ਜੇ ਦੋ ਤਿੰਨ ਘੰਟੇ ਮਸ਼ੀਨ ਖ਼ਰਾਬ ਰਹੇਗੀ ਤਾਂ ਵੋਟ ਨਹੀਂ ਪਵੇਗੀ ਕਿਉਂਕਿ ਲੋਕ ਘਰ ਵਾਪਸ ਚਲੇ ਜਾਣਗੇ

ਨਵੀਂ ਦਿੱਲੀ : ਕਾਂਗਰਸ ਦੇ ਸੀਨੀਅਰ ਆਗੂ ਕਪਿਲ ਸਿੱਬਲ ਨੇ ਦਾਅਵਾ ਕੀਤਾ ਹੈ ਕਿ ਜਿਥੇ ਦਲਿਤਾਂ ਅਤੇ ਘੱਟਗਿਣਤੀਆਂ ਦੀਆਂ ਵੋਟਾਂ ਜ਼ਿਆਦਾ ਹਨ, ਉਥੇ ਹੀ ਵੋਟਿੰਗ ਮਸ਼ੀਨਾਂ ਖ਼ਰਾਬ ਹੁੰਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਪਹਿਲੇ ਤਿੰਨ ਗੇੜਾਂ ਵਿਚ ਭਾਜਪਾ ਨੂੰ ਬਹੁਤ ਨੁਕਸਾਨ ਹੋਇਆ ਹੈ। ਉਂਜ ਹਾਰ-ਜਿੱਤ ਦਾ ਫ਼ੈਸਲਾ ਤਾਂ 23 ਮਈ ਨੂੰ ਹੋਵੇਗਾ ਪਰ ਸਵਾਲ ਇਹ ਹੈ ਕਿ ਜਿਥੇ ਵੀ ਮਸ਼ੀਨ ਖ਼ਰਾਬ ਹੁੰਦੀ ਹੈ, ਉਥੇ ਵੋਟ ਭਾਜਪਾ ਨੂੰ ਹੀ ਕਿਉਂ ਜਾਂਦੀ ਹੈ? ਉਨ੍ਹਾਂ ਕਿਹਾ ਕਿ ਕੁੱਝ ਦਿਨ ਪਹਿਲਾਂ ਹੀ ਇਕ ਥਾਂ ਤੋਂ 300 ਮਸ਼ੀਨਾਂ ਖ਼ਰਾਬ ਹੋਣ ਦੀ ਗੱਲ ਸਾਹਮਣੇ ਆਈ ਸੀ।

EVM

ਚੋਣਾਂ ਵਿਚ ਵੋਟਰ ਨੂੰ ਇਹ ਚਿੰਤਾ ਨਹੀਂ ਹੋਣੀ ਚਾਹੀਦੀ ਕਿ ਉਸ ਨੇ ਜਿਹੜੀ ਵੋਟ ਪਾਈ ਹੈ, ਉਹ ਸਹੀ ਪਈ ਹੈ ਜਾਂ ਨਹੀਂ। ਇਹ ਮਸ਼ੀਨ ਵੀ ਉਥੇ ਖ਼ਰਾਬ ਹੁੰਦੀ ਹੈ ਜਿਥੇ ਦਲਿਤ ਅਤੇ ਘੱਟਗਿਣਤੀ ਵੋਟਾਂ ਜ਼ਿਆਦਾ ਹੁੰਦੀਆਂ ਹਨ। ਜੇ ਦੋ ਤਿੰਨ ਘੰਟੇ ਮਸ਼ੀਨ ਖ਼ਰਾਬ ਰਹੇਗੀ ਤਾਂ ਵੋਟ ਨਹੀਂ ਪਵੇਗੀ ਕਿਉਂਕਿ ਲੋਕ ਘਰ ਵਾਪਸ ਚਲੇ ਜਾਣਗੇ। ਉਨ੍ਹਾਂ ਕਿਹਾ, 'ਅਸੀਂ ਬਿਲਕੁਲ ਵੀ ਸੰਤੁਸ਼ਟ ਨਹੀਂ ਹਾਂ। ਸਾਨੂੰ ਕਾਫ਼ੀ ਨਿਰਾਸ਼ਾ ਹੋਈ ਹੈ। ਸਾਡੀ ਮੁੱਖ ਮੰਗ ਹੈ ਕਿ 50 ਫ਼ੀ ਸਦੀ ਵੀਵੀਪੀਏਟੀ ਪਰਚੀਆਂ ਦਾ ਮਿਲਾਣ ਕੀਤਾ ਜਾਵੇ। ਈਵੀਐਮ ਵਿਚ ਗੜਬੜ ਦੀਆਂ ਸ਼ਿਕਾਹਿਤਾਂ ਨੂੰ ਦੂਰ ਕੀਤਾ ਜਾਵੇ ਤਾਕਿ ਚੋਣ ਕਵਾਇਦ ਵਿਚ ਲੋਕਾਂ ਦਾ ਵਿਸ਼ਵਾਸ ਕਾਇਮ ਰਹੇ।'

Kapil Sibal

ਉਨ੍ਹਾਂ ਕਿਹਾ ਕਿ ਸੁਪਰੀਮ ਕੋਰਟ ਨੇ ਤਾਂ ਪੰਜ ਫ਼ੀ ਸਦੀ ਪਰਚੀਆਂ ਦੇ ਮਿਲਾਣ ਦਾ ਹੁਕਮ ਦਿਤਾ ਹੈ ਕਿਉਂਕਿ 50 ਫ਼ੀ ਸਦੀ ਦੇ ਮਿਲਾਣ ਵਿਚ ਕਾਫ਼ੀ ਸਮਾਂ ਲੱਗੇਗਾ ਪਰ ਅਸੀਂ ਇਹ ਕਹਿ ਰਹੇ ਹਾਂ ਕਿ ਇਕ ਪਾਸੇ ਚੋਣ ਕਮਿਸ਼ਨ ਦੀ ਸਹੂਲਤ ਹੈ ਅਤੇ ਦੂਜੇ ਪਾਸੇ ਜਨਤਾ ਦਾ ਵਿਸ਼ਵਾਸ ਹੈ। ਪਰ ਕਮਿਸ਼ਨ ਨੂੰ ਅਪਣੀ ਸਹੂਲਤ ਦੀ ਜ਼ਿਆਦਾ ਪਰਵਾਹ ਹੈ।