CJI Gavai :ਕਿਹਾ, ਛੁੱਟੀਆਂ ’ਚ ਕੰਮ ਵਕੀਲ ਨਹੀਂ ਕਰਨਾ ਚਾਹੁੰਦੇ ਤੇ ਬਾਅਦ ’ਚ ਲੰਬਿਤ ਮਾਮਲਿਆਂ ਲਈ ਦੋਸ਼ੀ ਸਾਨੂੰ ਬਣਾਇਆ ਜਾਂਦਾ ਹੈ
Chief Justice Gavai: ਭਾਰਤ ਦੇ ਚੀਫ਼ ਜਸਟਿਸ ਬੀ.ਆਰ. ਗਵਈ ਨੇ ਬੁੱਧਵਾਰ ਨੂੰ ਕਿਹਾ ਕਿ ਵਕੀਲ ਛੁੱਟੀਆਂ ’ਤੇ ਕੰਮ ਨਹੀਂ ਕਰਨਾ ਚਾਹੁੰਦੇ ਪਰ ਲੰਬਿਤ ਮਾਮਲਿਆਂ ਲਈ ਨਿਆਂਪਾਲਿਕਾ ਨੂੰ ਜ਼ਿੰਮੇਵਾਰ ਠਹਿਰਾਇਆ ਜਾਂਦਾ ਹੈ। ਚੀਫ਼ ਜਸਟਿਸ ਬੀ.ਆਰ. ਗਵਈ ਅਤੇ ਜਸਟਿਸ ਆਗਸਟੀਨ ਜਾਰਜ ਕ੍ਰਾਈਸਟ ਦਾ ਬੈਂਚ ਉਸ ਸਮੇਂ ਨਾਰਾਜ਼ ਹੋ ਗਿਆ ਜਦੋਂ ਇੱਕ ਵਕੀਲ ਨੇ ਪਟੀਸ਼ਨ ਨੂੰ ਗਰਮੀਆਂ ਦੀਆਂ ਛੁੱਟੀਆਂ ਤੋਂ ਬਾਅਦ ਸੂਚੀਬੱਧ ਕਰਨ ਦੀ ਅਪੀਲ ਕੀਤੀ। ਚੀਫ਼ ਜਸਟਿਸ ਨੇ ਕਿਹਾ, ‘‘ਪਹਿਲੇ ਪੰਜ ਜੱਜ ਛੁੱਟੀਆਂ ਦੌਰਾਨ ਬੈਠ ਕੇ ਕੰਮ ਕਰ ਰਹੇ ਹਨ, ਫਿਰ ਵੀ ਸਾਨੂੰ ਲੰਬਿਤ ਮਾਮਲਿਆਂ ਲਈ ਜ਼ਿੰਮੇਵਾਰ ਠਹਿਰਾਇਆ ਜਾਂਦਾ ਹੈ। ਦਰਅਸਲ, ਕੁਝ ਵਕੀਲ ਹਨ ਜੋ ਛੁੱਟੀਆਂ ਦੌਰਾਨ ਕੰਮ ਕਰਨ ਲਈ ਤਿਆਰ ਨਹੀਂ ਹੁੰਦੇ।’’
ਸੁਪਰੀਮ ਕੋਰਟ ਨੇ ਹਾਲ ਹੀ ਵਿੱਚ 26 ਮਈ ਤੋਂ 13 ਜੁਲਾਈ ਤੱਕ ਆਉਣ ਵਾਲੀਆਂ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਕੰਮ ਕਰਨ ਵਾਲੇ ਬੈਂਚਾਂ ਬਾਰੇ ਇੱਕ ਨੋਟੀਫ਼ਿਕੇਸ਼ਨ ਜਾਰੀ ਕੀਤਾ ਸੀ। ਇਨ੍ਹਾਂ ਨੂੰ ‘ਅੰਸ਼ਕ ਅਦਾਲਤੀ ਕੰਮਕਾਜੀ ਦਿਨ’ ਕਿਹਾ ਗਿਆ ਹੈ। ਇਨ੍ਹਾਂ ਅੰਸ਼ਕ ਅਦਾਲਤੀ ਕੰਮਕਾਜੀ ਦਿਨਾਂ ਦੌਰਾਨ, ਦੋ ਤੋਂ ਪੰਜ ਤੱਕ ਦੇ ਛੁੱਟੀਆਂ ਵਾਲੇ ਬੈਂਚ ਬੈਠਣਗੇ ਅਤੇ ਚੀਫ਼ ਜਸਟਿਸ ਸਮੇਤ ਪੰਜ ਚੋਟੀ ਦੇ ਜੱਜ ਵੀ ਇਸ ਸਮੇਂ ਦੌਰਾਨ ਕਾਰਵਾਈ ਦਾ ਸੰਚਾਲਨ ਕਰਨਗੇ। ਪੁਰਾਣੀ ਪ੍ਰਥਾ ਅਨੁਸਾਰ, ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਸਿਰਫ਼ ਦੋ ਛੁੱਟੀਆਂ ਵਾਲੇ ਬੈਂਚ ਹੁੰਦੇ ਸਨ ਅਤੇ ਸੀਨੀਅਰ ਜੱਜ ਕਾਰਵਾਈ ਵਿੱਚ ਹਿੱਸਾ ਨਹੀਂ ਲੈਂਦੇ ਸਨ। ਇਸ ਨੋਟੀਫ਼ਿਕੇਸ਼ਨ ਵਿੱਚ ਬੈਂਚਾਂ ਨੂੰ ਜੱਜਾਂ ਦੀ ਹਫ਼ਤਾਵਾਰੀ ਵੰਡ ਦੀ ਰੂਪਰੇਖਾ ਦਿੱਤੀ ਗਈ ਹੈ।
ਇਸ ਅਨੁਸਾਰ, 26 ਮਈ ਤੋਂ 1 ਜੂਨ ਤੱਕ ਚੀਫ਼ ਜਸਟਿਸ, ਜਸਟਿਸ ਸੂਰਿਆਕਾਂਤ, ਜਸਟਿਸ ਵਿਕਰਮ ਨਾਥ, ਜਸਟਿਸ ਜੇਕੇ ਮਹੇਸ਼ਵਰੀ ਅਤੇ ਜਸਟਿਸ ਬੀਵੀ ਨਾਗਰਥਨਾ ਕ੍ਰਮਵਾਰ ਪੰਜ ਬੈਂਚਾਂ ਦੀ ਅਗਵਾਈ ਕਰਨਗੇ। ਇਸ ਸਮੇਂ ਦੌਰਾਨ, ਸੁਪਰੀਮ ਕੋਰਟ ਦੀ ਰਜਿਸਟਰੀ ਸਾਰੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਲਈ ਸਵੇਰੇ 10 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਖੁਲ੍ਹੀ ਰਹੇਗੀ। ਰਜਿਸਟਰੀ ਸਾਰੇ ਸਨਿਚਰਵਾਰ (12 ਜੁਲਾਈ ਨੂੰ ਛੱਡ ਕੇ), ਐਤਵਾਰ ਅਤੇ ਜਨਤਕ ਛੁੱਟੀਆਂ ਵਾਲੇ ਦਿਨ ਬੰਦ ਰਹੇਗੀ।
(For more news apart from Superem court Latest News, stay tuned to Rozana Spokesman)
