ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਇਹਨਾਂ ਤਸਵੀਰਾਂ ਦਾ ਦਿੱਲੀ ਬਾਰਡਰ ਨਾਲ ਕੋਈ ਸਬੰਧ ਨਹੀਂ ਹੈ।
ਰੋਜ਼ਾਨਾ ਸਪੋਕਸਮੈਨ (ਮੋਹਾਲੀ ਟੀਮ) - ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜਿੰਦਰ ਸਿਰਸਾ ਨੇ ਆਪਣੇ ਟਵਿੱਟਰ ਅਕਾਊਂਟ 'ਤੇ 7 ਫਰਵਰੀ ਨੂੰ ਦੋ ਫੌਜੀਆਂ ਦੀ ਤਸਵੀਰ ਸ਼ੇਅਰ ਕੀਤੀ ਅਤੇ ਕੈਪਸ਼ਨ ਲਿਖ ਕੇ ਇਹ ਦਾਅਵਾ ਕੀਤਾ ਗਿਆ ਕਿ ਇਹ ਫੌਜੀ ਛੁੱਟੀ 'ਤੇ ਆਏ ਤੇ ਇਸ ਦੌਰਾਨ ਸਭ ਤੋਂ ਪਹਿਲਾਂ ਦਿੱਲੀ ਬਾਰਡਰ 'ਤੇ ਆਪਣੇ ਕਿਸਾਨ ਪਿਤਾ ਨੂੰ ਮਿਲਣ ਪਹੁੰਚੇ। ਇਸ ਦੇ ਨਾਲ ਹੀ ਮਨਜਿੰਦਰ ਸਿਰਸਾ ਦੇ ਟਵੀਟ ਨੂੰ ਅਧਾਰ ਬਣਾ ਕੇ ਨਾਮਵਾਰ ਮੀਡੀਆ ਹਾਊਸ ਨਿਊਜ਼ 18 ਨੇ ਵੀ ਇਹ ਖਬਰ ਚਲਾਈ।
ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਇਹਨਾਂ ਤਸਵੀਰਾਂ ਦਾ ਦਿੱਲੀ ਬਾਰਡਰ ਨਾਲ ਕੋਈ ਸਬੰਧ ਨਹੀਂ ਹੈ ਇਹ ਤਸਵੀਰਾਂ ਪੰਜਾਬ ਦੇ ਲੁਧਿਆਣਾ ਸ਼ਹਿਰ ਦੇ ਬਸ ਸਟੈਂਡ ਨੇੜੇ ਦੀਆਂ ਹਨ।
ਵਾਇਰਲ ਤਸਵੀਰ
ਮਨਜਿੰਦਰ ਸਿਰਸਾ ਨੇ ਵਾਇਰਲ ਤਸਵੀਰ ਨੂੰ ਸ਼ੇਅਰ ਕਰ ਕੇ ਕੈਪਸ਼ਨ ਲਿਖਿਆ, ''फौजी छुट्टी पर घर आया तो सबसे पहले अपने किसान पिता से मिलने दिल्ली बॉर्डर पहुँचा और उनसे मिलकर उसकी आँखों में आँसू भर आए देश के लिए जान लुटाने वाले फ़ौजी परिवारों को कोई घटिया सोच वाला इंसान ही खालिस्तानी कहेगा! #ਖੜਾਂਗੇਅੜਾਂਗੇਲੜਾਂਗੇ_ਜਿੱਤਾਂਗੇ #FarmersProtest #supportfarmers''
ਟਵੀਟ ਦਾ ਅਰਕਾਇਵਰਡ ਲਿੰਕ
ਇਸ ਦੇ ਨਾਲ ਹੀ ਨਾਮਵਾਰ ਮੀਡੀਆ ਹਾਊਸ punjab.news18.com ਨੇ ਸਿਰਸਾ ਦੇ ਟਵੀਟ ਨੂੰ ਅਧਾਰ ਬਣਾ ਕੇ ਖ਼ਬਰ ਚਲਾਉਂਦਿਆ ਹੈੱਡਲਾਈਨ ਲਿਖੀ, ''ਛੁੱਟੀ ਆਏ ਫੌਜੀ, ਪਿਤਾ ਨੂੰ ਮਿਲਣ ਦਿੱਲੀ ਕਿਸਾਨ ਮੋਰਚੇ 'ਚ ਪਹੁੰਚੇ, ਹਾਲਤ ਦੇਖ ਅੱਖਾਂ 'ਚੋਂ ਨਿਕਲੇ ਹੰਝੂ''
ਰਿਪੋਰਟ ਦਾ ਅਰਕਾਇਵਰਡ ਲਿੰਕ
ਪੜਤਾਲ
ਪੜਤਾਲ ਸ਼ੁਰੂ ਕਰਨ ਦੌਰਾਨ ਅਸੀਂ ਸਭ ਤੋਂ ਪਹਿਲਾਂ ਵਾਇਰਲ ਤਸਵੀਰਾਂ ਨੂੰ ਧਿਆਨ ਨਾਲ ਦੇਖਿਆ ਤਾਂ ਸਾਨੂੰ ਇਕ ਵਾਇਰਲ ਤਸਵੀਰ ਦੇ ਵਿਚ “PARKING BUS STAND” ਦਾ ਬੋਰਡ ਲੱਗਾ ਦਿਖਿਆ, ਧਿਆਨ ਨਾਲ ਦੇਖਿਆ ਜਾਵੇ ਤਾਂ ਪਾਰਕਿੰਗ ਬੱਸ ਸਟੈਂਡ ਦੇ ਹੇਠਾਂ ਲੁਧਿਆਣਾ ਵੀ ਲਿਖਿਆ ਦੇਖਿਆ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ ਦੂਜੀ ਤਸਵੀਰ ਨੂੰ ਧਿਆਨ ਨਾਲ ਦੇਖਿਆ ਜਾਵੇ ਤਾਂ ਦੂਜੀ ਤਸਵੀਰ ਵਿਚ ਸ਼ਿਪਿੰਗ ਕੰਪਨੀ ਦਾ Fedex ਬੋਰਡ ਲੱਗਾ ਦੇਖਿਆ ਜਾ ਸਕਦਾ ਹੈ।
ਇਸ ਤੋਂ ਬਾਅਦ ਅਸੀਂ ਇਹਨਾਂ ਦੋਨੋਂ ਬੋਰਡ ਦੀ ਲੁਕੇਸ਼ਨ ਗੂਗਲ ਮੈਪ 'ਤੇ ਸਰਚ ਕੀਤੀ ਤਾਂ ਸਾਹਮਣੇ ਆਇਆ ਕਿ Fedex ਦਾ ਬੋਰਡ ਲੁਧਿਆਣਾ ਬੱਸ ਸਟੈਂਡ ਦੇ ਨਜ਼ਦੀਕ ਹੀ ਲੱਗਾ ਹੋਇਆ ਹੈ। ਪੜਤਾਲ ਨੂੰ ਅੱਗੇ ਵਧਾਉਂਦੇ ਹੋਏ ਅਸੀਂ ਵਾਇਰਲ ਤਸਵੀਰ ਨੂੰ ਲੈ ਕੇ ਖ਼ਬਰਾਂ ਸਰਚ ਕਰਨੀਆਂ ਸ਼ੁਰੂ ਕੀਤੀਆਂ ਤਾਂ ਸਾਨੂੰ ਪੜਤਾਲ ਦੌਰਾਨ ਅਜਿਹੀ ਕੋਈ ਵੀ ਰਿਪੋਰਟ ਨਹੀਂ ਮਿਲੀ ਜਿਸ ਵਿਚ ਇਹ ਕਿਹਾ ਗਿਆ ਹੋਵੇ ਕਿ ਇਹ ਫੌਜੀ ਛੁੱਟੀ ਦੌਰਾਨ ਕਿਸਾਨੀ ਧਰਨੇ ਵਿਚ ਆਪਣੇ ਪਿਤਾ ਨੂੰ ਮਿਲਣ ਗਏ ਹਨ।
ਇਸ ਦੇ ਨਾਲ ਹੀ ਅਸੀਂ ਵਾਇਰਲ ਤਸਵੀਰ ਬਾਰੇ ਆਪਣੇ ਲੁਧਿਆਣਾ ਦੇ ਰਿਪੋਟਰ ਵਿਸ਼ਾਲ ਕਪੂਰ ਨਾਲ ਗੱਲਬਾਤ ਕੀਤੀ ਤਾਂ ਉਹਨਾਂ ਦੱਸਿਆ ਕਿ ਵਾਇਰਲ ਤਸਵੀਰਾਂ ਲੁਧਿਆਣਾ ਸ਼ਹਿਰ ਦੇ ਬੱਸ ਸਟੈਂਡ ਦੇ ਕੋਲ ਸਥਿਤ ਦੁਕਾਨਾਂ ਦੀਆਂ ਹਨ। ਵਿਸ਼ਾਲ ਨੇ ਸਪੋਕਸਮੈਨ ਨਾਲ ਲੁਧਿਆਣਾ ਦੇ ਬੱਸ ਸਟੈਂਡ ਅਤੇ ਉਸ ਕੋਲ ਜੋ ਦੁਕਾਨਾਂ ਦੀਆਂ ਤਸਵੀਰਾਂ ਹਨ ਉਹ ਵੀ ਸ਼ੇਅਰ ਕੀਤੀਆਂ, ਜਿਸ ਜਗ੍ਹਾਂ 'ਤੇ ਫੌਜੀਆਂ ਦੀ ਤਸਵੀਰ ਲਈ ਗਈ ਹੈ। ਤਸਵੀਰਾਂ ਨੂੰ ਹੇਠਾਂ ਦੇਖਿਆ ਜਾ ਸਕਦਾ ਹੈ।
ਅਸੀਂ ਤਸਵੀਰ ਵਿਚ ਦਿਖ ਰਹੇ ਫੌਜੀਆਂ ਬਾਰੇ ਸੁਤੰਤਰ ਰੂਪ ਤੋਂ ਪੁਸ਼ਟੀ ਨਹੀਂ ਕਰਦੇ ਹਾਂ ਪਰ ਇਸ ਗੱਲ ਦੀ ਪੁਸ਼ਟੀ ਕਰਦੇ ਹਾਂ ਕਿ ਇਹ ਤਸਵੀਰਾਂ ਦਿੱਲੀ ਦੀਆਂ ਨਹੀਂ ਹਨ।
ਨਤੀਜਾ - ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਵਾਇਰਲ ਤਸਵੀਰ ਜਰੀਏ ਕੀਤਾ ਦਾਅਵਾ ਫਰਜ਼ੀ ਪਾਇਆ ਹੈ। ਵਾਇਰਲ ਤਸਵੀਰ ਦਾ ਕਿਸਾਨੀ ਸੰਘਰਸ਼ ਨਾਲ ਕੋਈ ਸਬੰਧ ਨਹੀਂ ਹੈ। ਇਹ ਤਸਵੀਰਾਂ ਪੰਜਾਬ ਦੇ ਲੁਧਿਆਣਾ ਸ਼ਹਿਰ ਦੇ ਬਸ ਸਟੈਂਡ ਨੇੜੇ ਦੀਆਂ ਹਨ।
Claim : ''ਛੁੱਟੀ ਆਏ ਫੌਜੀ, ਪਿਤਾ ਨੂੰ ਮਿਲਣ ਦਿੱਲੀ ਕਿਸਾਨ ਮੋਰਚੇ 'ਚ ਪਹੁੰਚੇ
Claimed By: News18 And Manjinder Sirsa
Fact Check: ਫਰਜ਼ੀ
