ਅਸਾਮ, ਤ੍ਰਿਪੁਰਾ, ਮਹਾਰਾਸ਼ਟਰ, ਗੁਜਰਾਤ, ਪੱਛਮ ਬੰਗਾਲ, ਮੱਧ ਪ੍ਰਦੇਸ਼, ਓਡੀਸ਼ਾ ਅਜਿਹੇ ਕਈ ਰਾਜਾਂ ਵਿਚ ਲੋਕਾਂ ਨੂੰ ਕੁੱਟ-ਕੁੱਟ ਕੇ ਮਾਰਨ ਦੀਆਂ ਘਟਨਾਵਾਂ ਅਤੇ ਹਿੰਸਾ...
ਨਵੀਂ ਦਿੱਲੀ : ਅਸਾਮ, ਤ੍ਰਿਪੁਰਾ, ਮਹਾਰਾਸ਼ਟਰ, ਗੁਜਰਾਤ, ਪੱਛਮ ਬੰਗਾਲ, ਮੱਧ ਪ੍ਰਦੇਸ਼, ਓਡੀਸ਼ਾ ਅਜਿਹੇ ਕਈ ਰਾਜਾਂ ਵਿਚ ਲੋਕਾਂ ਨੂੰ ਕੁੱਟ-ਕੁੱਟ ਕੇ ਮਾਰਨ ਦੀਆਂ ਘਟਨਾਵਾਂ ਅਤੇ ਹਿੰਸਾ ਦੀਆਂ ਘਟਨਾਵਾਂ ਲਗਾਤਾਰ ਸਾਹਮਣੇ ਆ ਰਹੀਆਂ ਹਨ ਅਤੇ ਸੋਸ਼ਲ ਮੀਡੀਆ 'ਤੇ ਫ਼ੈਲੀ ਅਫ਼ਵਾਹ ਇਸ ਦੇ ਵੱਡਾ ਕਾਰਨ ਹੈ। ਕੇਂਦਰ ਸਰਕਾਰ ਨੇ ਇਸ ਨਾਲ ਨਿਪਟਣ ਅਤੇ ਸਖ਼ਤ ਕਦਮ ਉਠਾਉਣ ਦੀ ਗੱਲ ਆਖੀ ਹੈ।
ਰੋਜ਼ਾਨਾ ਭੜਕਾਊ ਸੰਦੇਸ਼ਾਂ ਨਾਲ ਭੜਕਦੀ ਭੀੜ ਬੇਗੁਨਾਹਾਂ ਨੂੰ ਮਾਰਕੁੱਟ ਕਰ ਕੇ ਜਾਨੋਂ ਮਾਰਨ 'ਤੇ ਉਤਾਰੂ ਹੈ ਪਰ ਹੱਦ ਤਾਂ ਉਦੋਂ ਹੋ ਜਾਂਦੀ ਹੈ ਜਦੋਂ ਅਜਿਹੇ ਲੋਕ ਫੇਕ ਨਿਊਜ਼ ਨੂੰ ਬੜ੍ਹਾਵਾ ਦਿੰਦੇ ਹਨ, ਜਿਨ੍ਹਾਂ 'ਤੇ ਕਾਨੂੰਨ ਦੀ ਹਿਫ਼ਾਜ਼ਤ ਦੀ ਜ਼ਿੰਮੇਵਾਰੀ ਹੋਵੋ। ਤ੍ਰਿਪੁਰਾ ਦੇ ਸਿੱਖਿਆ ਮੰਤਰੀ ਨੇ ਹਾਲ ਹੀ ਵਿਚ ਅਜਿਹਾ ਹੀ ਕੰਮ ਕੀਤਾ ਹੈ। ਜਿਸ ਦਾ ਅੰਜ਼ਾਮ ਬਹੁਤ ਹੀ ਗੰਭੀਰ ਹੋਇਆ ਹੈ। ਉਥੇ ਕੇਂਦਰੀ ਮੰਤਰੀ ਰਵੀ ਸ਼ੰਕਰ ਪ੍ਰਸਾਦ ਦਿੱਲੀ ਵਿਚ ਕਹਿੰਦੇ ਹਨ ਕਿ ਸਰਕਾਰ ਫੇਕ ਨਿਊਜ਼ ਨਾਲ ਲੜਨ ਲਈ ਕਮਰ ਕਸ ਰਹੀ ਹੈ ਪਰ ਤ੍ਰਿਪੁਰਾ ਵਿਚ ਭਾਜਪਾ ਸਰਕਾਰ ਦੇ ਮੰਤਰੀ ਫੇਕ ਨਿਊਜ਼ ਨੂੰ ਸ਼ਹਿ ਦਿੰਦੇ ਦਿਸੇ ਸਨ।
ਤ੍ਰਿਪੁਰਾ ਦੀ ਹਾਲ ਹੀ ਵਿਚ ਹੋਈ ਹਿੰਸਾ ਇਕ ਫੇਕ ਨਿਊਜ਼ ਨਾਲ ਜੁੜੀ ਹੋਈ ਹੈ। ਜਿਸ ਵਿਚ ਗਿਆ ਹੈ ਕਿ 10 ਦਿਨ ਪਹਿਲਾਂ 11 ਸਾਲ ਦੇ ਬੱਚੇ ਦੀ ਕਿਡਨੀ ਪਾਈ ਗਈ ਜੋ ਉਸ ਦੇ ਸਰੀਰ ਤੋਂ ਕੱਢੀ ਗਈ ਸੀ। ਪੁਲਿਸ ਕਹਿੰਦੀ ਹੈ ਕਿ ਇਹ ਸੱਚ ਨਹੀਂ ਹੈ ਪਰ ਰਾਜ ਦੇ ਸਿੱਖਿਆ ਮੰਤਰੀ ਜਦੋਂ ਮੌਕੇ 'ਤੇ ਪਹੁੰਚੇ ਤਾਂ ਇਸੇ ਗੱਲ ਨੂੰ ਅੱਗੇ ਵਧਾਉਂਦੇ ਨਜ਼ਰ ਆਏ। ਤ੍ਰਿਪੁਰਾ ਦੇ ਸਿੱਖਿਆ ਮੰਤਰੀ ਰਤਨ ਲਾਲ ਨਾਥ ਨੇ ਕਿਹਾ ਕਿ ਮੈਨੂੰ ਸਥਾਨਕ ਲੋਕਾਂ ਨੇ ਦਸਿਆ ਕਿ ਲਾਸ਼ 'ਤੇ ਦੋ ਕੱਟ ਲੱਗੇ ਹੋਏ ਸਨ, ਜਿੱਥੋਂ ਗੁਰਦੇ ਕੱਢੇ ਗਏ, ਇਹ ਭਿਆਨਕ ਹੈ।
ਮੰਤਰੀ ਦੇ ਬਿਆਨ ਦੇ 48 ਘੰਟੇ ਦੇ ਅੰਦਰ ਇਸ ਫੇਕ ਨਿਊਜ਼ ਨੇ 4 ਲੋਕਾਂ ਦੀ ਜਾਨ ਲੈ ਲਈ ਕਿਉਂਕਿ ਉਨ੍ਹਾਂ ਦੇ ਬਿਆਨ ਨੂੰ ਸਥਾਨਕ ਅਖ਼ਬਾਰਾਂ ਨੇ ਛਾਪਿਆ ਅਤੇ ਉਸ ਦੀ ਵੀਡੀਓ ਕਲਿੱਪ ਵਾਇਰਲ ਹੋ ਗਈ। ਮੰਤਰੀ ਦਾ ਬਿਆਨ ਪੁਲਿਸ ਐਡਵਾਈਜ਼ਰੀ ਤੋਂ ਉਲਟ ਸੀ, ਜਿਸ ਵਿਚ ਕਿਹਾ ਗਿਆ ਹੈ ਕਿ ਪੋਸਟਮਾਰਟਮ ਰਿਪੋਰਟ ਤੋਂ ਪਤਾ ਚੱਲਿਆ ਕਿ ਕਿਡਨੀ ਅਤੇ ਲੀਵਰ ਸਰੀਰ ਦੇ ਅੰਦਰ ਹੀ ਸਨ। ਜਦੋਂ ਮੰਤਰੀ ਨਾਲ ਇਸ ਸਬੰਧੀ ਗੱਲਬਾਤ ਕੀਤੀ ਗਈ ਤਾਂ ਮੰਤਰੀ ਨੇ ਗੱਲ ਨੂੰ ਗੋਲ ਕਰਦਿਆਂ ਅਪਣੇ ਰਾਜਨੀਤਕ ਵਿਰੋਧੀਆਂ 'ਤੇ ਨਿਸ਼ਾਨਾ ਸਾਧਣਾ ਸ਼ੁਰੂ ਕਰ ਦਿਤਾ।
ਆਲਮ ਇਹ ਹੈ ਕਿ ਇਸ ਅਫ਼ਵਾਹ ਵਿਚ ਜਿਨ੍ਹਾਂ ਚਾਰ ਲੋਕਾਂ ਦੀ ਜਾਨ ਗਈ, ਉਨ੍ਹਾਂ ਵਿਚ ਇਕ ਕਲਾਕਾਰ ਸੁਕਾਂਤ ਚਕਰਵਰਤੀ ਹੈ ਜੋ ਇਸ ਵੀਡੀਓ ਵਿਚ ਕੁੱਟ ਖਾਂਦਾ ਹੋÎਇਆ ਦਿਖਾਈ ਦੇ ਰਿਹਾ ਹੈ। ਉਹ ਸਰਕਾਰ ਦੇ ਕਹਿਣ 'ਤੇ ਫੇਕ ਨਿਊਜ਼ ਦੇ ਵਿਰੁਧ ਜਾਗਰੂਕਤਾ ਫੈਲਾ ਰਿਹਾ ਸੀ। ਇਸ ਮਾਮਲੇ ਵਿਚ 20 ਲੋਕਾਂ ਦੀ ਗ੍ਰਿਫ਼ਤਾਰੀ ਕੀਤੀ ਗਈ ਹੈ। ਸਰਕਾਰ ਭਲੇ ਹੀ ਫੇਕ ਨਿਊਜ਼ ਨਾਲ ਲੜਨ ਦੀ ਗੱਲ ਕਰ ਰਹੀ ਹੋਵੇ ਪਰ ਪਹਿਲਾਂ ਉਸ ਨੂੰ ਅਪਣੇ ਮੰਤਰੀਆਂ 'ਤੇ ਲਗਾਮ ਕਸਣੀ ਹੋਵੇਗੀ ਜੋ ਗ਼ੈਰ ਜ਼ਿੰਮੇਵਾਰਾਨਾ ਬਿਆਨ ਦੇਣ ਤੋਂ ਰੱਤੀ ਭਰ ਵੀ ਗੁਰੇਜ਼ ਨਹੀਂ ਕਰਦੇ।
ਫੇਕ ਨਿਊਜੁ ਦੀ ਬਿਮਾਰੀ ਜਾਨਲੇਵਾ ਸਾਬਤ ਹੁੰਦੀ ਜਾ ਰਹੀ ਹੈ। ਵੱਖ-ਵੱਖ ਤਰ੍ਹਾਂ ਦੇ ਫੇਕ ਵੀਡੀਓ ਨਫ਼ਰਤ ਫੈਲਾਉਣ ਲਈ ਭੇਜੇ ਜਾ ਰਹੇ ਹਨ ਅਤੇ ਬਹੁਤ ਸਾਰੇ ਲੋਕ ਇਨ੍ਹਾਂ ਵੀਡੀਓ ਨੂੰ ਸੱਚ ਮੰਨ ਕੇ ਇਨ੍ਹਾਂ ਨੂੰ ਅੱਗੇ ਤੋਂ ਅੱਗੇ ਫਾਰਵਰਡ ਕਰੀ ਜਾਂਦੇ ਹਨ, ਜਿਸ ਦਾ ਨਤੀਜਾ ਭਿਆਨਕ ਨਿਕਲਦਾ ਹੈ।