ਕਿਹਾ, ਏ.ਆਈ. ਲਈ ਸ਼ਾਸਨ ਅਤੇ ਮਿਆਰ ਬਣਾਉਣ ਲਈ ਆਲਮੀ ਕੋਸ਼ਿਸ਼ਾਂ ਦੀ ਜ਼ਰੂਰਤ
ਪੈਰਿਸ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਬਨਾਉਟੀ ਬੁੱਧੀ (ਏ.ਆਈ.) ਦੇ ਆਉਣ ਨਾਲ ਨੌਕਰੀਆਂ ਖਤਮ ਹੋਣ ਦੇ ਖਦਸ਼ੇ ਨੂੰ ਦੂਰ ਕਰਦਿਆਂ ਕਿਹਾ ਕਿ ਨੌਕਰੀਆਂ ਤਕਨਾਲੋਜੀ ਕਾਰਨ ਨਹੀਂ ਮਰਦੀਆਂ, ਬਲਕਿ ਉਨ੍ਹਾਂ ਦੇ ਸੁਭਾਅ ਨੂੰ ਬਦਲਦੀਆਂ ਹਨ ਅਤੇ ਨਵੀਆਂ ਕਿਸਮਾਂ ਦੀਆਂ ਨੌਕਰੀਆਂ ਪੈਦਾ ਹੁੰਦੀਆਂ ਹਨ।
ਪ੍ਰਧਾਨ ਮੰਤਰੀ ਮੋਦੀ ਨੇ ਇੱਥੇ ਆਲਮੀ ਏ.ਆਈ. ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਇਹ ਗੱਲ ਕਹੀ। ਉਨ੍ਹਾਂ ਨੇ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨਾਲ ਕਾਨਫਰੰਸ ਦੀ ਸਹਿ-ਪ੍ਰਧਾਨਗੀ ਵੀ ਕੀਤੀ। ਅਪਣੇ ਸੰਬੋਧਨ ’ਚ ਮੋਦੀ ਨੇ ਲੋਕਾਂ ਨੂੰ ਹੁਨਰਮੰਦ ਬਣਾਉਣ ’ਚ ਨਿਵੇਸ਼ ਕਰਨ ਅਤੇ ਏ.ਆਈ. ਆਧਾਰਤ ਭਵਿੱਖ ਲਈ ਉਨ੍ਹਾਂ ਨੂੰ ਮੁੜ ਹੁਨਰਮੰਦ ਬਣਾਉਣ ਦਾ ਸੱਦਾ ਦਿਤਾ।
ਉਨ੍ਹਾਂ ਕਿਹਾ, ‘‘ਏ.ਆਈ. ਬਾਰੇ ਸੱਭ ਤੋਂ ਵੱਡਾ ਡਰ ਨੌਕਰੀਆਂ ਦਾ ਨੁਕਸਾਨ ਹੈ। ਪਰ ਇਤਿਹਾਸ ਨੇ ਸਾਨੂੰ ਵਿਖਾਇਆ ਹੈ ਕਿ ਤਕਨਾਲੋਜੀ ਚੀਜ਼ਾਂ ਨੂੰ ਵਾਪਰਨ ਨਹੀਂ ਦਿੰਦੀ। ਸਿਰਫ ਕਿਸਮ ਬਦਲਦੀ ਹੈ ਅਤੇ ਨਵੀਆਂ ਕਿਸਮਾਂ ਦੀਆਂ ਨੌਕਰੀਆਂ ਪੈਦਾ ਹੁੰਦੀਆਂ ਹਨ।’’
ਮੋਦੀ ਨੇ ਕਿਹਾ, ‘‘ਏ.ਆਈ. ਬੇਮਿਸਾਲ ਪੈਮਾਨੇ ਅਤੇ ਗਤੀ ਨਾਲ ਵਿਕਸਤ ਹੋ ਰਹੀ ਹੈ, ਅਤੇ ਇਸ ਨੂੰ ਹੋਰ ਵੀ ਤੇਜ਼ ਰਫਤਾਰ ਨਾਲ ਅਪਣਾਇਆ ਅਤੇ ਲਾਗੂ ਕੀਤਾ ਜਾ ਰਿਹਾ ਹੈ। ਸਰਹੱਦਾਂ ਦੇ ਪਾਰ ਵੀ ਇਸ ਦੀ ਡੂੰਘੀ ਨਿਰਭਰਤਾ ਹੈ। ਸਾਨੂੰ ਏ.ਆਈ.-ਸੰਚਾਲਿਤ ਭਵਿੱਖ ਲਈ ਅਪਣੇ ਲੋਕਾਂ ਨੂੰ ਹੁਨਰਮੰਦ ਬਣਾਉਣ ਅਤੇ ਮੁੜ ਹੁਨਰਮੰਦ ਬਣਾਉਣ ’ਚ ਨਿਵੇਸ਼ ਕਰਨ ਦੀ ਲੋੜ ਹੈ।’’
ਉਨ੍ਹਾਂ ਕਿਹਾ, ‘‘ਏ.ਆਈ. ਸਿਆਸੀ, ਆਰਥਕਤਾ, ਸੁਰੱਖਿਆ ਅਤੇ ਸਮਾਜ ਨੂੰ ਬਦਲ ਰਹੀ ਹੈ ਅਤੇ ਇਸ ਸਦੀ ’ਚ ਮਨੁੱਖਤਾ ਲਈ ਇਕ ਕੋਡ ਬਣਾ ਰਹੀ ਹੈ। ਪਰ ਇਹ ਮਨੁੱਖੀ ਇਤਿਹਾਸ ਦੀਆਂ ਹੋਰ ਤਕਨੀਕੀ ਪ੍ਰਾਪਤੀਆਂ ਤੋਂ ਬਹੁਤ ਵੱਖਰਾ ਹੈ।’’
ਪ੍ਰਧਾਨ ਮੰਤਰੀ ਅਨੁਸਾਰ, ‘‘ਏ.ਆਈ. ਇਕ ਅਜਿਹੀ ਦੁਨੀਆਂ ਬਣਾਉਣ ’ਚ ਮਦਦ ਕਰ ਸਕਦੀ ਹੈ ਜਿਸ ’ਚ ਟਿਕਾਊ ਵਿਕਾਸ ਟੀਚਿਆਂ ਵਲ ਯਾਤਰਾ ਆਸਾਨ ਅਤੇ ਤੇਜ਼ ਹੋਵੇ। ਅਜਿਹਾ ਕਰਨ ਲਈ ਸਾਨੂੰ ਸਰੋਤਾਂ ਅਤੇ ਪ੍ਰਤਿਭਾਵਾਂ ਨੂੰ ਇਕੱਠੇ ਕਰਨ ਦੀ ਜ਼ਰੂਰਤ ਹੈ। ਸਾਨੂੰ ਇਕ ਓਪਨ-ਸੋਰਸ ਪ੍ਰਣਾਲੀ ਵਿਕਸਤ ਕਰਨੀ ਪਵੇਗੀ ਜੋ ਵਿਸ਼ਵਾਸ ਅਤੇ ਪਾਰਦਰਸ਼ਤਾ ਨੂੰ ਵਧਾਏ।’’ ਉਨ੍ਹਾਂ ਕਿਹਾ ਕਿ ਕੁੱਝ ਲੋਕ ਮਸ਼ੀਨਾਂ ਦੇ ਮਨੁੱਖਾਂ ਨਾਲੋਂ ਵਧੇਰੇ ਬੁੱਧੀਮਾਨ ਬਣਨ ਬਾਰੇ ਚਿੰਤਤ ਹਨ। ਪਰ ਸਾਡੇ ਸਮੂਹਕ ਭਵਿੱਖ ਅਤੇ ਸਾਂਝੀ ਕਿਸਮਤ ਦੀ ਕੁੰਜੀ ਸਾਡੇ ਮਨੁੱਖਾਂ ਤੋਂ ਇਲਾਵਾ ਕਿਸੇ ਹੋਰ ਕੋਲ ਨਹੀਂ ਹੈ।
ਪ੍ਰਧਾਨ ਮੰਤਰੀ ਨੇ ਏ.ਆਈ. ਲਈ ਸੰਚਾਲਨ ਵਿਵਸਥਾ ਅਤੇ ਮਾਪਦੰਡ ਨਿਰਧਾਰਤ ਕਰਨ ਲਈ ਸਮੂਹਕ ਆਲਮੀ ਯਤਨਾਂ ਦਾ ਸੱਦਾ ਦਿਤਾ। ਉਨ੍ਹਾਂ ਕਿਹਾ ਕਿ ਸਾਂਝੀਆਂ ਕਦਰਾਂ-ਕੀਮਤਾਂ ਨੂੰ ਕਾਇਮ ਰੱਖਣ ਅਤੇ ਜੋਖਮਾਂ ਨਾਲ ਨਜਿੱਠਣ ਲਈ ਇਹ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ, ‘‘ਸ਼ਾਸਨ ਪ੍ਰਣਾਲੀਆਂ ਅਤੇ ਮਾਪਦੰਡਾਂ ਦੀ ਸਥਾਪਨਾ ਲਈ ਸਮੂਹਿਕ ਗਲੋਬਲ ਯਤਨਾਂ ਦੀ ਜ਼ਰੂਰਤ ਹੈ ਜੋ ਸਾਡੀਆਂ ਸਾਂਝੀਆਂ ਕਦਰਾਂ ਕੀਮਤਾਂ ਨੂੰ ਕਾਇਮ ਰਖਦੇ ਹਨ, ਜੋਖਮਾਂ ਨੂੰ ਘਟਾਉਂਦੇ ਹਨ ਅਤੇ ਵਿਸ਼ਵਾਸ ਪੈਦਾ ਕਰਦੇ ਹਨ।’’
