ਸਕੂਲਾਂ ਨੂੰ ਚਿੱਠੀਆਂ ਲਿਖ ਦੇ ਦਿੱਤੀ ਚਿਤਾਵਨੀ
ਭੋਪਾਲ - ਕ੍ਰਿਸਮਿਸ ਦੀ ਪੂਰਵ ਸੰਧਿਆ 'ਤੇ, ਸੱਜੇ ਪੱਖੀ ਸੰਗਠਨ ਵਿਸ਼ਵ ਹਿੰਦੂ ਪ੍ਰੀਸ਼ਦ (ਵੀ.ਐੱਚ.ਪੀ.) ਦੀ ਮੱਧ ਪ੍ਰਦੇਸ਼ ਇਕਾਈ ਨੇ ਸਕੂਲਾਂ ਦੇ ਪ੍ਰਿੰਸੀਪਲਾਂ ਨੂੰ ਪੱਤਰ ਲਿਖ ਕੇ ਜਸ਼ਨਾਂ ਦੌਰਾਨ ਹਿੰਦੂ ਬੱਚਿਆਂ ਨੂੰ ਸੈਂਟਾ ਕਲਾਜ਼ ਨਾ ਬਣਾਉਣ ਲਈ ਕਿਹਾ ਹੈ।
ਜਾਣਕਾਰੀ ਮਿਲੀ ਹੈ ਕਿ ਚਿੱਠੀਆਂ ਭੋਪਾਲ ਦੇ ਸਾਰੇ ਸਕੂਲਾਂ ਦੇ ਪ੍ਰਿੰਸੀਪਲਾਂ ਨੂੰ ਲਿਖੀਆਂ ਗਈਆਂ ਹਨ, ਇਹ ਕਹਿੰਦੇ ਹੋਏ ਕਿ ਸਕੂਲ ਵਿੱਚ ਕ੍ਰਿਸਮਸ ਦੇ ਜਸ਼ਨਾਂ ਵਿੱਚ ਵਿਦਿਆਰਥੀਆਂ ਨੂੰ ਸੈਂਟਾ ਕਲਾਜ਼ ਬਣਾਇਆ ਜਾ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਕ੍ਰਿਸਮਸ ਟ੍ਰੀ ਲਿਆਉਣ ਲਈ ਵੀ ਕਿਹਾ ਜਾ ਰਿਹਾ ਹੈ।
ਪਰਿਸ਼ਦ ਦੇ ਪੱਤਰ ਵਿੱਚ ਲਿਖਿਆ ਗਿਆ ਹੈ, "ਇਹ ਸਾਡੀ ਹਿੰਦੂ ਸੰਸਕ੍ਰਿਤੀ 'ਤੇ ਹਮਲਾ ਹੈ, ਇਹ ਹਿੰਦੂ ਬੱਚਿਆਂ ਨੂੰ ਈਸਾਈ ਧਰਮ ਵੱਲ ਪ੍ਰੇਰਿਤ ਕਰਨ ਦੀ ਸਾਜ਼ਿਸ਼ ਹੈ।"
ਵੀਐਚਪੀ ਨੇ ਗ਼ੈਰ-ਮਿਸ਼ਨਰੀ ਸਕੂਲਾਂ ਵਿੱਚ ਕ੍ਰਿਸਮਿਸ ਮਨਾਉਣ 'ਤੇ ਸਵਾਲ ਚੁੱਕਦੇ ਹੋਏ ਕਿਹਾ ਕਿ ਕੀ ਸਕੂਲ ਹਿੰਦੂ ਬੱਚਿਆਂ ਨੂੰ ਸੈਂਟਾ ਬਣਾ ਕੇ ਈਸਾਈ ਧਰਮ ਦਾ ਪ੍ਰਚਾਰ ਕਰ ਰਹੇ ਹਨ?
ਪੱਤਰ 'ਚ ਕਿਹਾ ਗਿਆ ਹੈ, "ਸਾਡੇ ਹਿੰਦੂ ਬੱਚਿਆਂ ਨੂੰ ਰਾਮ ਬਣਨਾ ਚਾਹੀਦਾ ਹੈ, ਕ੍ਰਿਸ਼ਨ ਬਣਨਾ ਚਾਹੀਦਾ ਹੈ, ਬੁੱਧ ਬਣਨਾ ਚਾਹੀਦਾ ਹੈ, ਗੌਤਮ ਬਣਨਾ ਚਾਹੀਦਾ ਹੈ, ਮਹਾਂਵੀਰ ਬਣਨਾ ਚਾਹੀਦਾ ਹੈ, ਇਹ ਸਭ ਬਣਨਾ ਚਾਹੀਦਾ ਹੈ, ਕ੍ਰਾਂਤੀਕਾਰੀ ਬਣਨਾ ਚਾਹੀਦਾ ਹੈ ਅਤੇ ਮਹਾਨ ਇਨਸਾਨ ਬਣਨਾ ਚਾਹੀਦਾ ਹੈ, ਪਰ ਸੈਂਟਾ ਨਹੀਂ ਬਣਨਾ ਚਾਹੀਦਾ।"
ਇਹ ਚਿਤਾਵਨੀ ਵੀ ਦਿੱਤੀ ਗਈ ਹੈ ਕਿ ਜੇਕਰ ਮਾਪਿਆਂ ਦੀ ਇਜਾਜ਼ਤ ਤੋਂ ਬਿਨਾਂ ਵਿਦਿਆਰਥੀਆਂ ਨੂੰ ਸੈਂਟਾ ਕਲਾਜ਼ ਬਣਾਇਆ ਗਿਆ ਤਾਂ ਵਿਸ਼ਵ ਹਿੰਦੀ ਪਰਿਸ਼ਦ ਉਸ ਸਕੂਲ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕਰੇਗਾ।
