ਚਰਚਾ ਦਾ ਵਿਸ਼ਾ ਬਣੀ 10 ਸਾਲਾ ਗਰਭਵਤੀ ਲੜਕੀ ਨੇ 17 ਅਗਸਤ ਦਿਨ ਵੀਰਵਾਰ ਨੂੰ ਇੱਕ ਬੱਚੀ ਨੂੰ ਜਨਮ ਦਿੱਤਾ
ਪਿਛਲੇ ਸਮੇਂ ਤੋਂ ਚਰਚਾ ਦਾ ਵਿਸ਼ਾ ਬਣੀ 10 ਸਾਲਾ ਗਰਭਵਤੀ ਲੜਕੀ ਨੇ 17 ਅਗਸਤ ਦਿਨ ਵੀਰਵਾਰ ਨੂੰ ਇੱਕ ਬੱਚੀ ਨੂੰ ਜਨਮ ਦਿੱਤਾ। ਇਸ 10 ਸਾਲਾ ਬੱਚੀ ਦੀ ਡਿਲੀਵਰੀ ਚੰਡੀਗੜ੍ਹ ਦੇ 32 ਸੈਕਟਰ ਹਸਪਤਾਲ ਵਿੱਚ ਕਰਵਾਈ ਗਈ। 10 ਸਾਲਾ ਬੱਚੀ ਦੇ ਮਾਂ ਬਣਨ ਦੀ ਖ਼ਬਰ ਸੁਣ ਕੇ ਸਾਰਾ ਦੇਸ਼ ਦੰਗ ਰਹਿ ਗਿਆ। ਇਸ ਲੜਕੀ ਦੀ ਜ਼ਿੰਦਗੀ ਬਰਬਾਦ ਕਰਨ ਵਾਲਾ ਹਵਸੀ ਦਰਿੰਦਾ ਕੋਈ ਹੋਰ ਨਹੀਂ ਇਸ ਬੱਚੀ ਦਾ ਆਪਣਾ ਮਾਮਾ ਸੀ। ਨਵਜੰਮੀ ਬੱਚੀ ਨੂੰ ਉਸਦੀ ਮਾਂ ਕੋਲੋਂ ਵੱਖ ਕਰ ਦਿੱਤਾ ਗਿਆ ਹੈ ਅਤੇ ਉਸ ਲਈ ਦੁੱਧ ਮਿਲਕ ਬੈਂਕ ਤੋਂ ਆਵੇਗਾ।
10 ਸਾਲਾ ਬੱਚੀ ਨੂੰ ਇਹ ਨਹੀਂ ਪਤਾ ਕਿ ਉਸਨੇ ਇੱਕ ਬੱਚੀ ਨੂੰ ਜਨਮ ਦਿੱਤਾ, ਬਲਕਿ ਉਸਨੂੰ ਪੱਥਰੀ ਦਾ ਅਪ੍ਰੇਸ਼ਨ ਕੀਤੇ ਜਾਣ ਦੀ ਗੱਲ ਕਹੀ ਗਈ ਹੈ। ਬੱਚੀ ਦੇ ਮਾਪਿਆਂ ਨੇ ਨਵਜੰਮੀ ਬੱਚੀ ਦੀ ਸ਼ਕਲ ਦੇਖਣ ਤੋਂ ਵੀ ਇਨਕਾਰ ਕਰ ਦਿੱਤਾ ਹੈ ਅਤੇ ਹਸਪਤਾਲ ਪ੍ਰਸ਼ਾਸਨ ਨੇ ਨਵਜੰਮੀ ਬੱਚੀ ਦੀ ਦੇਖਭਾਲ ਲਈ ਚਾਈਲਡ ਵੈਲਫੇਅਰ ਪ੍ਰੋਟੈਕਸ਼ਨ ਨੂੰ ਚਿੱਠੀ ਲਿਖੀ ਹੈ। ਨਾਬਾਲਿਗ ਮਾਂ ਨੂੰ ਕੁਝ ਦਿਨਾਂ ਬਾਅਦ ਹਸਪਤਾਲ ਤੋਂ ਘਰ ਭੇਜ ਦਿੱਤਾ ਜਾਵੇਗਾ ਪਰ ਨਵਜੰਮੀ ਬੱਚੀ ਦੇ ਭਵਿੱਖ ਬਾਰੇ ਹਾਲੇ ਤੱਕ ਕੋਈ ਖ਼ਬਰ ਨਹੀਂ।
