ਅਮਰੀਕਾ ਵਿਚ ਇਕ ਵੈਕਸੀਨ ਦੇ ਸਕਾਰਾਤਮਕ ਨਤੀਜੇ ਸਾਹਮਣੇ ਆਉਣ ਤੋਂ ਬਾਅਦ, ਲੋਕਾਂ ਦੀਆਂ ਉਮੀਦਾਂ ਵਿਚ ਵਾਧਾ ਹੋਇਆ ਹੈ।
ਨਵੀਂ ਦਿੱਲੀ: ਅਮਰੀਕਾ ਵਿਚ ਇਕ ਵੈਕਸੀਨ ਦੇ ਸਕਾਰਾਤਮਕ ਨਤੀਜੇ ਸਾਹਮਣੇ ਆਉਣ ਤੋਂ ਬਾਅਦ, ਲੋਕਾਂ ਦੀਆਂ ਉਮੀਦਾਂ ਵਿਚ ਵਾਧਾ ਹੋਇਆ ਹੈ। ਦਵਾ ਕੰਪਨੀ ਮਾਡਰਨਾ ਨੇ ਸੋਮਵਾਰ ਨੂੰ ਕਿਹਾ ਕਿ ਟਰਾਇਲ ਦੌਰਾਨ ਅੱਠ ਵਿਅਕਤੀਆਂ ਨੂੰ ਵੈਕਸੀਨ ਦੀ ਖੁਰਾਕ ਦਿੱਤੀ ਗਈ ਸੀ, ਜਿਸ ਦਾ ਨਤੀਜਾ ਸਕਾਰਾਤਮਕ ਆਇਆ ਹੈ।
Photo
ਇਹ ਅਮਰੀਕਾ ਦੀ ਪਹਿਲੀ ਵੈਕਸੀਨ ਹੈ ਜਿਸ ਦੀ ਜਾਂਚ ਲੋਕਾਂ ਤੇ ਕੀਤੀ ਗਈ ਸੀ। ਨਿਊਯਾਰਕ ਟਾਈਮਜ਼ ਅਨੁਸਾਰ ਅਮਰੀਕਾ ਵਿਚ ਇਹ ਪਹਿਲੀ ਵੈਕਸੀਨ ਹੈ ਜਿਸ ਦਾ ਟਰਾਇਲ ਇਨਸਾਨਾਂ 'ਤੇ ਕੀਤਾ ਗਿਆ। ਮਾਰਚ ਦੀ ਸ਼ੁਰੂਆਤ ਵਿਚ ਅੱਠ ਵਿਅਕਤੀਆਂ ਨੂੰ ਵੈਕਸੀਨ ਦੀ ਖੁਰਾਕ ਦਿੱਤੀ ਗਈ ਸੀ, ਸਾਰੇ ਲੋਕਾਂ ਨੂੰ ਵੈਕਸੀਨ ਦੇ 2 ਦੋ ਡੋਜ਼ ਦਿੱਤੇ ਗਏ ਸਨ।
Photo
ਦਵਾ ਕੰਪਨੀ ਦਾ ਕਹਿਣਾ ਹੈ ਕਿ ਵੈਕਸੀਨ ਸੁਰੱਖਿਅਤ ਨਜ਼ਰ ਆ ਰਹੀ ਹੈ ਅਤੇ ਵਾਇਰਸ ਖਿਲਾਫ ਇਮਿਊਨ ਰਿਸਪਾਂਸ ਪੈਦਾ ਕਰਦੀ ਨਜ਼ਰ ਆ ਰਹੀ ਹੈ। ਕੰਪਨੀ ਦੇ ਇਸ ਦਾਅਵੇ ਤੋਂ ਬਾਅਦ ਸ਼ੇਅਰ ਬਜ਼ਾਰ ਵਿਚ ਉਸ ਦੇ ਸਟਾਕ ਦੀ ਕੀਮਤ ਵਿਚ ਕਾਫੀ ਉਛਾਲ ਦੇਖਣ ਨੂੰ ਮਿਲਿਆ ਹੈ।
Photo
ਹਾਲਾਂਕਿ ਕੰਪਨੀ ਨੇ ਟਰਾਇਲ ਦੌਰਾਨ ਸਿਰਫ ਤੰਦਰੁਸਤ ਵਲੰਟੀਅਰਾਂ ਨੂੰ ਵੈਕਸੀਨ ਦਿੱਤੀ ਸੀ। ਇਹਨਾਂ ਲੋਕਾਂ ਦੇ ਸਰੀਰ ਵਿਚ ਜੋ ਐਂਟੀਬਾਡੀ ਮਿਲੇ, ਲੈਬ ਵਿਚ ਇਨਸਾਨਾਂ ਦੇ ਸੈਲਜ਼ 'ਤੇ ਉਹਨਾਂ ਦਾ ਪਰੀਖਣ ਕੀਤਾ ਗਿਆ। ਇਸ ਦੌਰਾਨ ਦੇਖਿਆ ਗਿਆ ਕਿ ਐਂਟੀਬਾਡੀ ਵਾਇਰਸ ਨੂੰ ਵਧਣ ਤੋਂ ਰੋਕ ਰਿਹਾ ਹੈ।
Photo
ਵੈਕਸੀਨ ਦਿੱਤੇ ਜਾਣ ਤੋਂ ਬਾਅਦ ਲੋਕਾਂ ਵਿਚ ਐਂਟੀਬਾਡੀਜ਼ ਦਾ ਪੱਧਰ ਉਹੀ ਸੀ ਜੋ ਕੋਰੋਨਾ ਵਾਇਰਸ ਤੋਂ ਠੀਕ ਹੋਣ ਵਾਲੇ ਮਰੀਜ਼ਾਂ ਵਿਚ ਸੀ। ਹਾਲਾਂਕਿ ਅਜੇ ਤੱਕ ਵੈਕਸੀਨ ਬਾਰੇ ਸੀਮਤ ਜਾਣਕਾਰੀ ਦੇ ਕਾਰਨ, ਇਸ ਦੀ ਸਫਲਤਾ ਬਾਰੇ ਅਜੇ ਵੀ ਅਨਿਸ਼ਚਿਤਤਾ ਹੈ।
Photo
ਕੰਪਨੀ ਨੇ ਕਿਹਾ ਹੈ ਕਿ ਉਹ ਦੂਜੇ ਪੜਾਅ ਵਿਚ 600 ਲੋਕਾਂ 'ਤੇ ਵੈਕਸੀਨ ਦਾ ਟਰਾਇਲ ਕਰਨ ਜਾ ਰਹੀ ਹੈ। ਜਦਕਿ ਜੁਲਾਈ ਤੋਂ ਵੈਕਸੀਨ ਦੀ ਟੈਸਟਿੰਗ ਦਾ ਤੀਜਾ ਪੜਾਅ ਸ਼ੁਰੂ ਹੋਵੇਗਾ, ਜਿਸ ਵਿਚ ਹਜ਼ਾਰਾਂ ਲੋਕਾਂ ਨੂੰ ਸ਼ਾਮਲ ਕੀਤਾ ਜਾ ਸਕਦਾ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਦੂਜਾ ਅਤੇ ਤੀਜਾ ਟਰਾਇਲ ਸਫਲ ਹੋਣ 'ਤੇ ਵੈਕਸੀਨ ਸਾਲ ਦੇ ਅਖੀਰ ਤੱਕ ਜਾਂ ਫਿਰ 2021 ਦੇ ਸ਼ੁਰੂਆਤ ਵਿਚ ਵੱਡੇ ਪੱਧਰ 'ਤੇ ਲੋਕਾਂ ਲਈ ਉਪਲਬਧ ਹੋ ਸਕਦੀ ਹੈ।
