ਨਵੀਂ ਦਿੱਲੀ, 24 ਸਤੰਬਰ : ਨਿਊਜ਼ੀਲੈਂਡ ਦੀਆਂ 52ਵੀਂਆਂ ਆਮ ਚੋਣਾਂ 'ਚ ਦੋ ਪੰਜਾਬੀਆਂ ਸਮੇਤ ਪੰਜ ਭਾਰਤੀ ਸੰਸਦ ਮੈਂਬਰ ਚੁਣੇ ਗਏ ਹਨ। ਇਨ੍ਹਾਂ 'ਚ ਦੋ ਔਰਤਾਂ ਵੀ ਸ਼ਾਮਲ ਹਨ। ਆਮ ਚੋਣਾਂ 'ਚ ਕੰਵਲਜੀਤ ਸਿੰਘ ਬਖ਼ਸ਼ੀ ਇਕਲੌਤੇ ਅਜਿਹੇ ਸਿੱਖ ਸੰਸਦ ਮੈਂਬਰ ਬਣੇ ਹਨ ਜਿਨ੍ਹਾਂ ਨੇ ਚੌਥੀ ਵਾਰ ਜਿੱਤ ਦਰਜ ਕੀਤੀ ਹੈ।
ਸਾਲ 2001 'ਚ ਭਾਰਤ ਤੋਂ ਨਿਊਜ਼ੀਲੈਂਡ ਗਏ ਸ. ਬਖਸ਼ੀ 2008 ਤੋਂ ਲਗਾਤਾਰ ਸੰਸਦ ਮੈਂਬਰ ਬਣ ਰਹੇ ਹਨ ਅਤੇ 2015 ਤੋਂ ਲੈ ਕੇ 2017 ਤਕ ਉਹ ਨਿਊਜ਼ੀਲੈਂਡ ਦੀ ਕਾਨੂੰਨ ਵਿਵਸਥਾ ਕਮੇਟੀ ਦੇ ਚੇਅਰਮੈਨ ਵੀ ਰਹੇ ਹਨ। ਇਸੇ ਤਰ੍ਹਾਂ ਸਾਲ 1995 'ਚ ਪੰਜਾਬ ਦੇ ਹੁਸ਼ਿਆਰਪੁਰ ਤੋਂ ਨਿਊਜ਼ੀਲੈਂਡ ਗਈ ਡਾ. ਪਰਮਜੀਤ ਕੌਰ ਪਰਮਾਰ ਨੇ ਵੀ ਜਿੱਤ ਪ੍ਰਾਪਤ ਕੀਤੀ ਹੈ। ਡਾ. ਪਰਮਜੀਤ ਕੌਰ ਪਰਮਾਰ ਦੂਜੀ ਵਾਰ ਸੰਸਦ 'ਚ ਪੁੱਜੀ ਹੈ। ਨਿਊਜ਼ੀਲੈਂਡ 'ਚ ਪੀ.ਐਚ.ਡੀ. ਕਰਨ ਮਗਰੋਂ ਬਤੌਰ ਵਿਗਿਆਨੀ ਕੰਮ ਕਰਨ ਵਾਲੀ ਡਾ. ਪਰਮਾਰ ਨਿਊਜ਼ੀਲੈਂਡ ਸਰਕਾਰ 'ਚ ਹੀ ਫ਼ੈਮਿਲੀ ਕਮਿਸ਼ਨਰ ਵੀ ਰਹਿ ਚੁਕੀ ਹੈ। ਭਾਰਤੀ ਮੂਲ ਦੀ ਪ੍ਰਿਯੰਕਾ ਰਾਧਾਕ੍ਰਿਸ਼ਨਨ ਨੇ ਵੀ ਲੇਬਰ ਪਾਰਟੀ ਦੀ ਟਿਕਟ 'ਤੇ ਬਾਜ਼ੀ ਮਾਰੀ ਹੈ। ਉਹ ਪਹਿਲੀ ਵਾਰ ਜਿੱਤ ਕੇ ਨਿਊਜ਼ੀਲੈਂਡ ਦੀ ਸੰਸਦ 'ਚ ਪੁੱਜੀ ਹੈ।
11 ਸਤੰਬਰ ਤੋਂ ਚੱਲ ਰਹੀਆਂ ਚੋਣਾਂ ਸਨਿਚਰਵਾਰ ਨੂੰ ਖ਼ਤਮ ਹੋਣ ਮਗਰੋਂ ਜੋ ਰੁਝਾਨ ਆਏ, ਉਨ੍ਹਾਂ ਮੁਤਾਬਕ ਨਿਊਜ਼ੀਲੈਂਡ ਦੀ ਨੈਸ਼ਨਲ ਪਾਰਟੀ 58 ਸੀਟਾਂ 'ਤੇ ਕਾਬਜ਼ ਹੋ ਚੁਕੀ ਹੈ, ਪਰ ਸੱਤਾ ਪ੍ਰਾਪਤ ਕਰਨ ਲਈ 61 ਸੀਟਾਂ ਦੀ ਜ਼ਰੂਰਤ ਹੈ। ਰਾਸ਼ਟਰੀ ਪਾਰਟੀ ਦੇ 41 ਉਮੀਦਵਾਰ ਲੋਕਾਂ ਨੇ ਚੁਣ ਕੇ ਭੇਜੇ ਹਨ, ਉਥੇ ਹੀ 17 ਉੁਮੀਦਵਾਰ ਪਾਰਟੀ ਵੋਟਾਂ ਨਾਲ ਸੰਸਦ ਪੁੱਜੇ ਹਨ। ਰਾਸ਼ਟਰੀ ਪਾਰਟੀ ਨੇ ਪਿਛਲੀ ਵਾਰ ਵੀ 58 ਸੀਟਾਂ 'ਤੇ ਕਬਜ਼ਾ ਜਮਾਇਆ ਸੀ ਜਿਨ੍ਹਾਂ 'ਚ 39 ਚੁਣ ਕੇ ਆਏ ਹਨ। (ਪੀਟੀਆਈ)