ਜਾਂਚ ਏਜੰਸੀ ਨੇ ਲਖਨਊ, ਉਨਾਵ, ਬਾਂਦਾ ਅਤੇ ਫ਼ਤਿਹਪੁਰ 'ਚ ਇਕੋ ਸਮੇਂ ਕਾਰਵਾਈ ਕੀਤੀ
ਲਖਨਊ : ਉਨਾਉ ਬਲਾਤਕਾਰ ਪੀੜਤਾ ਨਾਲ ਹੋਏ ਹਾਦਸੇ ਦੀ ਜਾਂਚ ਕਰ ਰਹੀ ਸੀਬੀਆਈ ਨੇ ਐਤਵਾਰ ਨੂੰ ਮੁਲਜ਼ਮ ਕੁਲਦੀਪ ਸਿੰਘ ਸੇਂਗਰ ਅਤੇ ਉਸ ਦੇ ਸਾਥੀਆਂ ਦੇ ਲਗਭਗ 15 ਟਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ। ਜਾਂਚ ਏਜੰਸੀ ਨੇ ਲਖਨਊ, ਉਨਾਵ, ਬਾਂਦਾ ਅਤੇ ਫ਼ਤਿਹਪੁਰ 'ਚ ਇਕੋ ਸਮੇਂ ਕਾਰਵਾਈ ਕੀਤੀ। ਇਸ ਟੀਮ ਕੁਲਦੀਪ ਦੇ ਘਰ ਵੀ ਗਈ। ਇਸ ਤੋਂ ਪਹਿਲਾਂ ਸਨਿਚਰਵਾਰ ਨੂੰ ਸੀਬੀਆਈ ਨੇ ਸੀਤਾਪੁਰ ਜੇਲ 'ਚ ਉਸ ਤੋਂ ਲਗਭਗ 6 ਘੰਟੇ ਪੁਛਗਿਛ ਕੀਤੀ ਸੀ। ਇਸ ਦੌਰਾਨ ਕੁਲਦੀਪ ਨੂੰ ਮਿਲਣ ਵਾਲੇ ਲੋਕਾਂ ਦੀ ਸੂਚੀ ਵੀ ਖੰਗਾਲੀ ਗਈ।
ਸੀਬੀਆਈ ਟੀਮ ਸਨਿਚਰਵਾਰ ਨੂੰ ਤੀਜੀ ਵਾਰ ਹਾਦਸੇ ਵਾਲੀ ਥਾਂ ਦੀ ਜਾਂਚ ਕਰਨ ਪੁੱਜੀ ਸੀ। ਹਾਸਦੇ ਵਾਲੀ ਥਾਂ ਨੇੜੇ ਮੌਜੂਦ ਦੁਕਾਨਦਾਰਾਂ ਦੇ ਬਿਆਨ ਦਰਜ ਕੀਤੇ ਗਏ। ਪੀੜਤਾ ਦੀ ਕਾਰ ਨੂੰ ਟੱਕਰ ਮਾਰਨ ਵਾਲੇ ਟਰੱਕ ਡਰਾਈਵਰ ਅਤੇ ਕਲੀਨਰ ਤਿੰਨ ਦਿਨ ਦੀ ਰਿਮਾਂਡ 'ਤੇ ਹਨ। ਟਰੱਕ ਮਾਲਕ ਦਵਿੰਦਰ ਕਿਸ਼ੋਰ ਪਾਲ ਵੀ ਐਤਵਾਰ ਸਵੇਰੇ ਲਖਨਊ ਸਥਿਤ ਸੀਬੀਆਈ ਦਫ਼ਤਰ ਪੁੱਜਾ। ਉਸ ਨੂੰ ਸੀਬੀਆਈ ਨੇ ਪੁਛਗਿਛ ਲਈ ਤਲਬ ਕੀਤਾ ਸੀ। ਦਵਿੰਦਰ ਦਾ ਕਹਿਣਾ ਹੈ ਕਿ ਉਹ ਬੇਕਸੂਰ ਹੈ। ਕੁਲਦੀਪ ਸੇਂਗਰ ਨਾਲ ਉਸ ਦਾ ਕੋਈ ਸਬੰਧ ਨਹੀਂ ਹੈ।
ਦੱਸ ਦੇਈਏ ਕਿ ਸਨਿਚਰਵਾਰ ਨੂੰ ਸੀ.ਬੀ.ਆਈ. ਦੀ ਤਿੰਨ ਮੈਂਬਰੀ ਟੀਮ ਸੀਤਾਪੁਰ ਜੇਲ 'ਚ ਪਹੁੰਚਣ 'ਤੇ ਜੇਲ ਪ੍ਰਸ਼ਾਸਨ 'ਚ ਹੜਕੰਪ ਮੱਚ ਗਿਆ ਸੀ। ਜੇਲ ਪ੍ਰਸ਼ਾਸਨ ਨਾਲ ਜੁੜੇ ਮਾਹਰਾਂ ਨੇ ਦਸਿਆ ਹੈ ਕਿ ਟੀਮ ਲਗਭਗ 6 ਘੰਟਿਆਂ ਤਕ ਜੇਲ ਦੇ ਅੰਦਰ ਜਾਂਚ ਕੀਤੀ ਅਤੇ ਉੱਥੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰੇ ਵੀ ਖੰਗਾਲੇ ਗਏ। ਸੀ.ਬੀ.ਆਈ. ਅਧਿਕਾਰੀਆਂ ਨੇ ਦੋਸ਼ੀ ਵਿਧਾਇਕ ਨਾਲ ਗੱਲਬਾਤ ਕੀਤੀ ਸੀ। ਇਸ ਤੋਂ ਇਲਾਵਾ ਸੀ.ਬੀ.ਆਈ. ਅਧਿਕਾਰੀਆਂ ਨੇ ਜ਼ੇਲ ਅਧਿਕਾਰੀਆਂ ਅਤੇ ਕੁਲਦੀਪ ਸੇਂਗਰ ਦੀ ਬੈਰਕ ਦੀ ਸੁਰੱਖਿਆ 'ਚ ਲੱਗੇ ਕਰਮਚਾਰੀਆਂ ਨਾਲ ਵੀ ਗੱਲਬਾਤ ਕੀਤੀ ਸੀ।
ਬੀਤੀ 28 ਜੁਲਾਈ ਨੂੰ ਪੀੜਤਾ ਦਾ ਪਰਵਾਰ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਿਆ ਸੀ। ਇਸ 'ਚ ਪੀੜਤਾ ਦੀ ਮਾਸੀ ਅਤੇ ਚਾਚੀ ਦੀ ਮੌਤ ਹੋ ਗਈ ਸੀ, ਜਦਕਿ ਪੀੜਤਾ ਅਤੇ ਉਸ ਦਾ ਵਕੀਲ ਗੰਭੀਰ ਰੂਪ 'ਚ ਜ਼ਖ਼ਮੀ ਹੋ ਗਿਆ ਸੀ। ਪੀੜਤਾ ਲਖਨਊ ਦੇ ਮੈਡੀਕਲ ਕਾਲਜ 'ਚ ਵੈਂਟੀਲੇਟਰ 'ਤੇ ਹੈ। ਜ਼ਿਕਰਯੋਗ ਹੈ ਕਿ ਕੁਲਦੀਪ ਪਹਿਲੀ ਵਾਰ ਸਾਲ 2002 'ਚ ਬਸਪਾ ਦੀ ਟਿਕਟ 'ਤੇ ਉਨਾਉ ਸਦਰ ਸੀਟ ਤੋਂ ਵਿਧਾਇਕ ਚੁਣੇ ਗਏ ਸਨ।
ਇਸ ਤੋਂ ਬਾਅਦ 2007 'ਚ ਇਸੇ ਜ਼ਿਲ੍ਹੇ ਦੀ ਬਾਂਗਰਮਊ ਅਤੇ 2012 'ਚ ਭਗਵੰਤਨਗਰ ਸੀਟ ਤੋਂ ਸਪਾ ਦਾ ਵਿਧਾਇਕ ਰਿਹਾ। 2017 'ਚ ਵਿਧਾਨ ਸਭਾ ਚੋਣ ਤੋਂ ਠੀਕ ਪਹਿਲਾਂ ਕੁਲਦੀਪ ਸੇਂਗਰ ਭਾਜਪਾ 'ਚ ਸ਼ਾਮਲ ਹੋ ਗਏ ਸਨ। ਬੀਤੇ 17 ਸਾਲਾਂ 'ਚ ਕੁਲਦੀਪ ਨੇ ਇਲਾਕੇ 'ਚ ਚੰਗਾ ਦਬਦਬਾ ਬਣਾਇਆ ਹੋਇਆ ਹੈ। ਇਹੀ ਕਾਰਨ ਹੈ ਕਿ ਲੋਕ ਸਭਾ ਚੋਣ ਜਿੱਤਣ ਤੋਂ ਬਾਅਦ ਸਾਕਸ਼ੀ ਮਹਾਰਾਜ ਉਸ ਨੂੰ ਜੇਲ 'ਚ ਮਿਲਣ ਗਏ ਸਨ।