਸ਼ੁਭਰਾ ਸੇਨ ਇਕ ਗਹਿਣਿਆਂ ਦੀ ਡਿਜ਼ਾਈਨਰ ਸੀ। ਮੁੱਢਲੀ ਸਿੱਖਿਆ ਹੈਦਰਾਬਾਦ ਵਿਚ ਹੀ ਹੋਈ। ਫਿਰ ਏਅਰਫੋਰਸ ਗੋਲਡ ਜੁਬਲੀ ਇੰਸਟੀਚਿਊਟ, ਨਵੀਂ ਦਿੱਲੀ ਤੋਂ ਗ੍ਰੈਜੂਏਸ਼ਨ ਕੀਤੀ। ਇਸ ਦੌਰਾਨ ਹੀ ਸੁਸ਼ਮਿਤਾ ਮਾਡਲਿੰਗ ਨਾਲ ਜੁੜੀ ਸੀ। 1994 ਵਿਚ ਸੁਸ਼ਮਿਤਾ ਨੇ ਮਾਡਲਿੰਗ ਦੇ ਨਾਲ-ਨਾਲ ਸੁੰਦਰਤਾ ਮੁਕਾਬਲੇ ਵਿਚ ਹਿੱਸਾ ਲਿਆ। ਇਸ ਮੁਕਾਬਲੇ 'ਚ ਐਸ਼ਵਰਿਆ ਰਾਏ ਵੀ ਸੀ ਪਰ ਸੁਸ਼ਮਿਤਾ ਨੇ ਮਿਸ ਇੰਡੀਆ ਦਾ ਖਿਤਾਬ ਜਿੱਤਿਆ। ਐਸ਼ਵਰਿਆ ਉਦੋਂ ਕੁਝ ਅੰਕਾਂ ਨਾਲ ਹਾਰ ਗਈ ਸੀ ਪਰ ਉਸ ਨੇ ਉਸੇ ਸਾਲ ਮਿਸ ਵਰਲਡ ਦਾ ਖਿਤਾਬ ਜਿੱਤਿਆ, ਜਦੋਂ ਸੁਸ਼ਮਿਤਾ ਮਿਸ ਯੂਨੀਵਰਸ ਬਣੀ।
ਸੁਸ਼ਮਿਤਾ ਸੇਨ ਨੇ 24 ਸਾਲ ਦੀ ਉਮਰ ਵਿਚ ਆਪਣੀ ਪਹਿਲੀ ਬੇਟੀ ਰੇਨੀ ਨੂੰ ਗੋਦ ਲਿਆ ਸੀ। ਇਸ ਤੋਂ ਬਾਅਦ ਲਗਭਗ 10 ਸਾਲ ਬਾਅਦ ਦੂਜੀ ਬੇਟੀ ਅਲੀਸ਼ਾ ਨੂੰ ਗੋਦ ਲਿਆ ਗਿਆ। ਰਿਪੋਰਟਾਂ ਅਨੁਸਾਰ ਪਹਿਲੀ ਫਿਲਮ 'ਦਸਤਕ' 'ਚ ਲੇਖਕ-ਨਿਰਦੇਸ਼ਕ ਵਿਕਰਮ ਭੱਟ ਤੋਂ ਲੈ ਕੇ ਮਾਡਲ ਰੋਹਮਨ ਸ਼ਾਲ ਤੱਕ ਸੁਸ਼ਮਿਤਾ ਦੇ ਕਈ ਲੋਕਾਂ ਨਾਲ ਰਿਸ਼ਤੇ ਸਨ। ਸੁਸ਼ਮਿਤਾ ਨੇ ਖੁਦ ਇਕ ਇੰਟਰਵਿਊ 'ਚ ਕਬੂਲ ਕੀਤਾ ਸੀ ਕਿ ਉਹ ਆਪਣੇ ਰਿਸ਼ਤੇ 'ਚ ਤਿੰਨ ਵਾਰ ਵਿਆਹ ਦੇ ਬੰਧਨ 'ਚ ਬੱਝਣ ਵਾਲੀ ਸੀ ਪਰ ਕਿਸੇ ਕਾਰਨ ਗੱਲ ਨਹੀਂ ਬਣ ਸਕੀ। ਵਿਕਰਮ ਭੱਟ ਤੋਂ ਬਾਅਦ ਅਦਾਕਾਰ ਰਣਦੀਪ ਹੁੱਡਾ, ਸਾਬਕਾ ਪਾਕਿਸਤਾਨੀ ਕ੍ਰਿਕਟਰ ਵਸੀਮ ਅਕਰਮ, ਇਕ ਰੈਸਟੋਰੈਂਟ ਦੇ ਮਾਲਕ ਰਿਤਿਕ, ਨਿਰਦੇਸ਼ਕ ਮੁਦੱਸਰ, ਮਾਡਲ ਰੋਹਮਨ ਸ਼ਾਲ ਤੋਂ ਇਲਾਵਾ ਸੁਸ਼ਮਿਤਾ ਦਾ ਨਾਂ ਕਈ ਹੋਰ ਲੋਕਾਂ ਨਾਲ ਜੁੜ ਚੁੱਕਿਆ ਹੈ।