ਮਾਂ-ਬੇਟੇ ਵਿਚਕਾਰ ਹੋਈ ਇਸ ਲੰਮੀ ਗੱਲਬਾਤ ਤੋਂ ਬਾਅਦ ਵੀ ਤੇਜਪ੍ਰਤਾਪ ਦੇ ਪਟਨਾ ਵਾਪਸ ਆਉਣ ਦੀ ਤਰੀਕ ਪਤਾ ਨਹੀਂ ਲਗ ਸਕੀ ਹੈ।
ਪਟਨਾ, ( ਭਾਸ਼ਾ ) : ਦੀਵਾਲੀ ਅਤੇ ਛਠ ਪੂਜਾ ਵਿਚ ਪਹਿਲੀ ਵਾਰ ਅਪਣੇ ਤੋਂ ਦੂਰ ਰਹਿ ਰਹੇ ਬੇਟੇ ਤੇਜਪ੍ਰਤਾਪ ਨੂੰ ਮਨਾਉਣ ਲਈ ਮਾਂ ਰਾਬੜੀ ਦੇਵੀ ਨੇ ਫੋਨ ਕਰ ਕੇ ਉਸ ਨੂੰ ਸਮਝਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ। ਦੋਹਾਂ ਵਿਚਕਾਰ ਲੰਮੀ ਗੱਲਬਤ ਹੋਈ। ਇਸ ਦੌਰਾਨ ਰਾਬੜੀ ਨੇ ਰੁੱਸੇ ਹੋਏ ਬੇਟੇ ਨੂੰ ਮਨਾਉਂਦੇ ਹੋਏ ਵਾਪਸ ਆਉਣ ਲਈ ਕਿਹਾ ਹੈ। ਮਾਂ-ਬੇਟੇ ਵਿਚਕਾਰ ਹੋਈ ਇਸ ਲੰਮੀ ਗੱਲਬਾਤ ਤੋਂ ਬਾਅਦ ਵੀ ਤੇਜਪ੍ਰਤਾਪ ਦੇ ਪਟਨਾ ਵਾਪਸ ਆਉਣ ਦੀ ਤਰੀਕ ਪਤਾ ਨਹੀਂ ਲਗ ਸਕੀ ਹੈ। ਪਤਨੀ ਐਸ਼ਵਰਿਆ ਤੋਂ ਤਲਾਕ ਦੀ ਅਰਜ਼ੀ ਕੋਰਟ ਵਿਚ ਦਾਖਲ ਕਰਨ ਤੋਂ ਬਾਅਦ
ਤੇਜਪ੍ਰਤਾਪ ਭਗਵਾਨ ਕ੍ਰਿਸ਼ਨ ਨਾਲ ਜੁੜੀਆਂ ਧਾਰਮਿਕ ਥਾਵਾਂ ਤੇ ਗਏ ਹੋਏ ਹਨ। ਇਸ ਤੋਂ ਪਹਿਲਾ ਗੋਵਰਧਨ ਪਰਿਕਰਮਾ ਤੋਂ ਬਾਅਦ ਉਨ੍ਹਾਂ ਦੀ ਸਿਹਤ ਖਰਾਬ ਹੋਣ ਦੀ ਗੱਲ ਵੀ ਸਾਹਮਣੇ ਆਈ ਸੀ। ਤੇਜਪ੍ਰਤਾਪ ਦੇ ਦੋਸਤਾਂ ਦਾ ਕਹਿਣਾ ਹੈ ਕਿ ਕੱਤਕ ਦੀ ਪੂਰਨਮਾਸੀ ਤੋਂ ਬਾਅਦ ਉਹ ਘਰ ਵਾਪਸ ਆ ਸਕਦੇ ਹਨ। ਸੂਤਰਾਂ ਮੁਤਾਬਕ ਮਥੂਰਾ-ਵ੍ਰਿੰਦਾਵਨ, ਬਰਸਾਨਾ ਦੇ ਨਾਲ ਹੀ ਉਨ੍ਹਾਂ ਨੇ ਅਪਣੀ ਯਾਤਰਾ ਦੌਰਾਨ ਹਰਿਆਣਾ ਵਿਚ ਪੈਣ ਵਾਲੇ ਬ੍ਰਿਜ ਮੰਦਰਾਂ ਦੇ ਵੀ ਦਰਸ਼ਨ ਕੀਤੇ। ਇਸ ਤੋਂ ਇਲਾਵਾ ਤੇਜਪ੍ਰਤਾਪ ਯਾਦਵ ਮਥੂਰਾ ਦੇ ਮੰਦਰਾਂ ਵਿਚ ਵੀ ਗਏ।
ਜ਼ਿਕਰਯੋਗ ਹੈ ਕਿ ਪਹਿਲੀ ਵਾਰ ਤੇਜ ਪ੍ਰਤਾਪ ਦੀਵਾਲੀ ਅਤੇ ਛਠ ਪੂਜਾ ਜਿਹੇ ਮੁਖ ਤਿਉਹਾਰਾਂ ਤੇ ਅਪਣੇ ਘਰ ਮੌਜੂਦ ਨਹੀਂ ਸਨ। ਹਾਲਾਂਕਿ ਬੀਤੇ ਦਿਨ ਹੀ ਬਰਸਾਨਾ ਦੇ ਰਾਧਾ ਰਾਣੀ ਮੰਦਰ ਵਿਖੇ ਵੀਹ ਮਿੰਟ ਬਿਤਾਉਣ ਤੋਂ ਬਾਅਦ ਉਹ ਉਥੋਂ ਨਿਕਲ ਗਏ। ਦੱਸ ਦਈਏ ਕਿ ਲਾਲੂ ਦੇ ਵੱਡੇ ਬੇਟੇ ਤੇਜਪ੍ਰਤਾਪ ਯਾਦਵ ਨੇ ਅਪਣੀ ਪਤਨੀ ਐਸ਼ਵਰਿਆ 'ਤੇ ਕਈ ਗੰਭੀਰ ਦੋਸ਼ ਲਗਾਏ ਹਨ ਅਤੇ ਵਿਆਹ ਤੋਂ
6 ਮਹੀਨੇ ਬਾਅਦ ਹੀ ਕੋਰਟ ਵਿਚ ਤਲਾਕ ਦੀ ਅਰਜੀ ਦੇ ਦਿਤੀ ਹੈ। ਉਨ੍ਹਾਂ ਇਸ ਮਾਮਲੇ ਸਬੰਧੀ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਉਹ ਘੁਟ-ਘੁਟ ਕੇ ਜ਼ਿੰਦਗੀ ਬਿਤਾ ਰਹੇ ਹਨ। ਅਪਣੇ ਵਿਆਹ ਬਾਰੇ ਉਨ੍ਹਾਂ ਕਿਹਾ ਸੀ ਕਿ ਵਿਆਹ ਕਰਵਾ ਕੇ ਉਨ੍ਹਾਂ ਨੂੰ ਫਸਾਇਆ ਗਿਆ ਹੈ। ਉਨ੍ਹਾਂ ਹੋਰ ਕਿਹਾ ਕਿ ਜੇਕਰ ਪ੍ਰਧਾਨ ਮੰਤਰੀ ਵੀ ਆ ਜਾਣ ਤਾਂ ਵੀ ਉਹ ਅਪਣੇ ਫੈਸਲੇ ਨੂੰ ਨਹੀਂ ਬਦਲਣਗੇ।