ਕਿਉਂਕਿ ਬੱਚੇ ਵੋਟ ਬੈਂਕ ਵਿਚ ਨਹੀਂ ਆਉਂਦੇ, ਇਸ ਲਈ ਉਹ ਦੇਸ਼ ਦੇ ਨੇਤਾਵਾਂ ਵੱਲੋਂ ਪਹਿਲ ਦੇ ਆਧਾਰ 'ਤੇ ਪੂਰੀਆਂ ਕੀਤੀਆਂ ਜਾਣ ਵਾਲੀਆਂ ਨੀਤੀਆਂ ਦਾ ਹਿੱਸਾ ਨਹੀਂ ਹਨ।
ਵਿਦਿਸ਼ਾ : ਨੈਸ਼ਨਲ ਕ੍ਰਾਈਮ ਬਿਊਰੋ ਦੀ ਤਾਜ਼ਾ ਰਿਪੋਰਟ ਮੁਤਾਬਕ ਦੇਸ਼ ਵਿਚ ਹਰ ਘੰਟੇ ਦੌਰਾਨ 7 ਬੱਚਿਆਂ ਦਾ ਜਿਨਸੀ ਸ਼ੋਸ਼ਣ ਹੁੰਦਾ ਹੈ। ਦੁਨੀਆਂ ਦੇ 40 ਫ਼ੀ ਸਦੀ ਬੱਚਿਆਂ ਨੂੰ ਰੋਜ਼ਾਨਾ ਢਿੱਡ ਭਰ ਕੇ ਰੋਟੀ ਵੀ ਨਸੀਬ ਨਹੀਂ ਹੁੰਦੀ। ਦੇਸ਼ ਵਿਚ 43 ਲੱਖ ਬੱਚੇ ਇਸ ਸਮੇਂ ਖਾਣਾਂ, ਖੇਤਾਂ ਅਤੇ ਇੱਟਾਂ ਦੇ ਭੱਠਿਆਂ 'ਤੇ ਕੰਮ ਵਿਚ ਲਗੇ ਹੋਏ ਹਨ। ਆਰਟੀਈ ਨਾਲ ਬੱਚਿਆਂ ਦਾ ਸਕੂਲਾਂ ਵਿਚ ਦਾਖਲਾ ਤਾਂ ਵਧਿਆ ਹੈ ਪਰ ਸਿੱਖਿਆ ਦੀ ਗੁਣਵੱਤਾ ਨਹੀਂ ਵਧੀ। ਕਿਉਂਕਿ ਬੱਚੇ ਵੋਟ ਬੈਂਕ ਵਿਚ ਨਹੀਂ ਆਉਂਦੇ,
ਇਸ ਲਈ ਉਹ ਦੇਸ਼ ਦੇ ਨੇਤਾਵਾਂ ਵੱਲੋਂ ਪਹਿਲ ਦੇ ਆਧਾਰ 'ਤੇ ਪੂਰੀਆਂ ਕੀਤੀਆਂ ਜਾਣ ਵਾਲੀਆਂ ਨੀਤੀਆਂ ਦਾ ਹਿੱਸਾ ਨਹੀਂ ਹਨ। ਇਹ ਗੱਲ ਨੋਬੇਲ ਸ਼ਾਂਤੀ ਪੁਰਸਕਾਰ ਨਾਲ ਸਨਮਾਨਿਤ ਕੈਲਾਸ਼ ਸਤਿਆਰਥੀ ਨੇ ਵਿਦਿਸ਼ਾ ਐਸਏਟੀਆਈ ਵਿਚ ਆਯੋਜਿਤ ਪ੍ਰੋਗਰਾਮ ਵਿਚ ਵਿਦਿਆਰਥੀਆਂ ਅਤੇ ਸਟਾਫ ਮੈਂਬਰਾਂ ਸਮੇਤ ਪੰਤਵੰਤੇ ਨਾਗਰਿਕਾਂ ਨੂੰ ਅਪਣੇ ਸੰਬੋਧਨ ਦੌਰਾਨ ਸਾਂਝੀ ਕੀਤੀ। ਸਤਿਆਰਥੀ ਨੇ ਕਿਹਾ ਕਿ ਸਾਡੀ ਸਰਕਾਰ ਦੇਸ਼ ਦੇ ਬੱਚਿਆਂ ਦੀ ਭਲਾਈ ਦੇ ਲਈ ਕੁਲ ਜੀਡੀਪੀ ਦਾ 4 ਫ਼ੀ ਸਦੀ ਵੀ ਖਰਚ ਨਹੀਂ ਕਰਦੀ ਹੈ।
ਪੰਜਵੀਂ ਜਮਾਤ ਵਿਚ ਪੜ੍ਹਨ ਵਾਲਾ ਬੱਚਾ ਜਮਾਤ ਦੂਜੀ ਦਾ ਕੋਰਸ ਵੀ ਪੂਰਾ ਨਹੀਂ ਕਰ ਪਾਉਂਦਾ। ਸਾਡੇ ਦੇਸ਼ ਦੇ ਧਰਮਗੁਰੂ ਅਤੇ ਸਮਾਜਸੇਵੀ ਵੀ ਬੱਚਿਆਂ 'ਤੇ ਹੋ ਰਹੇ ਜ਼ੁਲਮਾਂ ਨੂੰ ਲੈ ਕੇ ਚੁੱਪ ਹਨ। ਸਤਿਆਰਥੀ ਨੇ ਕਿਹਾ ਕਿ ਉਹਨਾਂ ਨੂੰ ਮਾਣ ਹੈ ਕਿ ਮੈਂ ਐਸਏਟੀਆਈ ਦਾ ਇੰਜੀਨੀਅਰ ਹਾਂ। ਬੀਤੇ 100 ਸਾਲਾਂ ਵਿਚ ਪਹਿਲੀ ਵਾਰ ਕਿਸੇ ਇੰਜੀਨੀਅਰ ਨੂੰ ਸ਼ਾਂਤੀ ਦਾ ਪੁਰਸਕਾਰ ਮਿਲਿਆ ਹੈ। ਇਕ ਹੁਨਰਮੰਦ ਇੰਜੀਨੀਅਰ ਕਿਸੇ ਵੀ ਮੁਸ਼ਕਲ ਦੇ ਹੱਲ ਲਈ ਤਰਕ ਦੇ ਆਧਾਰ 'ਤੇ ਉਸ ਦਾ ਹੱਲ ਲੱਭਣ ਦੀ ਕੋਸ਼ਿਸ਼ ਕਰਦਾ ਹੈ।
ਉਹ ਹਰ ਖੇਤਰ ਵਿਚ ਸਫਲ ਹੁੰਦਾ ਹੈ ਚਾਹੇ ਉਹ ਨੇਤਾ ਹੋਵੇ, ਵਪਾਰੀ ਹੋਵੇ ਜਾਂ ਫਿਰ ਕਿਸੇ ਹੋਰ ਖੇਤਰ ਵਿਚ ਕੰਮ ਕਰ ਰਿਹਾ ਹੋਵੇ। ਸਤਿਆਰਥੀ ਨੇ ਕਿਹਾ ਕਿ ਸਿਰਫ ਚੋਣਾਂ ਨਾਲ ਹੀ ਲੋਕਤੰਤਰ ਨਹੀਂ ਚਲਦਾ, ਸਗੋਂ ਲੋਕਤੰਤਰ ਦੇ ਨੈਤਿਕ ਮੁੱਲਾਂ ਦੀ ਰੱਖਿਆ ਨਾਲ ਲੋਕਤੰਤਰ ਚਲਦਾ ਹੈ। ਕੈਲਾਸ਼ ਸਤਿਆਰਥੀ ਦੇ ਜੀਵਨ ਅਤੇ ਬਚਪਨ ਬਚਾਓ ਅੰਦੋਲਨ ਨੂੰ ਲੈ ਕੇ ਹਾਲੀਵੁੱਡ ਨੇ 'ਦਿ ਪ੍ਰਾਈਸ ਆਫ਼ ਫਰੀ' ਨਾਮ ਦੀ ਇਕ ਦਸਤਾਵੇਜ਼ੀ ਫਿਲਮ ਬਣਾਈ ਹੈ। ਜਿਸ ਦੀ ਸਕ੍ਰੀਨਿੰਗ ਅਗਲੇ ਹਫਤੇ ਸਵਿਟਰਜ਼ਲੈਂਡ ਵਿਖੇ ਹੋਵੇਗੀ। ਉਹਨਾਂ ਕਿਹਾ ਕਿ ਬੱਚਿਆਂ ਦੇ ਜ਼ੁਲਮਾਂ 'ਤੇ ਚੁੱਪ ਰਹਿਣਾ ਸੱਭ ਤੋਂ ਵੱਡਾ ਅਪਰਾਧ ਹੈ।