ਬਰਫਬਾਰੀ ਤੋਂ ਬਾਅਦ ਫ਼ਰਵਰੀ ਦੇ ਸਿਰਫ ਛੇ ਦਿਨਾਂ ਦੇ ਅੰਦਰ 19,532 ਸੈਲਾਨੀ ਇਸ ਸਥਾਨ ਦਾ ਦੌਰਾ ਕਰ ਚੁਕੇ ਹਨ
ਗੁਲਮਰਗ (ਜੰਮੂ-ਕਸ਼ਮੀਰ): ਦੋ ਮਹੀਨੇ ਦੀ ਉਡੀਕ ਤੋਂ ਬਾਅਦ ਹੋਈ ਬਰਫਬਾਰੀ ਨੇ ‘ਧਰਤੀ ’ਤੇ ਸਵਰਗ’ ਵਜੋਂ ਜਾਣੇ ਜਾਂਦੇ ਜੰਮੂ-ਕਸ਼ਮੀਰ ਦੇ ਗੁਲਮਰਗ ਨੂੰ ਕੁਦਰਤ ਪ੍ਰੇਮੀਆਂ ਲਈ ਖਿੱਚ ਦਾ ਕੇਂਦਰ ਬਣਾ ਦਿਤਾ ਹੈ। ਕੜਾਕੇ ਦੀ ਠੰਢ ਦੌਰਾਨ ਬਰਫਬਾਰੀ ਨਾ ਹੋਣ ਕਾਰਨ ਲੋਕ ਨਿਰਾਸ਼ ਸਨ ਅਤੇ ਬੇਸਬਰੀ ਨਾਲ ਬਰਫਬਾਰੀ ਦੀ ਉਡੀਕ ਕਰ ਰਹੇ ਸਨ। ਇਹ ਉਡੀਕ ਆਖਰਕਾਰ ਜਨਵਰੀ ਦੇ ਅਖੀਰ ’ਚ ਖਤਮ ਹੋਈ, ਜਿਸ ਨਾਲ ਸਥਾਨਕ ਲੋਕਾਂ ਅਤੇ ਸੈਲਾਨੀਆਂ ਦੋਹਾਂ ਦੇ ਚਿਹਰਿਆਂ ’ਤੇ ਖੁਸ਼ੀ ਵਾਪਸ ਆ ਗਈ।
ਸ਼੍ਰੀਨਗਰ ਤੋਂ ਕਰੀਬ 50 ਕਿਲੋਮੀਟਰ ਦੂਰ ਗੁਲਮਰਗ ਦੇ ਸ਼ਾਂਤ ਮਾਹੌਲ ’ਚ ਪਰਵਾਰ ਨਾਲ ਬਰਫਬਾਰੀ ਦਾ ਅਨੰਦ ਲੈਣ ਲਈ ਦੇਸ਼-ਵਿਦੇਸ਼ ਤੋਂ ਸੈਂਕੜੇ ਸੈਲਾਨੀ ਪ੍ਰਸਿੱਧ ਸਕੀ ਰਿਜ਼ਾਰਟ ’ਚ ਆ ਰਹੇ ਹਨ। ਬਰਫਬਾਰੀ ਕਾਰਨ ਦੂਰ-ਦੁਰਾਡੇ ਤੋਂ ਸੈਲਾਨੀ ਬਰਫੀਲੀ ਢਲਾਨਾਂ ’ਤੇ ਸਕੀਇੰਗ ਕਰਨ ਅਤੇ ਸ਼ਾਂਤ ਵਾਦੀਆਂ ਅਤੇ ਬਰਫ ਨਾਲ ਢਕੇ ਪਹਾੜਾਂ ਦੇ ਖ਼ੂਬਸੂਰਤ ਨਜ਼ਾਰਿਆਂ ਦਾ ਅਨੰਦ ਲੈਣ ਲਈ ਗੁਲਮਰਗ ਵਲ ਰੁਖ ਕਰ ਰਹੇ ਹਨ।
ਸੈਰ-ਸਪਾਟਾ ਵਿਭਾਗ ਅਨੁਸਾਰ, ਇਸ ਬਰਫਬਾਰੀ ਤੋਂ ਬਾਅਦ ਫ਼ਰਵਰੀ ਦੇ ਸਿਰਫ ਛੇ ਦਿਨਾਂ ਦੇ ਅੰਦਰ 19,532 ਸੈਲਾਨੀ ਇਸ ਸਥਾਨ ਦਾ ਦੌਰਾ ਕਰ ਚੁਕੇ ਹਨ। ਵਿਭਾਗ ਦੇ ਅੰਕੜਿਆਂ ਅਨੁਸਾਰ 1 ਤੋਂ 6 ਫ਼ਰਵਰੀ ਤਕ 15,086 ਘਰੇਲੂ ਸੈਲਾਨੀ, 4,290 ਸਥਾਨਕ ਅਤੇ 156 ਵਿਦੇਸ਼ੀ ਗੁਲਮਰਗ ਆਏ ਹਨ। ਮੱਧ ਪ੍ਰਦੇਸ਼ ਦੇ ਰਹਿਣ ਵਾਲੇ ਰੋਹਿਤ ਨੇ ਕਿਹਾ, ‘‘ਅਸੀਂ ਬਰਫਬਾਰੀ ਨਾ ਹੋਣ ਕਾਰਨ ਕਸ਼ਮੀਰ ’ਚ ਅਪਣੀ ਬੁਕਿੰਗ ਦੋ ਮਹੀਨਿਆਂ ਲਈ ਰੋਕ ਦਿਤੀ ਸੀ, ਪਰ ਜਿਵੇਂ ਹੀ ਅਸੀਂ ਬਰਫਬਾਰੀ ਬਾਰੇ ਸੁਣਿਆ, ਅਸੀਂ ਕਸ਼ਮੀਰ ਵਲ ਭੱਜ ਗਏ।’’
ਬਰਫਬਾਰੀ ਕਾਰਨ ਸ਼੍ਰੀਨਗਰ ਜਾਣ ਵਾਲੀ ਉਡਾਣ ਰੱਦ ਹੋਣ ਤੋਂ ਬਾਅਦ ਰੋਹਿਤ ਕਾਰ ਰਾਹੀਂ ਸ਼੍ਰੀਨਗਰ ਆਏ ਸਨ। ਉਨ੍ਹਾਂ ਕਿਹਾ, ‘‘ਇਹ ਸੱਚਮੁੱਚ ਸਵਰਗ ਹੈ, ਇਹ ਸੱਚਮੁੱਚ ਸੁੰਦਰ ਹੈ, ਮੈਂ ਪਹਿਲੀ ਵਾਰ ਅਜਿਹਾ ਕੁੱਝ ਵੇਖ ਰਿਹਾ ਹਾਂ।’’ ਉਨ੍ਹਾਂ ਕਿਹਾ ਕਿ ਉਸ ਨੇ ਗੁਲਮਰਗ ਦੇ ਦੌਰੇ ਦੌਰਾਨ ਸਲੇਜਿੰਗ ਦਾ ਵੀ ਅਨੰਦ ਲਿਆ।
