‘ਲੋਕਾਂ ਨੂੰ ਵੰਡੋ ਨਾ, ਭਾਰਤ ਦੀ ਧਰਮ ਨਿਰਪੱਖ ਪਰੰਪਰਾ ਨੂੰ ਯਾਦ ਰੱਖੋ’
ਨਵੀਂ ਦਿੱਲੀ: ਭਾਰਤ ਵਿਚ ਨਾਗਰਿਕਤਾ ਸੋਧ ਕਾਨੂੰਨ, ਐਨਆਰਸੀ ਅਤੇ ਐਨਪੀਆਰ ਦੇ ਵਿਰੋਧ ਦੇ ਵਿਚਕਾਰ ਰਾਸ਼ਟਰੀ ਪੱਧਰ ‘ਤੇ ਚੱਲ ਰਹੇ ਪ੍ਰਦਰਸ਼ਨਾਂ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਲਈ ਗੁਆਂਢੀ ਦੇਸ਼ ਬੰਗਲਾਦੇਸ਼ ਤੋਂ ਚਿੱਠੀ ਆਈ ਹੈ। ਪੀਐਮ ਮੋਦੀ ਨੂੰ ਲਿਖੀ ਚਿੱਠੀ ਵਿਚ ਬੰਗਲਾਦੇਸ਼ੀ ਸਿੱਖਿਆ ਸ਼ਾਸਤਰੀ ਮੁਮਤਾਜ ਜਹਾਂ ਨੇ ਉਹਨਾਂ ਨੂੰ ਭਾਰਤ ਦੀ ਧਰਮ ਨਿਰਪੱਖਤਾ ਪਰੰਪਰਾ ਦੀ ਯਾਦ ਦਵਾਈ ਹੈ।
Photo
ਚਿੱਠੀ ਵਿਚ ਭਾਰਤ ਵਿਚ ਲੋਕਾਂ ਨੂੰ ਵੰਡਣ ਲਈ ਨਿਯਮ ਜਾਂ ਕੰਢਿਆਲੀਆਂ ਤਾਰਾਂ ਜਾਂ ਦਿਵਾਰਾਂ ਨਾ ਬਣਾਉਣ ਦੀ ਅਪੀਲ ਕੀਤੀ ਗਈ ਹੈ। ਮੁਮਤਾਜ ਜਹਾਂ ਬੰਗਲਾਦੇਸ਼ ਫੋਰਮ ਫਾਰ ਐਜੁਕੇਸ਼ਨ ਡਿਵੈਲਪਮੈਂਟ ਦੇ ਸੰਸਥਾਪਕ ਮੈਂਬਰ ਹਨ। ਇਸ ਦੇ ਨਾਲ ਹੀ ਉਹ ਸਮਾਜ ਸ਼ਾਸਤਰ ਦੇ ਪ੍ਰੋਫੈਸਰ ਵੀ ਰਹਿ ਚੁੱਕੇ ਹਨ।
Photo
ਮੁਮਤਾਜ ਨੇ ਲਿਖਿਆ ਹੈ ਕਿ ਅਸੀਂ ਹਮੇਸ਼ਾਂ ਤੋਂ ਭਾਰਤ ਨੂੰ ਇਕ ਲੋਕਤੰਤਰਿਕ ਦੇਸ਼ ਅਤੇ ਜੀਵਤ ਲੋਕਤੰਤਰ ਦੇ ਰੂਪ ਵਿਚ ਦੇਖਦੇ ਰਹੇ ਹਾਂ। ਉਹਨਾਂ ਨੇ ਅੱਗੇ ਲਿਖਿਆ ਕਿ ਅਸੀਂ ਨਾਗਰਿਕਤਾ ਸੋਧ ਕਾਨੂੰਨ ਨੂੰ ਲਾਗੂ ਕਰਨ ਅਤੇ ਸਿਟੀਜ਼ਨਸ਼ਿਪ ਰਜਿਸਟਰ ਦੀ ਸੰਭਾਵਨਾ ਨਾਲ ਭਾਰਤ ਨੂੰ ਨਹੀਂ ਸਮਝ ਪਾ ਰਹੇ।
Photo
ਉਹਨਾਂ ਕਿਹਾ, ਮੈਂ ਅਪਣੀਆਂ ਭਾਵਨਾਵਾਂ ਵਿਅਕਤ ਕਰਦੇ ਹੋਏ ਤੁਹਾਨੂੰ ਅਪੀਲ ਕਰ ਰਿਹਾ ਹਾਂ ਅਤੇ ਇਸ ਲਈ ਤੁਹਾਨੂੰ ਇਹ ਚਿੱਠੀ ਲਿਖ ਰਿਹਾ ਹਾਂ। ਮਮਤਾਜ਼ ਨੇ ਚਿੱਠੀ ਵਿਚ ਲਿਖਿਆ ਕਿ ਬੰਗਲਾਦੇਸ਼ ਮੇਰੇ ਦੇਸ਼ ਦੇ ਜਨਮ ਲਈ ਉਸ ਸਮੇਂ ਦੀ ਸਰਕਾਰ, ਫੌਜ ਅਤੇ ਭਾਰਤ ਦੇ ਲੋਕਾਂ ਦਾ ਰਿਣੀ ਹੈ।
Photo
ਉਹਨਾਂ ਲਿਖਿਆ ਹੈ ਕਿ ਸਾਡਾ ਕਦੀ ਨਾ ਟੁੱਟਣ ਵਾਲਾ ਰਿਸ਼ਤਾ ਭਾਰਤੀ ਫੌਜ ਦੇ ਜਵਾਨਾਂ ਅਤੇ ਬੰਗਾਲੀ ਸੁਤੰਤਰਤਾ ਸੈਨਾਨੀਆਂ ਦੋਵਾਂ ਦੇ ਬਲੀਦਾਨ ਨਾਲ ਪੈਦਾ ਹੋਇਆ ਹੈ। ਉਹਨਾਂ ਨੇ ਲਿਖਿਆ, ‘ਮੈਂ ਹੈਰਾਨ ਹਾਂ ਕਿ ਤੁਸੀਂ ਇਕ ਅਸਾਧਾਰਣ ਤੌਰ ਤੇ ਵੰਡਣ ਵਾਲਾ ਨਾਗਰਿਕਤਾ ਸੋਧ ਕਾਨੂੰਨ ਬਣਾਇਆ ਹੈ, ਜੋ ਕਿ ਲਾਜ਼ਮੀ ਤੌਰ 'ਤੇ ਭਾਰਤ ਅਤੇ ਬੰਗਲਾਦੇਸ਼ ਵਿਚ ਲੰਬੇ ਸਮੇਂ ਤੋਂ ਧਰਮ-ਨਿਰਪੱਖ ਵਿਚਾਰਧਾਰਾ ਵਾਲੀ ਭਾਰਤੀਆਂ ਦੀ ਸ਼ਾਨਦਾਰ ਵਿਰਾਸਤ ਨੂੰ ਪ੍ਰਭਾਵਤ ਕਰੇਗਾ’।
