ਪੰਜਾਬ ਮਾਮਲਿਆਂ ਦੇ ਇੰਚਾਰਜ ਜਰਨੈਲ ਸਿੰਘ ਨੇ ਕਿਸੀ ਬਾਗ਼ੀ ਨਾਲ ਸੰਪਰਕ ਨਾ ਕੀਤਾ
ਚੰਡੀਗੜ੍ਹ : ਦਿੱਲੀ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਆਮ ਆਦਮੀ ਪਾਰਟੀ ਦੀ ਪੰਜਾਬ ਇਕਾਈ ਵਿਚ ਏਕਤਾ ਦੀ ਜੋ ਚਰਚਾ ਛਿੜੀ ਸੀ, ਉਹ ਠੰਢੀ ਪੈ ਗਈ ਹੈ ਅਤੇ ਹੁਣ ਜਲਦੀ ਏਕਤਾ ਦੀ ਕੋਈ ਸੰਭਾਵਨਾ ਨਹੀਂ ਲਗਦੀ। ਪੰਜਾਬ ਇਕਾਈ ਦੇ ਸੂਤਰਾਂ ਤੋਂ ਮਿਲੀ ਤਾਜ਼ਾ ਸੂਚਨਾ ਅਨੁਸਾਰ ਬਾਗ਼ੀਆਂ ਨਾਲ ਏਕਤਾ ਦੀ ਕੋਈ ਸੰਭਾਵਨਾ ਨਹੀਂ ਅਤੇ ਨਾ ਹੀ ਕਿਸੀ ਬਾਗ਼ੀ ਨੇਤਾ ਨਾਲ ਹਾਈਕਮਾਨ ਜਾਂ ਪੰਜਾਬ ਇਕਾਈ ਦੇ ਕਿਸੀ ਨੇਤਾ ਨੇ ਸੰਪਰਕ ਕੀਤਾ ਹੈ।
ਅਸਲੀਅਤ ਇਹ ਹੈ ਕਿ ਪੰਜਾਬ ਇਕਾਈ ਤੋਂ ਕਾਬਜ਼ ਨੇਤਾ ਹੁਣ ਬਾਗ਼ੀ ਵਿਧਾਇਕਾਂ ਨਾਲ ਏਕਤਾ ਦੇ ਰੌਂਅ ਵਿਚ ਨਹੀਂ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਬਾਗ਼ੀ ਧੜੇ ਨੇ ਪਾਰਟੀ ਦੀ ਜੋ ਨੁਕਸਾਨ ਕਰਨਾ ਸੀ ਉਹ ਕਰ ਲਿਆ। ਹੁਣ ਉਨ੍ਹਾਂ ਨੂੰ ਪਾਰਟੀ ਵਿਚ ਮੁੜ ਸ਼ਾਮਲ ਕਰਨ ਲਈ ਲਾਭ ਦੀ ਥਾਂ ਨੁਕਸਾਨ ਹੀ ਹੋਵੇਗਾ। ਪਾਰਟੀ ਦੇ ਕੁੱਝ ਸੀਨੀਅਰ ਨੇਤਾਵਾਂ ਨਾਲ ਫ਼ੋਨ 'ਤੇ ਗੱਲ ਹੋਈ ਤਾਂ ਉਨ੍ਹਾਂ ਸਪਸ਼ਟ ਕੀਤਾ ਕਿ ਬਾਗ਼ੀਆਂ ਨੂੰ ਪਾਰਟੀ ਵਿਚ ਵਾਪਸ ਲੈਣ ਦਾ ਕੋਈ ਇਰਾਦਾ ਨਹੀਂ।
ਆਮ ਆਦਮੀ ਪਾਰਟੀ ਵਿਧਾਇਕ ਦਲ ਦੇ ਆਗੂ ਹਰਪਾਲ ਸਿੰਘ ਚੀਮਾ ਨਾਲ ਗੱਲ ਹੋਈ ਤਾਂ ਉਨ੍ਹਾਂ ਸਪਸ਼ਟ ਕੀਤਾ ਕਿ ਅਜੇ ਤਕ ਬਾਗ਼ੀਆਂ ਨੂੰ ਵਾਪਸ ਲੈਣ ਸਬੰਧੀ ਕੋਈ ਗੱਲ ਨਹੀਂ ਹੋਈ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਨ੍ਹਾਂ ਦਾ ਰਵਈਆ ਠੀਕ ਨਹੀਂ। ਪਾਰਟੀ ਦੇ ਦੋ ਹੋਰ ਨੇਤਾਵਾਂ ਨਾਲ ਗੱਲ ਹੋਈ ਤਾਂ ਉਨ੍ਹਾਂ ਅਪਣਾ ਨਾਮ ਨਾ ਪ੍ਰਕਾਸ਼ਤ ਕਰਨ ਦੀ ਸ਼ਰਤ ਨਾਲ ਸਪਸ਼ਟ ਕੀਤਾ ਕਿ ਕਿਸੀ ਬਾਗ਼ੀ ਵਿਧਾਇਕ ਨੂੰ ਵਾਪਸ ਲੈਣ ਸਬੰਧੀ ਨਾ ਤਾਂ ਕੋਈ ਗੱਲ ਚਲੀ ਹੈ ਅਤੇ ਨਾ ਹੀ ਉਨ੍ਹਾਂ ਨੂੰ ਵਾਪਸ ਲੈਣ ਦੇ ਪਾਰਟੀ ਹੱਕ ਵਿਚ ਹੈ।
ਇਕ ਹੋਰ ਆਗੁ ਨੇ ਕਿਹਾ ਕਿ ਜੇਕਰ ਕੋਈ ਬਾਗ਼ੀ ਵਾਪਸ ਪਾਰਟੀ ਵਿਚ ਆਉਣਾ ਚਾਹੁੰਦਾ ਹੈ ਤਾਂ ਆ ਜਾਵੇ ਪ੍ਰੰਤੂ ਬਿਨਾਂ ਸ਼ਰਤ ਆਉਣਾ ਹੋਵੇਗਾ ਅਤੇ ਅਪਣੀਆਂ ਪਾਰਟੀ ਵਿਰੋਧੀ ਕਾਰਵਾਈਆਂ ਦੀ ਮਾਫ਼ੀ ਵੀ ਮੰਗਣੀ ਹੋਵੇਗੀ। ਅਸਲ ਵਿਚ ਦਿੱਲੀ ਵਿਧਾਨ ਸਭਾ ਚੋਣਾਂ ਵਿਚ ਜਿੱਤ ਤੋਂ ਬਾਅਦ ਜਦ ਹਾਈ ਕਮਾਨ ਨੇ ਵਿਧਾਇਕ ਜਰਨੈਲ ਸਿੰਘ ਨੂੰ ਪੰਜਾਬ ਮਾਮਲਿਆਂ ਦਾ ਇੰਚਾਰਜ ਬਣਾ ਦਿਤਾ ਤਾਂ ਜਰਨੈਲ ਸਿੰਘ ਨੇ ਅਗਲੇ ਹੀ ਦਿਨ ਬਿਆਨ ਦਿਤਾ ਸੀ ਕਿ ਉਹ ਪੰਜਾਬ ਇਕਾਈ ਵਿਚ ਏਕਤਾ ਲਈ ਯਤਨ ਕਰਨਗੇ।
ਪ੍ਰੰਤੂ ਪਿਛਲੇ ਦਿਨੀਂ ਜਦ ਉਹ ਪੰਜਾਬ ਆਏ ਤਾਂ ਇਸ ਮਾਮਲੇ ਸਬੰਧੀ ਕੋਈ ਗੱਲ ਨਾ ਹੋਈ ਅਤੇ ਨਾ ਹੀ ਉਨ੍ਹਾਂ ਨੇ ਕਿਸੀ ਬਾਗ਼ੀ ਵਿਧਾਇਕ ਜਾਂ ਕਿਸੇ ਹੋਰ ਬਾਗ਼ੀ ਨੇਤਾ ਨਾਲ ਸੰਪਰਕ ਕੀਤਾ। ਪਾਰਟੀ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਪਾਰਟੀ ਦੀ ਪੰਜਾਬ ਇਕਾਈ ਬਾਗ਼ੀਆਂ ਨਾਲ ਕਿਸੀ ਏਕਤਾ ਦੇ ਹੱਕ ਵਿਚ ਨਹੀਂ। ਉਨ੍ਹਾਂ ਅਪਣੀ ਗੱਲ ਹਾਈਕਮਾਨ ਤਕ ਵੀ ਪਹੁੰਚਾ ਦਿਤੀ ਹੈ। ਇਸੀ ਕਾਰਨ ਜਰਨੈਲ ਸਿੰਘ ਏਕਤਾ ਦਾ ਐਲਾਨ ਕਰਨ ਤੋਂ ਬਾਅਦ ਇਸ ਪਾਸੇ ਅੱਗੇ ਨਹੀਂ ਵਧੇ ਅਤੇ ਖਾਮੋਸ਼ ਹੋ ਗਏ।
ਇਸ ਸਬੰਧੀ ਜਦ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨਾਲ ਗੱਲ ਹੋਈ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨਾਲ ਇਸ ਮੁੱਦੇ 'ਤੇ ਕਿਸੀ ਦੀ ਗੱਲ ਨਹੀਂ ਹੋਈ। ਉਨ੍ਹਾਂ ਇਹ ਵੀ ਸਪਸ਼ਟ ਕੀਤਾ ਕਿ ਜਿਨ੍ਹਾਂ ਕਾਰਨਾਂ ਕਰ ਕੇ ਉਨ੍ਹਾਂ ਨੇ ਪਾਰਟੀ ਤੋਂ ਵਖਰਾ ਰਸਤਾ ਅਪਣਾਇਆ। ਉਸ ਦਾ ਉਨ੍ਹਾਂ (ਪਾਰਟੀ 'ਤੇ ਕਾਬਜ਼ ਨੇਤਾਵਾਂ) ਨੂੰ ਜਵਾਬ ਦੇਣਾ ਹੋਵੇਗਾ। ਉਨ੍ਹਾਂ ਦਾਅਵਾ ਕੀਤਾ ਕਿ ਉਨ੍ਹਾਂ ਸਮੇਤ ਅੱਜ ਵੀ 5 ਬਾਗ਼ੀ ਵਿਧਾਇਕ ਇਕੱਠੇ ਹਨ ਅਤੇ ਆਉਣ ਵਾਲੇ ਸਮੇਂ ਵਿਚ ਉਹ ਅਪਣੀ ਰਣਨੀਤੀ ਤਹਿ ਕਰਨਗੇ। ਵਿਧਾਇਕ ਨਾਜਰ ਸਿੰਘ ਮਾਨਸਾਹੀਆ ਅਤੇ ਅਮਰਜੀਤ ਸਿੰਘ ਸੰਦੋਆ ਤਾਂ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਹੀ ਕਾਂਗਰਸ ਵਿਚ ਸ਼ਾਮਲ ਹੋ ਗਏ ਸਨ। ਜੈਤੋ ਤੋਂ ਵਿਧਾਇਕ ਬਲਦੇਵ ਸਿੰਘ ਬਿਨਾਂ ਸ਼ਰਤ ਕਾਬਜ਼ ਧੜੇ ਨਾਲ ਵਾਪਸ ਜੁੜ ਗਏ ਹਨ। ਪ੍ਰੰਤੂ ਪਿਰਮਲ ਸਿੰਘ, ਸੁਖਪਾਲ ਸਿੰਘ ਖਹਿਰਾ, ਕੰਵਰ ਸੰਧੂ ਅਤੇ ਜਗਤਾਰ ਸਿੰਘ ਜੱਗਾ ਅਤੇ ਇਕ ਹੋਰ ਵਿਧਾਇਕ ਅੱਜ ਵੀ ਵਖਰੇ ਚਲ ਰਹੇ ਹਨ।