ਮਾਂ ਦਿਵਸ ਵਾਲੇ ਦਿਨ ਜੋੜੇ ਬੱਚਿਆਂ ਨੂੰ ਦਿੱਤਾ ਜਨਮ
ਬੰਗਲੁਰੂ : 16 ਸਾਲ ਤਕ ਭੁੱਖ ਹੜਤਾਲ ਕਰਨ ਵਾਲੀ ਇਰੋਮ ਸ਼ਰਮਿਲਾ ਨੇ ਮਾਂ ਦਿਵਸ ਦੇ ਦਿਨ ਐਤਵਾਰ ਨੂੰ ਜੋੜੇ ਬੱਚਿਆਂ ਨੂੰ ਜਨਮ ਦਿੱਤਾ। ਇਰੋਮ ਮਣੀਪੁਰ 'ਚ ਹਥਿਆਰਬੰਦ ਫ਼ੌਜ ਵਿਸ਼ੇਸ਼ ਅਧਿਕਾਰ ਕਾਨੂੰਨ (ਅਫਸਪਾ) ਹਟਾਉਣ ਲਈ 16 ਸਾਲ ਤਕ ਭੁੱਖ ਹੜਤਾਲ ਕਰ ਚੁੱਕੀ ਹੈ। ਇਰੋਮ ਨੇ 48 ਸਾਲ ਦੀ ਉਮਰ 'ਚ ਜੋੜੇ ਬੱਚਿਆਂ ਨੂੰ ਜਨਮ ਦਿੱਤਾ ਹੈ। ਇਰੋਮ ਨੇ ਬੰਗਲੁਰੂ ਦੇ ਹਸਪਤਾਲ 'ਚ ਲੜਕੀਆਂ ਨੂੰ ਜਨਮ ਦਿੱਤਾ, ਜਿਨ੍ਹਾਂ ਦੇ ਨਾਂ ਨਿਕਸ ਸ਼ਾਖੀ ਅਤੇ ਆਟਮ ਤਾਰਾ ਰੱਖੇ ਗਏ ਹਨ।
Irom Sharmila
ਇਰੋਮ ਨੇ ਸਿਜੇਰੀਅਨ ਡਿਲੀਵਰੀ ਨਾਲ ਹਸਪਤਾਲ ਦੀ ਮੱਲੇਸ਼ਵਰਮ ਬਰਾਂਚ 'ਚ ਐਤਵਾਰ ਨੂੰ ਦੋ ਲੜਕੀਆਂ ਨੂੰ ਜਨਮ ਦਿੱਤਾ। ਡਾਕਟਰਾਂ ਮੁਤਾਬਕ ਉਹ ਇਰੋਮ ਸ਼ਰਮਿਲਾ ਦੇ ਆਪ੍ਰੇਸ਼ਨ ਦੀ ਅਗਲੇ ਹਫ਼ਤੇ ਦੀ ਪਲਾਨਿੰਗ ਕਰ ਰਹੇ ਸਨ ਪਰ ਸਨਿਚਰਵਾਰ ਰਾਤ ਨੂੰ ਤੇਜ਼ ਦਰਦ ਕਾਰਨ ਸ਼ਰਮਿਲਾ ਨੂੰ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ। ਇਰੋਮ ਨੂੰ ਮੰਗਲਵਾਰ ਜਾਂ ਬੁਧਵਾਰ ਤਕ ਛੁੱਟੀ ਮਿਲ ਜਾਵੇਗੀ।
Irom Sharmila
ਜ਼ਿਕਰਯੋਗ ਹੈ ਕਿ ਮਣੀਪੁਰ 'ਚ ਆਰਮਡ ਫੋਰਸਿਜ਼ ਐਕਟ (ਅਫਸਪਾ) ਹਟਾਉਣ ਦੀ ਮੰਗ ਨੂੰ ਲੈ ਕੇ 16 ਸਾਲਾਂ ਤੱਕ ਸੰਘਰਸ਼ ਕਰਨ ਵਾਲੀ ਇਰੋਮ ਸ਼ਰਮਿਲਾ ਨੇ 9 ਅਗਸਤ 2018 ਨੂੰ ਆਪਣੀ ਭੁੱਖ ਹੜਤਾਲ ਖ਼ਤਮ ਕੀਤੀ ਸੀ। ਸ਼ਰਮਿਲਾ ਨੇ ਨਵੰਬਰ 2000 'ਚ ਸੁਰੱਖਿਆ ਬਲਾਂ ਹੱਥੋਂ 10 ਨਾਗਰਿਕਾਂ ਦੀ ਮੌਤ ਮਗਰੋਂ ਅਫਸਪਾ ਹਟਾਉਣ ਦੀ ਮੰਗ ਕਰਦਿਆਂ ਭੁੱਖ ਹੜਤਾਲ ਸ਼ੁਰੂ ਕੀਤੀ ਸੀ। ਭੁੱਖ ਹੜਤਾਲ 'ਤੇ ਬੈਠਣ ਦੇ ਤਿੰਨ ਦਿਨਾਂ ਮਗਰੋਂ ਹੀ ਉਨ੍ਹਾਂ ਨੂੰ ਮਣੀਪੁਰ ਸਰਕਾਰ ਨੇ ਖ਼ੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ 'ਚ ਗ੍ਰਿਫਤਾਰ ਕਰ ਲਿਆ ਸੀ। ਅਦਾਲਤ ਨੇ ਉਨ੍ਹਾਂ ਨੂੰ ਕਿਹਾ ਕਿ ਜ਼ਮਾਨਤ ਬਾਂਡ ਕਰਨ ਮਗਰੋਂ ਉਹ ਜੋ ਚਾਹੇ ਕਰ ਸਕਦੀ ਹੈ।
