ਅਦਾਲਤ ਨੇ ਸੁਣਾਈ ਇਕ ਸਾਲ ਦੀ ਸਜ਼ਾ ਤੇ ਜੁਰਮਾਨਾ
ਅਹਿਮਦਾਬਾਦ : ਆਮ ਤੌਰ 'ਤੇ ਕੁੱਤੇ ਨੂੰ ਇਨਸਾਨ ਦਾ ਵਫ਼ਾਦਾਰ ਮੰਨਿਆ ਜਾਂਦਾ ਹੈ। ਪਰ ਜਦੋਂ ਇਹ ਜਾਨਵਰ ਖਫ਼ਾ ਹੋ ਕੇ ਇਨਸਾਨਾਂ ਨੂੰ ਹੀ ਕੱਟਣ ਲੱਗ ਜਾਵੇ ਤਾਂ ਮਾਮਲਾ ਗੰਭੀਰ ਹੋ ਜਾਂਦਾ ਹੈ। ਖ਼ਾਸ ਕਰ ਕੇ ਵਿਦੇਸ਼ੀ ਨਸਲ ਦੇ ਕੁੱਤੇ ਜਦੋਂ ਆਪੇ ਤੋਂ ਬਾਹਰ ਹੋ ਜਾਣ ਤਾਂ ਉਹ ਕਿਸੇ 'ਤੇ ਵੀ ਭਾਰੀ ਪੈ ਸਕਦੇ ਹਨ। ਅਜਿਹੇ ਹੀ ਇਕ ਮਾਮਲੇ 'ਚ ਇਕ ਕੁੱਤੇ ਵਲੋਂ ਗੁਆਢੀਆਂ ਨੂੰ ਕੱਟਣ ਦੀ ਘਟਨਾ 'ਚ ਉਸ ਦੇ ਮਾਲਕ ਨੂੰ ਹੁਣ 6 ਸਾਲ ਬਾਅਦ ਜੇਲ੍ਹ ਦੀ ਹਵਾ ਖਾਣੀ ਪਵੇਗੀ।
Photo
ਇਹ ਮਾਮਲਾ ਗੁਜਰਾਤ ਦਾ ਹੈ ਜਿੱਥੇ ਇਕ ਡਾਬਰਮੈਨ ਨਸਲ ਦੇ ਕੁੱਤੇ ਨੇ ਅਪਣੇ ਗੁਆਂਢ 'ਚ ਰਹਿੰਦੇ ਚਾਰ ਲੋਕਾਂ 'ਤੇ ਹਮਲਾ ਕਰ ਕੇ ਜ਼ਖ਼ਮੀ ਕਰ ਦਿਤਾ ਸੀ। ਇਹ ਘਟਨਾਵਾਂ ਸਾਲ 2012 ਤੋਂ 2014 ਦਰਮਿਆਨ ਵਾਪਰੀਆਂ ਸਨ। ਇਸ ਮਾਮਲੇ 'ਚ ਕੁੱਤੇ ਦੇ ਮਾਲਕ ਨੂੰ ਸਜ਼ਾ ਹੁਣ 6 ਸਾਲ ਬਾਅਦ ਸੁਣਾਈ ਗਈ ਹੈ।
Photo
ਜਾਣਕਾਰੀ ਅਨੁਸਾਰ ਅਹਿਮਦਾਬਾਦ ਜ਼ਿਲ੍ਹੇ ਦੇ ਗੌੜਸਰ ਦੇ ਰਹਿਣ ਵਾਲੇ ਭਾਰੇਸ਼ ਪਾਂਡੇ ਨਾਂ ਦੇ ਵਿਅਕਤੀ ਨੇ ਸ਼ਕਤੀ ਨਾਂ ਦਾ ਡਾਬਰਮੈਨ ਨਸਲ ਦਾ ਕੁੱਤਾ ਪਾਲਿਆ ਹੋਇਆ ਸੀ। ਇਸ ਕੁੱਤੇ ਨੇ 3 ਬੱਚਿਆਂ ਨੂੰ ਕੱਟ ਕੇ ਜ਼ਖ਼ਮੀ ਕਰ ਦਿਤਾ ਸੀ।
Photo
ਕੁੱਤੇ ਦੇ ਹਮਲੇ 'ਚ ਪਾਂਡੇ ਦਾ ਗੁਆਢੀ ਅਵਿਨਾਸ਼ ਪਟੇਲ ਵੀ ਗੰਭੀਰ ਜ਼ਖ਼ਮੀ ਰੂਪ 'ਚ ਹੋ ਗਿਆ ਸੀ। ਕੁੱਤੇ ਦੇ ਹਮਲੇ ਤੋਂ ਬਾਅਦ ਭੱਜਦੇ ਸਮੇਂ ਉਸ ਦੀਆਂ ਡਿੱਗਣ ਕਾਰਨ ਹੱਡੀਆਂ ਤਕ ਟੁਟ ਗਈਆਂ ਸਨ। ਪਟੇਲ ਨੇ ਸਾਲ 2014 ਵਿਚ ਕੁੱਤੇ ਦੇ ਮਾਲਕ ਪਾਂਡੇ ਖਿਲਾਫ਼ ਐਫ.ਆਈ.ਆਰ. ਦਰਜ ਕਰਵਾਈ ਸੀ।
Photo
ਇਸ ਦਾ ਕੇਸ ਵਧੀਕ ਚੀਫ਼ ਮੈਟਰੋਪੋਲੀਲਨ ਮੈਜਿਸਟ੍ਰੇਟ ਯੂ.ਐਨ. ਸਿੰਧੀ ਦੀ ਅਦਾਲਤ 'ਚ ਚੱਲਿਆ। ਅਦਾਲਤ ਨੇ ਸੁਣਵਾਈ ਦੌਰਾਨ ਕੁੱਤੇ ਦੇ ਮਾਲਕ ਪਾਂਡੇ ਨੂੰ ਦੋਸ਼ੀ ਠਹਿਰਾਉਂਦਿਆਂ ਉਸ ਨੂੰ ਇਕ ਸਾਲ ਦੀ ਕੈਦ ਤੇ 1500 ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ।
Photo
ਅਦਾਲਤ ਨੇ ਕਿਹਾ ਕਿ ਭਾਵੇਂ ਪਾਂਡੇ ਲੋਕਾਂ ਨੂੰ ਸਿੱਧੇ ਤੌਰ 'ਤੇ ਜ਼ਖ਼ਮੀ ਕਰਨ ਲਈ ਜ਼ਿੰਮੇਵਾਰ ਨਹੀਂ ਹੈ, ਪਰ ਉਸ ਨੇ ਅਪਣੇ ਕੁੱਤੇ ਨੂੰ ਖੁਲ੍ਹਾ ਛੱਡਿਆ, ਜਿਸ ਕਾਰਨ 4 ਲੋਕ ਜ਼ਖ਼ਮੀ ਹੋ ਗਏ, ਜਿਹੜਾ ਕਿ ਲਾਪ੍ਰਵਾਹੀ ਵਾਲਾ ਕਦਮ ਮੰਨਿਆ ਜਾਵੇਗਾ।
