ਉੱਤਰ ਪ੍ਰਦੇਸ਼ ਦੇ ਦੇਵਰੀਆ ਵਿਚ ਕੁਝ ਦਿਨ ਪਹਿਲਾਂ ਜ਼ਿਲ੍ਹਾ ਹਸਪਤਾਲ ਵਿਚ ਬੱਚੀ ਕੋਲੋਂ ਪੋਚਾ ਲਗਵਾਉਣ ਦੀ ਵੀਡੀਓ ਕਾਫੀ ਵਾਇਰਲ ਹੋਈ ਸੀ।
ਨਵੀਂ ਦਿੱਲੀ: ਉੱਤਰ ਪ੍ਰਦੇਸ਼ ਦੇ ਦੇਵਰੀਆ ਵਿਚ ਕੁਝ ਦਿਨ ਪਹਿਲਾਂ ਜ਼ਿਲ੍ਹਾ ਹਸਪਤਾਲ ਵਿਚ ਬੱਚੀ ਕੋਲੋਂ ਪੋਚਾ ਲਗਵਾਉਣ ਦੀ ਵੀਡੀਓ ਕਾਫੀ ਵਾਇਰਲ ਹੋਈ ਸੀ। ਹਸਪਤਾਲ ਪ੍ਰਸ਼ਾਸਨ ‘ਤੇ ਕਾਰਵਾਈ ਕਰਨ ਦੀ ਬਜਾਏ, ਇਸ ਵੀਡੀਓ ਨੂੰ ਬਣਾਉਣ ਵਾਲੇ ਸਥਾਨਕ ਪੱਤਰਕਾਰ ਅਮਿਤਾਭ ਰਾਵਤ ਖਿਲਾਫ਼ ਐਫਆਈਆਰ ਦਰਜ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ।
Journalist
ਪੱਤਰਕਾਰ ਖਿਲਾਫ਼ ਐਫਆਈਆਰ 27 ਜੁਲਾਈ ਨੂੰ ਹੀ ਦਰਜ ਹੋ ਗਈ ਸੀ ਹਾਲਾਂਕਿ ਇਹ ਖ਼ਬਰ ਸੋਸ਼ਲ ਮੀਡੀਆ ‘ਤੇ ਹੁਣ ਵਾਇਰਲ ਹੋ ਰਹੀ ਹੈ। ਇਸ ਤੋਂ ਬਾਅਦ ਦੇਵਰੀਆ ਵਿਚ ਸਥਾਨਕ ਪੱਤਰਕਾਰਾਂ ਨੇ ਪ੍ਰਦਰਸ਼ਨ ਕੀਤਾ। ਪੱਤਰਕਾਰ ਅਮਿਤਾਭ ਰਾਵਤ ਖਿਲਾਫ ਆਈਪੀਸੀ ਦੀ ਧਾਰਾ 67, 506, 504, 389 ਅਤੇ 385 ਦੇ ਤਹਿਤ ਮਾਮਲਾ ਦਰਜ ਹੋਇਆ ਹੈ।
Girl sweeping floor of hospital
ਸਫਾਈ ਸੇਵਾਵਾਂ ਦੇ ਸੁਪਰਵਾਈਜ਼ਰ ਸ਼ਤਰੂਘਨ ਯਾਦਵ ਨੇ ਪੱਤਰਕਾਰ ਖਿਲਾਫ ਐਫਆਈਆਰ ਦਰਜ ਕਰਵਾਈ ਹੈ। ਐਫਆਈਆਰ ਵਿਚ ਲਿਖਿਆ ਗਿਆ ਹੈ ਕਿ ਪੱਤਰਕਾਰ ਨੇ ਬੱਚੀ ਨੂੰ ਉਕਸਾਇਆ ਹੈ ਤੇ ਪੋਚਾ ਲਗਾਉਂਦੇ ਹੋਏ ਦਾ ਵੀਡੀਓ ਬਣਾਇਆ ਹੈ। ਸ਼ਿਕਾਇਤ ਕਰਤਾ ਦਾ ਅਰੋਪ ਹੈ ਕਿ ਪੱਤਰਕਾਰ ਨੇ ਵੀਡੀਓ ਵਾਇਰਲ ਕਰਨ ਦੀ ਧਮਕੀ ਦਿੰਦੇ ਹੋਏ 5 ਹਜ਼ਾਰ ਰੁਪਏ ਮੰਗੇ ਸੀ। ਸ਼ਿਕਾਇਤਕਰਤਾ ਨੇ ਪੱਤਰਕਾਰ ‘ਤੇ ਗਾਲਾਂ ਕੱਢਣ ਦਾ ਅਰੋਪ ਵੀ ਲਗਾਇਆ ਹੈ।
FIR
ਜ਼ਿਕਰਯੋਗ ਹੈ ਕਿ ਦੇਵਰੀਆ ਦੇ ਜ਼ਿਲ੍ਹਾ ਹਸਪਤਾਲ ਦੇ ਮਹਿਲਾ ਵਾਰਡ ਵਿਚ ਇਕ ਬੱਚੀ ਦਾ ਵਾਈਪਰ ਨਾਲ ਗੈਲਰੀ ਸਾਫ ਕਰਦੇ ਹੋਏ ਵੀਡੀਓ ਵਾਇਰਲ ਹੋਇਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਬੱਚੀ ਦੀ ਮਾਂ ਦੀ ਹਾਲਤ ਇੰਨੀ ਗੰਭੀਰ ਸੀ ਕਿ ਉਸ ਨੇ ਵਾਰਡ ਦੀ ਗੈਲਰੀ ਵਿਚ ਹੀ ਪੇਸ਼ਾਬ ਕਰ ਦਿੱਤਾ, ਇਸ ‘ਤੇ ਨਰਾਜ਼ ਕਰਮਚਾਰੀਆਂ ਨੇ ਨਾਲ ਆਈ ਬੱਚੀ ਕੋਲੋਂ ਹੀ ਪੋਚਾ ਲਗਵਾਇਆ। ਇਸ ਦੌਰਾਨ ਪੱਤਰਕਾਰ ਨੇ ਬੱਚੀ ਦਾ ਵੀਡੀਓ ਬਣਾ ਕੇ ਵਾਇਰਲ ਕਰ ਦਿੱਤਾ ਸੀ।
