ਇੰਟੇਲ 386 ਅਤੇ ਇੰਟੈੱਲ 486 ਮਾਈਕ੍ਰੋਪ੍ਰੋਸੈਸਰਾਂ ’ਤੇ ਕੰਮ ਕਰ ਕੇ ਅਵਤਾਰ ਸੈਣੀ ਨੇ ਬਣਾਈ ਸੀ ਪਛਾਣ
Avtar Saini Death News: ਇੰਟੈੱਲ ਇੰਡੀਆ ਦੇ ਸਾਬਕਾ 'ਕੰਟਰੀ ਹੈੱਡ' ਅਵਤਾਰ ਸੈਣੀ ਦੀ ਮਹਾਰਾਸ਼ਟਰ ਦੇ ਨਵੀਂ ਮੁੰਬਈ ਵਿਚ ਸਾਈਕਲ ਚਲਾਉਂਦੇ ਸਮੇਂ ਇਕ ਤੇਜ਼ ਰਫਤਾਰ ਕੈਬ ਦੀ ਲਪੇਟ ਵਿਚ ਆਉਣ ਨਾਲ ਮੌਤ ਹੋ ਗਈ। ਪੁਲਿਸ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਇਕ ਅਧਿਕਾਰੀ ਨੇ ਦਸਿਆ ਕਿ ਇਹ ਹਾਦਸਾ ਬੁਧਵਾਰ ਸਵੇਰੇ ਕਰੀਬ 5.50 ਵਜੇ ਵਾਪਰਿਆ ਜਦੋਂ ਸੈਣੀ (68) ਅਪਣੇ ਦੋਸਤਾਂ ਨਾਲ ਨੇਰੂਲ ਇਲਾਕੇ ਦੇ ਪਾਮ ਬੀਚ ਰੋਡ 'ਤੇ ਸਾਈਕਲ ਚਲਾ ਰਿਹਾ ਸੀ।
ਉਨ੍ਹਾਂ ਦਸਿਆ ਕਿ ਤੇਜ਼ ਰਫਤਾਰ ਕੈਬ ਨੇ ਸੈਣੀ ਦੇ ਸਾਈਕਲ ਨੂੰ ਪਿੱਛੇ ਤੋਂ ਟੱਕਰ ਮਾਰ ਦਿੱਤੀ ਅਤੇ ਉਥੋਂ ਭੱਜਣ ਦੀ ਕੋਸ਼ਿਸ਼ ਕੀਤੀ। ਅਧਿਕਾਰੀ ਨੇ ਦਸਿਆ ਕਿ ਹਾਦਸੇ ਵਿਚ ਸੈਣੀ ਜ਼ਖ਼ਮੀ ਹੋ ਗਿਆ ਅਤੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਜਿਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿਤਾ।
ਸੈਣੀ ਨੂੰ 'ਇੰਟੈੱਲ 386' ਅਤੇ '486 ਮਾਈਕ੍ਰੋਪ੍ਰੋਸੈਸਰਾਂ 'ਤੇ ਕੰਮ ਕਰਨ ਲਈ ਜਾਣਿਆ ਜਾਂਦਾ ਹੈ। ਕੰਪਨੀ ਦੇ 'ਪੇਂਟਿਅਮ ਪ੍ਰੋਸੈਸਰ' ਨੂੰ ਡਿਜ਼ਾਈਨ ਕਰਨ 'ਚ ਵੀ ਉਨ੍ਹਾਂ ਨੇ ਅਹਿਮ ਭੂਮਿਕਾ ਨਿਭਾਈ ਹੈ। ਪੁਲਿਸ ਨੇ ਕੈਬ ਡਰਾਈਵਰ ਵਿਰੁਧ ਭਾਰਤੀ ਦੰਡਾਵਲੀ ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਅਜੇ ਤਕ ਦੋਸ਼ੀ ਦੀ ਗ੍ਰਿਫਤਾਰੀ ਨਹੀਂ ਹੋਈ ਹੈ।
ਸਾਈਕਲਿੰਗ ਗਰੁੱਪ ਦੇ ਮੈਂਬਰ ਅਨਵਰ ਸਈਦ ਨੇ ਕਿਹਾ ਕਿ ਸੈਣੀ 10 ਸਾਲਾਂ ਤੋਂ ਚੈਂਬੂਰ ਅਮੇਚਰ ਸਾਈਕਲਿੰਗ ਗਰੁੱਪ ਦਾ ਸਰਗਰਮ ਮੈਂਬਰ ਸੀ। ਇਕ ਹੋਰ ਮੈਂਬਰ ਪ੍ਰਵੀਨ ਪ੍ਰਕਾਸ਼ ਨੇ ਕਿਹਾ ਕਿ ਸੈਣੀ ਦੀ ਪਤਨੀ ਦੀ ਤਿੰਨ ਸਾਲ ਪਹਿਲਾਂ ਮੌਤ ਹੋ ਗਈ ਸੀ। ਉਹ ਅਪਣੇ ਪਿੱਛੇ ਬੇਟਾ ਅਤੇ ਬੇਟੀ ਛੱਡ ਗਏ ਹਨ, ਜੋ ਅਮਰੀਕਾ ਵਿਚ ਰਹਿੰਦੇ ਹਨ।
ਇੰਟੇਲ ਇੰਡੀਆ ਦੇ ਪ੍ਰਧਾਨ ਗੋਕੁਲ ਵੀ ਸੁਬਰਾਮਨੀਅਮ ਨੇ ਸੋਸ਼ਲ ਮੀਡੀਆ 'ਤੇ ਕਿਹਾ, "ਇੰਟੈਲ ਦੇ ਸਾਬਕਾ ਕੰਟਰੀ ਮੈਨੇਜਰ ਅਤੇ ਇੰਟੇਲ ਸਾਊਥ ਏਸ਼ੀਆ ਦੇ ਡਾਇਰੈਕਟਰ ਅਵਤਾਰ ਸੈਣੀ ਦੇ ਦਿਹਾਂਤ ਤੋਂ ਅਸੀਂ ਦੁਖੀ ਹਾਂ। ਅਵਤਾਰ ਨੇ ਭਾਰਤ ਵਿਚ ਇੰਟੈਲ ਆਰ ਐਂਡ ਡੀ ਸੈਂਟਰ ਸਥਾਪਤ ਕਰਨ ਵਿਚ ਮਹੱਤਵਪੂਰਣ ਭੂਮਿਕਾ ਨਿਭਾਈ। ਉਨ੍ਹਾਂ ਦਾ 1982 ਤੋਂ 2004 ਤਕ ਇੰਟੈਲ ਵਿਚ ਸ਼ਾਨਦਾਰ ਕੈਰੀਅਰ ਸੀ, ਇਸ ਦੌਰਾਨ ਉਨ੍ਹਾਂ ਨੇ ਕਈ ਪ੍ਰੋਸੈਸਰਾਂ ਦੇ ਡਿਜ਼ਾਈਨ ਵਿਚ ਮਹੱਤਵਪੂਰਣ ਭੂਮਿਕਾ ਨਿਭਾਈ”।
(For more Punjabi news apart from Former Intel India head Avtar Saini Death News , stay tuned to Rozana Spokesman)
