ਉਪ ਰਾਜਪਾਲ ਨੇ ਸ਼ਰਧਾਂਜਲੀ ਭੇਟ ਕੀਤੀ
ਸ੍ਰੀਨਗਰ: ਅਨੰਤਨਾਗ ਜ਼ਿਲ੍ਹੇ ਦੇ ਕੋਕਰਨਾਗ ’ਚ ਸਨਿਚਰਵਾਰ ਨੂੰ ਅਤਿਵਾਦ ਵਿਰੋਧੀ ਮੁਹਿੰਮਾਂ ਦੌਰਾਨ ਖਰਾਬ ਮੌਸਮ ਨਾਲ ਜੂਝ ਰਹੇ ਦੋ ਫ਼ੌਜੀ ਸ਼ਹੀਦ ਹੋ ਗਏ। ਸ਼ਹਾਦਤ ਪਾਉਣ ਵਾਲਿਆਂ ਵਿਚ ਲਾਂਸ ਹੌਲਦਾਰ ਪਲਾਸ਼ ਘੋਸ਼ ਅਤੇ ਲਾਂਸ ਨਾਇਕ ਸੁਜੈ ਘੋਸ਼ ਸ਼ਾਮਲ ਹਨ, ਜਿਨ੍ਹਾਂ ਨੇ ਦੇਸ਼ ਲਈ ਆਪਣੀਆਂ ਜਾਨਾਂ ਕੁਰਬਾਨ ਕੀਤੀਆਂ।
ਦੋਹਾਂ ਫ਼ੌਜੀਆਂ ਨੇ ਕੋਕਰਨਾਗ ਦੀ ਕਿਸ਼ਤਵਾੜ ਰੇਂਜ ਵਿਚ ਬਹੁਤ ਖ਼ਰਾਬ ਮੌਸਮ ਨਾਲ ਜੂਝਦੇ ਹੋਏ ਅਤਿਵਾਦ ਵਿਰੋਧੀ ਅਭਿਆਨ ਚਲਾਉਂਦੇ ਹੋਏ ਸਰਵਉੱਚ ਕੁਰਬਾਨੀ ਦਿਤੀ। ਜੰਮੂ-ਕਸ਼ਮੀਰ ਦੇ ਉਪ ਰਾਜਪਾਲ ਮਨੋਜ ਸਿਨਹਾ ਨੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਉਪ ਰਾਜਪਾਲ ਨੇ ਸ੍ਰੀਨਗਰ ਸਥਿਤ ਬਾਦਾਮੀ ਬਾਗ ਛਾਉਣੀ ’ਚ ਫੌਜ ਦੀ ਚਿਨਾਰ ਕੋਰ ਦੇ ਹੈੱਡਕੁਆਰਟਰ ਦਾ ਦੌਰਾ ਕੀਤਾ ਅਤੇ ਸ਼ਹੀਦ ਫ਼ੌਜੀਆਂ ਨੂੰ ਸ਼ਰਧਾਂਜਲੀ ਦੇਣ ਲਈ ਤਾਬੂਤਾਂ ਉਤੇ ਫੁੱਲ ਮਾਲਾਵਾਂ ਭੇਟ ਕੀਤੀਆਂ। ਸਿਨਹਾ ਨੇ ਕਿਹਾ, ‘‘ਮੈਂ ਅਪਣੀ ਫ਼ੌਜ ਦੇ ਬਹਾਦਰ ਲਾਂਸ ਹਵਲਦਾਰ ਪਲਾਸ਼ ਘੋਸ਼ ਅਤੇ ਲਾਂਸ ਨਾਇਕ ਸੁਜੈ ਘੋਸ਼ ਦੀ ਮਹਾਨ ਕੁਰਬਾਨੀ ਨੂੰ ਸਲਾਮ ਕਰਦਾ ਹਾਂ। ਰਾਸ਼ਟਰ ਸਾਡੇ ਫ਼ੌਜੀਆਂ ਦੀ ਮਿਸਾਲੀ ਬਹਾਦਰੀ ਅਤੇ ਨਿਰਸਵਾਰਥ ਸੇਵਾ ਲਈ ਹਮੇਸ਼ਾ ਧੰਨਵਾਦੀ ਰਹੇਗਾ। ਅਸੀਂ ਦੁੱਖ ਦੀ ਇਸ ਘੜੀ ’ਚ ਅਪਣੇ ਸ਼ਹੀਦਾਂ ਦੇ ਪਰਵਾਰਾਂ ਨਾਲ ਇਕਜੁੱਟਤਾ ਨਾਲ ਖੜ੍ਹੇ ਹਾਂ।’’
ਫੌਜ ਦੀ ਕੁਲੀਨ ਪੈਰਾ ਯੂਨਿਟ ਦਾ ਹਿੱਸਾ ਬਣੇ ਇਹ ਦੋਵੇਂ ਜਵਾਨ ਇਸ ਹਫਤੇ ਦੇ ਸ਼ੁਰੂ ਵਿਚ ਕੋਕਰਨਾਗ ਵਿਚ ਇਕ ਮੁਹਿੰਮ ਦੌਰਾਨ ਲਾਪਤਾ ਹੋ ਗਏ ਸਨ। ਅਤਿਵਾਦੀਆਂ ਦੇ ਲੁਕੇ ਹੋਣ ਦੀ ਸੂਚਨਾ ਮਿਲਣ ਤੋਂ ਬਾਅਦ ਅਹਿਲਾਨ ਗਡੋਲੇ ਇਲਾਕੇ ’ਚ ਇਹ ਮੁਹਿੰਮ ਸ਼ੁਰੂ ਕੀਤੀ ਗਈ ਸੀ। ਅਧਿਕਾਰੀਆਂ ਨੇ ਦਸਿਆ ਕਿ ਇਕ ਫ਼ੌਜੀ ਦੀ ਲਾਸ਼ ਵੀਰਵਾਰ ਨੂੰ ਬਰਾਮਦ ਕੀਤੀ ਗਈ ਸੀ, ਜਦਕਿ ਇਕ ਹੋਰ ਲਾਸ਼ ਸ਼ੁਕਰਵਾਰ ਨੂੰ ਮਿਲੀ ਸੀ, ਅਜਿਹਾ ਲਗਦਾ ਹੈ ਕਿ ਦੋਹਾਂ ਦੀ ਮੌਤ ਹਾਈਪੋਥਰਮੀਆ ਕਾਰਨ ਹੋਈ ਹੈ।
