ਦਿੱਲੀ ਘੱਟ-ਗਿਣਤੀ ਕਮਿਸ਼ਨ ਨੇ ਸ਼੍ਰੋਮਣੀ ਕਮੇਟੀ ਤੇ ਦਿੱਲੀ ਕਮੇਟੀ ਨੂੰ ‘ਵਾਹਿਗੁਰੂ’ ਦੇ ਅਰਥ ਸਪਸ਼ਟ ਕਰਨ ਲਈ ਕਿਹਾ

ਨਵੀਂ ਦਿੱਲੀ: ਭਾਜਪਾ ਦੇ ਅਹੁਦੇਦਾਰ ਤਜਿੰਦਰਪਾਲ ਸਿੰਘ ਬੱਗਾ ਵਲੋਂ ‘ਵਾਹਿਗੁਰੂ’ ਬਾਰੇ ਕੀਤੇ ਗਏ ਇਕ ਟਵੀਟ ਨਾਲ  ਵਿਵਾਦ ਖੜਾ ਹੋ ਗਿਆ ਹੈ। ਦਰਅਸਲ ਬੱਗਾ ਨੇ ਜੋ ਟਵੀਟ ਕੀਤਾ ਸੀ ਉਸ ਵਿਚ ‘ਵਾਹਗੁਰੂ’ ਦੇ ਅਰਥ  ਵਿਸ਼ਨੂੰ ਵਾਸੂਦੇਵ, ਹਰਿਕ੍ਰਿਸ਼ਨਾ, ਗੁਰੂ ਗੋਵਿੰਦ ਅਤੇ ਸ਼੍ਰੀ ਰਾਮ ਨਾਲ ਜੋੜ ਕੇ ਕੀਤੇ ਗਏ ਹਨ ਤੇ ਕਿਹਾ ਹੈ, ‘ਖ਼ਾਲਿਸਤਾਨੀ ਜੋ ਇੰਡੀਆ ਤੇ ਹਿੰਦੂ ਦੇਵੀ ਦੇਵਤਿਆਂ ਨੂੰ ਮੰਦਾ ਬੋਲਦੇ ਹਨ, ਉਹ ਸਿੱਧੇ ਤੌਰ ’ਤੇ ਸਿੱਖਿਜ਼ਮ ਨੂੰ ਵੀ ਮੰਦਾ ਬੋਲਦੇ ਹਨ। ਉਹ ਬਿਲਕੁਲ ਨਹੀਂ ਜਾਣਦੇ ਕਿ ‘ਵਾਹਿਗੁਰੂ’ ਦਾ ਮਤਲਬ ਕੀ ਹੈ ।’ ਨਾਲ ਹੀ ਉਨ੍ਹਾਂ ਵਾਹਿਗਰੂ ਦੇ ਅਰਥ ਵਿਸ਼ਨੂੰ ਦੇਵਤਾ ਨਾਲ ਜੋੜ ਕੇ ਲਿਖੇ ਹਨ।

Tweet

ਟਵੀਟ ਦਾ ਨੋਟਿਸ ਲੈਂਦੇ ਹੋਏ ਦਿੱਲੀ ਘੱਟ-ਗਿਣਤੀ ਕਮਿਸ਼ਨ ਨੇ 28 ਮਾਰਚ ਨੂੂੰ ਕੀਤੇ ਗਏ ਬੱਗਾ ਦੇ ਟਵੀਟ ਨੂੰ ਵਿਵਾਦਤ ਮੰਨਿਆ ਹੈ ਤੇ ਕਿਹਾ ਹੈ,  ‘ਵਾਹਿਗੁਰ’ ਦੇ ਕੀਤੇ ਗਏ ਅਰਥ ਇਤਰਾਜ਼ਯੋਗ ਤੇ ਸਿੱਖੀ/ਸਿੱਖ ਮਰਿਆਦਾ ਵਿਰੁਧ ਜਾਪਦੇ ਹਨ।’

ਕਮਿਸ਼ਨ ਤੋਂ ਪ੍ਰਾਪਤ ਵੇਰਵਿਆਂ ਮੁਤਾਬਕ ਕਮਿਸ਼ਨ ਦੇ ਸਿੱਖ ਮੈਂਬਰ ਸ.ਅਜੀਤਪਾਲ ਸਿੰਘ ਬਿੰਦਰਾ ਨੇ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਅਤੇ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਚੇਅਰਮੈਨ ਸ.ਜਸਪ੍ਰੀਤ ਸਿੰਘ ਕਰਮਸਰ ਨੂੰ ਚਿੱੱਠੀ ਲਿੱਖ ਕੇ, ਵਿਵਾਦਤ ਟਵੀਟ ਦੀ ਕਾਪੀ ਨਾਲ ਨੱਥੀ ਕਰ ਕੇ, ਸਿੱਖ ਮਰਿਆਦਾ ਮੁਤਾਬਕ ‘ਵਾਹਿਗੁਰੂ’ ਸ਼ਬਦ ਦੇ ਅਰਥ ਸਪਸ਼ਟ ਕਰਨ ਦੀ ਬੇਨਤੀ ਕੀਤੀ ਹੈ ਅਤੇ 2 ਦਿਨ ਦੇ ਅੰਦਰ ਕਮਿਸ਼ਨ ਨੂੰ ਅਪਣਾ ਜਵਾਬ ਭੇਜਣ ਲਈ ਕਿਹਾ ਹੈ। ਸ.ਬਿੰਦਰਾ ਨੇ ਕਿਹਾ ਹੈ ਕਿ ਜੇ ਟਵੀਟ (ਵਾਹਿਗੁਰੂ ਦੇ ਅਰਥ) ਸਿੱਖੀ ਵਿਰੁਧ ਹੋਣਗੇ ਤਾਂ ਬੱਗਾ ਵਿਰੁਧ ਲੋੜੀਂਦੇ ਕਾਰਵਾਈ ਕੀਤੀ ਜਾਵੇਗੀ।