ਵਾਸ਼ਿੰਗਟਨ, 5 ਫ਼ਰਵਰੀ : ਅਮਰੀਕਾ 'ਚ ਸੁਪਰ ਬਾਊਲ ਮੁਕਾਬਲੇ (ਨੈਸ਼ਨਲ ਫ਼ੁਟਬਾਲ ਲੀਗ) ਤੋਂ ਪਹਿਲਾਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਖਿਡਾਰੀਆਂ ਅਤੇ ਪ੍ਰਸ਼ੰਸਕਾਂ ਨੂੰ ਕੌਮੀ ਗੀਤ ਨੂੰ ਲੈ ਕੇ ਚਿਤਾਵਨੀ ਦਿਤੀ ਹੈ। ਟਰੰਪ ਨੇ ਇਕ ਬਿਆਨ ਜਾਰੀ ਕਰਦੇ ਹੋਏ ਕਿਹਾ ਹੈ ਕਿ ਕੌਮੀ ਗੀਤ ਦੇ ਵਿਰੋਧ 'ਚ ਖਿਡਾਰੀ ਗੋਡਿਆਂ ਭਾਰ ਨਾ ਬੈਠਣ।
ਮੈਚ ਤੋਂ ਪਹਿਲਾਂ ਵ੍ਹਾਈਟ ਹਾਊਸ ਵਲੋਂ ਜਾਰੀ ਇਕ ਬਿਆਨ 'ਚ ਟਰੰਪ ਨੇ ਕਿਹਾ, ''ਕੌਮੀ ਗੀਤ ਦੌਰਾਨ ਖੜੇ ਹੋ ਕੇ ਅਸੀਂ ਆਜ਼ਾਦੀ ਦਵਾਉਣ ਵਾਲਿਆਂ ਦਾ ਦਿਲੋਂ ਸ਼ੁਕਰੀਆ ਅਦਾ ਕਰਦੇ ਹਾਂ।'' ਜ਼ਿਕਰਯੋਗ ਹੈ ਕਿ ਸਾਲ 2016 'ਚ ਸਾਨ ਫ੍ਰਾਂਸਿਸਕੋ 49 ਟੀ ਟੀਮ ਦੇ ਕੌਲਿਨ ਕਾਪੇਰਨਿਕ ਨੇ ਰਾਸ਼ਟਰੀ ਗੀਤ ਦੌਰਾਨ ਗੋਡਿਆਂ ਭਾਰ ਬੈਠ ਕੇ ਵਿਰੋਧ ਪ੍ਰਦਰਸ਼ਨ ਕੀਤਾ ਸੀ। ਅਸਲ ਵਿਚ ਇਸ ਤਰ੍ਹਾਂ ਕਰ ਕੇ ਉਹ ਸਰਕਾਰ ਦਾ ਧਿਆਨ ਇਸ ਗੱਲ ਵਲ ਖਿੱਚਣਾ ਚਾਹੁੰਦੇ ਸਨ ਕਿ ਉਥੇ ਘੱਟਗਿਣਤੀ ਦੇ ਵਿਰੁਧ ਨਿਆਂ ਨਹੀਂ ਕੀਤਾ ਜਾ ਰਿਹਾ।
ਇਸ ਸਾਲ ਵੀ ਨੈਸ਼ਨਲ ਲੀਗ ਦੇ ਮੈਚਾਂ ਦੌਰਾਨ ਅਜਿਹਾ ਵਿਰੋਧ ਪ੍ਰਦਰਸ਼ਨ ਜਾਰੀ ਰਿਹਾ।ਬੀਤੇ ਸਾਲ ਸਤੰਬਰ 'ਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਸਬੰਧੀ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ। ਟਰੰਪ ਨੇ ਉਸ ਸਮੇਂ ਵਿਰੋਧ ਕਰਨ ਵਾਲੇ ਖਿਡਾਰੀਆਂ ਵਿਰੁਧ ਕਾਰਵਾਈ ਕਰਨ ਲਈ ਕਿਹਾ ਸੀ। ਬਾਅਦ 'ਚ ਨੈਸ਼ਨਲ ਫ਼ੁਟਬਾਲ ਲੀਗ ਦੇ ਮਾਲਕਾਂ ਨੇ ਖਿਡਾਰੀਆਂ ਨੂੰ ਇਸ ਸਬੰਧੀ ਇਕ ਨੋਟਿਸ ਵੀ ਜਾਰੀ ਕੀਤਾ ਸੀ। ਇਸ ਦੇ ਬਾਵਜੂਦ ਇਸ ਸਾਲ ਲਗਭਗ 150 ਖਿਡਾਰੀਆਂ ਨੇ ਵਿਰੋਧ ਪ੍ਰਦਰਸ਼ਨ ਕੀਤਾ।
