ਅਮਰੀਕਾ ਦੀ ਵੱਡੀ ਕੰਪਨੀ ਇੰਟਰਨੈਸ਼ਨਲ ਬਿਜ਼ਨੇਸ ਮਸ਼ੀਨਸ (IBM) ਵਿਚ ਭਾਰਤੀ ਮੂਲ ਦੇ ਅਰਵਿੰਦ ਕ੍ਰਿਸ਼ਨਾ ਨਵੇਂ ਸੀਈਓ ਹੋਣਗੇ।
ਨਵੀਂ ਦਿੱਲੀ: ਅਮਰੀਕਾ ਦੀ ਵੱਡੀ ਕੰਪਨੀ ਇੰਟਰਨੈਸ਼ਨਲ ਬਿਜ਼ਨੇਸ ਮਸ਼ੀਨਸ (IBM) ਵਿਚ ਭਾਰਤੀ ਮੂਲ ਦੇ ਅਰਵਿੰਦ ਕ੍ਰਿਸ਼ਨਾ ਨਵੇਂ ਸੀਈਓ ਹੋਣਗੇ। ਉਹ ਆਈਬੀਐਮ ਦੇ ਸੀਈਓ ਦੇ ਤੌਰ ‘ਤੇ ਵਰਜੀਨੀਆ ਰੋਮਟੀ ਦੀ ਥਾਂ ਲੈਣਗੇ। 57 ਸਾਲਾਂ ਦੇ ਅਰਵਿੰਦ ਕ੍ਰਿਸ਼ਨਾ 6 ਅਪ੍ਰੈਲ ਨੂੰ ਅਪਣੀ ਨਵੀਂ ਜ਼ਿੰਮੇਵਾਰੀ ਸੰਭਾਲਣਗੇ।
Photo
ਦੱਸ ਦਈਏ ਕਿ ਅਰਵਿੰਦ ਕ੍ਰਿਸ਼ਨਾ ਫਿਲਹਾਲ ਕਲਾਊਡ ਅਤੇ ਕਾਗਨਿਟਿਵ ਸਾਫਟਵੇਅਰ ਲਈ ਆਈਬੀਐਮ ਵਿਚ ਸੀਨੀਅਰ ਵਾਇਸ ਪ੍ਰੈਸੀਡੈਂਟ ਦੇ ਅਹੁਦੇ ‘ਤੇ ਕੰਮ ਕਰ ਰਹੇ ਹਨ। ਉਹਨਾਂ ਦੀਆਂ ਮੌਜੂਦਾ ਜ਼ਿੰਮੇਵਾਰੀਆਂ ਵਿਚ ਆਈਬੀਐਮ ਕਲਾਊਡ, ਆਈਬੀਐਮ ਸਕਿਓਰਿਟੀ ਅਤੇ ਕਾਗਨੇਟਿਵ ਐਪਲੀਕੇਸ਼ਨ ਬਿਜ਼ਨੇਸ ਅਤੇ ਆਈਬੀਐਮ ਰਿਸਰਚ ਵੀ ਸ਼ਾਮਲ ਹਨ।
Photo
ਅਰਵਿੰਦ ਆਈਬੀਐਮ ਸਿਸਟਮ ਅਤੇ ਤਕਨਾਲੋਜੀ ਗਰੁੱਪ ਦੀ ਡਿਵੈਲਪਮੈਂਟ ਅਤੇ ਮੈਨੂਫੈਕਚਰਿੰਗ ਸੰਸਥਾ ਦੇ ਜਨਰਲ ਮੈਨੇਜਰ ਵੀ ਰਹੇ ਸੀ। ਉਹਨਾਂ ਨੇ ਆਈਬੀਐਮ ਦੇ ਡਾਟੇ ਨਾਲ ਸਬੰਧਤ ਕਈ ਵਪਾਰਾਂ ਦੀ ਅਗਵਾਈ ਕੀਤੀ ਹੈ। ਉਹਨਾਂ ਨੇ ਸਾਲ 1990 ਵਿਚ ਆਈਬੀਐਮ ਨੂੰ ਜੁਆਇਨ ਕੀਤਾ ਸੀ।
Photo
ਅਰਵਿੰਦ ਕ੍ਰਿਸ਼ਨਾ ਦੀ ਨਿਯੁਕਤੀ ਨੂੰ ਲੈ ਕੇ ਮੌਜੂਦਾ ਸੀਈਓ ਵਰਜੀਨੀਆ ਰੋਮਟੀ ਨੇ ਕਿਹਾ ਹੈ ਕਿ ਆਈਬੀਐਮ ਦੇ ਅਗਲੇ ਦੌਰ ਲਈ ਅਰਵਿੰਦ ਬੈਸਟ ਸੀਈਓ ਹਨ। ਇਸ ਤੋਂ ਇਲਾਵਾ ਉਹਨਾਂ ਨੇ ਕਿਹਾ, ਉਹ ਕਾਫੀ ਵਧੀਆ ਟੈਕਨੋਲੋਜਿਸਟ ਹਨ, ਜਿਨ੍ਹਾਂ ਨੇ ਆਰਟੀਫੀਸ਼ਲ ਇੰਟੈਲੀਜੈਂਸ, ਕਲਾਊਡ, ਕੁਆਂਟਮ ਕੰਪਿਊਟਿੰਗ ਅਤੇ ਬਲਾਕਚੇਨ ਆਦਿ ਅਹਿਮ ਤਕਨੀਕਾਂ ਨੂੰ ਵਿਕਸਿਤ ਕੀਤਾ ਹੈ।
Photo
ਅਰਵਿੰਦ ਕ੍ਰਿਸ਼ਨਾ ਨੇ ਆਈਆਈਟੀ ਕਾਨਪੁਰ ਤੋਂ ਅੰਡਰ ਗ੍ਰੇਜੂਏਟ ਡਿਗਰੀ ਪ੍ਰਾਪਤ ਕੀਤੀ ਹੈ। ਉਹਨਾਂ ਨੇ ਯੂਨੀਵਰਸਿਟੀ ਆਫ ਇਲਨਾਇਜ਼, ਅਰਬਨਾ ਸ਼ੈਂਪੇਨ ਤੋਂ ਪੀਐਚਡੀ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਬਿਗ ਬਲੂ ਦੇ ਨਾਂਅ ਨਾਲ ਦੁਨੀਆ ਵਿਚ ਮਸ਼ਹੂਰ ਆਈਟੀ ਕੰਪਨੀ ਨੇ 20ਵੀਂ ਸ਼ਤਾਬਦੀ ਵਿਚ ਅਪਣੇ ਟੈਕਨੋਲੋਜੀ ਦੇ ਵਿਕਾਸ ਲਈ ਅਪਣਾ ਖ਼ਾਸ ਯੋਗਦਾਨ ਦਿੱਤਾ ਹੈ।
Photo
ਆਈਬੀਐਮ ਦੀ ਸਥਾਪਨਾ 16 ਜੂਨ 1911 ਨੂੰ ਕੀਤੀ ਗਈ ਹੈ। ਕੰਪਿਊਟਿੰਗ ਕੰਪਨੀਆਂ ਵਿਚ ਆਈਬੀਐਮ ਇਕਲੌਤੀ ਅਜਿਹੀ ਕੰਪਨੀ ਹੈ, ਜਿਸ ਨੇ ਹੁਣ ਤੱਕ ਤਿੰਨ ਨੋਬਲ ਪੁਰਸਕਾਰ, ਚਾਰ ਟੂਰਿੰਗ ਪੁਰਸਕਾਰ, ਪੰਜ ਰਾਸ਼ਟਰੀ ਤਕਨਾਲੋਜੀ ਮੈਡਲ ਅਤੇ ਪੰਜ ਨੈਸ਼ਨਲ ਸਾਇੰਸ ਮੈਡਲ ਜਿੱਤੇ ਹਨ। ਇਹੀ ਨਹੀਂ ਕੰਪਨੀ ਦੇ ਨਾਂਅ ਦੁਨੀਆ ਦੇ ਸਭ ਤੋਂ ਜ਼ਿਆਦਾ ਪੇਟੈਂਟ ਹੋਣ ਦਾ ਵੀ ਗੌਰਵਮਈ ਇਤਿਹਾਸ ਜੁੜਿਆ ਹੈ।
