ਸੁਪਰੀਮ ਕੋਰਟ ਨੇ ਇਕ ਹਫ਼ਤੇ ਵਿਚ ਮੰਗੀ ਸਥਿਤੀ ਰਿਪੋਰਟ
ਨਵੀਂ ਦਿੱਲੀ : ਰਾਮ ਜਨਮ ਭੂਮੀ-ਬਾਬਰੀ ਮਸਜਿਦ ਅਯੁਧਿਆ ਜ਼ਮੀਨ ਵਿਵਾਦ ਮਾਮਲੇ ਵਿਚ ਜਾਰੀ ਵਿਚੋਲਗੀ ਪ੍ਰਕਿਰਿਆ ਸਬੰਧੀ ਸੁਪਰੀਮ ਕੋਰਟ ਨੇ ਇਕ ਹਫ਼ਤੇ ਦੇ ਅੰਦਰ ਸਥਿਤੀ ਰਿਪੋਰਟ ਮੰਗੀ ਹੈ। ਇਸ ਦੇ ਨਾਲ ਹੀ ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਜੇ ਵਿਵਾਦਤ ਮਾਮਲਾ ਦੋਸਤਾਨਾ ਢੰਗ ਨਾਲ ਹੱਲ ਨਾਲ ਹੋਇਆ ਤਾਂ 25 ਜੁਲਾਈ ਤੋਂ ਇਸ ਦੀ ਰੋਜ਼ਾਨਾ ਸੁਣਵਾਈ ਹੋਵੇਗੀ। ਅਦਾਲਤ ਨੇ 18 ਜੁਲਾਈ ਤਕ ਸਥਿਤੀ ਰਿਪੋਰਟ ਪੇਸ਼ ਕਰਨ ਦਾ ਹੁਕਮ ਦਿੰਦਿਆਂ ਕਿਹਾ ਕਿ ਅਗਲਾ ਹੁਕਮ 18 ਜੁਲਾਈ ਨੂੰ ਹੀ ਦਿਤਾ ਜਾਵੇਗਾ।
Supreme court and Ayodhya
ਤਾਜ਼ਾ ਸਥਿਤੀ ਰਿਪੋਰਟ ਵੇਖਣ ਤੋਂ ਬਾਅਦ ਜੇ ਅਦਾਲਤ ਨੂੰ ਲੱਗੇਗਾ ਕਿ ਵਿਚੋਲਗੀ ਪ੍ਰਕਿਰਿਆ ਅਸਫ਼ਲ ਰਹੀ ਹੈ ਤਾਂ ਉਹ ਅਯੁਧਿਆ ਮਾਮਲੇ ਦੀ 25 ਜੁਲਾਈ ਤੋਂ ਰੋਜ਼ਾਨਾ ਸੁਣਵਾਈ ਹੋਵੇਗੀ। ਅਦਾਲਤ ਦੀ ਬੈਂਚ ਦੇ ਜੱਜ ਨੇ ਕਿਹਾ ਕਿ ਉਹ ਸਮਝਦੇ ਹਨ ਕਿ ਸੇਵਾਮੁਕਤ ਜਸਟਿਸ ਐਫ਼,ਐਮ,ਆਈ, ਕਲੀਫੁੱਲਾ ਨੂੰ ਇਹ ਅਪੀਲ ਕਰਨਾ ਠੀਕ ਹੈ ਕਿ ਉਹ ਅਦਾਲਤ ਨੂੰ ਵਿਚੋਲਗੀ ਪ੍ਰਕਿਰਿਆ ਸਬੰਧੀ ਸੂਚਿਤ ਕਰਨ। ਕਲੀਫੁੱਲਾ ਅਗਲੇ ਵੀਰਵਾਰ ਤਕ ਇਹ ਰਿਪੋਰਟ ਅਦਾਲਤ ਨੂੰ ਸੌਂਪ ਦੇਣਗੇ, ਇਸੇ ਦਿਨ ਅਗਲਾ ਹੁਕਮ ਜਾਰੀ ਕੀਤਾ ਜਾਵੇਗਾ।
Ayodhya land dispute case in supreme court
ਅਦਾਲਤ ਨੇ ਗੋਪਾਲ ਸਿੰਘ ਵਿਸ਼ਾਰਦ ਵਲੋਂ ਦਾਖ਼ਲ ਕੀਤੀ ਗਈ ਪਟੀਸ਼ਨ ਦੀ ਸੁਣਵਾਈ ਕਰਦਿਆਂ ਇਹ ਹੁਕਮ ਦਿਤਾ ਹੈ। ਵਿਸ਼ਾਰਦ ਨੇ ਅਪਣੀ ਪਟੀਸ਼ਨ ਵਿਚ ਅਦਾਲਤ ਨੂੰ ਅਪੀਲ ਕੀਤੀ ਹੈ ਕਿ ਉਹ ਵਿਚੋਲਗੀ ਦੀ ਇਸ ਪ੍ਰਕਿਰਿਆ ਨੂੰ ਬੰਦ ਕਰੇ ਕਿਉਂਕਿ ਇਸ ਨਾਲ ਜ਼ਿਆਦਾ ਕੁੱਝ ਨਹੀਂ ਹੋ ਰਿਹਾ। ਸੁਣਵਾਈ ਦੌਰਾਨ ਰਾਮ ਲੱਲਾ ਬਿਰਾਜਮਾਨ ਵਲੋਂ ਪੇਸ਼ ਹੋਏ ਸੀਨੀਅਰ ਵਕੀਲ ਰੰਜੀਤ ਕੁਮਾਰ ਨੇ ਪਟੀਸ਼ਨ ਦਾ ਸਮਰਥਨ ਕੀਤਾ ਅਤੇ ਕਿਹਾ ਕਿ ਉਨ੍ਹਾਂ ਪਹਿਲਾਂ ਵੀ ਵਿਚੋਲਗੀ ਕਮੇਟੀ ਵਿਚ ਮਾਮਲਾ ਭੇਜੇ ਜਾਣ ਦਾ ਵਿਰੋਧ ਕੀਤਾ ਸੀ। ਪਟੀਸ਼ਨ ਦਾ ਵਿਰੋਧ ਕਰ ਰਹੇ ਮੁਸਲਿਮ ਪੱਖ ਵਲੋਂ ਪੇਸ਼ ਵਕੀਲ ਰਾਜੀਵ ਧਵਨ ਨੇ ਕਿਹਾ ਕਿ ਇਹ ਨਵੀਂ ਪਟੀਸ਼ਨ ਉਨ੍ਹਾਂ ਨੂੰ ਡਰਾਉਣ ਦੀ ਇਕ ਚਾਲ ਹੈ, ਇਸ ਲਈ ਵਿਚੋਲਗੀ ਦੀ ਪ੍ਰਕਿਰਿਆ ਜਾਰੀ ਰਹਿਣੀ ਚਾਹੀਦੀ ਹੈ।
