ਹਾਲ ਹੀ ਵਿਚ ਇਕ ਨੌਜਵਾਨ ਨੇ ਓਲਾ ਕੈਬ ਦੀ ਬੁਕਿੰਗ ਨੂੰ ਸਿਰਫ਼ ਇਸ ਲਈ ਕੈਂਸਲ ਕਰ ਦਿਤਾ ਕਿਉਂਕਿ ਉਸ ਓਲਾ ਕੈਬ ਦਾ ਡਰਾਈਵਰ ਮੁਸਲਮਾਨ ਸੀ।
ਨਵੀਂ ਦਿੱਲੀ : ਹਾਲ ਹੀ ਵਿਚ ਇਕ ਨੌਜਵਾਨ ਨੇ ਓਲਾ ਕੈਬ ਦੀ ਬੁਕਿੰਗ ਨੂੰ ਸਿਰਫ਼ ਇਸ ਲਈ ਕੈਂਸਲ ਕਰ ਦਿਤਾ ਕਿਉਂਕਿ ਉਸ ਓਲਾ ਕੈਬ ਦਾ ਡਰਾਈਵਰ ਮੁਸਲਮਾਨ ਸੀ। ਉਹ ਇਥੇ ਹੀ ਨਹੀਂ ਰੁਕਿਆ ਉਸ ਨੇ ਇਸ ਘਟਨਾ ਨੂੰ ਪੋਸਟ ਵੀ ਕਰ ਦਿਤਾ, ਫਿਰ ਟਵਿਟਰ 'ਤੇ ਤਾਂ ਇਸ ਮੁੱਦੇ 'ਤੇ ਬਹਿਸ ਹੀ ਛਿੜ ਗਈ। ਦਰਅਸਲ ਮੁਸਲਮਾਨ ਡਰਾਈਵਰ ਹੋਣ ਦੀ ਵਜ੍ਹਾ ਨਾਲ ਕੈਬ ਨੂੰ ਕੈਂਸਲ ਕਰਨ ਵਾਲੇ ਸ਼ਖ਼ਸ ਦਾ ਨਾਮ ਹੈ ਅਭਿਸ਼ੇਕ ਮਿਸ਼ਰਾ। ਅਭਿਸ਼ੇਕ ਮਿਸ਼ਰਾ ਖ਼ੁਦ ਨੂੰ ਵਿਸ਼ਵ ਹਿੰਦੂ ਪ੍ਰੀਸ਼ਦ ਨਾਲ ਜੁੜਿਆ ਹੋਇਆ ਦਸਦੇ ਹਨ। ਉਨ੍ਹਾਂ ਦੇ ਟਵਿਟਰ 'ਤੇ ਕਰੀਬ 14 ਹਜ਼ਾਰ ਫ਼ਾਲੋਅਰ ਹਨ, ਜਿਨ੍ਹਾਂ ਵਿਚ ਰੱਖਿਆ ਮੰਤਰੀ ਨਿਰਮਲਾ ਸੀਤਾਰਮਣ, ਧਰਮਿੰਦਰ ਪ੍ਰਧਾਨ ਅਤੇ ਸਭਿਆਚਾਰ ਮੰਤਰੀ ਮਹੇਸ਼ ਸ਼ਰਮਾ ਵਰਗੇ ਕਈ ਵੱਡੇ ਨਾਮ ਵੀ ਸ਼ਾਮਲ ਹਨ।
ਦਰਅਸਲ ਅਭਿਸ਼ੇਕ ਮਿਸ਼ਰਾ ਨੇ 20 ਅਪ੍ਰੈਲ ਨੂੰ ਓਲਾ ਕੈਬ ਕੀਤੀ ਪਰ ਉਸ ਦਾ ਡਰਾਈਵਰ ਮੁਸਲਮਾਨ ਹੋਣ ਦੀ ਵਜ੍ਹਾ ਨਾਲ ਉਨ੍ਹਾਂ ਨੇ ਕੈਂਸਲ ਕਰ ਦਿਤਾ ਅਤੇ ਟਵਿਟਰ 'ਤੇ ਇਸ ਦਾ ਸਕਰੀਨਸ਼ਾਟ ਲੈ ਕੇ ਪੋਸਟ ਕਰ ਦਿਤਾ। ਅਪਣੀ ਪੋਸਟ ਵਿਚ ਉਨ੍ਹਾਂ ਲਿਖਿਆ ਕਿ ਮੈਂ ਓਲਾ ਕੈਬ ਕੈਂਸਲ ਕਰ ਦਿਤੀ ਕਿਉਂਕਿ ਮੈਂ ਜਿਹਾਦੀ ਨੂੰ ਅਪਣਾ ਪੈਸਾ ਨਹੀਂ ਦੇਣਾ ਚਾਹੁੰਦਾ। ਅਭਿਸ਼ੇਕ ਨੇ ਜੋ ਸਕਰੀਨਸ਼ਾਟ ਪੋਸਟ ਕੀਤਾ ਹੈ, ਉਸ ਵਿਚ ਡਰਾਈਵਰ ਦਾ ਨਾਮ ਮਸੂਦ ਆਲਮ ਵਿਖਾਈ ਦੇ ਰਿਹਾ ਹੈ।
ਹਾਲਾਂਕਿ ਅਭਿਸ਼ੇਕ ਮਿਸ਼ਰਾ ਦੇ ਟਵੀਟ ਦੇ ਜਵਾਬ ਵਿਚ ਓਲਾ ਕੈਬ ਨੇ ਕਿਹਾ ਕਿ ਓਲਾ ਵੀ ਬਿਲਕੁਲ ਸਾਡੇ ਦੇਸ਼ ਦੀ ਤਰ੍ਹਾਂ ਹੀ ਇਕ ਧਰਮ ਨਿਰਪੱਖ ਹੈ। ਅਸੀਂ ਜਾਤੀ, ਧਰਮ, ਲਿੰਗ ਜਾਂ ਪੰਥ ਦੇ ਆਧਾਰ 'ਤੇ ਅਪਣੇ ਡਰਾਈਵਰ, ਕਰਮਚਾਰੀ ਅਤੇ ਗਾਹਕਾਂ ਨਾਲ ਭੇਦਭਾਵ ਨਹੀਂ ਕਰਦੇ। ਅਸੀਂ ਅਪਣੇ ਸਾਰੇ ਗਾਹਕਾਂ, ਡਰਾਈਵਰਾਂ ਅਤੇ ਭਾਈਵਾਲਾਂ ਨੂੰ ਉਤਸ਼ਾਹਿਤ ਕਰਦੇ ਹਾਂ ਕਿ ਇਕ ਦੂਜੇ ਦਾ ਹਰ ਸਮੇਂ ਸਨਮਾਨ ਕਰੋ ਅਤੇ ਸਹੀ ਢੰਗ ਨਾਲ ਪੇਸ਼ ਆਉ।
ਅਭਿਸ਼ੇਕ ਦਾ ਇਹ ਟਵੀਟ ਇੰਨਾ ਵਾਇਰਲ ਹੋ ਗਿਆ ਕਿ ਇਹ ਬਹਿਸ ਦਾ ਮੁੱਦਾ ਹੀ ਬਣ ਗਿਆ। ਟਵਿਟਰ 'ਤੇ ਕਈਆਂ ਨੇ ਓਲਾ ਕੈਬ ਨਾਲ ਅਭਿਸ਼ੇਕ ਮਿਸ਼ਰਾ ਨੂੰ ਗੱਲ ਕਰਨ ਲਈ ਕਿਹਾ। ਕਈਆਂ ਨੇ ਉਤਰ ਪ੍ਰਦੇਸ਼ ਸਰਕਾਰ ਨਾਲ ਉਸ ਦੇ ਕਥਿਤ ਲਿੰਕ ਦੀ ਗੱਲ ਕਹੀ ਅਤੇ ਯੂਪੀ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਅਨਾਥ ਨਾਲ ਉਨ੍ਹਾਂ ਵਿਰੁਧ ਕਾਰਵਾਈ ਕਰਨ ਲਈ ਕਿਹਾ।
ਅਭਿਸ਼ੇਕ ਮਿਸ਼ਰਾ ਦੇ ਫ਼ੇਸਬੁਕ ਪ੍ਰੋਫ਼ਾਈਲ ਤੋਂ ਪਤਾ ਚਲਦਾ ਹੈ ਕਿ ਉਹ ਅਯੁਧਿਆ ਦੇ ਰਹਿਣ ਵਾਲੇ ਹਨ ਅਤੇ ਲਖਨਊ ਵਿਚ ਆਈਟੀ ਪ੍ਰੋਫ਼ੈਸ਼ਨਲ ਦੇ ਤੌਰ 'ਤੇ ਕੰਮ ਕਰਦੇ ਹਨ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਹ ਵਿਸ਼ਵ ਹਿੰਦੂ ਪ੍ਰੀਸ਼ਦ ਅਤੇ ਬਜਰੰਗ ਦਲ ਦੇ ਸਰਗਰਮ ਮੈਂਬਰ ਹਨ। ਦਸ ਦਈਏ ਕਿ ਇਹ ਦੋਵੇਂ ਰਾਸ਼ਟਰੀ ਸਵੈ ਸੇਵਕ ਸੰਘ ਨਾਲ ਜੁੜੇ ਸੰਗਠਨ ਹਨ। ਨਾਲ ਹੀ ਉਹ ਵੀਐਚਪੀ ਦੇ ਆਈਟੀ ਪ੍ਰੀਸ਼ਦ ਲਈ ਵੀ ਕੰਮ ਕਰਦੇ ਹਨ।
ਜਿਵੇਂ - ਜਿਵੇਂ ਪ੍ਰਤੀਕਿਰਿਆਵਾਂ ਆਉਣੀਆਂ ਸ਼ੁਰੂ ਹੋਈਆਂ, ਅਭਿਸ਼ੇਕ ਨੇ ਇਕ ਹੋਰ ਪੋਸਟ ਕੀਤੀ ਅਤੇ ਲਿਖਿਆ ਕਿ ਲੋਕਾਂ ਨੇ ਮੇਰੇ 'ਤੇ ਹਮਲੇ ਸ਼ੁਰੂ ਕਰ ਦਿਤੇ ਹਨ। ਕੀ ਮੈਨੂੰ ਚੁਣਨ ਦਾ ਕੋਈ ਅਧਿਕਾਰ ਨਹੀਂ ਹੈ ? ਜੇਕਰ ਉਹ ਕੈਬ 'ਤੇ ਹਨੂਮਾਨ ਜੀ ਪੋਸਟਰ ਵਿਰੁਧ ਮੁਹਿੰਮ ਚਲਾ ਸਕਦੇ ਹਨ, ਕਠੂਆ 'ਚ ਹਿੰਦੂਆਂ ਅਤੇ ਹਿੰਦੂਆਂ ਦੇ ਦੇਵਤਾ ਨੂੰ ਬਦਨਾਮ ਕਰ ਸਕਦੇ ਹਨ ਤਾਂ ਉਨ੍ਹਾਂ ਨੂੰ ਜਵਾਬ ਲਈ ਵੀ ਤਿਆਰ ਰਹਿਣਾ ਚਾਹੀਦਾ ਹੈ।