ਨਰੇਸ਼ ਨੇ ਦੱਸਿਆ ਕਿ ਰਾਜੇਸ਼ ਖੇਤੀ ਦਾ ਕੰਮ ਕਰਦਾ ਸੀ। ਇਸ ਤੋਂ ਇਲਾਵਾ ਉਹ ਟਰੈਕਟਰ ਅਤੇ ਰੋਟਾਵੇਟਰ ਤੋਂ ਕਿਰਾਏ 'ਤੇ ਹੋਰ ਲੋਕਾਂ ਦੇ ਖੇਤ ਵਾਹੁਦਾ ਸੀ।
ਕਰਨਾਲ - ਹਰਿਆਣਾ ਦੇ ਪਾਣੀਪਤ ਦੇ ਮਤਲੌਦਾ ਇਲਾਕੇ ਦੇ ਵੇਸਰ ਪਿੰਡ ਵਿਚ ਮੰਗਲਵਾਰ ਸਵੇਰੇ ਇੱਕ ਵੱਡਾ ਹਾਦਸਾ ਵਾਪਰਿਆ। ਇੱਥੇ ਖੇਤਾਂ ਵਿਚ ਕੰਮ ਕਰ ਰਿਹਾ ਇੱਕ ਕਿਸਾਨ ਸ਼ੱਕੀ ਹਾਲਾਤਾਂ ਵਿਚ ਰੋਟਾਵੇਟਰ ਵਿਚ ਫਸ ਗਿਆ, ਜਿਸ ਕਾਰਨ ਉਸ ਦੇ ਸਰੀਰ ਦੇ ਕਈ ਹਿੱਸੇ ਹੋ ਗਏ ਤੇ ਉਸ ਦੀ ਮੌਤ ਹੋ ਗਈ। ਹਾਦਸੇ ਸਮੇਂ ਜਦੋਂ ਤੱਕ ਆਸਪਾਸ ਦੇ ਖੇਤਾਂ 'ਚ ਕੰਮ ਕਰ ਰਹੇ ਕਿਸਾਨ ਦੌੜ ਕੇ ਆਏ, ਉਦੋਂ ਤੱਕ ਉਸ ਦੀ ਮੌਤ ਹੋ ਚੁੱਕੀ ਸੀ।
ਮਰਨ ਵਾਲੇ ਕਿਸਾਨ ਦਾ ਨਾਮ ਰਾਜੇਸ਼ ਸੀ ਅਤੇ ਉਸ ਦੀ ਉਮਰ 40 ਸਾਲ ਸੀ। ਗੁਆਂਢੀ ਖੇਤ ਵਿਚ ਕੰਮ ਕਰਨ ਵਾਲੇ ਕਿਸਾਨਾਂ ਨੇ ਕਿਸੇ ਤਰ੍ਹਾਂ ਰਾਜੇਸ਼ ਦੀ ਲਾਸ਼ ਨੂੰ ਰੋਟਾਵੇਟਰ 'ਚੋਂ ਬਾਹਰ ਕੱਢਿਆ ਅਤੇ ਪਰਿਵਾਰ ਨੂੰ ਸੂਚਿਤ ਕੀਤਾ। ਸੂਚਨਾ ਮਿਲਦੇ ਹੀ ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਰਾਜੇਸ਼ ਦੀ ਲਾਸ਼ ਨੂੰ ਪਾਣੀਪਤ ਦੇ ਸਿਵਲ ਹਸਪਤਾਲ ਭੇਜ ਦਿੱਤਾ। ਪਰਿਵਾਰ ਦੇ ਬਿਆਨਾਂ ਦੇ ਆਧਾਰ 'ਤੇ ਪੁਲਿਸ ਨੇ ਸੀਆਰਪੀਸੀ ਦੀ ਧਾਰਾ 174 ਤਹਿਤ ਕਾਰਵਾਈ ਕਰਦੇ ਹੋਏ ਪੋਸਟਮਾਰਟਮ ਤੋਂ ਬਾਅਦ ਲਾਸ਼ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀ ਹੈ।
ਵੇਸਰ ਪਿੰਡ ਦੇ ਲੋਕਾਂ ਨੇ ਦੱਸਿਆ ਕਿ ਰਾਜੇਸ਼ ਮੰਗਲਵਾਰ ਸਵੇਰੇ ਆਪਣੇ ਖੇਤ ਨੂੰ ਵਾਹ ਰਿਹਾ ਸੀ। ਇਸ ਦੌਰਾਨ ਅਚਾਨਕ ਟਰੈਕਟਰ ਦੇ ਪਿੱਛੇ ਬੰਨ੍ਹੇ ਰੋਟਾਵੇਟਰ ਵਿਚੋਂ ਕੁਝ ਆਵਾਜ਼ ਆਉਣ ਲੱਗੀ ਤਾਂ ਰਾਜੇਸ਼ ਨੇ ਟਰੈਕਟਰ ਰੋਕ ਲਿਆ। ਉਹ ਰੋਟਾਵੇਟਰ ਚੈੱਕ ਕਰਨ ਲਈ ਟਰੈਕਟਰ ਤੋਂ ਹੇਠਾਂ ਉਤਰਿਆ। ਜਦੋਂ ਰਾਜੇਸ਼ ਰੋਟਾਵੇਟਰ ਕੋਲ ਬੈਠਾ ਆਵਾਜ਼ ਸੁਣਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ ਤਾਂ ਉਸੇ ਸਮੇਂ ਉਸ ਦੇ ਕੱਪੜਿਆਂ ਦਾ ਇੱਕ ਹਿੱਸਾ ਰੋਟਾਵੇਟਰ ਵਿਚ ਫਸ ਗਿਆ ਅਤੇ ਦੇਖਦੇ ਹੀ ਦੇਖਦੇ ਰੋਟਾਵੇਟਰ ਨੇ ਉਸ ਨੂੰ ਅੰਦਰ ਖਿੱਚ ਲਿਆ।
ਰੋਟਾਵੇਟਰ ਦੀ ਤੇਜ਼ ਰਫ਼ਤਾਰ 'ਚ ਰਾਜੇਸ਼ ਦਾ ਸਰੀਰ ਬੁਰੀ ਤਰ੍ਹਾਂ ਫਸ ਗਿਆ ਅਤੇ ਸਰੀਰ ਦੇ ਕਈ ਹਿੱਸੇ ਹੋ ਗਏ। ਜਿਸ ਸਮੇਂ ਰਾਜੇਸ਼ ਨਾਲ ਇਹ ਹਾਦਸਾ ਵਾਪਰਿਆ, ਉਸ ਸਮੇਂ ਨੇੜਲੇ ਖੇਤਾਂ ਵਿਚ ਕਈ ਕਿਸਾਨ ਕੰਮ ਕਰ ਰਹੇ ਸਨ। ਕੁਝ ਲੋਕ ਰਾਜੇਸ਼ ਦੇ ਖੇਤ ਵਿਚ ਵੀ ਖੜ੍ਹੇ ਸਨ। ਹਾਦਸੇ ਤੋਂ ਤੁਰੰਤ ਬਾਅਦ ਇਹ ਲੋਕ ਮਦਦ ਲਈ ਭੱਜੇ ਅਤੇ ਰੋਟਾਵੇਟਰ ਨੂੰ ਬੰਦ ਕਰ ਦਿੱਤਾ। ਹਾਲਾਂਕਿ ਉਦੋਂ ਤੱਕ ਰਾਜੇਸ਼ ਦਾ ਸਰੀਰ ਬੁਰੀ ਤਰ੍ਹਾਂ ਕੱਟਿਆ ਹੋਇਆ ਸੀ।
ਕਾਫੀ ਮੁਸ਼ੱਕਤ ਤੋਂ ਬਾਅਦ ਪਿੰਡ ਵਾਸੀਆਂ ਨੇ ਰਾਜੇਸ਼ ਦੀ ਲਾਸ਼ ਨੂੰ ਰੋਟਾਵੇਟਰ ਤੋਂ ਬਾਹਰ ਕੱਢਿਆ। ਉਦੋਂ ਤੱਕ ਉਸ ਦੀ ਮੌਤ ਹੋ ਚੁੱਕੀ ਸੀ। ਖੇਤਾਂ 'ਚ ਮੌਜੂਦ ਲੋਕਾਂ ਨੇ ਰਾਜੇਸ਼ ਦੇ ਪਰਿਵਾਰ ਨੂੰ ਹਾਦਸੇ ਦੀ ਸੂਚਨਾ ਦਿੱਤੀ ਤਾਂ ਘਰ 'ਚ ਹੜਕੰਪ ਮੱਚ ਗਿਆ। ਵੇਸਰ ਪਿੰਡ ਦੇ ਰਹਿਣ ਵਾਲੇ ਨਰੇਸ਼ ਨੇ ਦੱਸਿਆ ਕਿ ਰਾਜੇਸ਼ ਖੇਤੀ ਦਾ ਕੰਮ ਕਰਦਾ ਸੀ। ਇਸ ਤੋਂ ਇਲਾਵਾ ਉਹ ਟਰੈਕਟਰ ਅਤੇ ਰੋਟਾਵੇਟਰ ਤੋਂ ਕਿਰਾਏ 'ਤੇ ਹੋਰ ਲੋਕਾਂ ਦੇ ਖੇਤ ਵਾਹੁਦਾ ਸੀ।
