ਕਾਂਗਰਸ ਦੇ ਕੋਆਰਡੀਨੇਸ਼ਨ ਸੈਂਟਰ ਦੇ ਮੈਂਬਰ ਅਤੇ ਰਾਹੁਲ ਗਾਂਧੀ ਦੇ ਕਰੀਬੀ ਰਹੇ ਆਸ਼ੀਸ਼ ਕੁਲਕਰਨੀ ਨੇ ਪਾਰਟੀ ਛੱਡ ਦਿਤੀ ਹੈ।
ਨਵੀਂ ਦਿੱਲੀ, 18 ਅਗੱਸਤ : ਕਾਂਗਰਸ ਦੇ ਕੋਆਰਡੀਨੇਸ਼ਨ ਸੈਂਟਰ ਦੇ ਮੈਂਬਰ ਅਤੇ ਰਾਹੁਲ ਗਾਂਧੀ ਦੇ ਕਰੀਬੀ ਰਹੇ ਆਸ਼ੀਸ਼ ਕੁਲਕਰਨੀ ਨੇ ਪਾਰਟੀ ਛੱਡ ਦਿਤੀ ਹੈ। ਪਾਰਟੀ ਤੋਂ ਅਸਤੀਫ਼ਾ ਦੇਣ ਦੇ ਨਾਲ ਹੀ ਉਨ੍ਹਾਂ ਪ੍ਰਿਯੰਕਾ ਗਾਂਧੀ ਨੂੰ ਕਾਂਗਰਸ ਦਾ ਕਾਰਜਕਾਰੀ ਪ੍ਰਧਾਨ ਬਣਾਏ ਜਾਣ ਦੀ ਚਰਚਾ ਬਾਰੇ ਵੀ ਸਵਾਲ ਖੜੇ ਕੀਤੇ ਹਨ। ਆਸ਼ੀਸ਼ ਨੇ ਅਸਤੀਫ਼ਾ ਪੱਤਰ ਵਿਚ ਕਿਹਾ ਹੈ ਕਿ ਪ੍ਰਿਯੰਕਾ ਨੂੰ ਪ੍ਰਧਾਨ ਬਣਾਉਣ ਦੀਆਂ ਅਫ਼ਵਾਹਾਂ ਪਾਰਟੀ ਦੇ ਹੀ ਕੁੱਝ ਵੱਡੇ ਨੇਤਾ ਫੈਲਾ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਹੁਣ ਅਜਿਹੇ ਲੋਕ 2014 ਦੀ ਹਾਰ ਦਾ ਸਾਰਾ ਦੋਸ਼ ਰਾਹੁਲ ਗਾਂਧੀ 'ਤੇ ਮੜ੍ਹਨਾ ਚਾਹੁੰਦੇ ਹਨ। ਉਨ੍ਹਾਂ ਕਾਂਗਰਸ ਪਾਰਟੀ ਵਿਚ ਵੰਸ਼ਵਾਦ ਵਧਣ ਦੇ ਵੀ ਦੋਸ਼ ਲਾਏ। ਕੁਲਕਰਨੀ ਨੇ ਕਿਹਾ ਕਿ ਪਾਰਟੀ ਮੱਧਮਾਰਗੀ ਵਿਚਾਰਧਾਰਾ ਤੋਂ ਭਟਕ ਗਈ ਹੈ। ਕਾਂਗਰਸ ਹੁਣ ਕਸ਼ਮੀਰ ਮੁੱਦੇ 'ਤੇ ਵੱਖਵਾਦੀਆਂ ਨਾਲ ਖੜੀ ਦਿਸ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਜੇਐਨਯੂ ਮਾਮਲੇ ਵਿਚ ਕਾਂਗਰਸ ਇਕ ਤਰ੍ਹਾਂ ਨਾਲ ਅਲਟਰਾ ਲੈਫ਼ਟ ਨਾਲ ਹਮਦਰਦੀ ਵਿਖਾਉਂਦੀ ਨਜ਼ਰ ਆਈ। ਆਸ਼ੀਸ਼ ਨੇ ਲਿਖਿਆ ਕਿ ਪਾਰਟੀ ਨੇ ਜ਼ਮੀਨੀ ਹਕੀਕਤ ਤੋਂ ਦੂਰੀ ਬਣਾ ਲਈ ਹੈ ਅਤੇ ਮੌਜੂਦਾ ਸਥਿਤੀਆਂ ਨੂੰ ਸਮਝਣ ਅਤੇ ਕਾਰਕੁਨਾਂ ਨਾਲ ਜੁੜਨ ਵਿਚ ਅਸਫ਼ਲ ਸਾਬਤ ਹੋ ਰਹੀ ਹੈ। (ਏਜੰਸੀ)