ਈਵੀਐਮ ਨੂੰ ਦਸਿਆ ਦੇਸ਼ ਤੇ ਲੋਕਤੰਤਰ ਲਈ ਘਾਤਕ
ਉੜੀਸਾ : ਇਲੈਕਟ੍ਰਾਨਿਕ ਵੋਟਿੰਗ ਮਸ਼ੀਨ (ਈਵੀਐਮ) ਸ਼ੁਰੂ ਤੋਂ ਹੀ ਵਿਵਾਦਾ 'ਚ ਰਹੀ ਹੈ। ਖ਼ਾਸ ਕਰ ਕੇ ਚੋਣ ਹਾਰਨ ਵਾਲੀਆਂ ਪਾਰਟੀਆਂ ਇਸ ਦੀ ਵਰਤੋਂ 'ਤੇ ਕਿੰਤੂ-ਪ੍ਰੰਤੂ ਕਰਦੀਆਂ ਰਹੀਆਂ ਹਨ। ਹੁਣ ਉਤਰਾਂਖੰਡ ਦੇ ਇਕ ਸ਼ਖਸ ਵਲੋਂ ਈਵੀਐਮ ਖਿਲਾਫ਼ ਵਿੱਢੀ ਅਨੋਖੀ ਮੁਹਿੰਮ ਚਰਚਾ 'ਚ ਹੈ। 41 ਸਾਲਾ ਇਸ ਵਿਅਕਤੀ ਨੇ ਈਵੀਐਮ 'ਤੇ ਪਾਬੰਦੀ ਦੀ ਮੰਗ ਨੂੰ ਲੈ ਕੇ ਦੇਸ਼ ਵਿਆਪੀ 'ਪੈਦਲ ਯਾਤਰਾ' ਦਾ ਪ੍ਰੋਗਰਾਮ ਵਿੱਢਿਆ ਹੋਇਆ ਹੈ।
Photo
ਉਤਰਾਂਖੰਡ ਦੇ ਰੂਦਰਪੁਰ ਦੇ ਵਾਸੀ ਉਂਕਾਰ ਸਿੰਘ ਢਿੱਲੋਂ ਅਪਣੀ ਪੈਦਲ ਯਾਤਰਾ ਦੇ ਪੜਾਅ ਦੌਰਾਨ ਐਤਵਾਰ ਸ਼ਾਮ ਨੂੰ ਬ੍ਰਹਮਾਪੁਰ ਵਿਖੇ ਪਹੁੰਚੇ। ਪੇਸ਼ੇ ਤੋਂ ਰਿਅਲ ਅਸਟੇਟ ਕਾਰੋਬਾਰੀ ਉਂਕਾਰ ਸਿੰਘ ਢਿੱਲੋਂ ਤਕਰੀਬਨ 4500 ਕਿਲੋਮੀਟਰ ਦੀ ਯਾਤਰਾ ਤੈਅ ਕਰ ਕੇ ਇਥੇ ਪਹੁੰਚੇ ਸਨ।
Photo
ਇਸ ਮੌਕੇ ਗੱਲਬਾਤ ਕਰਦਿਆਂ ਢਿੱਲੋਂ ਨੇ ਕਿਹਾ ਕਿ ਉਹ ਈਵੀਐਮ 'ਤੇ ਪਾਬੰਦੀ ਲਾਉਣ ਦੇ ਹੱਕ ਵਿਚ ਹਨ। ਉਨ੍ਹਾਂ ਕਿਹਾ ਕਿ ਸੱਤਾਧਾਰੀ ਧਿਰ ਵਲੋਂ ਏਵੀਐਮ ਨਾਲ ਛੇੜਛਾੜ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ ਜੋ ਕਿ ਦੇਸ਼ ਤੇ ਲੋਕਤੰਤਰ ਲਈ ਠੀਕ ਨਹੀਂ ਹੈ।
Photoਢਿੱਲੋਂ ਮੁਤਾਬਕ ਹੁਣ ਕਈ ਦੇਸ਼ਾਂ ਵਿਚ ਇਸ ਦੇ ਇਸਤੇਮਾਲ 'ਤੇ ਪਾਬੰਦੀ ਹੈ। ਇੱਥੋਂ ਤਕ ਕਿ ਕਈ ਵਿਕਸਤ ਦੇਸ਼ ਵੀ ਇਸ ਦੀ ਵਰਤੋਂ ਨਹੀਂ ਕਰ ਰਹੇ। ਉਨ੍ਹਾਂ ਦਸਿਆ ਕਿ ਉਸ ਨੇ ਪਿਛਲੇ ਸਾਲ 18 ਅਗੱਸਤ ਨੂੰ ਉਤਰਾਂਖੰਡ ਦੇ ਰੁਦਰਪੁਰ ਤੋਂ ਅਪਣੀ 'ਪੈਦਲ ਯਾਤਰਾ' ਸ਼ੁਰੂ ਕੀਤੀ ਸੀ। ਉਨ੍ਹਾਂ ਦਾ ਟੀਚਾ ਕਰੀਬ 6500 ਕਿਲੋਮੀਟਰ ਦੀ ਯਾਤਰਾ ਤੋਂ ਬਾਅਦ ਰਾਜਘਾਟ ਨਵੀਂ ਦਿੱਲੀ ਵਿਖੇ ਅਪਣੀ 'ਪੈਦਲ ਯਾਤਰਾ' ਨੂੰ ਖ਼ਤਮ ਕਰਨਾ ਹੈ।
Photoਕਾਬਲੇਗੌਰ ਹੈ ਕਿ ਇਲੈਕ੍ਰਾਨਿਕ ਮਸ਼ੀਨਾਂ ਦੀ ਵਰਤੋਂ ਨੂੰ ਲੈ ਕੇ ਦੇਸ਼ ਅੰਦਰਲੀਆਂ ਸਿਆਸੀ ਪਾਰਟੀਆਂ ਵਲੋਂ ਕਾਫ਼ੀ ਰੌਲਾ ਪਾਇਆ ਜਾਂਦਾ ਰਿਹਾ ਹੈ। ਖ਼ਾਸ ਕਰ ਕੇ ਕਾਂਗਰਸ ਪਾਰਟੀ ਵਲੋਂ ਇਸ ਵਿਰੁਧ ਵਿਸ਼ੇਸ਼ ਮੁਹਿੰਮ ਵਿੱਢੀ ਗਈ ਸੀ।
Photo
ਪਿਛਲੀਆਂ ਲੋਕ ਸਭਾ ਚੋਣਾਂ ਦੌਰਾਨ ਇਸ ਖਿਲਾਫ਼ ਰੋਹ ਪ੍ਰਚੰਡ ਰੁਖ ਅਖਤਿਆਰ ਕਰ ਗਿਆ ਸੀ। ਹਾਲਾਂਕਿ ਸਿਆਸੀ ਧਿਰਾਂ ਦਾ ਇਹ ਰੌਲਾ ਸਿਰਫ਼ ਹਾਰਨ ਦੀ ਸੂਰਤ ਵਿਚ ਹੀ ਹੁੰਦਾ ਹੈ, ਜਦਕਿ ਜਿੱਤਣ ਦੀ ਸੂਰਤ 'ਚ ਉਨ੍ਹਾਂ ਨੂੰ ਈਵੀਐਮ 'ਚ ਕੋਈ ਕਮੀ ਨਜ਼ਰ ਨਹੀਂ ਆਉਂਦੀ।
